3 Auala e “Saili ai le Aoaoina” (E Le Aofia ai le A’oga)

O le a se tomai o le olaga e te le’i aoaoina? O nisi nei o vaega o le olaga e mafai ona e faalauteleina ai ou tomai:

• Tomai i le aiga (kuka po o le sauniuniga o meaai, faatauga o meaai i se paketi, faatulaga ma faavasega ma le aveeseina o mea tuai ma le toe aoga, tausia o laau po o se togalaau)

• Tomai faalegaluega (fesootaiga faaletagata ma le fausiaina o sootaga faapolofesa, fausiaina o se talaaga o tomai ma aafiaga faalegaluega, umiaina ma le faagaoioia o se pisinisi, tusia o imeli)

• Tomai tautupe (paketiina, sefeina, ma le teu faafaigaluega o tupe; totogiina o lafoga; fuafuaina mo le litaea)

• Tomai faafesoota’i (faalogologo ma le mataalia, fofō o fete’ena’iga, lagona maufetuuna’i, tautala i nofoaga faitele)

• Tomai faatino (tausiga o taavale, uila, po o le fale; faaaogaina o meafaigaluega; suisui masani; fesoasoani muamua)

• Tomai fiafia (vulu lalaga, aoaoina o se mea faifaaili, pueina o ata, vali)

Fai atu i se matua, uo, tagata o le uarota, po o se taitai o le Ekalesia e fautuaina oe i se tomai fou o le olaga. Mafaufau e auai i se tasi o kosi o le ola tutoatasia le Ekalesia.

I o tatou olaga atoa, e mafai ona tatou oo i tulaga maualuluga faaleagaga faapea foi ma tulaga maualalo faaleagaga. Ae po o fea lava e te i ai i lau malaga, o le faateleina o lou malamalama i le talalelei o se auala taua i taimi uma e “saili ai le aoaoina” i lou olaga atoa.

O le faatomuaga i le tusi lesona Sau, Mulimuli Mai ia te A’u ua fai mai: “O le faamoemoega uma o le a‘oa‘o mai ma le a‘oa‘o atu o le talalelei o le faalolotoina lea o lo tatou liua i le Tama Faalelagi ma Iesu Keriso, ma fesoasoani ai ia tatou e avea atili ai e faapei o i Laua. Ona o lea mafuaaga, pe a tatou suesue i le talalelei, e le na ona tatou vaavaai mo faamatalaga fou, ae tatou te mananao e avea o se ‘tagata fou’ (2 Korinito 5:17).”

O nisi nei o auala e mafai ona e faalolotoina ai lou liua i le Tama Faalelagi ma Iesu Keriso e ala i le aoaoina o le talalelei:

• Suesue i le soifuaga ma uiga o Iesu Keriso

• “Aoao e uiga i le Atua ma le auala e galue ai o Ia.”

• Auai i le inisitituti

• Alu i le malumalu pe afai e te mafaia

• Suesue i upumoni o loo aoaoina i faaeega paia o le malumalu

• Suesue i feagaiga o le malumalu ua e osia pe manao e osia

• Faaleleia atili au suesuega o tusitusiga paia e ala i le Sau, Mulimuli Mai ia te Au po o Autu ma Fesili i le Gospel Library

O le atiina ae o tomai o le olaga ma le faaleleia atili o au suesuega o le talalelei o auala uma ia e mafai ona e saunia ai mo le isi mea o le a sosoo ai. Ae o loo i ai isi vaega o le avea ma tagata matutua o le a i ai se aso o le a tatou fetaiai ai pe faamoemoe e oo i ai e mafai ona tatou saunia mo le taimi nei!

O nisi nei o faataitaiga:

• Faaipoipoga (suesue i mataupu faavae o le faaipoipoga e faavavau, ao mai upusii o konafesi aoao e uiga i le faaipoipoga, talosaga atu mo se fautuaga mai ulugalii faaipoipo e te faamemelo i ai, saunia mo sootaga vavalalata faalefeusuaiga e ala i le aoaoina o oe lava e ala i punaoa musuia e faavae i le faatuatua po o taitai faatuatuaina)

• Tulaga faamatua (suesue i tina ma tama i tusitusiga paia, auai i se vasega faamatua, talanoa i isi matua, faitau lauga o konafesi aoao e uiga i tulaga faamatua)

• Faasolosolo matua ma le soifua maloloina (aoao i meaai talafeagai, aoao auala fou e faamalositino ai, aoao metotia autu o le fesoasoani muamua)

Po o a lava ou tulaga i le olaga, e finagalo le Tama Faalelagi ma Iesu Keriso ia e tuputupu a’e lou malamalama ma le faatuatua ina ia “mafai ona outou saunia i mea uma pe a Ou toe auina atu outou e faalautele le valaauga ua Ou valaauina ai outou, ma le misiona ua Ou tofia ai outou” (Mataupu Faavae ma Feagaiga 88:80).

O loo i ai se faamoemoega a le Tama Faalelagi mo oe. A o e taumafai e faatuina se olaga atoa o le aoaoina, pe i totonu o se potuaoga po o fafo atu, o le a Ia faamanuiaina au taumafaiga ma taitai atu oe i le mea e finagalo o Ia e te i ai.