E Mafai Ona Fesoasoani le Loto Malamalama e Tali Au Fesili Faigata

O Tomasi B. Marsh o se tasi o uluai tagata o le Ekalesia toefuataiina, ae e lei atoa se lima tausaga talu mai lona papatisoga, ae ua avea nei o ia ma Peresitene o le Korama a Aposetolo e Toasefululua. Sa ia aoaoina le ala e mulimuli ai i poloaiga a le Atua, ma e lei faaalia mai lava e le Atua auiliiliga uma o ona tiutetauave.

E malamalama atonu na ia manatu, i le avea ai o se peresitene, o le a ia filifili po o le a le mea e tatau ona atofa atu i isi Aposetolo. O lea ina ua valaauina e Iosefa Samita ni Aposetolo se toalua e tala’i atu le talalelei i Egelani, sa le fiafia Peresitene Marsh ona e lei i ai se feutagaina ma ia i le faaiuga.

Ina ua ou faatoa iloa lenei mea, sa ou te’i. O se Aposetolo, na valaauina e le Atua, ua ita i le perofeta?

O lo’u i ai faatasi ma perofeta ma aposetolo i aso nei e tele lava i le tulaga o faasalalauga aloaia, o lea e faigata ai ia te a’u ona manatua o i latou o ni tagata moni—o tagata ua valaauina e le Atua e taitai ma auauna atu, ae o tagata lava.

Sa sola ese Iona mai lona valaauga (tagai i le Iona 1). Sa tagitu’i Nifae i ona lē atoatoa, ma ta’ua ai o ia lava o se “malaia,” ma fai mai sa i ai faaosoosoga ma agasala e “faigofie ona lavelavea [ia te ia]” (2 Nifae 4:17–18).

Ma ua na o ni faataitaiga nei mea mai le talafaasolopito anamua. Talu ai nei lava, ua tatou iloa o Iosefa Samita sa ia faatagaina Matini e ave itulau e 116 lea na leiloloa mulimuli ane (tagai i le Mataupu Faavae ma Feagaiga 3).

E mafai faapefea la ona tatou faaaogaina nei tala e faailoa atu ai le auala tatou te iloa ai faatinoga na faia i lena taimi ma le taimi nei?

Ou te talitonu e mafai ona tatou amata i le auala e tasi lea na faia e le Alii ina ua ia fetalai atu i Lana auauna o Thomas B. Marsh e tali atu ai i le to’atama’i o Thomas: “Ua Ou faalogoina au tatalo” (Mataupu Faavae ma Feagaiga 112:1; faaopoopo le faamamafa).

I se isi faaupuga, e mafai ona tatou amata i le faalogo.

E leai se tasi e sili atu lona malamalama i le loto malamalama nai lo le Faaola. Sa oo o Ia i mafatiaga o tagata uma (tagai i le Alema 7:11–12). Afai e i ai se tasi e mafai ona aoaoina i tatou i le auala e malamalama atili ai i isi ma faalogo ma le loto malamalama, o Ia lava lea.

Sa faaauau pea ona fetalai mai le Alii ia Tomasi e ala mai ia Iosefa Samita, ua faapea mai, “Ua Ou iloa lou loto, ma ua Ou faalogo i au tatalo e faatatau i ou uso” (Mataupu Faavae ma Feagaiga 112:11). E ui lava o loo faaauau pea ona aoai e le Alii ia Tomasi, ae ou te manatu e taua lona faailoa atu ia Tomasi sa Ia faafofogaina ana tatalo.

I le fuaiupu lava lea, ua apoapoa’i mai ai le Alii, “Aua le faapito’au ia te i latou i le alofa sili atu i lo le toatele o isi, ae ia tuu atu lou alofa mo i latou e faapei foi mo oe lava; ma ia faateleina lou alofa i tagata uma, ma ia i latou uma o e alolofa i loʼu igoa.”

O se tasi o mafuaaga e malamalama atoatoa ai le Faaola ia i tatou ona e alofa atoatoa o Ia ia i tatou. Afai tatou te fia malamalama moni i le mea na tupu i le talafaasolopito o le Ekalesia, o le faaaogaina o lo tatou alolofa mo isi o le a fesoasoani tatou te faalogo ai ma le manatu moni i ai.

E i ai so tatou avanoa maoa’e pe a toe tepa i tua i le talafaasolopito aua e mafai ona tatou vaai i le tala mai le amataga e oo i le iuga; e mafai ona tatou vaai i taunuuga atonu na alu ai ni masina, tausaga, po o le tele foi o tausaga e tau faailoa ai.

O lena mea e faigofie ai ona faamasinoina faatinoga a se tasi ma faapea atu, “Atonu ou te le faia i lena auala.”

Ona tatou te le maua nisi o faamatalaga mai le talafaasolopito, o loo i ai se talaaga atonu tatou te le malamalama atoatoa i ai, ma o lea e le mafai ai ona tatou faamasinoina atoatoa le mea na tupu.

Ou te le o fai atu e tatau ona tatou ‘alofaga pe faamalamalama atu mea uma tatou te le malamalama i ai. E taua fesili aua e fesoasoani ia i tatou e faatupuina ai lo tatou malamalama. Ae a o sailia tali e ala i le suesue ma le tatalo, e taua le mafaufau i le poloaiga a le Alii ia Tomasi e “aua le faaeaeaina outou lava” (Mataupu Faavae ma Feagaiga 112:15). Ou te manatu o se faamatalaga tali tutusa atonu e faapea “Aua e te manatu e sili atu lou lelei nai lo se isi lava tagata.”

O se fautuaga maoa’e lenei mo le tele o tulaga (e pei o mafutaga), ma o se fautuaga sili pe a iloiloina mea na tutupu anamua. E le mafai ona ou manatu faapea, afai ou te se’eina se’evae o Tomasi B. Marsh, Iosefa Samita, po o se isi lava tagata, semanu ou te faia ia sili atu ona lelei. Semanu ou te le faia i le ala na latou faia ai, ae atonu o le a ou faia ni mea sese talitutusa pe eseese foi.

E tusa lava po o a popolega atonu o ia te oe, o le mauaina o tali e aumaia ai le filemu e amata i se manao moni e mulimuli i le finagalo o le Atua ma faalagolago i Lana vaaiga e faavavau. “Ia e lotomaualalo,” na faailoa atu ai e le Alii ia Tomasi, “ma o le a taitai ai oe e le Alii lou Atua i le lima, ma tuu mai ia te oe tali i au tatalo” (Mataupu Faavae ma Feagaiga 112:10

Sa liliuese Tomasi B. Marsh mai le Ekalesia mo se taimi ae mulimuli ane toe foi mai ma sa taliaina. E pei ona fetalai atu le Alii ia te ia i tausaga na muamua atu, “Ae ui i lea, talu ai ona ua e faamaulaloina oe lava o le a faaeaina oe; o lea, ua faamagaloina au agasala uma mai ia te oe” (Mataupu Faavae ma Feagaiga 112:3).

Tau ina ia tatou tuuina atu i le tasi ma le isi nisi o malamalamaaga lava e tasi ua tuuina mai e Keriso ia i tatou.