Kaveinga ʻo e Māhina Ní: Ko e Temipalé mo e Ngaahi Fuakavá

Mālō e lelei, ngaahi kaungāmeʻa!

ʻI he timi YA Fakauiké, kuo lahi haʻamau talanoa fekauʻaki mo e temipalé kimuí ni.

ʻOku pehē pē mo e timi Liahoná . Pea mo e timi Ki Hono Fakamālohia ʻo e Toʻu Tupú. Pea mo e timi Ko e Kaumeʻá

ʻOku meimei ko e tokotaha kotoa pē.

ʻOku tau fiefia kotoa ke mamata ki hono fakavaveʻi ʻe he ʻEikí ʻEne ngāué! Kuo hoko ʻa e ngaahi liliu fakalaumālie ʻi he moihū ʻi he temipalé ke faingofua ange e ʻalu ki aí ʻi ha toe taimi kimuʻa. ʻOku fakahoko ʻe he toʻu tupú ʻa e papitaiso fakafofongá ʻo lahi ʻaupito. ʻOku fakahoko mo tauhi ʻe he kakaí ha ngaahi fuakava toputapu mo e ʻOtuá.

Pea mahalo ko au pē ia, ka ʻoku hangē ʻoku ongoʻi fehokotaki ange ʻa e kāingalotu ʻo e Siasí mo e temipalé. ʻOku nau manako lahi ange ki ai. Vēkeveke lahi ange ke kau ki ai.

ʻOku lava ke hoko ʻeni koeʻuhí ʻoku tokolahi ange e kāingalotu ʻo e Siasí ʻoku nau nofo ofi ki ha temipale he taimí ni ʻi he taʻu ʻe 10 kuo hilí. Ka ʻoku ou saiʻia ke fakakaukau ʻoku toe makatuʻunga pē ia ʻi he fakaʻau ke mahino ange kiate kitautolu e vīsone ʻa e ʻEikí. ʻOku kamata ke tau vakai kakato ange ki he founga ʻoku fakatupulaki ai ʻe heʻetau moʻui ʻaki e ngaahi fuakava ʻoku tau fakahoko ʻi he temipalé ʻa ʻetau moʻui fakaʻahó, mo fakaloloto ʻetau vā fetuʻutaki mo e ʻOtuá. ʻOku tupulaki ʻetau fakamoʻoní!

Ko ha ngaahi talanoa ʻeni he māhiná ni fekauʻaki mo e mālohi mo e ngaahi tāpuaki ʻo e fale ʻo e ʻEikí:

• Founga te ke lava ai ʻofakalakalaka ʻi he hala ʻo e fuakavá ʻi he taimi ʻokú ke ongoʻi ʻoku ʻikai ai ha tupulakí ʻi hoʻo hoko ko ha taautaha kei talavoú

• Ko ha tokotaha lahi kei talavou mei ʻEkuatoa naʻá ne ʻiloʻi ʻe lava ke tokoni ha sēsini ʻenitaumeni ʻi heʻene lea tuʻufonuá ke ne ikunaʻi ʻaki ʻene ofo ʻi he kehe ʻo e ʻulungaanga fakafonua ʻi ha feituʻu foʻou ʻoku nofo ai

• Ko ha fakamatala ki he founga ʻoku maʻu ai e ngaahi fuakava ʻoku tau fai he ʻaho ní ʻi he Fuakava Motuʻá

• Founga ke moʻui ai ʻo hangē kuó ke fai ha ngaahi fuakavá kapau ʻoku tupu mei he vā mamaʻó ʻa e ʻikai ke ke fakahoko kinautolú

Pea mei heʻetau ngaahi talanoa hokohokó:

• Ngaahi Taukei ʻo e Moʻuí: Founga ke hoko ai ko ha tokotaha faʻa fakalelei ʻi he ʻinitanetí, naʻa mo e taimi ʻoku ʻai ai ʻe he māmaní ke faingataʻa ʻaupitó

• Tautautefito ki he Ongo Meʻa Toki Mali Foʻoú: ʻUhinga ʻoku hoko ai e ʻalu ki he ʻinisititiutí ko e taha ʻo e ngaahi meʻa lelei taha ke fakahoko mo ho malí

• Fakataha Lotu ʻOku ʻOmí: Ko ha pōpoaki meia ʻEletā Dale G. Renlund fekauʻaki mo e founga ʻoku fakaloloto ai ʻe heʻetau ngaahi fuakavá hotau vā fetuʻutaki mo e Tamai Hēvaní

Kapau kuo teʻeki ke lahi hoʻo ʻalu ki he temipalé, kapau ʻokú ke teuteu ke toe foki mai hili ha vahaʻataimi naʻá ke mavahe ai, pe kapau ʻoku ʻikai mahino kiate koe ʻa e meʻa kotoa pē, ʻoua naʻá ke tuku ke ne taʻofi koe mei haʻo toe foki. ʻOku sai pē ke ʻikai ke te ongoʻi ʻokú te poto ʻi ha meʻa. ʻOku sai pē ke ʻikai te te maʻu ha mahino ki he meʻa kotoa ʻi he taimi pē ko iá. Naʻa mo e kakai kuo laui taʻu ʻenau ʻalu ki he temipalé, te nau talaatu ʻoku nau kei maʻu ha ngaahi fakakaukau foʻou fekauʻaki mo e temipalé mo hono ngaahi fuakavá.

Tatau ai pē pe kuo tuʻo fiha hoʻo ʻalu ki he temipalé, ʻoku mau fakatauange ʻe tokoni atu ʻa e ngaahi fakamatala ko ʻení ke ke maʻu ha ngaahi founga foʻou ke houngaʻia mo maʻu monū mei he tuku taimi ke ʻi he fale ʻo e ʻEikí.

Ko ho kaungāmeʻá,

Eric D. Snider, Tokotaha TohiYA Fakauiké