Faapitoa mo i Latou Faatoa Faaipoipo
O le Faia o se Avanoa mo Vaivaiga Faaletagata Lava Ia i le Faaipoipoga
O vaivaiga ma luitau e mafai ona fesoasoani ia te oe ma lou toalua ia latalata atili atu ai i le Atua.
O le fa tausaga o le faaipoipo atu ai i lo’u toalua e mautinoa lava e le avea ai a’u ma se tagata atamai i le faaipoipoga. Ae i lena taimi, sa i ai o ma’ua luitau, o na vaega taitasi sa faloina ai i ma’ua i auala lea ua faamalosia ai le ma mafutaga ma faalolotoina ai lo ma alolofa mo le tasi ma le isi.
Ae o lesona taitasi ua faamanatu mai ai foi ia i ma’ua o i ma’ua o ni tagata e le atoatoa—i o ma’ua lava vaivaiga o le tagata lava ia—ma o faaipoipoga e faavavau e manaomia ai taumafaiga faifai pea, ositaulaga, tuputupu ae, ma le faalagolago i le Faaola.
Ina ia fesoasoani ia te oe ma lou toalua e aloese mai feteenaiga e le manaomia, o lesona autu nei ua ou aoaoina e uiga i le faia o avanoa mo vaivaiga faaletagata lava ia i le faaipoipoga.
O le Faapea atu “Ou te Faamagalo ia te Oe” ma le Loto I Ai
I le popofou o le ma faaipoipoga, sa masani ona ma talanoaina ma lo’u toalua ia vaega mo le faaleleia atili. I se tasi o talanoaga faamaoni, sa ou faatoese atu ai mo le faatupuina o lagona tiga ma folafola atu o le a faia ia lelei atu. Ae ina ua ia tali mai faapea “Ou te faamagalo atu ia te oe,” sa matua faate’ia ai lava a’u.
Sa masani lava ona ou faalogo i le “E le afaina” ina ua uma ona faatoese, ae o na upu sa le’i sufiina ai lo’u lotofuatiaifo ta’usalaina. “Ou te faamagalo ia te oe” sa ese ai lagona; sa le’i faasaoina faigofie ai a’u mai i le sese sa ou faia. Sa ou faia se mea sese, ma sa le na o le “Ua lelei.” Sa faamalosia ai a’u e faafetaia’ia a’u amioga.
Talu mai lena taimi, “Ou te faamagalo ia te oe” ua avea ma se vaega mamana o le ma faaipoipoga. Ma te faaaogaina ma le loto i ai, ma e mulimuli ai i suiga e manaomia ona ma faia. Ua ma taofia nei lenei fasifuaitau mo taimi pe a ma faauigaina moni ai lava, ma faamanatu atu i le tasi ma le isi le aafiaga o a tatou amioga ma le taua o le faamagalo atu.
Tuu Atu i Lou Toalua ia Tali Atu mo Ia Lava
Pe a tatou vaai i faaletonu i o tatou taitoalua, e faigofie lava ona pauu atu i se mamanu o le mataituina o i latou—siakiina, faamanatu atu ia i latou, po o le faiso’o ma faalavelave atu ia i latou ia mautinoa ua latou faia le mea sa’o. Atonu e faaosoosoina lenei mea i vaega e pei o mea tautupe, auai i le lotu, po o tauiviga faaletagata lava ia.
Ou te lei iloaina le tele o lo’u faia o lenei mea seia oo ina ta’u mai e se uo e faapea o le suesueina pea lava pea o lo’u toalua e le fausia ai se tulaga o le faatuatuaina. Sa ou faamalosia o ia ina ia tali mai ia te a’u nai lo le faatagaina o ia e faaalia le amiosa’o ma lona tali atu i le Atua. O lenei suesuega faifai pea o se tasi lea o o’u vaivaiga!
I le aluga o taimi, ua ma a’oa’o e faatuatuaina e le tasi le isi e ala i le faatagaina o se avanoa e faia ai ni a tatou lava filifiliga ma alu atu i le isi pe a ma se’e ese pe manaomia se fesoasoani. E faapena foi ona ma faaali atu e mafai ona ma faatuatuaina pe a ma faia filifiliga e ōgatusa ma o ma’ua talitonuga fefaasoaai ma filifili ia tali atu le tasi i le isi ma i le Tama Faalelagi. O lenei faiga ua faamalosia ai lo ma faatuatuaina o le tasi ma le isi. “O lo tatou faitalia ma le saolotoga e i ai le uiga auā tatou te tali atu i luma o le Atua ma i tatou lava mo o tatou tagata, mo mea ua tatou iloa ma faia,” e pei ona aoao mai Elder Gerrit W. Gong o le Korama a Aposetolo e Toasefululua.
Tautino Atu e Galue i o Tatou Vaivaiga
O nisi vaivaiga e aafia ai le sootaga vavalalata faalelagona ma le faatuatuaina, o lea e tāua ai le fatuina o se avanoa mo nei vaivaiga a o galue e faatoilaloina. E mafai ona avea lenei mea ma se talanoaga faigata, aemaise lava pe afai e leai se avanoa o ni amioga patino i le lua faaipoipoga. Mo lo’u toalua ma a’u, sa ma taliaina ni vaivaiga pau lava le mea ia ma tautino atu i le faaleleia pea ma le faamaoni.
I le tusi a Alema, na faamalosia ai e le Taitai’au o Moronae ia aai o sa Nifae ina ia puipuia mai osofaiga, fausiaina o papuipui laau ma le palapala seia oo ina avea i latou ma olo malolosi (tagai i le Alema 53:4–5). I se tulaga tutusa lelei, e mafai ona faigata ona talia le lē atoatoa ia i tatou lava po o o tatou taitoalua, ae o le vaavaai atu i le tasi ma le isi o taumafai mo le faaleleia atili e faamalosia ai le sootaga vavalalata faalelagona. O le taumafaiga e faamalosia vaivaiga o le tasi ma le isi, e iu lava ina tatou vavalalata atili ai, ma fausia ai se olo malosi e faavavau o le alofa ma le lagolago.
O Au Feagaiga ma le Atua e Aumaia ai le Mana
Ina ua faamauina oulua i le malumalu, sa lua faia ni folafolaga e le gata i le tasi ma le isi ae faapea foi i le Atua. E faatatau i lenei sootaga faalefeagaiga, na faamanatu mai ai e Peresitene Nelson ia i tatou, “O le taui mo le tausiga o feagaiga ma le Atua, o le mana faalelagi—le mana e faamalosia ai i tatou e tetee atili atu ai i o tatou tofotofoga, faaosoosoga, ma lototiga.”
I taimi o vaivaiga, ia manatua e ala i le tausia o au feagaiga o le malumalu, ua ia te oe le aia tatau e maua ai le fesoasoani faalelagi i lau faaipoipoga. Faatasi ai ma le mana o le Atua, e mafai ona Ia fesoasoani ia te oe e faamagalo atu, faalagolago, tali atu mo oe lava, faia se avanoa mo vaivaiga o le tasi ma le isi, ma “faia mea vaivai ia avea ma mea malolosi” (Eteru 12:27).