Fakaʻilekitulōnika Pē
ʻOku Ou Hoko Nai ko ha Kaungāmeʻa ki he Fakamoʻuí ʻo Hangē ko Ia Kiate Aú?
ʻE lava ke tau maʻu pea mole hotau ngaahi kaungāmeʻá, ka ʻe lava ke tuʻuloa ʻo taʻengata hotau vā fetuʻutaki mo e Fakamoʻuí.
ʻOku ou ʻofa hoku ngaahi kaungāmeʻá.
Ko e taha ʻo e ngaahi konga ʻo ʻeku moʻuí ʻoku ou saiʻia taha aí ko ʻeku maʻu ha ngaahi ʻofaʻanga ʻoku nau ʻai au ke u kata, malimali, pea aʻu pē ʻo u tangi (ʻi ha ngaahi founga lelei).
Ka neongo ia, ʻi he fakalau atu ʻa e ngaahi taʻú, kuó u fakatokangaʻi ʻoku ʻikai tatau ʻa e ngaahi feohi fakakaungāmeʻá.
Ka ʻe lava ke haohaoa, taʻe-tūkua, mo taʻengata ha feohi fakakaungāmeʻa ʻe taha, pea ko hotau vā fetuʻutaki ia mo Sīsū Kalaisí.
ʻOkú Ne hoko maʻu pē ko e kaungāmeʻa lelei taha kiate aú, ka kuó Ne kole fēfē mai nai ke u hoko ko ha kaungāmeʻa mo ha ākonga lelei ange kiate Iá?
ʻOkú Ne Poupouʻi Koe ʻi he Taimi Leleí mo e Koví
ʻOku ou manatuʻi ha ngaahi taimi lahi kuo tokoniʻi ai au ʻe haʻaku kaungāmeʻa ʻofa ke hiki hake hoku laumālié lolotonga ha taimi faingataʻa. Naʻe ʻi ai foki mo haʻaku ngaahi kaungāmeʻa naʻa nau ʻamanaki mai ke u fuesia ʻenau ngaahi kavengá ka naʻe ʻikai ke nau fie tokoni mai kiate au.
ʻOku ʻikai ha taha ʻe haohaoa, kau ai au, pea kuo ʻi ai ha ngaahi taimi naʻá ku mei toe lelei ange ai pe ko hoku ngaahi kaungāmeʻá ʻi he fetokoniʻaki mo e feʻofaʻakí.
Ka ko e maluʻi ʻeni hotau vā fetuʻutaki fuakava mo e Fakamoʻuí—ʻi heʻetau tauhi ʻetau ngaahi fuakava ʻokú ne haʻi kitautolu kiate Iá, ko Ia hotau kaungāmeʻa haohaoa ʻi he leleí, koví, mo e meʻa kotoa pē ʻi he vahaʻá (vakai, Sione 15:14).
Naʻe fakamoʻoni ʻa Palesiteni Nalesoni ki he meʻá ni ʻi heʻene pehē, “Kapau ʻe liʻaki koe ʻe he meʻa kotoa pē mo e taha kotoa pē ʻi he māmani ʻokú ke falala ki aí, he ʻikai pē ke teitei liʻaki koe ʻe Sīsū Kalaisi mo Hono Siasí.”
Ko ha talaʻofa maʻongoʻonga ia!
ʻOku foaki ʻe ha ngaahi kaungāmeʻa ʻe niʻihi ʻo lahi ange ʻi he meʻa ʻoku nau maʻú. Ko e faʻahinga vā fakakaumeʻa ia ʻoku tau maʻu mo e Fakamoʻuí.
ʻOkú Ne tokoniʻi maʻu pē au, ka ʻoku fiemaʻu ke u manatuʻi ke u tafoki kiate Ia. ʻI heʻeku hoko ko ʻEne ākongá, mahalo ʻoku ʻikai ke u mateakiʻi maʻu pē ia ʻo hangē ko ia ʻoku totonu ke u faí pea ʻoku fiemaʻu ke u feinga mālohi ange. ʻI he taimi ʻoku tau tokanga ai ki hotau vā fetuʻutaki mo Iá, ʻe lava ke fakaloloto ange ʻetau tukupā mo e vā fetuʻutaki mo Iá.
ʻOkú Ne ʻAfioʻi Kānokato Koe
Mahalo kuo tau maʻu kotoa ha ngaahi maheni foʻou ʻoku tau momou ke vahevahe kakato mo moʻoni ki ai. Naʻe faingataʻa ʻi ha taimi lahi hono vahevahe ʻeku ngaahi faingataʻaʻiá, ongoʻi tailiilí, mo e ngaahi fakakaukau ʻoku kehé mo hoku ngaahi kaungāmeʻá. Naʻe ʻikai ke u ʻilo pe ʻe fēfē ha tali ʻa hoku ngaahi kaungāmeʻá kapau te nau ʻiloʻi ʻa hoku tuʻunga moʻoní, ʻa e ngaahi fehalaākí mo e meʻa kotoa pē.
Ka neongo ia, ʻoku finangalo ʻa e Fakamoʻuí ke tau haʻu ʻi hotau tuʻunga totonú. ʻOku mahino kiate Ia ʻa e ngaahi faingataʻa kotoa pē ʻoku tau fehangahangai mo iá, ko ia ʻokú Ne ʻafioʻi ʻa e founga ke tokoniʻi mo langaki fakafoʻituitui ai kitautolú (vakai, ʻAlamā 7:11–12).
Naʻe akoʻi ʻe Palesiteni Sefilī R. Hōlani, Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku finangalo [ʻa e Fakamoʻuí] ke tau haʻu kiate Ia, ke muimui ʻiate Ia, ke Ne fakafiemālieʻi kitautolu. Pea ʻokú Ne finangalo ke tau fakafiemālieʻi e niʻihi kehé. Neongo e tuai ʻetau ngaahi sitepu kiate Iá—neongo ʻoku ʻikai totonu ke teitei tuai—ka ʻoku ʻikai teitei tuai ʻene tokonia kitautolú.”
‘Oku ʻafioʻi mo ʻofeina kitautolu ʻe he Fakamoʻuí. Hangē ko ha kaungāmeʻa moʻoni, ʻokú Ne poupouʻi kitautolu ke tau fakalakalaka pea, ʻi Heʻene tokoní, te tau hoko ʻo lelei ange.
Te tau lava ʻo ʻiloʻi Ia ʻaki ʻetau ako kiate Ia ʻo fakafou ʻi Heʻene ngaahi akonakí, moihū ʻi he temipalé, fakahoko mo tauhi e ngaahi fuakavá, pea ʻi he lotu ki heʻetau Tamai Hēvaní.
ʻOkú Ne ʻOfa Haohaoa ʻIate Koe
ʻOku pehē ʻi he Sione 15:13, “ʻOku ʻikai ha tangata ʻe lahi hake ʻene ʻofá ʻi he meʻá ni, ke ne foaki ʻene moʻuí koeʻuhí ko hono kāingá.” ʻOku ongo ki hoku lotó ʻa e mahuʻinga kakato ʻo e feilaulau fakalelei ʻa e Fakamoʻuí ʻi he taimi kotoa pē ʻoku ou lau ai e foʻi moʻoni ko ʻení.
ʻI heʻeku ʻiloʻi naʻe finangalo lelei ʻa Sīsū Kalaisi ke mamahi mo foaki ʻEne moʻuí maʻakú, ko ha fakamoʻoni ia ki he ʻofa haohaoa ʻokú Ne maʻu kiate kitautolu takitahá.
Pea kiate aú, ko e ʻofá ʻa e uho ʻo e feohi fakakaungāmeʻa kotoa pē.
ʻI he taimi kotoa pē ʻoku tau fāʻofua, kakata pe tangi fakataha aí, ʻokú ne fakahaaʻi ʻa e manavaʻofa—“ʻa e ʻofa haohaoa ʻa Kalaisí” (Molonai 7:47). Ko e hā leva ha toe founga lelei ange ke manatuʻi ai ʻEne ʻofa ʻiate kitautolú mo fakahaaʻi ha ʻofa kiate Ia ʻaki ʻetau feinga ke hoko ko ha kaungāmeʻa ki he kakai kotoa pē? (Vakai, Sione 15:12.)
Ko ha Vā Fetuʻutaki Taʻengata
Neongo ʻe ʻi ai ha ngaahi vā fetuʻutaki te tau maʻu pea toe mole, ka ʻe tolonga ʻo taʻengata mo tupulaki hotau vā fetuʻutaki fuakava mo Sīsū Kalaisí ʻi heʻetau muimui kiate Ia mo kātaki ki he ngataʻangá (vakai, Tokāteline mo e Ngaahi Fuakava 14:7).
ʻI heʻeku hoko ko ha taha ʻoku ʻofa lahi ʻi hoku ngaahi kaungāmeʻá, tautautefito ki hoku Fakamoʻuí, ʻoku fiefia ai hoku laumālié.
ʻOku ou fakatauange te tau lava ʻo hokohoko atu hono ako e lahi ʻo ʻEne ʻofá, poupoú, mo fakamahuʻingaʻi hotau vā fetuʻutaki mo Iá pea fakakaukau ki he founga te tau lava ai ʻo fakahaaʻi lelei ange ʻEne ʻofá. Hangē ko ha faʻahinga feohi fakakaungāmeʻa fakaʻofoʻofa pē, ʻe fakafonu ʻetau moʻuí ʻe ha vā fetuʻutaki mālohi mo Ia ʻaki ha fiefia mo ha taumuʻa pea tokoni ke tau vahevahe ʻa e fiefia ko iá mo e niʻihi kehé.