Ko Hono Toe Ongoʻi Hoto Mahuʻingá ʻi he Temipalé

ʻI he fakaofi mai ʻa e konifelenisi lahí, ne u fakafanongo tailiili ki he kau leá, ʻo ʻamanaki te u ongoʻi ha faʻahinga fakaʻilonga ne kei ʻofeina au ʻe he ʻOtuá neongo ʻeku ngaahi fehalaakí. Naʻe pehē ʻe Palesiteni Tieta F. ʻUkitofa, ko e Tokoni Ua ʻi he Kau Palesitenisī ʻUluakí he taimi ko iá: “ʻOku ʻikai mahuʻinga pe ko e hā e ngali lahi ʻo e tuʻunga uesia pe hōloa kakato ʻo ʻetau moʻuí. ʻOku ʻikai mahuʻinga pe ko e hā e lahi e kulamūmū ʻetau ngaahi angahalá, ʻa e lahi ʻetau loto-ʻitá, ʻetau taʻelatá, liʻekiná, pe ko e mamahi hotau lotó. ʻOku ʻikai ke taʻe-malava hano fakafoki mai ha moʻui ne fuʻu maumau.”

Naʻá ku ongoʻi moʻoni naʻe folofola mai e ʻOtuá kiate au. Ne u fifili ʻi ha ngaahi māhina lahi ki ha founga ke u toe foki ai kia Kalaisí, pea ko e pōpoaki konifelenisi ko iá ko ʻEne ui ia kiate au ke u fai ha ngaahi liliu ke toe hū ki Hono falé.

Naʻá ku fakataha mo ʻeku pīsopé ke talanoa ki haʻaku toe hū ki he temipalé. Naʻá ne tokoniʻi au ke mahino e fatongia ʻe lava ʻe Sīsū Kalaisi ʻo fakahoko ʻi heʻeku moʻuí mo e lava ʻe hono tali ʻEne Fakaleleí ʻo tokoniʻi au ke u tuku atu ʻeku kavenga mafasiá mo e angahalá kiate Ia. Naʻe kamata ke u lotu ke maʻu ha mahino, mālohi, mo ha kātaki. ʻI heʻeku falala lahi ange ki he ʻOtuá mo toe fai lelei ange he ʻaho takitaha, ne kamata māmālie ʻeku toe fehokotaki mo e maama ʻa e Fakamoʻuí.

Naʻe mālohi ange ʻeku fakamoʻoni ki hoku tuʻunga ko e ʻofefine ʻo e Tamai Hēvaní ʻi heʻeku ngāue mo ʻeku pīsopé mo ako lahi ange ki hoku Fakamoʻuí. Naʻe mahino kiate au he ʻikai ke teitei kole mai hoku Huhuʻi ʻofá ke u mavahe meiate Ia, ka ʻe feinga ʻa Sētane ke u ongoʻi ʻoku ʻikai totonu ke u ʻi he temipalé. ʻI he ʻilo ko ʻení, ne faifai peá u ongoʻi mateuteu ke toe hū ki he fale ʻo e ʻOtuá.

Ne u hū atu ki he temipalé hili ha ngaahi taʻu lahi, mo ha lekomeni manusinusi ne tā pelupelu, mo loto hohaʻa ke u ʻilo ki hoku tuʻungá ʻi he fale ʻo e ʻOtuá. ʻI heʻeku fakaofi atu ki he matapaá, ko e lahi ange ia ʻeku ongoʻi veiveiuá. Te u hangē nai ha valé ʻi he ʻikai ke u ʻiloʻi e feituʻu ke u ʻalu ki aí pe ko e meʻa ke faí? Ne u fuʻu motuʻa nai ke u ʻalu ki he temipalé ke [ fakahoko ha] papitaiso?

Naʻe malimali mai e tangata ʻi he tesi talitali kakaí ʻi heʻeku hū atú, ʻo ne talitali lelei au ki he temipalé. Naʻe fakafoʻou hoku laumālié ʻi he pongipongi ko iá ʻi hono fakapapauʻi mai ʻe he kau ngāue temipalé ʻa hoku tuʻunga ʻi he fale ʻo e ʻOtuá.

ʻI heʻeku mavahe mei he temipalé, naʻe taʻalo mai ha taha ʻo e kau ngāué kiate au ʻi heʻeku lue atu he holó ke hū ki tuʻa mei he faiʻanga papitaisó. Naʻá ne fanafana mai ʻi ha leʻo fiefia ʻo pehē, “Fakamālō atu ʻi hoʻo haʻu ki he temipalé he ʻaho ní—naʻa mau fiemaʻu koe ʻi heni!” Naʻá ku palōmesi ange te u toe foki mai he uike hono hokó ʻi heʻeku hanganaki atu ke toe ongoʻi e māfana ʻo e temipalé.

Koeʻuhí ko hotau tuʻunga fakalangi ko e ngaahi ʻofefine mo e ngaahi foha ʻo ha mātuʻa fakalangí, te tau lava kotoa ʻo ʻiloʻi ʻoku ʻi ai hotau mahuʻinga ʻi he temipalé. ʻOku ʻikai ha meʻa te ne lava ʻo taʻofi kitautolu mei he tokoni ʻofa ʻa e ʻOtuá kapau ʻoku tau fie nofo ʻi Hono ʻaó. ʻOkú Ne finangalo ke tau ʻi ai, pea ʻi heʻetau fai ha kiʻi ngāue ke hoko ʻo hangē ko hotau Fakamoʻuí he ʻaho takitaha, te tau lava ʻo fakafenāpasi ʻetau moʻuí mo ʻEne moʻuí pea moʻui taau maʻu pē mo e temipalé. ʻOku ou ʻilo koeʻuhí ko e Fakalelei ʻa Sīsū Kalaisí, te tau lava ʻo hū ki he fale māʻoniʻoni ʻo e ʻOtuá pea maʻu ʻa e ngaahi tāpuaki ʻoku fakatatali mai maʻatautolu ʻi lotó.

Pea hangē ko ia kuó u aʻusiá, ʻoku mahuʻinga e ngaahi tāpuaki ko iá ki he meʻa kotoa pē.