Tomai o le Olaga
O Fautuaga e 5 e Faatotonugalemu i le Talalelei e Fesoasoani ia te Oe ia Manuia i Lau Galuega
O aoaoga a Keriso e le na o lou olaga faaleagaga e faatatau i ai.
I le avea ai ma se tama talavou, sa masani ona ou tatalo mo se fesoasoani i le sailia o se galuega. Ua ou taoto i le po ma mafaufau pe o le a faapefea ona ou totogiina pili. Ma e ui ua aoaoina a’u e se vaaiga e faavavau e faapea o le manuia i le olaga e le fuaina i le tele o tupe ou te maua, ae ou te manao lava ia mafai ona ou lagolagoina lo’u aiga ma maua se galuega faamalieina.
E ui o loo ou fuafuaina pea lo’u lava ala i se galuega tauia, ae sa lava a’u galuega i le aluga o o’u tausaga i le kolisi e iloa ai o aoaoga a Keriso e faatatau i mea e sili atu nai lo na o lo’u lava olaga patino. O mataupu faavae nei e lima o le talalelei na fesoasoani ia te a’u e alualu ai i luma i le fale faigaluega.
1. Talanoa, Talanoa, Talanoa
O fegalegaleaiga faaletagata lava ia, valaau i telefoni, po o imeli foi ou te popole lava i ai. Peitai, ua manino lava, o le lelei o le talanoa e taua tele i se siosiomaga faalegaluega. E manaomia ai le tautala atu, faia o fesili, ma, ia, talanoa.
E tutusa lava le taua, o le mataalia o lau talanoa. Na saunoa mai Peresitene Russell M. Nelson, “E talanoa mai le [Tama Faalelagi] i le faigofie, filemu, ma i se manino matuā maofa lava lea e le mafai ona tatou malamalama sese ai ia te Ia.” Ua ou aoaoina o le talanoa tuusa’o, agamalu, ma faamaoni e sili ona lelei i le fale faigaluega.
Aua le faatuai ona talanoa atu i le Tama Faalelagi e uiga i lau galuega e ala i le tatalo. Ua tuuina mai se valaaulia e leIakopo 1:5 , e pei ona aoaoina e Iosefa Samita: “A e afai ua leai se poto i so outou, ina ole atu ia i le Atua.” O le tatalo ua faamanuiaina ai a’u i vaega uma o lo’u olaga, e aofia ai a’u taumafaiga faalegaluega.
2. Galue ma le Filiga (Po o le Galue Malosi)
O le galuega a o le galuega. E le o taimi uma o le a malie ai, ma e seasea ona oo mai gofie. Atonu e te matea o le faamamaina o faleletaua ia e le o lisiina i a’u galuega e sili ona ou fiafia i ai (e leai se le faaaloalo i soo se tagata teu faletaele e faitauina; matou te alolofa ma manaomia oe), ae ou te toe tepa i tua ma le lotofaafetai sa ou faia—ma e le faapea ona sa ou mauaina ai se tupe.
Na folafola mai e le Atua i le Au Paia i Navu, “Afai tou te galulue ma lo outou malosi atoa, o le a Ou faapaiaina lena fasi eleele ina ia faia ia paia” (Mataupu Faavae ma Feagaiga 124:44). E ui o lenei mea e faatatau i le fausiaina o se malumalu, e mafai foi ona faatatau i le galuega tatou te faia i isi mea.
Ou te talitonu o mea e sili ona aoga e manaomia ai taumafaiga. O le auauna atu i se misiona sa manaomia ai se taumafaiga tele lava, ae ou te matua faafetai lava mo le aafiaga. O sootaga faaleuo e manaomia ai taumafaiga, ae e mafai ona latou aumaia le olioli tele. E leai lava se eseesega ma matātā. O nisi taimi e manaomia ona punoulou ulu ma fai le galuega.
3: Ia Onosai
Ua lisiina e le Aposetolo o Paulo le onosai, po o le tali-tiga, o se uiga auaumama o le Agaga (tagai i le Kalatia 5:22). Ou te le’i galue lava i se mea e aunoa ma le feagai ma sina lē fiafia, pe o le taulimaina o tagata faigaluega faigata, faatautaiga o faafitauli, po o le feagai ma le faatuai i le ausiaina o sini. O le aoao e alu faatasi ma mea tiga, faatuatuaina o le a lelei mea uma, ma tumau le taula’i atu i le faaaliga mo se taimi umi, sa taua i lo’u lava aafiaga faalegaluega.
4. Talia Manatu Faaalia
O le aoao e talia manatu faaalia e faigata ae e tatau ai. O le mauaina o se faitioga e le faapea o le toilalo; o lona uiga e i ai se avanoa mo le faaleleia. Ua faatumulia tusitusiga paia i faataitaiga o tagata o loo aoao i le auala e fai ai ma ia lelei atu—mafaufau ia Isaraelu o loo feoai solo i le vao po o Alema le Itiiti. Ona sa alofa le Alii ia i latou, sa Ia aoaiina i latou ma le tele o isi alii ma tamaitai maoae.
Ua faamatala e Alema le tiga na ia lagonaina e uiga i ana agasala o se “mafatia faavavau” (Alema 36:12). Ae ua ia faamatalaina lona salamo, po o le liuga o le loto, ua faapea mai, “E leai se mea e faapea ona silisili ona logolelei ma suamalie e pei o lo’u olioli” (Alema 36:21).
Sa ou faigaluega i se potu o tusitala faasalalau mo le tele o tausaga. O le tele o aso e aofia ai le tuuina atu o tusiga faataitai ma talanoaina le auala e faaleleia ai. E i ai taimi, sa pei na faasino mai e tagata mea sese uma sa ou faia. Ae peitai, i le aluga o taimi, sa amata ona ou talisapaia ia manatu faaalia aua na avea ai a’u ma se tusitala e sili atu ona lelei ma se, tagata e toa e fai atu.
5. Faatulaga ma Ausia Sini
Aua le faapopoleina pe a umi se taimi e atiina ae ai se galuega. E toalaiti tagata e faamanuiaina vave. Na faaali mai e Nifae e faapea ua aoao mai e le Alii “lea fuaitau i luga o lea fuaitau, ma lea mataupu i luga o lea mataupu” (2 Nifae 28:30). Na aoao mai Alema, “o mea laiti ma faatauvaa e faataunuu ai mea tetele” (Alema 37:6).
O le faia ma le tulitulimatagauina o sini tauaogaina o se auala sili lea e alualu ai i luma i sina mea itiiti. O le vaega manaia e faapea, o sini e le faapea e tatau ona tele se aoga e tulitulimatagauina, ae o a tatou taumafaiga e tatau ona ogatusa. Na aoao mai Elder Michael A. Dunn o le Fitugafulu, “Mo sina mea itiiti e maua i le tuufaatasiga, e tatau ona i ai se taumafaiga faifai pea, i lea aso ma lea aso.”
E masani ona ou popole i le faia ia lava le alualu i luma i lo’u olaga patino ma la’u galuega. Ae a ou toe tepa i tua, ua ou vaaia ai se ala manino mai le tasi itu i le isi, e ui lava sa le vaaia i lena taimi.
Ou te iloa o le a taialaina i tatou e le Atua i la tatou galuega a o tatou tuu atu lo tatou faatuatua ia te Ia.