Mai le AM Faalevaiaso
Sa Ou Iloaina Ou Te Le o Ola i Lo’u Olaga Sili Ona Lelei—O Le A Se Mea e Mafai Ona Ou Suia?
Sa ou maua ni uo na foliga mai sa i ai se mea sa ou misia i lo’u olaga.
Mo le tele o lo’u olaga, sa ou manatu ia te a’u lava o se tagata e le talitonu i le Atua. Ou te le’i mautinoa po o le a le mea ou te manao ai mai le olaga po o le a foi le uiga o lena mea, ae sa lava lo’u fiafia.
Ae ina ua amata ona ou alu i le kolisi, sa ou feto’ai ai ma ni patupatu i le auala. Ou te le’i faia ni filifiliga sili ona lelei. Sa ou lagona ua ou sē. I ni nai tausaga mulimuli ane, sa ou toe fesootai ai ma ni nai uo o e sa avea ma tagata o Le Ekalesia a Iesu Keriso o le Au Paia o Aso e Gata Ai. Sa ou ola a’e faatasi ma i latou ma sa ou fiafia i taimi uma i la matou mafutaga, ae ou te le’i lagonaina lava o le auala sa latou ola ai sa fetaui mo a’u.
Ina ua matou toe feiloai le tasi ma le isi ma faasoa tala o matou olaga, na pau lava le mea na ou vaaia o le olioli i o latou foliga. Ua faaipoipo uma laua ma maua ni fanau, sa i ai a latou galuega ma ua alualu i luma latou taumafaiga, ma o le mea e sili ona taua, na foliga mai o loo latou faasusulu atu le lelei.
Ina ua ou faatusatusaina lo’u olaga i o latou olaga, sa ou iloa ai ua mamao ese lo’u taulaiga. Sa ou agai atu i se auala ou te le manao ou te alu ai. Sa ou manao ia i ai se uiga o le olaga, ma ou te le’i manao e tulituliloa mea o le a le aumaia ia te au le fiafia i se taimi umi.
Mo le taimi muamua, sa ou lagona ai e pei ua i ai se mea o misi i lo’u olaga.
Ma sa ou mautinoa o nei uo sa i ai le vaega o lo’o misi.
O le Filifiliga na Mafua ai le Suiga
Ina ua amata ona ou toe tafafao faatasi ma nei uo, sa ou iloaina sa latou le mauaina le olioli ma le manuia ona o i latou o ni tagata o le Ekalesia. Ae o le lagona o a’u uo o le latou faamoemoega i le olaga ma le uunaiga e faaauau pea ona alualu i luma sa ofoofogia. Sa latou matua alolofa ma tuuto ma sa i ai lenei malosiaga e le gata. Ou te le’i malamalama pe o le a le mea na mafua ai ona latou ola faapena.
Peitai, mulimuli ane, sa ou iloaina o lo latou fiafia i le olaga na mafua mai i le mulimuli i mataupu faavae autu o le talalelei a Iesu Keriso. O lea na amata ai ona ou fesili atu, ma sa uunaia a’u e a’u uo e aoao atili.
A o ou aoao e uiga i le talalelei, sa ese lava i le taimi muamua. Sa leai ni o’u talitonuga faaleagaga e fausia ai, ae o upumoni o le talalelei na amata ona kiliki mo au. Sa ou lagona e pei ua iu lava ina i ai se faamoemoega o le olaga.
Sa saunoa mai Peresitene Russell M. Nelson lata mai nei lava: “O la’u faai’uga e mulimuli ia Iesu Keriso o le faai’uga aupito silisili lea ona taua ua ou faia. … O lena filifiliga ua ala ai le eseesega atoa! O lena faai’uga ua faafaigofie ai ona faia isi faai’uga e tele. O lena faai’uga na aumaia ia te a’u le faamoemoega ma le taitaiga. Na fesoasoani foi ia te a’u ia lavātia ona talitali afā o le olaga.”
Sa ou lagonaina foi le mea lava lea e tasi a o ou filifili e mulimuli ia Iesu Keriso ma papatiso.
Fusifusia o i tatou lava i le Tama Faalelagi
Talu ona ou auai i le Ekalesia, e lei telē lava se suiga i lo’u tulaga. O lo’o i ai pea le tele o mea e tatau ona ou galue ai, ae o o’u lagona atoa e uiga i le olaga e matua ese lava nai lo le taimi muamua.
O le aoao e uiga i le Faaola, iloaina o lo’u faasinomaga paia, ma le iloaina e le o tuua na o i tatou i lenei faigamalaga ua fesoasoani ia te au e lagonaina ai lena lava lagona o le filemu ma le naunautaiga lea e masani ona i ai i a’u uo.
E tele lo’u faatuatuaga i lo tatou Tama Faalelagi, ma ou te taofimau i le manatu e tusa lava po o le a le mea e tupu, o loo Ia lagolagoina lava au. A o ou tausia a’u feagaiga ma taumafai e ogatasi lelei ma lo’u faasinomaga paia, ou te iloa o le a faatasi o Ia ma au i laasaga uma o le ala. Ma afai e faatasi o Ia faatasi ma a’u, e leai se mea ou te fefe ai.
Na molimau mai foi Peresitene Russell M. Nelson: “O le ulu atu i se sootaga faalefeagaiga ma le Atua e noatia ai i tatou ia te Ia i se auala e faia ai mea uma e uiga i le olaga ia faigofie atu. Faamolemole ‘aua ne’i ave sese la’u tala: Ou te le’i fai atu o le osia o feagaiga e faigofieai le olaga. O le mea moni, ia e faamoemoe o le a i ai mea faafeagai, ona e lē manao le fili ia te oe ia e mauaina le mana o Iesu Keriso. Ae o lou noatia o oe lava ia i le Faaola o lona uiga e te mauaina Lona mana faamalosiau ma togiola.”
Ou te manatu o le uiga lena o le ola ai i le talalelei. E le faafaigofieina e le talalelei le olaga, ae e fesoasoani ia i tatou e fausia le ola faalelalolagi ma le faavavau e finagalo ai le Atua mo i tatou.
E ui lava i fesili e lei taliina, fefe i le lumanai, ma faafitauli, ae ua ou vaai i le auala e tuuina mai ai e le talalelei ia i tatou taiala tatou te manaomia e ola ai i se olaga sili tatou te mafaia.