Mai le AM Faalevaiaso
O Lo’u A’otauina Na Mafai ai Ona Ou Filifilia se Olaga e Tumu i le Aoaoina ma le Auauna Atu
O le tuua o lo’u motu mo se a’oa’oga sa i ai le lagona popole ma lofituina, ae sa aoga.
Sa i ai taimi sa ou manatu ai o le tulitulimatagauina o la’u aoga o le a le aogā.
Sa ou alu ese mai lo’u aiga e a’oga i le iunivesite. Ou te le’i nofo i se nofoaga saogalemu o le taulaga. Ma faatasi ai ma le popole uma sa ou oo i ai e uiga i lo’u saogalemu ma a’u tupe, sa ou le lagonaina faapea e tele ni mea sa ou aoaoina.
Ae o le mea lenei na ou iloaina: Ou te le’i faia lenei mea mo na o a’u lava. O lo’u a’otauina e sili atu nai lo a’u ma o’u aafiaga.
Iloaina o Lo’u Faitalia
Ou te sau mai Camotes, o se tamai motu i Filipaina. Ina ua tonu ia te au e auai i le kolisi ia avea o se faiaoga, sa ou siitia atu i Cebu, o se motu e telē atu, e lua itula le mamao e tietie ai i le vaa.
Ma mo sina taimi, sa ou popole tele i lo’u saogalemu. Sa tele le faaaogaina o fualaau faasaina ma solitulafono i le eria sa ou nofo ai, o lea o le alu mai lo’u fale i lea lotoa i aso uma o nisi taimi na faamalosia ai a’u e i ai i tulaga atuatuvale ma matautia, ma sa ou le maua le puipuiga a lo’u aiga.
I le taimi lea, sa i ai se upusii mai ia Peresitene Thomas S. Monson (1927–2018) na suia ai le auala na ou mafaufau ai e uiga i lo’u tulaga: “O faaiuga e filimaoti ai taunuuga.”
Sa ou mafaufau e uiga i mea faigata uma na tutupu ia te a’u, mea uma i fafo atu o la’u pule. Ae i le aluga o taimi, sa oo mai le manatu ia te au ua ou faia lenei filifiliga—sa ou filifili e alu ese mai lo’u aiga ma maua se aoaoga.
Filifili o se Olaga e Tumu i le Aoaoina ma le Auauna Atu
O lenei iloaina na mafua ai ona ou mafaufau pe aisea na ou faia ai lenei filifiliga. Ma sa vave ona oo mai le tali ia te au: Sa ou manao e avea ma se taitai i la’u paranesi. Sa ou manao e toe foi atu i lo’u nuu ma se malamalama sili atu. Sa ou manao e aoao tamaiti i Camotes ma uunaia i latou e saili avanoa e aoao ai e mafai ona fesoasoani ia i latou e faamanuia ai foi o latou nuu i le lumanai. O le taunuuga lena sa ou galue agai i ai.
Na aoao mai Peresitene Russell M. Nelson i se tasi taimi: “Aua e te fefe e tuliloa au sini—e oo lava i au miti! E leai se auala ‘alo e tau atu i le tulaga silisili ma le tomai. O le a’otauina o le eseesega lea i le va o le moomoo maimau pe ana mafai ona e fesoasoani atu i isi tagata ma le mafai ona e fesoasoani atu ia i latou.”
O lenei ua mae’a lo’u tikeri, ma ua ou toe ola i Camotes. Ou te aoaoina tamaiti i le vasega tasi ma le lua, ma o au foi o le fesoasoani muamua i le au peresitene o le Peraimeri a la’u paranesi, o lea ua sili atu ai ona ou faaaogaina la’u aoga nai lo le mea sa ou faamoemoeina. Ou te iloa le ala e onosai ai i nei tamaiti ma aoao i latou i mataupu faavae o le talalelei i se auala o le a latou malamalama ai. O aso uma lava ou te faafetai ai ona sa ou filifili ia a’otauina, e ui lava i le faigata o nisi taimi.
Afai o loo e tauivi ma le aoga, pe na o le lagonaina foi o le popole e uiga i lou tulaga o i ai nei, ia manatua e tumau latalata atu i le Tama Faalelagi ma Iesu Keriso. E mafai ona La’ua taialaina oe i avanoa e aoao ai o le a faamanuiaina ai lou olaga ma fesoasoani ia te oe e faamanuia ai isi. Ia manatua e le o tuua na o oe—La’ua te malamalama ia te oe, ma e toatele atu talavou matutua nai lo le mea e te iloa o loo i ai ia lava lagona ma faafitauli.
Ma ia manatua o au filifiliga e filimaoti ai lou taunuuga. Ua ia te oe le mana e filifili ai se olaga e tumu i le aoaoina ma le auauna atu.