Mai AM Faalevaiaso
O Mausa Mamana e 3 Lea e Fesoasoani ia te A’u e Ola i le Tulafono o le Legavia
E alala le tusitala i Formosa, Pasila.
O le ola mama sa foliga o se tulaga sa mamao ese atu lava. Ae ua fesoasoani Iesu Keriso ia te a’u e talia atoatoa.
O le ola ai i le tulafono o le legavia e lei faigofie i taimi uma mo a’u.
Ina ua ou auai i Le Ekalesia a Iesu Keriso o le Au Paia o Aso e Gata Ai i le 15 o o’u tausaga, sa avea a’u ma se tasi o nai tagata auai toalaiti i la’u aoga, o lea o o’u tulaga faatonuina e faatatau i tafaoga faamasani sa masani ona malamalama sese i ai ma tauemuina.
O se tasi o o’u luitau silisili o le faaleleiga lea o tulaga o le malamalama i le itupa ou te i ai faatasi ai ma le tulafono o le ola mama. O a’u o se tagata lea e fiafia i itupa uma e lua (alii ma tamaitai), ma ina ua ou papatiso, sa ou tauivi ma le auala e mafai ona ou ola ai i lenei tulafono, aemaise lava ina ua le fiafia le toatele o a’u uo e nonofo faatasi ma a’u.
A o faasolo ina ou matua, ua ou maua ni mea mamana se tolu e fesoasoani ia te au e tausia ai a’u feagaiga:
1. Faamuamuaina o le Malumalu
O le auai i le malumalu e fesoasoani ou te tumau ai i le tuuto atu i le tulafono o le legavia. Ou te taumafai e alu soo pe a mafai. I se tasi vaiaso faigata, sa ou ulu atu ai i le potu selesitila ma le lagona lofituina i a’u mea sese. O le vaaia o lo’u ataata i se faaata, sa ou lagonaina ai le filemu ma manatua ai le tele o le alofa o le Faaola ia te a’u.
Ua faamanatu mai e Peresitene Russell M. Nelson ia i tatou: “E leai se isi mea e sili atu ona fesoasoani ia te oe e pipiimau ai i le ‘ai uamea nai lo le tapuai i totonu o le malumalu i le tele e mafai ai e pei ona faatagaina ai e ou tulaga. E leai se mea e sili atu ona puipuia oe a o e fetaia’i ma puao pogisa o le lalolagi. E leai se mea e faamausali ai lau molimau i le Alii o Iesu Keriso ma Lana Togiola pe fesoasoani e te malamalama atiliai i le fuafuaga ofoofogia a le Atua.”
E pei lava ona folafola mai e Peresitene Nelson, pe a ou avea le malumalu ma se faamuamua, e faamanatu mai ia te a’u feagaiga paia ua ou osia ma lo’u Tama Faalelagi. O le alu i le maota o le Alii e faamalosia ai la’u faaiuga e ola i Ana poloaiga ma fesoasoani ou te lagona ai Lona alofa.
2. Faaaofia Ai i le Lotu
Ina ua ou faatoa auai i le lotu, sa masani ona ou alu na o a’u, ona sa na o a’u le tagata auai i le lotu o lo’u aiga. E i ai taimi, sa ou tauivi ai ia lagonaina se lagona o le avea ma se tasi, lea sa faateleina ai faaosoosoga mo fesootaiga i nofoaga sese. Sa ou iloaina se tasi o auala e mafai ona ou faafetaiaia ai lenei mea o le punouai loloto atili lea i la’u aulotu. E pei ona aoao mai le Alii ia i tatou i le Mataupu Faavae ma Feagaiga 58:27, e tatau ona tatou “auai ma le naunautai i se faamoemoega lelei, ma fai mea e tele i lo [tatou] lava loto malie.”
Sa ou amata i le volenitia e fesoasoani e faamama le falesa. Sa amata ona ou auai i gaoioiga uma a le uarota ma ofo atu e fesoasoani i soo se mea ou te mafaia. Na faasolosolo lava, ona ou fausia ni fesootaiga loloto ma tagata o la’u uarota. Sa amata ona valaaulia a’u e se tasi o aiga i a latou afiafi faaleaiga, taumafataga i afiafi o Aso Sa, pe na ona evaeva lava ma taaalo i taaloga. Ua avea a’u ma lo’u aiga ma ni uo lelei ma i latou, ma o se aafiaga matagofie mo i matou uma.
O le faaaofiaina o a’u lava i la’u uarota, ua ou maua ai avanoa e fesootai ai ma isi o e tutusa o latou tulaga faatauaina ma tulaga faatonuina, e aofia ai le tulafono o le legavia. O lo’u aiga faaleuarota o se punavai sili o le lagolagosua e fesoasoani ai ia te a’u ia tumau i le faamaoni ma le malosi.
3. Taliaina o le Salamo
O le salamo e le o se mea e fefe ai—o se faamanuiaga, o se meaalofa mai lo tatou Tama Faalelagi ma Iesu Keriso.
Soo se taimi lava ou te tomanatu ai i mea na faia e Iesu Keriso mo a’u, e lofituina lava a’u i le lotofaafetai. Ou te faamanatu ia te a’u lava ia o le Togiola a Iesu Keriso e aofia ai o’u vaivaiga uma, mea sese, ma agasala ma “e faaolaina i tatou i le alofa tunoa, pe a uma mea uma e mafai ona tatou faia” (2 Nifae 25:23).
E pei ona aoao mai Sister Kristin M. Yee, Fesoasoani Muamua i le Au Peresitene Aoao o le Aualofa: “Afai o loo e tauivi ma se tulaga e te manatu ua tatau ona e faatoilaloina i le taimi nei, aua e te fiu. Ia onosai ia te oe lava, tausi au feagaiga, ia salamo soo, saili le fesoasoani mai ou taitai pe a manaomia, ma alu i le maota o le Alii i le tele e te mafaia. … O le a Ia le lafoa’ia lava Lana sootaga faalefeagaiga ma oe.”
Aua e te fefe e talanoa atu i lou epikopo po o taitai perisitua e uiga i soo se mea mamafa i lou loto, aemaise lava e faatatau i le tulafono o le legavia. Latou te mananao e fesoasoani ia te oe ia salamo ma maua le faamalologa e ala i le Togiola a Iesu Keriso. Ma aua nei galo le mana o le salamo i aso taitasi. E ui e manaomia le lototele, ae e aoga lava i taimi uma. Sa ou lagonaina le malosi o le Agaga i lo’u olaga ma ua faamanatu mai ai ia te a’u le alofa o Keriso mo a’u i taimi uma ou te salamo ai.
O le Ola ai i le Tulafono o le Legavia o se Faagasologa Faifai Pea
Manatua o le tausia o a tatou feagaiga, e aofia ai le ola i le tulafono o le legavia, o se faagasologa faifai pea tatou te oo i ai i o tatou olaga atoa ae lē o se lisi o mea e fai. E tusa lava pe e te faaaogaina nei mausa mamana e tolu, o le ola ai i le tulafono o le legavia o se taumafaiga tumau.
Pe tatou te feagai ma luitau i faaosoosoga po o lagona o le lē atoatoa, e alofa le Tama Faalelagi ia i tatou taitoatasi. O le tulafono o le legavia o se tulafono faalelagi, ma o le mulimuli i ai e aumaia ai le filemu, olioli, ma le malosi faaleagaga. Ou te iloa e ala mai ia Iesu Keriso, e mafai ai ona tatou maua le faamalologa, faamafanafanaga, ma le alofa tatou te manaomia.
Ou te molimau atu po o a lava ou tulaga, o le tausia o le tulafono o le legavia e matua’i aoga lava!