Mai le AM Faalevaiaso
Sa Saisaitia A’u i Lo’u Tulaga Na Saunia e le Atua se Ala Agai i Luma
Ina ua tuua a’u ma lo’u tuagane ma le aitalafu a o ma matua, sa ma le iloa pe faapefea ona ma fausia se lumanai sili atu.
Ina ua maliu faafuasei lo matou tina, sa le gata ina ma faanoanoa ma lo’u tuagane—ae sa tuua i ma’ua e feagai ma se faafitauli tautupe.
Sa muamua maliu lo ma tama i ni tausaga, ma a o tausia i ma’ua e lo ma tina, sa tele taimi na ia nonoina atu ai tupe i isi i taimi o o latou puapuaga. Ae paga lea, o lona agalelei na mafua ai ona le lava lana tupe e totogi ai ana lava aitalafu, ma tuua ai i ma’ua ma lo’u tuagane e nafa ma le totogiina o ana nonogatupe.
Sa faamae’aina pea a ma suesuega ma e lei amata ona ma galulue, o lea sa ma popole ai e uiga i le totogiina o le aitalafu a o ma totogiina foi a ma tupe faaalu faalemasina.
Sa ma le iloa le mea e fai, o lea sa ma liliu atu ai i le Tama Faalelagi mo se fesoasoani.
Sailia o le Ala i Luma
Ina ua mavae le tele o tatalo, sa ma lagonaina ma lo’u tuagane le musuia e fesili atu mo se fautuaga tautupe mai uo o e sa lelei i le paketiina. Sa ma mafaufau e faatau atu lo ma fale ona sa le lava se ma tupe e totogi ai ma a ma nonogatupe i masina taitasi. Ae faatasi ai ma la latou fesoasoani, na matou filifili ai e faatau atu ni mea taua i lo matou fale e totogi ai tupe seia oo ina ou faauu ma maua se galuega.
I se isi itu, sa lava a matou tupe e totogi ai a matou nonogatupe.
E ui lava i lenei vavega, ae o nisi taimi sa ou lotovaivai lava. Sa ou galue malosi ma sa ou manao e agai i luma i lo’u lava olaga. Sa i ai a’u lava miti, e aofia ai le auauna atu i se misiona, lea na foliga mai e le mafai e tusa lava pe mafai ona ma totogiina lenei aitalafu.
Sa ou tatalo i le Tama Faalelagi ma ta’u atu ia te Ia o’u lagona e fia alu e talai. Sa ou folafola atu ia te Ia o le a ou faia soo se mea ou te mafaia mai la’u piltolaau ina ia taunuu, ma sa ou ole atu ia te Ia e faaali mai ia te au le ala ina ia mafai ona ou alu e auauna atu.
Sa i ai sa’u molimau e uiga i le ola tutoatasi ma le sefuluai, ae sa matuai faaosoosoina lava ia le totogiina atoa le sefuluai sei vagana ua uma ona ma totogiina le ma aitalafu. Ae sa ou taumafai e manatua faamanuiaga folafolaina o le faamuamua o le Alii, ma sa ma totogiina le aofaiga atoa (tagai i le Malaki 3:10–11). Sa ou maua foi le faamoemoe i upu nei mai le Alii: “O lo’u faamoemoega o le tausia o la’u au paia, aua o a’u mea uma” (Mataupu Faavae ma Feagaiga 104:15).
Mulimuli ane, sa ou faalagolago pea i le taimi a le Tama Faalelagi, faataitai le onosai, ma talitonu e popole o Ia i lo’u olaga.
O le Galue Malosi ma le Fesoasoani Faalelagi e Aumaia ai Vavega
Mulimuli ane, na maua foi e lo’u tuagane se galuega ina ua uma ona faauu. Sa faaauau pea ona ma faaeteete i tupe faaalu, ma tuu soo se tupe faaopoopo sa i ai i le aitalafu e foliga mai e le uma.
Ina ua mavae le fa tausaga, na ma totogiina ai le matou pemeni mulimuli i le nonogatupe. Sa le mafai ona ou talitonu i ai—sa mafai ona ma ola, faamae’a a ma’ua aoga, ma totogi nei aitalafu i le taimi faatulagaina. Sa faasaolotoina le le toe lagonaina o lena avega tautupe i luga o o’u tauau. Sa ou iloaina sa fesoasoani mai le Tama Faalelagi ia i matou.
O se vavega lava.
E ala mai i lenei aafiaga, sa ou aoaoina ai o le a faalauteleina e le Alii a tatou taumafaiga pe a tatou maua le faatuatua ma galulue malosi. E pei ona Ia folafolaina mai ia i tatou, “O le a ou i ai i lo itu taumatau ma lou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” (Mataupu Faavae ma Feagaiga 84:88).
Ina ua foliga mai ua ou le gafatia o’u tulaga, sa saunia e le Alii se ala (tagai i le 1 Nifae 3:7).
Fa’atalitali i le Alii ma le Onosa’i
I le avea ai ma talavou matutua, o nisi taimi atonu tatou te faatalitali i le Alii mo se suiga i o tatou tulaga. Atonu o loo tatou feagai ma tauiviga i o tatou aiga, saili mo se galuega po o se avanoa fou, pe na o le manaomia moni lava e iloa po o fea le isi mea e agai atu i ai. Ou te le iloa pe aisea e tatau ai ona tatou faatalitali mo faamanuiaga i nisi taimi, ae ou te iloa e silafia e le Tama Faalelagi o tatou tulaga ma o tatou manaoga.
Ina ua mavae a’u taumafaiga faifai pea ma vavega a le Alii, sa iu lava ina mafai ona ou auauna atu i se misiona. O le taimi na ou iloa ai o lenei mea sa mafai ona ou faia sa o se vavega tele. Ou te le’i vaai i se auala e ono tupu ai lenei mea, ae sa ou iloaina ua tali mai a’u tatalo.
Sa fautua mai Peresitene Jeffrey R. Holland, Sui Peresitene o le Korama a Aposetolo e Toasefululua:
“Ia, sagai atu i ai ma faafetaia’i ou lava luitau ma le iloa, o le i ai o le faatuatua, o le a sologa lelei ai mea i le iuga.
“… Ou te faamanuia atu ia te outou, ai’oi atu ia te outou, ia tumau ma le onosai e pei ona maua e lo outou Tama oi le Lagi, i Lona poto, le ala sili e tuuina soo atu ai ia te outou mea tou te ole atu ai, ae ia tuuina atu pea ia te outou i taimi uma mea tou te manaomia.”
O lo’o ou taumafai pea e mafaufau po o fea e soso’o ai i le olaga. O nisi taimi pe a tatou faatalitali i le Alii, e mafai ona faigata ona tatou iloa Lona aao i o tatou olaga. Ae ou te iloa faatasi ai ma le faatuatua e le faavaivaia ia te Ia, o le a e iloa ai e le o toesea o Ia—e le mou atu o Ia i taimi e te manaomia ai. Nai lo lena, o loo faatasi o Ia ma oe, e taialaina oe i le laasaga e tasi i le taimi, agai atu i le lumanai sili atu o loo e galue ai.
Talitonu o le a Ia saunia se ala agai i luma. Sa Ia faia mo a’u.