“O Lo’u Faamanuiaga Faapeteriaka: Taiala a le Atua i le Fausiaina o le Olaga sa Ou Faamoemoe I Ai,” Liahona, Aok. 2025.
Mai AM Faalevaiaso
O Lo’u Faamanuiaga Faapeteriaka: Taiala a le Atua i le Fausiaina o le Olaga sa Ou Faamoemoe I Ai
O laasaga uma lava ou te faia e taialaina e lo’u faatuatua i folafolaga na ou mauaina.
A o [ou] ola ae i Ghana, sa faatumulia la’u malaga i le aoga maualuga i faafitauli.
O le tele o aoga maualuluga i lena taimi sa manaomia ai le pili aoga, ma sa tauivi lo’u aiga i mea tautupe. Sa ofo mai ma le agalelei le uso o lo’u tamā e lagolago la’u aoga, ma faatagaina au e siitia atu faatasi ma ia ma faaauau a’u aoga. Peitai, sa taatele faafitauli tautupe, ma e lēi mafai i taimi uma e le uso o lo’u tamā ona totogiina a’u pili. O le le totogia na oo atu ai i le auina atu o a’u i le fale, lea na avea ai ma le faanoanoa ma mea moni i le tele o taimi, faatasi ai ma isi faasalaga.
I le lotolotoi o o’u tauiviga, sa masani ona ou lagonaina le lotovaivai a o ou vaavaai atu i isi tamaiti o i ai ni avanoa sili atu. Ae o nei luitau na avea ma tulaga mo se aafiaga na suia ai i lo’u olaga.
A o nonofo faatasi ma le uso o lo’u tamā ma lona aiga, sa latou faailoa mai ia te a’u Le Ekalesia a Iesu Keriso o le Au Paia o Aso e Gata Ai. Sa latou tuuto atu le taimi i vaiaso taitasi i afiafi faaleaiga, suesuega o tusitusiga paia, ma tatalo i aso taitasi. Ina ua mavae se tausaga o auai faatasi ma i latou i le lotu ma le seminare, i le 17 o o’u tausaga, sa ou faia ai le filifiliga paia e papatiso.
Taialaina e Lo’u Faamanuiaga Faapeteriaka
I tausaga mulimuli ane, a o ou auai i le Aoga Sa, sa ou aoao ai e uiga i faamanuiaga faapeteriaka ma lagona ai se manaoga faanatinati ia maua sea faamanuiaga. O le peteriaka, o Iosefa Viliamu “Billy” Johnson, o se soo faaaloalogia i le nuu o le Ekalesia ma o se tasi o uluai tagata liliu mai o Kana. Sa ou malaga i le lua itula e talosagaina la’u faamanuiaga ma toe foi mai i se masina mulimuli ane ma se loto matala e talia.
I le taimi o le faamanuiaga, sa lofituina a’u a o saunoa mai le peteriaka i ni malamalamaaga patino sa matuai logoitino loloto i totonu ia te a’u, ma faaalia ai se sootaga i lo’u olaga lea e na o le Atua lava e mafai ona iloa. Sa ou lagonaina Lona alofa ma le faamautinoaga e i ai so’u faamoemoega. O faitauga taitasi na sosoo ai o lo’u faamanuiaga na faamamafa mai ai le silafia vavalalata e le Atua o a’u ma le galuega paia e tatau ona ou faataunuuina.
Na oo ina ou iloaina e matua naunau lava le Atua i o tatou olaga, o i tatou o Ana fanau (tagai i le Roma 8:16) ma e i ai se faamoemoega paia. O lenei iloaina na musuia ai au e faatumauina lo’u faamanuiaga faapeteriaka i le taumua o lo’u mafaufau, e faamanatu mai ai ia te au poloaiga ma folafolaga e fesootai ma lena faamanuiaga. O lo’u faamanuiaga faapeteriaka na uunaia ai la’u filifiliga e auauna atu i se misiona. O lenei aafiaga na matuai suia ai lo’u olaga, ma sa ou molimauina faamanuiaga na fofogaina mai e le peteriaka ia te au i le taimi atoa o la’u auaunaga.
Aua Le Fiu
Ina ua ou toe foi mai mai la’u misiona, sa ou naunau e mulimuli i le ala na faataatia mai i lo’u faamanuiaga faapeteriaka. O laasaga uma lava sa ou faia sa taialaina e lo’u faatuatua i folafolaga sa ou mauaina ma lo’u manao ia vaai i le faataunuuina. Sa ou iloaina afai ou te usiusitai i le Atua ma taumafai e ola i le ala na Ia finagalo ou te ola ai, o le a Ia taialaina au. E ui lava i faigata i le taimi o le kolisi, ae sa ou lagonaina le faamalosia o au e le Tama Faalelagi ma taitaiina au.
Mo i latou o loo tauivi ma aoaoga po o le faafoeina o faigata (aemaise lava i Aferika), ou te malamalama ia te outou. Sa ou savalia lena ala. Ou te malamalama i le mamafa o le le mautonu, ae ou te aioi atu ia te outou: Aua le fiu. E i ai pea lava pea le Alii, ua saunia e fesoasoani ia te oe e ui lava i tofotofoga e ono feagai ma oe. E pei ona aoao mai le Faaola, “Ia outou o mai ia te au, o outou uma o e tigaina ma mafatia i avega, o a’u foi e malolo ai outou” (Mataio 11:28).
Atonu e oo mai le fesoasoani mai punavai e lei faamoemoeina—pe o aiga, uo, po o taitai o le Ekalesia—ma ou te molimau atu e musuia e le Alii isi e lagolago Ana fanau. E taua le faatumauina o le faatuatua ia te oe lava ia ma le gafatia o loo i totonu ia te oe. O le galue malosi ma le naunautai, e mafai ai ona e faatoilaloina ou tulaga.
O lo’u faamanuiaga faapeteriaka, o se Liahona patino mo lo’u olaga, na faamanatu mai ai pea ia te au e tulimatai atu i le lumanai i aso e sili atu ona lelei. I le Alema 37, o loo faamatalaina ai le Liahona i se auala matagofie: “Sa galue mo [le aiga o Liae] e tusa ma lo latou faatuatua i le Atua” (fuaiupu 40). Ua faaalia ai i lenei mea le auala e mafai ai e o tatou faamanuiaga faapeteriaka ona taialaina i tatou pe afai tatou te faatumauina lo tatou faatuatua i folafolaga a le Alii.
E ui e le o faamanuiaga uma e mafai ona faataunuuina i lenei olaga, ae e mafai ona tatou maua le faamoemoe o le a faaalia mai nisi, ma o la tatou sailiga faamaoni o manaoga amiotonu o le a taitai atu ai i tatou i le olioli ma le faamalieina.
O Se Molimau o le Faatuatua ma le Tumau
I la’u malaga atoa, ua ou aoaoina ai e ui atonu e le o taimi uma e tuusao ai le olaga, ae o le faatuatuaina o le fuafuaga a le Tama Faalelagi e taitai atu ai i vavega patino. Pe a ou fetaiai ma faafitauli, ou te faalagolago atu i lenei upumoni ma faamalosia ai e ala i le faatuatua. Pe a tatou galulue i le faatuatua ma faia filifiliga atamai, e saunia e le Alii se ala mo i tatou. O taimi uma lava ou te lagona ai le lofituina po o le le mautonu, ou te manatuaina ai lenei folafolaga ma faamanatu mai ai o le faatuatua o le ki lea (tagai i le Mataio 17:20).
I taimi o le masalosalo, e masani ona ou toe mafaufau i le faamalosiauga o loo maua i le faitauina o lo’u faamanuiaga faapeteriaka. E musuia ai au e fetaomi atu i luma, ma le iloaina o taumafaiga uma e faia i le faatuatua o le a le aunoa ma le silafiaina e le Alii.
Pe a tatala o tatou loto i musumusuga, o le a tatou iloa ai o loo saunia pea e le Atua avanoa mo le tuputupu ae. A o tatou taitaia Lana galuega ma fausia Lona malo, e le o tuua na o i tatou.
A o faaauau pea ona ou taliaina le taitaiga o loo maua i lo’u faamanuiaga faapeteriaka, ou te tumau mausali i la’u tautinoga e mulimuli i le Faaola. A o tatou agai faatasi i luma, ou te uunaia outou ia pipiimau i o outou faamanuiaga ma le faamoemoe o loo faatusa i ai. O o tatou faamanuiaga faapeteriaka e avea o ni faamanatu paia o lo tatou taua ma le gafatia i le silafaga a le Atua.