Faigalotu Na Faatino
Fautuaga Tāua mo le Mauaina o le Tagata Sa’o e Faaipoipo Atu i Ai
E fa upu ou te manao ia e manatua: faamaoni atoatoa, lotomaualalo lē manatufaapito.
O loo i ai faamanuiaga maoa’e, avanoa tāua, ma avanoa mata’ina i lenei taimi matagofie o le olaga.
Ou te fia faasoa atu ni nai manatu ia te outou o ē e le’i faaipoipo ae o loo i ai i le faagasologa faafiafiaina, faagaeetia, matagofie, ma o nisi taimi e taufaafefe ma tupu atu ai le atuatuvale, o le sailia o le tagata lea o le a lua faatasi i aso o totoe o lou olaga faaletino ma le faavavau atoa. E mafai ona avea lenei mea ma se aafiaga e sili ona paia ma loloto le faamalieina i lou olaga.
Ia Lototele
O la’u fautuaga muamua lava ia te oe, ia e lototele. Uunai oe lava e atiina ae ni faigauo taitoatasi. E le manaomia ona e mafaufau o faauoga uma o le a o’o atu i se mafutaga mafana, ae o le a tele mea o le a maua i fegalegaleaiga taitoatasi.
I ni nai tausaga ua mavae atu, na saunoa ai Peresitene Dallin H. Oaks, Fesoasoani Muamua i le Au Peresitene Sili, “Matou te fautuaina outou ia faaaoga a outou fegalegaleaiga ma le itupa faafeagai i mamanu o tafaoga faamasani ia e i ai le gafatia e faatagata matua ai i le faaipoipoga.”
Sa faaopoopo mulimuli mai Elder Robert D. Hales (1932–2017): “A e tafao faamasani, a’oa’o mea uma e te mafaia e uiga i le tasi ma le isi. Ia faamasani atu i aiga o le tasi ma le isi pe a mafai ai. Pe e tutusa a oulua sini? Pe tutusa o oulua lagona e uiga i poloaiga, le Faaola, le perisitua, le malumalu, tulaga faamatua, valaauga i le Ekalesia, ma le auauna atu i isi? Na lua matauina le tasi ma le isi i taimi o le atuatuvale, tali atu i tulaga manuia ma toilalo, tetee atu i le ita, ma le taulimaina o faafitauli? Pe o le tagata o lua tafafao faamasani e faaleaga tagata pe faamalosiau? Pe o ona uiga, gagana, ma amio, o le ituaiga tagata lea e te fia mafuta ai i aso uma?”
Usitai i Tulafono o le Mama A’ia’i, Aoaiga, ma le Legaviā
Pe a e manao e faalautele se sootaga ia sili atu ma na o faauoga ae oo atu i le alofa mafana, e taua tele le usitaia o tulafono o le mama a’ia’i, aoaiga, ma le ola mama.
Ua e iloa o loo ia te oe ni lagona malolosi faaletino ma ni faananauga e tatau ona puleaina ma taitaia ma le faaeteete ina ia aloese ai mai le tele o feāsogi po o soo se ituaiga o pa’i le talafeagai.
Ou te faamautinoa atu ia te oe i le avea ai o se Aposetolo a le Alii, o le manatu e faia ma ’alofaga mo oe ona ua e lagona e te popole tele mo le tasi ma le isi ma agai atu ma le le talafeagai i le solia o le tulafono o le legavia, o le a le fesoasoani ia te oe i le filifiliga faaleagaga sili ona taua o loo e faamoemoe e fai. O le a puaoa lou mafaufau, lou loto, ma ou sane faaleagaga.
Faatulaga ou tapula’a. Toto na tapulaa i mea uma e te lua faia faatasi, ina ia le mafai ai ona solia pe tu’u ese i le isi itu ao e lagonaina le malosi o lagona mo le tasi ma le isi.
Faaaoga se Avanoa / Fai se Taumafaiga
O le isi vaega, aua e te fefe e faaaoga se avanoa ma se tasi lea atonu e le o se filifiliga manino. Ina ua amata ona ma iloa ma Kathy le tasi ma le isi, ia te a’u sa le gata ina avea o ia ma se tagata e loloto tele lona faatuatua ma le atamai, ae o ia foi o se purinisese o Florida. Sa ia ofuina ni ofu mananaia ma se atamai faapitoa. O a’u o se tama faifaatoaga. Sa ou sau mai se faatoaga lafu manu laititi lava.
O lea na faaaoga ai e Kathy se avanoa ia te a’u. Ou te mautinoa sa ese lava lo’u talaaga mai le mea sa ia manatu o le a i ai i lona toalua faamoemoeina. E le faapea e tatau ona tatou feiloai na o i latou o e o mai mai talaaga e pei lava o o tatou lava siosiomaga. Tatou te vaavaai loloto atili atu i tagata o i ai i latou ma tagata o le a avea ai i latou.
Ou te fiafia i le upusii lenei mai ia Peresitene David O. McKay (1873–1970), o le sa avea ma perofeta a le Alii i luga o le fogaeleele ina ua ou ulufale atu i lo’u tausaga muamua i le iunivesite. I le talanoa atu i alii, na ia faapea atu ai:
“Afai e te feiloai i se teine o sē i ona luma e te lagonaina ai se manao e ausia, o lē e musuia oe e fai le mea sili e te mafaia, ma ia faia le mea sili mo oe lava, o se tamaitai talavou faapena e agavaa mo lou alofa. …
“… I ona luma e te le taumafai e faaaoga o ia; i ona luma e te lagona ai e te manao e avea ma mea uma e tatau ona avea ai [oe], aua o le a ia musuia oe i lena tulaga lelei.”
Tautino atu i le Faamaoni ma le Lotomaualalo
E fa upu ou te manao ia e manatua: faamaoni atoatoa, lotomaualalo lē manatufaapito.
Na saunoa mai Peresitene Jeffrey R. Holland, Sui Peresitene o le Korama a Aposetolo e Toasefululua, “O le alofa moni e fuga mai pe a tatou popole tele i se isi tagata nai lo le tatou popole mo i tatou lava.”
A o e alualu i luma i au tafaoga faamasani e agai atu i le mafaufau loloto e faasoa faatasi o oulua olaga, lua te faasoa o oulua mafaufauga e sili ona patino, o a lua miti, ma o oulua popolega. E te faasoa atu po o ai oe, po o le a le ituaiga tagata sa e i ai, ma po o ai e te manao e avea ai oe. O le faamaoni atoatoa ma le lotomaualalo lē manatu faapito.
Afai e te tauivi ma ponokalafi pe sa e tauivi ma lena tulaga i le taimi ua tuanai, o se tagata o loo mafaufau ia te oe o se soa e faavavau e tatau ona iloa e uiga i lou luitau ma pe na faapefea ona e faasagatau atu i ai. Afai na i ai ni faigata ia te oe ona o isi vaisu, o le tausia o le tulafono o le legavia, pepelo, po o le gaoi, o le lotomaualalo ma le faamaoni e uunaia oe e tuuina atu i le tagata e te alofa i ai, le avanoa e fuatia ai filifiliga faaleagaga ma le agaga tatalo o le agai i luma, a o lei taliaina ma faasilasila faalauaitele atu lau talosaga e faaipoipo.
Pe o mea uma na tutupu e tatau ona ta’uina atu? E te faaaogaina lou poto ma le faautautaga lelei. Afai sa e aveina le pulukamu a Nancy mai lana kesi i le vasega ono e aunoa ma lana faatagaga, atonu o le a faagaloina lena mataupu. Ae afai e lua tausaga o e tauivi ma ponokalafi, o lona uiga e sili atu ona taua lena mea.
O se auala magafagafa lelei o le fesili ifo lea ia te oe lava po o le a se mea e te manao e iloa pe afai o e i ai i le tulaga o lau soa, ma sauniuni ma le agaga tatalo e faaalu lou olaga ma se tasi e te alofa i ai.
O se mea mai le tele o tausaga ua tuanai atonu e vave lava ona malamalama i ai ma lē fatuina ai se mea faalavefau. Afai e sili atu ona lata mai le faafitauli po o le vaivaiga po o le agasala, e ono afua ai ona faalemu e le isi le faigauo ma faatagaina ai se taimi sili atu ma se aafiaga sili atu i le faamasinoina pe ua saunia o ia e agai i luma. Atonu e manaomia ai nisi tatalo, talanoaga ma matua po o taitai faatuatuaina, ma le tele o aafiaga ma le tagata e te faamoemoe e i ai faatasi ma oe e faavavau.
E tatau ona tatou manatua e leai se tasi e atoatoa. O tatou uma lava sa faia ni mea sese. A o talanoa faamaoni atu le tagata e te alofa i ai ia te oe, faaaloalo i le lototele o loo ia faaalia. Afai o se mea ua manino lava ua i ai i le taimi tuana’i, manatua lenei mau i lou loto: “O lē ua salamo i ana agasala, e faamagaloina o ia, ma o au, le Alii, ou te le toe manatua lava” (Mataupu Faavae ma Feagaiga 58:42
Ou te toe sii maia foi lenei saunoaga mai ia Peresitene Holland: “E leai se faamasaniga po o se faamauga faamaoni po o se faaipoipoga e aoga ai le igoa pe afai tatou te le faaaluina atoatoa mea uma o loo ia i tatou ma o le faia o lena mea o le faatuatuaina atoatoa o i tatou lava i le tagata tatou te alolofa i ai.”
Faamaoni atoatoa, lotomaualalo lē manatufaapito.