Fakaʻilekitulōnika Pē: Kakai Lalahi Kei Talavoú
ʻI he Taimi Naʻe Faingataʻa ai ʻa e Moʻuí, Naʻá ku Maʻu ha Fakafiemālie ʻi he Seminelí mo e ʻInisititiutí
Talu ʻeku kau ki he Siasí mo ʻeku ʻalu ki he seminelí mo e ʻinisititiutí ke tanumaki mo fakamālohia ʻeku tuí.
Naʻá ku ʻiloʻi ʻa e ongoongolelei kuo fakafoki maí ʻi hoku taʻu 11.
Naʻe kau hoku ngaahi taʻoketé ki he Siasí ʻi heʻenau kei siʻí ka naʻe ʻikai ke nau toe maʻulotu. ʻI ha ʻaho ʻe taha naʻe ʻaʻahi ange ʻa e ongo faifekaú ki hoku taʻoketé ʻo fakaafeʻi ia ke foki mai. Naʻá ne fai ia, pea iku ke u ʻalu ai mo au ki he lotú, tali e ongoongoleleí, mo papitaisó.
Naʻe faingataʻa ʻa e ngaahi taʻu siʻi hono hokó ʻi ha ngaahi ʻuhinga kehekehe. Naʻá ku fetaulaki mo ha ngaahi hala fononga lahi naʻe fepaki mo e ngaahi akonaki ʻo e ongoongoleleí. Neongo naʻe poupouʻi ʻe heʻeku ongomātuʻá ʻemau maʻulotú, ka naʻe ʻikai ke na kau ki he Siasí pea naʻe ʻikai ke na maʻu ʻa e ngaahi tuʻunga moʻui tatau. Ko ia naʻe ʻikai ke ʻi ai ha fakavaʻe ʻi ʻapi ki he tupulaki fakalaumālié.
Lolotonga e taimi ko iá, naʻe tokoniʻi moʻoni au ʻe he ʻalu ki he seminelí mo e fetuʻutaki mo ʻeku kau taki ʻo e toʻu tupú ke u tekeʻi ʻa e ngaahi taimi faingataʻá mo tukupā maʻu pē ki he ongoongoleleí. Naʻá ku tupulaki fakalaumālie, koeʻuhí ko e ngaahi ngāue ʻa e kau faiakó mo e kāingalotu kehe ʻo e Siasí naʻa nau ʻofa ʻiate au mo tokanga ki heʻeku tupulakí.
Naʻe faifai pea fakalotolahiʻi au ʻe heʻeku palesiteni ʻo e Kau Talavoú mo e kau taki kehé, ke u ngāue fakafaifekau. Naʻe hoko ʻa e taʻu ʻe ua ko iá ko ha tāpuaki fakaofo kiate au mo ʻeku fakamoʻoní. Naʻá ku moʻui ʻaki e ngaahi meʻa kotoa pē naʻá ku ako ʻi he seminelí, pea naʻá ku vahevahe ʻa e ongoongoleleí mo ha kakai tokolahi.
Ka neongo ia, ʻi heʻeku foki ki ʻapí, naʻá ku fehangahangai mo ha ngaahi ʻahiʻahi faingataʻa ange.
Ko e Foki ki ʻApí mo e Ako ke Falalá
ʻE lava ke faingataʻa hono tauhi maʻu hoʻo tuí, fakamoʻoní, mo hoʻo tuʻunga fakalaumālie hili ʻa e ngāue fakafaifekaú. Ka ko e meʻa ʻe taha naʻá ne tokoniʻi au ke u tuʻu maʻu hili ʻeku ngāue fakafaifekaú ko e ʻinisititiutí.
Naʻá ku fokotuʻu ha taumuʻa ke u feinga ke ʻalu ki he ngaahi kalasi ʻinisititiutí he uike takitaha, pea naʻe mātuʻaki mahuʻinga ʻa e fili ko iá ki heʻeku moʻuí.
Naʻá ku kumi ngāue foki, ka naʻe ʻikai pē ha meʻa ia ʻe lelei. Naʻá ku maʻu ha loto-hohaʻa ʻi he ʻikai haʻaku ngāué, pea naʻe fakaafeʻi au ʻe haʻaku kaungāmeʻa ʻi ha taimi ʻe taha ke u ʻalu ange ʻo ngāue mo ia. Naʻe kau ʻi he ngāué ʻa hono tokangaʻi ʻo e sitoka ʻo e kava mālohí mo ngāue ʻi he ngaahi pō Tokonakí—ko e efiafi tatau ʻoku fakahoko ai ʻa e ʻinisititiutí, ko ia naʻá ku momou ke tali e ngāué.
Ne u talaange ʻikai ki hoku kaungāmeʻá, ka naʻá ne toutou fakaafeʻi pē au ke u ngāue mo ia. Naʻe ʻosi ʻeku paʻangá, pea ko ʻene ngāué pē hoku faingamālié. Ko ia naʻe kamata leva ke u fakakaukau ke tali ʻa e ngāué.
Naʻá ku fakakaukau ke u fehuʻi ki he Tamai Hēvaní pe ko e hā ʻoku totonu ke u faí. Naʻá ku ongoʻi hono fakamoʻoniʻi mai ʻe he Laumālié kapau he ʻikai ke u ʻalu ki he ʻinisititiutí, ʻe ngalingali vaivai ʻeku fakamoʻoní. Naʻá ku ongoʻi hono fakapapauʻi mai ʻe he Laumālié kiate au ʻoku ʻikai totonu ke u tali ʻa e ngāué, pea naʻe ʻikai ke u toe tali e fakaafe hoku kaungāmeʻá.
Naʻe ʻikai ke u fakapapauʻi pe ko e hā te u faí kapau he ʻikai vavé ni haʻaku maʻu ha ngāue, ka naʻá ku falala ki he hala fononga naʻe finangalo ʻa e Tamai Hēvaní ke u muimui aí.
ʻI he uike hono hokó ʻi he ʻinisititiutí, naʻá ku ako ai fekauʻaki mo ha ngāue ʻatā ko ha kouʻōtineita ʻo e moʻui fakafalala pē kiate kitá. Naʻá ku tohi kole, ʻinitaviu, pea maʻu ʻa e ngāué. ʻOku ou ʻilo naʻe ʻomi ʻe he ʻEikí ʻa e faingamālie ko iá maʻaku.
Ko e Feituʻu Kuó u Maʻu ai ʻa e Fiemālié mo e Mālohí
Kuo fakamālohia ʻeku tui kia Sīsū Kalaisí mo liliu ʻeku moʻuí ʻe he ngaahi aʻusia ne u maʻu lolotonga ʻeku ʻalu ki he seminelí mo e ʻinisititiutí, ʻo hangē ko ia ne talaʻofa mai ʻe Palesiteni Lāsolo M. Nalesoni ki he toʻu tupu mo e kakai lalahi kei talavou ʻo e Siasí: “Ko e hā leva ha meʻa ʻe tokoni atu ke ke hoko ai ko ha ākonga līʻoa ʻa Sīsū Kalaisi? Ko e taha ʻo e ngaahi talí ko e seminelí mo e ʻinisititiutí—ʻo ʻikai ko e maʻu kalasí pē ka ko e kau faivelenga ki he kalasí mo muimui faivelenga ʻi ha faʻahinga ngāue pē ne vahe atu.”
Talu mei heʻeku maʻu ha ngāué, ʻoku teʻeki pē ke faingofua ʻa e moʻuí. Ka ʻoku ou fakapapauʻi ke fakamuʻomuʻa ʻa e ʻEikí mo ʻalu ki he lotú, pīkitai ki he Tohi ʻa Molomoná, fakahoko totonu hoku uiuiʻí, maʻu ʻa e sākalamēnití, pea ʻalu ki he ʻinisititiutí. ʻOku tokoni ʻa e ngaahi meʻá ni ke u maʻu ha fiemālie, ʻo aʻu ai pē ki he taimi ʻoku faingataʻa ai ʻeku moʻuí. ʻOku ou houngaʻia ʻaupito ʻi he ngaahi maʻuʻanga tokoni kotoa pē ʻoku tau maʻu ʻi he ongoongolelei ʻo Sīsū Kalaisí!
ʻOku ou fakatauange ʻe lava ke tokoni atu ʻa e ʻinisititiutí ke ke maʻu ʻa e fiemālie mo e ʻamanaki lelei ʻi he Fakamoʻuí ʻo hangē ko ia kuó ne fai maʻakú.