Autu o le Masina Lenei: Sootaga Vavalalata ma Fesootaiga

Talofa, uo.

Pe tusa ma le lima tausaga talu ai, a o faatoa tau amatamata le AM Faalevaiaso o se mekasini faaeletonika a le Ekalesia mo talavou matutua, sa matou le iloa i le avea ai ma se aufaigaluega le tele o mea e tatau ona matou aoaoina e uiga i le tele o mea eseese. Matou te talanoa uma lava i autu o le talalelei mai le faasinoga o o matou lava manatu ma aafiaga, ma nisi o autu matou te tusia e uiga i lagona e sili atu ona patino ia i matou nai lo isi.

O se tasi o autu faapitoa ua matou aoao atili ai e uiga i le aluga o tausaga—e ala i talanoaga e le mafaitaulia ma talavou matutua, o foma’i faapitoa mo lagona, taitai o le Ekalesia, faufautua, ma le tasi ma le isi—o le taua lea o le fesootaiga.

Atonu e le o le mea lena sa e faamoemoeina.

Ia, matou te lagona e pei ua matou iloa sina mea e uiga i mea o loo feagai ma talavou matutua (e pei ona i ai le toatele o tagata o la Matou aufaigaluega, o le mea moni, o talavou matutua i matou lava). O loo matou feagai ma filifiliga e foliga mai e faigata i aso uma e uiga i tafaoga faamasani, a’oga, galuega, misiona, auala e faaalu ai o tatou taimi, auala e tetee atu ai i faaosoosoga a le lalolagi, ma le auala e avea ai ma tagata e finagalo le Tama Faalelagi ia tatou i ai. Matou te popole i tauiviga po o mausa matou te lagona e le mafai ona matou sosola ese mai ai. O le mea sili lava, e foliga mai o le toatele o i tatou e faaaluina le tele o taimi e lagona ai le tuuatoatasi.

O le agasala e faaesea ai i tatou. O popolega faaagafesootai po o isi luitau o le soifua maloloina faalemafaufau e faaesea ai i tatou. O le faaaogaina o ponokalafi e vavaeeseina ai i tatou. O le ola ai i lenei lalolagi faatekinolosi e vavaeeseina ai i tatou (aua ia tatou talanoa faamaoni, o uo faatekinolosi e le tutusa ma uo moni o le olaga)

O le masina lenei, e mafai ona e maua ai tala mai talavou matutua o e na lagonaina se manaoga mo le faateleina o fesootaiga ma sootaga vavalalata i o latou olaga. O ni nai tala e aofia ai:

• Fautuaga mai ia Elder Jaggi o le Fitugafulu i le auala e fausia ai sootaga faaKeriso i au mafutaga

• O se talavou matua mai Pasila o loo faasoa mai ni mausa e fesoasoani ia te ia e ola ai i le tulafono o le legavia

• O manatu e tolu mo le auala e mafai ona e fatuina ai ni fesootaiga loloto atu i le korama a toeaina

• O se talavou matua mai Filipaina e lei lagonaina se “aloiafi o lagona faagaeetia” ina ua la faatoa feofeoa’i ma le alii lea na ia toe faaipoipo mulimuli lava i ai—ma le mea sa ia lagonaina nai lo lena

• O se tusiga tusitusia a le aufaigaluega ma ni fesili se lima e fesili ifo ai ia te oe lava pe na e tauivi ma ponokalafi ae e te manao e tafao faamasani

E i ai foi a matou tusiga o lo’o avea ma vaega o tusiga fa’asolo faifai pea:

• Faigalotu ua Faaalia: Ua tuuina mai e Elder Andersen ni fautuaga se fa mo le sailia o le tagata sa’o e faaipoipo i ai

• Tomai o le Olaga: O mataupu faavae o le talalelei e mafai ona fesoasoani i lou olaga faalegaluega

• Faaaogaina o le Mataupu Faavae ma Feagaiga i Lou Olaga: Lagolago mo lau suesuega o le Sau, Mulimuli Mai ia te A’u ma se tala e uiga ia Thomas B. Marsh ma pe mafai faapefea ona tatou aoao e vaai atu i isi ma le loto malamalama atili ma le alofa mama

• Aemaise lava mo Tagata Faatoa Faaipoipo Lava: E mafai faapefea ona e faia se avanoa i lau faaipoipoga mo ou vaivaiga faaletagata, tusa lava pe o lua galulue faatasi e faaleleia atili

E ala i le faalagolago ia Iesu Keriso, ua tuuina mai ai ia i tatou le malosi e faatoilalo ai o tatou vaivaiga. Ma a tatou fesootai ma isi, e mafai foi ona tatou iloa e le o tuua na o i tatou i o tatou luitau. E mafai ona lagolagoina i tatou i a tatou taumafaiga ia avea ma soo sili atu o Keriso. Ma e mafai ona tatou saunia e olioli i ituaiga eseese o sootaga vavalalata i o tatou olaga atoa.

Faatasi ai ma le alofa ma le tele o le faamoemoe,

AufaigaluegaAM Faalevaiaso