O Lea La, Ua E Faatoa Sau i le Fale mai Lau Misiona. O Le A La le Isi Mea?

E tele mea e fetuunai ai, ae ou te fautua atu e te aloese mai le toe oso i tua i mausa tuai faalelalolagi e pei o le soona faaaogaina o ala o faasalalauga. A mae’a se anapogi mai ala o faasalalauga faaagafesootai, o nisi taimi ou te tauia a’u lava e ala i le soona faamalieina.

Atonu o le a faaosoosoina oe e faia le mea lava lea e tasi i isi ala o faasalalauga pe a e toe foi mai i le fale. E malamalama lelei, ae na aoao oe i lau misiona i le taua o le faaeteete i lou taimi ma le faia o mea e fesoasoani ia te oe e te latalata atili ai i le Atua. Aua le faatagaina na mea uma e mou atu ona ua e toe maua lau telefoni.

Ia faaauau pea mausa faamalolosia faaleagaga na e aoaoina, e pei o le suesueina o au tusitusiga paia ma tatalo soo. Atonu e le tutusa foliga o lou taimi suesue ma le taimi o lau misiona, ae e mafai lava ona mamana ma anoa. Na saunoa mai Peresitene Steven J. Lund, Peresitene Aoao o Alii Talavou, “E mafai ona tatou maua le lototele faaleagaga ma le filemu a o tatou faafaileleina mausa paia ma faiga masani amiotonu ia e mafai ona lagolagoina ma faamumuina ai le afi o lo tatou faatuatua.”

Faatoa mae’a sou vaitaimi faapaiaina o auaunaga, ma e mafai ona faigata ona maua se lagona o le faamoemoega i le taimi e te taunuu ai i le fale. Na faamanatu mai e Peresitene M. Russell Ballard (1928-2023) ia i tatou: “Pe a faamalolo oe mai lau misiona, ia manatua e te lei faamaloloina mai lou toaga i le Ekalesia. Fausia i luga o mausa lelei sa e aoaoina i lau misiona, faaauau e faamalosi lau molimau, galue malosi, tatalo, ma ia usiusitai i le Alii. Faamamalu i feagaiga ua uma ona e osia. Faaauau e faamanuia ma auauna atu i isi.”

O le mea lea aua ne’i faamamuluina lou malosiaga! Auauna atu pea—fesili atu i lou epikopo mo se valaauga, mafaufau e auauna atu o se tagata faigaluega o le malumalu, pe vaavaai mo ni auala e auauna atu ai i lou aiga, uarota, po o le alalafaga. Na fesoasoani lau misiona e tapena ai oe mo se olaga atoa o le auauna atu i le Alii.

O le isi, e tatau ona e mautinoa e saili ni uo lelei o e o le a fesoasoani ia te oe e faamasani ai i le olaga pe a mae’a le misiona a o tumau faamaoni i le talalelei. O au uo tuai atonu o loo i ai i laasaga eseese o le olaga, o lea atonu e te lagona ai e tatau ona e toe amata i le faia o uo. Ae e mafai ona avea lenei mea ma se avanoa lelei—o lau filifiliga o uo e aafia ai lou olaga e sili atu nai lo le mea e te iloaina. Saili i latou o le a fesoasoani ia te oe e faaauau pea ona ola i le talalelei.

O se faufautua—o se epikopo, faiaoga, po o se matua—e mafai foi ona fesoasoani e taialaina oe. Saili se tasi e sili atu lona malamalama nai lo oe ma aoao mai ia i latou, pe i le talalelei, o le matata e te fiafia i ai, po o se mea e te fiafia i ai. O le toatele o tagata o le a fiafia e faasoa atu lo latou silafia ia te oe, ma o lesona latou te aoao atu e mafai ona avea ma nisi o meafaigaluega sili i le olaga. O le a faamanuiaina oe e ala i lo latou faufautua, ma o le a faamanuiaina i latou mo le faasoaina atu o lo latou malamalama.

Ma le mea mulimuli, ia i ai se faamoemoega i le mea e te tuu ai lou faatuatua. Na aoao mai Peresitene Russell M. Nelson: “O mea lelei uma i le olaga—o faamanuiaga uma taua e faavavau e mafai ona maua—e amata i le faatuatua.”

Ua ou filifili e tuu atu lo’u faatuatua i le Atua, o le ua ofoina mai ia te au le olioli e faavavau. A o ou faia ni filifiliga e i ai faamoemoega e faalatalata atili atu ai i le Atua, sa ou lagonaina Lona mana i ni auala e sili atu nai lo mea na ou oo i ai i la’u misiona.

Ia manatua, e alofagia oe ma e mafai ona e faia lenei mea! A o e faatinoina le faatuatua i le Tama Faalelagi, o le a Ia faaali atu ia te oe le olioli e sili atu nai lo lou malamalama. Atonu e te manatu ua e vaai i mea uma e mafai ona faia e le Atua mo oe, ae ou te folafola atu ia te oe, e te le’i vaai lava i se mea.

Alofaaga,

Henry