Mai le AM Faalevaiaso
Ae Faapefea Pe Afai Ou Te Lē Lagonaina se “Aloiafi o se Lagona Faagaeetia” i se Tafaoga Faamasani Muamua?
O le taula’i atu i mea sese e mafai ona faia ni lagona o le fetaui lelei o se vaega e le mafai ona maua.
O le taimi muamua lava sa ma o ai i se tafaoga faamasani ma le alii o le a iu ina avea ma o’u toalua, ou te lei lagonaina se aloiafi o se lagona faagaeetia.
Ma sa ou tali atu i le auala atonu o le a e faamoemoe i ai—sa ou manatu o le uiga o lea mea sa le fetaui lelei i ma’ua, ma sa ou agai pea i luma.
Ae i ni tausaga mulimuli ane, ina ua mavae se faasologa o mea na tutupu lea e na o le faalavefau paia e mafai ona ou faamatalaina ai, sa ma toe fesootai. Ma o le taimi lea, sa ma’ua gaualofa ma faaipoipo ai.
O le a la le mea na tupu? Sa ou faalogo i a’u uo uma ma tagata o le aiga ua faaipoipo o le a ou “iloa” pe a ou feiloai i le tagata sa’o, ma e manino lava sa lei tupu lena mea i le tafaoga faamasani muamua.
O Se Sootaga E Lē O I Ai
Ina ia tuuina atu ia te oe sina talaaga laitiiti, sa ma feiloai ma lo’u toalua i le lumanai ao ia auauna atu i lana misiona i la’u uarota. I ni tausaga mulimuli ane, sa ia fesoota’i mai ai i luga o ala o faasalalauga faaagafesootai. Sa ma talanoa e ala i feau tusitusia ma valaau vitio, ae sa nofo o ia i se motu ese nai lo a’u, o lea sa faigata ai ona feiloai faafesagai.
Ina ua iu ina ma feiloai e o i se tafaoga faamasani aloa’ia, sa ma talanoa pe tusa ma se tausaga, ma sa tele ni faamoemoega mo le auala o le a alu ai lenei tafaoga faamasani muamua.
Ae ma te le’i feva’aia’i faafesagai lava mo le tele o tausaga, ma o le mea moni, sa ma lagonaina uma le faaletonu.
Sa lei lagonaina le ofoofogia po o le faafiafiaina e pei ma mafaufauina. O lea ina ua ou toe foi i le fale, a o ou pisi i se galuega fou ma sa ia tau faapaleni foi lona ia olaga o se tagata aoga i le aoga faafoma’i, na i’u ai lava ina i ai i se tulaga le mautonu le ma fesootaiga. Sa leai se sootaga faamemelo ma mafanafana, aisea la e tatau ai ona ou manatu fua i ai?
Na mavae atu le tolu tausaga, ma iu ai ina ia faia le isi tausaga e faigaluega faataitai ai ina ia avea ma se foma’i, i se falema’i lea na o ni nai itula mai le mea sa ou nofo ai—o se tulaga matua vāvālalata lava lea ua ma i ai nei i totonu o tuaoi lava e tasi mo konafesi a le YSA.
Ou te iloa e pei e valea lenei mea, ae a o ou saofai i le pito i tua i se tasi konafesi, sa ou tilotilo ma ou iloa atu o ia. Ma na faafuasei lava, na pau le mea na mafai ona ou vaai i ai o ia, ma sa ou lagonaina lenei uunaiga mai le Agaga:
“O ia o le tagata sa’o.”
E a?
Sa ou saofai iina, ma se lagona te’i. Aisea ua ou maua ai lenei tali i le taimi nei—i le mavae ai o tausaga? Ma o le a le mea sa tatau ona ou faia i ai?
O le mea na tupu, e ui lava i se tali manino faapena ma faavavega, ae sa manaomia lava ona ma faamasani i le tasi ma le isi. Sa ia toe fesili mai ma te o e tafafao; Sa ou taliaina. Ona faaauau ai lea o nisi tafaoga faamasani se tele. Ma a o ma tuuina atu ia i ma’ua lava le taimi e faamasani ai le tasi i le isi nai lo le faalagolago i se sootaga e le mafaatusalia, sa ma atiina ae se mea loloto ma le moni.
O Ni Fesili e Mafaufau I Ai
Ae a la lena lagona o se aloiafi o se lagona faagaeetia sa i ai muamua?
Aisea na le i ai ai iina i le taimi muamua?
Afai e te le lagonaina se na vaega i se tafaoga faamasani muamua, o lona uiga la o nisi uma fegalegaleaiga faaleuo faapea e ono i ai, ua faaleaogaina uma?
O fesili lelei uma nei. Ma e le o ia te au tali i na fesili uma. Ae o nisi nei o fesili e mafaufau i ai pe a e fiafia i se tasi ae e te le o lagonaina se fesootaiga vave:
-
Pe o faaosofia ma musuia a’u e lenei tagata ia avea ma ituaiga tagata sili ona lelei o a’u lava?
-
Pe o ou iloa le mea o loo ou sailia moni i se toalua?
-
Pe ua ou iloa lo’u taua moni o se atalii/afafine o le Atua? Ma pe o iloa e lenei tagata lo’u taua?
-
Pe na ou sailia se faamautinoaga mai le Agaga o se tagata lelei lenei mo a’u e tafafao faamasani?
Na aoao mai Elder Gerrit W. Gong o le Korama o Aposetolo e To’asefululua e faapea: “Ia e avea ma le tagata lena e te sailia. Vaavaai mo se tasi e mafai ona lua tuputupu a’e faatasi. O le tuputupu ae faatasi o lona uiga o oulua uma taitoatasi e tuputupu a’e o se tagata taitoatasi faaleagaga, faaleatamai, faaleagafesootai. Ae o le tuputupu ae faatasi o lona uiga foi e te faataunuuina lou gafatia atoatoa a o oulua tuputupu ae faatasi o se ulugalii ma o se aiga.
O Le Alofa e Sili Atu Nai Lo na o se Aloiafi o le Lagona Faagaeetia
Ou te le manao e tuu maualaloina le manao mo le tosina atu ma le tulaga fetaui lelei o oe ma lou toalua. Ioe e tatau ona e sailia se tasi e te manatu e te fiafia ai, agalelei, aulelei, malie, po o a lava uiga e te lagona o le a atili fiafia ma matagofie ai le olaga i luga o le ala o feagaiga.
Ae afai e te iloaina ua e iloiloina ma le naunautai se tafaoga faamasani muamua, ma mafaufau pe na e lagonaina mea “sa’o” ma le uiga uma o ia mea, ia manatua “e lei tuuina mai e le Atua ia i tatou le agaga o le fefe; a o le mana, ma le alofa, ma le mafaufau tonu” (2 Timoteo 1:7). Afai e te talitonu e i ai sou mafaufau lelei ma e mafai ona e maua faaaliga faaletagata lava ia, e mafai ona e faalemu, malamalama atoatoa i ou lagona, ma faaalu le taimi e te manaomia e filifili ai pe mafai ona e vaai i se lumanai ma se tasi.
O le alofa moni, faamaoni e sili atu nai lo na o se aloiafi.