Mai AM Faalevaiaso
Faamanuiaga Moni ma Faaleagaga: Folafolaga mai o Tatou Taitai e uiga i le Ola Tutoatasi
O loo polopolo e le Tama Faalelagi faamanuiaga mo i tatou pe a oo ina tatou gafatia ma tutoatasi.
O le fasifuaitau o le ola tutoatasi atonu e le o taimi uma e faaosofia tatou e mananao e osooso ai i le olioli.
E mafai ona manatua ai mea e pei o le paketiina, totogiina o pili, po o le mauaina o se galuega, o nei mea uma e mafai ona avea ma mataupu e popolevale ai. Ae o le faia o osigataulaga i le taimi nei e atiina ae ai le ola tutoatasi, o le mea moni lava o se tasi lea o auala sili e tausia ai i tatou lava. E mafai ona fesoasoani ia i tatou i vaega uma o o tatou olaga—faalelagona, faaletino, ma le faaleagaga.
O nisi nei o upu mai o tatou taitai musuia e uiga i faamanuiaga o le ola tutoatasi:
Faamanuiaga Faalelagona
“E tatau ona tatou manatua afai tatou te faia mea faigofie i le asō, e tatau ona tatou faia mea faigata i le lumanai, ae afai tatou te naunau e faia mea faigata i le taimi nei, atonu o le a sili atu ona manuia ma faigofie lo tatou lumanai.”
Elder Frederick Kamya, Fitugafulu Eria, “Ola Tutoatasi,” Liahona, Sete. 2023, Itulau Lotoifale i Aferika Tutotonu, Gospel Library.
“O le a faamanuiaina oe i se faamoemoe, filemu, ma le alualu i luma sili atu.”
Tupe Patino mo le Ola Tutoatasi (2016), Gospel Library.
“O le mataupu faavae o le faalagolago o le tagata ia te ia lava po o le tutoatasi patino o se autu faavae lea i le ola fiafia.”
Peresitene Boyd K. Packer (1924–2015), “Solving Emotional Problems in the Lord’s Own Way,” Ensign, May 1978, 91.
Faamanuiaga Faaletino
““A o tatou saili ia saunia faaletino, e mafai ona tatou fetaiai ma tofotofoga o le olaga faatasi ai ma le mautinoa faateleina, filemu i o tatou loto ma, faapei o Iosefa i Aikupito, o le a mafai ona faapea atu, e ui i tulaga popole ‘Sa i ai mea ‘ai’ [Kenese 41:54].”
Epikopo W. Christopher Waddell, Fesoasoani Muamua i le Au Epikopo Pulefaamalumalu, “Sa i ai le Areto,” Liahona, Nov. 2020, 45.
“A tatou faateleina le maualuga o lo tatou lava faalagolago ia i tatou lava, ua tatou faateleina lo tatou gafatia e fesoasoani ai ma auauna atu i isi i le auala na faia ai foi e le Faaola.”
Silvia H. Allred, fesoasoani muamua talu ai i le Au Peresitene Aoao o le Aualofa, “O le Ute o le Avea ma Soo,” Liahona, Me 2011, 85.
”E oo mai faamanuiaga pe a tatou usitai i fautuaga a perofeta ma ola e tusa ma mea ua tatou maua, aloese mai aitalafu e le manaomia, ma faataatia ese ia lava mea e manaomia o le olaga e tausi ai i tatou lava ma o tatou aiga mo le le itiiti ifo ma le tausaga. Atonu e le faigofie i taimi uma lenei mea, ae ia tatou faia le ‘mea sili,’ tatou te mafaia ma o le a le uma a tatou faleoloa—o le a ‘lava ma totoe’ [Mataupu Faavae ma Feagaiga 104:17].”
Epikopo Keith B. McMullin, sa avea ma Fesoasoani Lua i le Au Epikopo Pulefaamalumalu, “Ia Saunia … Ia Outou Faamalolosi Mai le Taimi Nei Atu i Luma,” Liahona, Nov. 2005, 12.
Faamanuiaga Faaleagaga
“O le faatelelina o lo tatou ola-tutoatasi—faaletino, faalelagona, ma faaleagaga—o le faateleina foi lena o lo tatou saunia e tetee atu i sauaga lē fo’i a Satani.”
Peresitene Russell M. Nelson, “Fetaiai ma le Lumanai i le Faatuatua,” Liahona, Nov 2020, 75.
“O le taumafai ia ola tutoatasi o se vaega o la tatou galuega i luga o le ala o feagaiga e toe taitai atu ai tatou i le Tama Faalelagi ma Lona Alo, o Iesu Keriso. O le a faamalosia ai lo tatou faatuatua ia Iesu Keriso ma fusia fiafia ai i tatou ia te Ia e ala i feagaiga ma sauniga o le faaolataga ma le faaeaga.”
Elder Hugo E. Martinez o le Fitugafulu, “Aoao Atu o le Ola Tutoatasi i Tamaiti ma le Autalavou,” Liahona, Me 2022, 95.
“Afai tatou te faia la tatou vaega, o le a fesoasoani mai o Ia. O Ia o lē na afio i lalo ifo o mea uma o le a afio mai e fesoasoani ia i tatou. O le a Ia faamalosia ma sapasapaia i tatou. O le a Ia faamalosia i tatou i o tatou vaivaiga ma faamalosia i tatou i o tatou mafatiaga. O le a Ia faia mea vaivai ia avea ma mea malolosi. Pau lava le mea e tatau ona tatou faia o le tatalo ona fai lea o le mea sili tatou te mafaia i aso taitasi, ma tuu le vaega o totoe i Ona lava aao.”
Elder Frederick Kamya, Fitugafulu Eria, “Ola Tutoatasi,” Liahona, Sete. 2023, Itulau Lotoifale i Aferika Tutotonu, Gospel Library.
Fa’alagolago atu iā Keriso
O au taumafaiga ina ia ola tutoatasi o le a aumaia ai ia te oe faamanuiaga silisili ma faatagaina ai oe e olioli mulimuli ane ona o sauniuniga ua e faia i le asō.
A o e galue e faateleina lou ola tutoatasi, ia manatua po o ai e mafai ona e faalagolago i ai ma le saogalemu. Na molimau mai Elder Ricardo P. Giménez o le Fitugafulu, “Ou te iloa afai tatou te faia le mea sili tatou te mafaia ma faalagolago ia Iesu Keriso ma Lana Togiola e fai ma o tatou sulufaiga, o le a faamanuiaina i tatou i le toomaga, faamafanafanaga, malosi, le gaoia, ma le filemu o loo tatou sailia.’”
O le mea e sili ona taua, ia filifili e faalagolago i le Faaola. Na te lē tuulafoaia lava oe.