O Se Mea na Aoaoina ai Au e Uiga i le Ola TutoatasiFaaleagaga i le Siitia Atu i se Atunuu Ese

Ina ua ou siitia atu, ou te le’i iloa se tasi ma sa le mafai ona ou tautala Igilisi. Sa ou lagonaina lo’u se, leai se sootaga, ma le tuua toatasi. Sa taufaafefe.

Ina ua ou faasoa atu i lo’u tina o’u popolega e uiga i le nofo ai i se isi atunuu, sa ia fautua mai ia te au, “Po o fea lava e te alu i ai, vaavaai mo le Ekalesia.”

O le mea tonu lava lena sa ou faia: Sa ou mauaina le falesa aupito lata ane ma maua ai la’u uarota. Ou te lei iloaina o lenei laasaga faigofie o le a avea ma se suiga i la’u malaga o le ola tutoatasi faaleagaga.

O lo’u Aso Sa muamua i lenei atunuu fou sa lofituina, ae o le faafeiloaia e tagata o la’u uarota fou o se vavega moni. Sa valaaulia au e se tasi o tuafafine ou te auai i le inisitituti, ma o lena mea, sa le gata ina ou faaleleia atili ai la’u gagana Peretania ae sa faalauteleina ai foi la’u li’o o uo.

Faafetai i le inisitituti, sa ou auai ai i se konafesi lata ane mo talavou nofofua matutua i le Ekalesia ma fesootai ai ma isi talavou matutua o e sa taumafai e ola i le talalelei.

Sa ou lagonaina moni lava le tuputupu ae o lo’u ola tutoatasi faaleagaga a o ou ola ai ma le agaga tatalo i a’u feagaiga, tagofia le faamanatuga i Aso Sa taitasi, ma auauna atu i isi.

E ui lava i nei faamanuiaga uma, ae sa ou feagai pea ma luitau.

O le galue o se tausitama e le’i sologa lelei e pei ona ou faamoemoeina. E le’i tausia e lo’u aiga talimalo le latou faaiuga o la matou konekarate, ma na iu ina ou filifili e saili se galuega fou ma se nofoaga e nofo ai.

Sa tele po sa ou le iloa po o fea ou te alu i ai. O le sailiga na foliga mai e le uma, ma o le feeseeseaiga ma lo’u aiga talimalo na mafua ai ona ou fesiligia mea uma.

Sa ou iloaina o le laasaga muamua lava o le tatalo lea i le Tama Faalelagi e uiga i lo’u tulaga. E pei ona aoao mai Elder Clement M. Matswagothata, Fitugafulu Eria: “Ia loto tatalo a o e vaavaai mo ni auala e ola tutoatasi ai. Ou te faamautinoa atu ia te outou o le a aumaia e le Tama Faalelagi ni manatu i lou mafaufau ma o le a faamanuiaina oe.”

O po uma lava, ou te liliu atu ai i le Tama Faalelagi i le tatalo, ma ole atu e le gata mo se auala e alu ese ai ae mo le malosi e galue ai i uunaiga. Sa ou iloa “E mate le faatuatua pe a leai ni galuega” (Iakopo 2:26).

Ina ua ou faasoa atu lo’u tulaga i uo i le uarota, sa ofo mai e se tuafafine ia te au se galuega faavaitaimi, e fesoasoani ia te au e sefe se tupe faaopoopo e tausi ai au lava ia. Sa ou matuai faafetai lava ona sa ou fesootai atu i la’u uarota ma sa mafai ona ou faalagolago ia i latou i lenei taimi faigata.

Mulimuli ane, sa ou maua ai se aiga talimalo fou i Iuta. Ina ua mavae le tele o tatalo, sa ou lagonaina malosi o le mea lenei e tatau ona ou i ai. Sa ou toe siitia atu, ma maua se uarota a le YSA lea e mafai ona faaauau ai ona ou auauna atu ma tuputupu ae.

O lenei aafiaga na aoaoina ai au o le ola faalagolago o le tagata ia te ia lava—faaleagaga pe faaletino—e le o lona uiga o le feagai ai ma mea uma na o i tatou. E pei ona aoao mai Elder Gerrit W. Gong o le Korama a Aposetolo e Toasefululua: “‘O le ‘ola faalagolago o le tagata ia te ia lava’ e le o lona uiga o le faalagolago ia i tatou lava. O le mea mulimuli, o lona uiga o le faatuatua ma le faalagolago i le Alii. O le ola faalagolago o le tagata ia te ia lava o se filifiliga tatou te faia e o mai i le Alii ina ia mafai ona Ia fesoasoani mai ia i tatou e fesoasoani i isi.”

E ala i le faatuatua ma le lotomaualalo, e mafai ai ona tatou lafoai o tatou vaivaiga, ma e mafai e le Alii ona “faia mea vaivai ia avea ma mea malolosi” (Eteru 12:27). O o’u vaivaiga na avea ma avanoa mo au e latalata atili atu ai i le Atua, ma faalagolago ia te Ia e fesoasoani mai ia te au “ia galulue, ia tu tutoatasi, ma ia avea e faapei o Ia.”

Soo se taimi lava ou te lagona ai le le mautonu po o le fefe i le lumanai, o le ave o le faamuamua o la’u sootaga ma le Tama Faalelagi ma Iesu Keriso e ala i le tatalo, fesootai ma o’u uso a soo, ma le faafouina o a’u feagaiga e fesoasoani ou te lagona ai le filemu.

O le toe tepa i tua i la’u malaga, ou te iloa ai o luitau uma o se avanoa mo le tuputupu ae faaleagaga. E pei lava ona tuputupu ae lo’u ola tutoatasi faaletino, sa tuputupu ae lo’u ola tutoatasi faaleagaga a o ou galue e faamalosia la’u sootaga ma le Atua.

Po o fea lava e ave i ai au i le olaga, ou te manatua pea le fautuaga a lo’u tina e vaavaai mo le Ekalesia—ia vaavaai mo Keriso. Ou te iloa o loo silafia lelei e le Tama Faalelagi ma Iesu Keriso lo’u tulaga. Po o fea lava ou te alu i ai, o le liliu atu ia i La’ua e faasino mai ai a’u i taimi uma i le itu sa’o.