O Auala e 3 e Faamaloloina ai mai Manatu Leaga i Feusuaiga ma Vaai Atu i Sootaga Vavalalata I Le Auala Na Faamoemoeina Ai e le Atua

O le Atua o se Atua o le faamasinotonu ma le alofa mutimutivale. Ua Ia poloaiina i tatou e aloese mai mea patino ma ia mulimuli i Ana tulafono. O le taimi nei, ua faaleoina mai e le fili se tulaga e faapei e ta’umāmāina ai e faapea: “E le o se mea tele lena. O le a le afaina le taimi e tasi.”

Ae a uma ona tatou gauai atu i faaosoosoga, o lena leo e oo ina sauā ma lē loto faamagalo: “Ou te le talitonu ua e faia lena sese. E leai se auala e salamo ai. E leai se isi e toe alofa ia te oe.”

I se tualga faafeagai, tatou te faalogoina ai le siufofoga alofa o le Atua e ala mai i le Faaola: “Pe tou te le foi mai nei ea ia te au, ma salamo ia outou agasala, ma liua, ina ia Ou faamaloloina outou?” (3 Nifae 9:13).

E ui lava i lena talotaloga alofa, e masani lava ona ou faalogo i talavou matutua o fai mai faapea, “Sa ou tauivi ma le faaaogaina o ponokalafi, o lea o le a ou le agavaa ai lava mo se faaipoipoga i le malumalu,” “Ou te lagona le nutimomoia tele ina ia alofaina,” po o le “E le mafai ona ou faamagaloina a’u lava mo mea ua ou faia.”

Mo i latou ua faamalepeina i lenei ituaiga o maasiasi, faalogo i upu a Elder Patrick Kearon o le Korama a Aposetolo e Toasefululua: “Afai e te popole o le a e le ausia lava lena maualuga, pe o le aapa atu ma le alofa o le Togiola le i’u a Keriso e ufitia ai ma le alofa mutimutivale isi tagata uma ae le oo atu ia te oe, o loo e lē malamalamala la. Lē iu o lona uiga e lē iu. Lē iu e aofia ai oe ma i latou e te alofa i ai.”

O le laasaga muamua i le faamalologa mai savali le lelei o ponokalafi ma vaaiga leaga o feusuaiga o le talitonu lea e mafai ona e maua le fesoasoani mai ia Iesu Keriso.

O le togafiti o le aua lea e te lafi mai le Tama Faalelagi ma Iesu Keriso. Liliu atu ia i Laua mo le faamoemoe, fesoasoani, ma le filemu.

Na aoao mai talu ai nei Sister Tamara W. Runia, Fesoasoani Muamua i le Au Peresitene Aoao o Tamaitai Talavou: “E tuuina mai e Iesu Keriso le malamalama ia i latou o e nonofo i le pogisa. O le mea lea, i na aso e te lagonaina ai lena leo o fai atu ia te oe e te lafi, ma e tatau ona e lafi i se potu pogisa na o oe lava, ou te valaaulia oe ia e lototoa ma talitonu ia Keriso! Savali atu ma ki le Moli—lo tatou Susulu Atoatoa o le Faamoemoe.”

Aua nei faatapulaaina le Togiola a Keriso ma auala e mafai ona Ia faia ai vavega i lou olaga.

Sa ta’ua e Peresitene Thomas S. Monson (1927–2018) i se tasi taimi se tala mai le Alice’s Adventures in Wonderland. Ina ua maua e Alice o ia lava i se fetaulaiga o ala, sa ia fesili atu i le Pusi o Cheshire po o le fea le ala e ui ai. Na ia tali atu, “E faalagolago i le mea e te fia alu i ai. Afai e te le iloa le mea e te fia alu i ai, e le afaina la po o le fea o auala e te ui ai.”

I se tulaga tutusa, atonu e te i ai i se fetaula’iga i le va o se vaaiga faasamasamanoa o feusuaiga ma se malamalamaaga i faamoemoega o le Atua mo sootaga vavalalata faalefeusuaiga. E tatau ona e malamalama i le ala o feagaiga ma faamoemoega o le Atua mo sootaga vavalalata maloloina ma alofa faalefeusuaiga ina ia mafai ai ona iloa amioga ma ala e le ogatusa ma Ona ala. O le tele o savali—o ponokalafi, aganuu o feoa’iga, o ata o ala o faasalalauga e le manino—e tuleia mai ai se vaaiga le lelei o feusuaiga e faatatau i le faamalieina vave faaletino ma le faia o isi na o ni vaega faafoliga pe faatatau i ai.

Ae o le vaaiga a le talalelei i sootaga vavalalata faalefeusuaiga i totonu o le faaipoipoga i le va o se alii ma se tamaitai e sili atu ona tamaoaiga. O lona uiga o le faafesootaia o ulugalii faalelagona ma faaleagaga, ma faalolotoina ai a latou sootaga.

E toatele tagata e le iloa le tele o mea o loo latou misia i lo latou malamalama i tulaga feusuai seia oo ina latou faalogo i se vaaiga e faatotonugalemu i le talalelei. Sa ou talanoa i se tasi taimi ma se alii talavou e uiga i le auala e faasese ai e le faaaogaina o ponokalafi le tulaga faaleagaga o feusuaiga. I se tulaga faate’ia, sa ia fai mai na te lei faalogo lava i upu nei o le feusuai ma le faaleagaga o talanoaina faatasi.

Pe a e maua se vaaiga sili atu faaleagaga po o le a le uiga o le sootaga vavalalata faalefeusuaiga, o le a faigofie ona tetee atu i le lomiga taufaasese ua ofoina mai e le lalolagi.

Ina ia suia la tatou vaaiga, e le tatau ona tatou aloese mai savali leaga—e manaomia ona tatou aoao ma le mataalia po o le a le faamoemoega o le Atua mo sootaga vavalalata faalefeusuaiga ma tatalo mo le fesoasoani a le Agaga i le mamanuina o la tatou vaaiga mamao.

O le taimi lava e fesoasoani ai le Agaga ia te oe ia malamalama i faamoemoega maualuluga atu o le Atua mo sootaga vavalalata faalefeusuaiga, o le a e lagonaina le faamalosia i le filifili e savali i le ala o le faamalologa ma suiga.

O nisi nei o auala e mafai ona e amata ai:

• E ui lava atonu o loo e taumafai pea e faatoilalo le faaaogaina o ponokalafi masani, amata ona sui ponokalafi ma faasalalauga taufaasese e fai ma au punavai o faamatalaga e faatatau i le uiga masani pe maloloina o le sootaga vavalalata faalefeusuaiga.

• Suesue i punaoa e uiga i tulaga feusuai o loo ogatusa ma aoaoga o le talalelei, e pei o le vaega o le Taulimaina o Ponokalafi i le Gospel Library. O le kosi o le inisitituti “O Le Aiga e Faavavau” o loo aoao mai e uiga i le saunia mo sootaga vavalalata faalefeusuaiga i le faaipoipoga. O le lomiga ia Aokuso 2020 o le AM Faalevaiaso o loo talanoaina ai le auala e atiina ae ai se vaaiga maloloina o feusuaiga. E tele foi tusi ua tusia e tagata faatuatuaina o le Ekalesia e mafai ona fesoasoani. Ole atu i le Tama Faalelagi mo se fesoasoani i le taialaina o oe i punaoa musuia.

• Talanoa ma matua, taitai faatuatuaina o le Ekalesia, faufautua atamamai, po o ni fomai faapitoa e mafai ona fesoasoani ia te oe ia iloa sootaga vavalalata faalefeusuaiga i le ala e finagalo ai le Atua ia te oe.

• Siomia oe lava i uo o e tutusa ou tulaga faatauaina ma o loo taumafai e ola i le tulafono o le legavia.

O faatosinaga o mea sese ua tuanai po o savali leaga e le mou vave atu—ae i le aluga o taimi, e faasolo ina filemu atu leo o le lalolagi a o tatou savavali i le ala o feagaiga i le faatuatua. E pei ona aoao mai Peresitene Russell M. Nelson, “Talu ai na manumalo Iesu Keriso i lenei lalolagi pa’ū, ma talu ai na Ia togiola mo i tatou taitoatasi, e mafai foi ona e faatoilaloina lenei lalolagi tumu i agasala, manatu faapito, ma masani ona vaivai.”

A o e liliu atu i le Tama Faalelagi mo se fesoasoani i le toe faauigaina o ou manatu i tulaga faalefeusuaiga, e mafai ona e maua le faamoemoe i le fausiaina o se sootaga faalefeusuaiga ma lou toalua i le lumanai (po o le taimi nei) e faavae i le faatuatuaina, alofa, ma le fefaaaloaloai.

Sa ou tilotilo atu i mata o tagata o e o loo tauaveina ni tiga loloto mai savali o faafitauli e uiga i feusuaiga. Ae ua ou vaai foi i na lava mata i le filemu, olioli, ma le faamoemoe a o latou mauaina le upumoni a le Atua e uiga i sootaga vavalalata faalefeusuaiga ma salamo faamaoni i mea e tatau ai.

Afai na i ai se taimi na e lagona ai le nutimomoia, maasiasi, po o le le mautonu, faamolemole ia iloa le mea lenei: E mafai ona faamaloloina oe. E le o faaleaogaina oe mai le alofa, sootaga vavalalata, po o le olioli.

E sili atu se vaega e tatau ona e mauaina nai lo fesootaiga taufaasese. Atiina ae lau vaaiga. Savali i le ala. Ia taialaina oe e le malamalama o le Togiola a Keriso i se lumanai o le atoatoa moni ma le sootaga vavalalata.