Fakaʻilekitulōnika Pē: Kakai Lalahi Kei Talavoú
ʻOku ʻIkai ko ha Tūkiaʻanga ʻa e Fono ʻo e Angamaʻá—Ko ha Tāpuaki Ia!
ʻOku nofo ʻa e tokotaha naʻá ne faʻú ʻi ʻIulanipata, Mongokōlia.
Naʻe hangē naʻe fiefia ange ʻa e kakai naʻe ʻikai ke nau tauhi e fono ʻo e angamaʻá ʻiate au.
Kuó u hoko maʻu pē ko ha tokotaha fie ʻilo lahi ange.
ʻI heʻeku tupu haké, naʻá ku maʻu ha ngaahi fehuʻi lalahi fekauʻaki mo e founga naʻe fakatupu ai ʻa e māmaní, founga naʻe fakatupu ai ʻa e moʻui ʻa e tangatá, pea mo e ʻuhinga ʻoku tau ʻi he palānite ai ko ʻení. ʻI heʻeku ako mo tali ʻa e ongoongolelei ʻo Sīsū Kalaisí ʻi hoku taʻu 14, naʻá ku maʻu ha ngaahi tali lahi mo ha ʻuhinga lahi ange ki heʻeku moʻuí. Naʻá ku fai hoku lelei tahá ke tauhi e ngaahi fekau ʻa e ʻOtuá mo ongoʻi ʻa e fiefia moʻoní ʻi hono moʻui ʻaki e ongoongoleleí.
Naʻe hokohoko atu ʻeku fakalakalaká ʻi ha ngaahi founga fakafiefia lahi—naʻá ku ngāue fakafaifekau, hū ki he ʻunivēsití, mo ha ngaahi meʻa lahi ange. Ka ʻi he ofi ke u taʻu 30, naʻá ku loto-foʻi ʻi he teʻeki ke u maʻu ha faingamālie ke malí. Neongo naʻá ku mamata ki ha kakai tokolahi ne mau feohi ʻoku nau fili ke moʻui ʻo fehangahangai mo e fono ʻo e angamaʻá, ka naʻá ku tuʻu maʻu ʻi heʻeku tukupā ke tauhi ʻeku ngaahi fuakavá mo teuteu ki ha mali temipale.
Naʻá ku tui ʻoku maʻu ʻa e fiefiá mei he talangofuá (vakai, Mōsaia 2:41). Ka ʻi heʻeku vakavakai holo ki hoku ngaahi kaungāmeʻa naʻa nau fili ke ʻoua te nau tauhi ʻa e fono ʻo e angamaʻá, naʻe hangē ʻoku nau fiefia ange ʻiate aú. Naʻa nau maʻu ha ngaahi aʻusia foʻou ʻi he teití mo e ngaahi vā fetuʻutakí, pea naʻá ku ongoʻi ʻoku taʻetotonu. ʻI heʻeku hoko ko ha taha fie ʻilo lahi ange mo ako leleí, naʻá ku loto-foʻi ʻi he ngali fakapotopoto mo matuʻotuʻa ange hoku ngaahi kaungāmeʻá he taimí ni ʻiate aú.
Naʻe kamata ke siʻisiʻi ange e ongo ʻa e ngaahi fekaú ʻo hangē ha tāpuakí ka naʻe hangē ia ha tūkiaʻanga ʻokú ne taʻofi au mei heʻeku moʻui lelei tahá.
Naʻe fakataueleʻi au ke u mavahe mei he fakakaukau ʻo e mali temipalé mo ha moʻui ʻoku fakatefito ʻi he ongoongoleleí hili ha kiʻi taimi siʻi. Naʻe hangē ne fuʻu faingataʻa ke tauhi e fono ʻo e angamaʻá ʻi he taimi naʻe ʻākilotoa ai au ʻe ha māmani naʻe ʻikai ke tatau ʻene vakai ki he feohi fafale fakaesinó ʻo hangē ko ʻeku vakaí.
Tokanga Taha ki he “ʻUhingá”
ʻI he taimi naʻá ku faingataʻaʻia lahi taha aí, naʻe vahevahe mai ʻe heʻeku faiako ʻinisititiutí ha talanoa fekauʻaki mo ʻene maʻu meʻatokoni efiafi fakataha mo e kau faifekaú. Naʻá ne vahevahe ʻa e founga naʻe teuteu mo kau kotoa ai hono fāmilí ki he fakakaukau fakalaumālie naʻe vahevahe ʻe he ongo faifekaú.
ʻI he mōmeniti ko iá, naʻá ku fakatokangaʻi ʻoku mahulu hake ʻi ha toe meʻa, ʻeku fiemaʻu ke ohi hake ha fāmili ʻe lava ke mau fiefia fakataha ʻi he ngaahi tāpuaki ʻo e ongoongoleleí.
Naʻe mahino e ngaahi meʻá hono kotoa. Naʻe ʻikai taʻofi au ʻe he fono ʻo e angamaʻá mei heʻeku aʻusia ʻa e meʻafoaki ʻo e tōʻonga fakasekisualé—ko ha tāpuaki ia ʻokú ne fakahinohino au ki he temipalé mo hoku fāmili taʻengatá.
Naʻe akoʻi mai ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku hala nai ke ʻi ai ha ngaahi lao? ʻIkai. ʻOku tau fiemaʻu kinautolu ʻi he ʻaho kotoa pē. Ka ʻoku hala ke nofo taha pē ʻi he ngaahi laó kae ʻikai ke nofo taha ʻi he Fakamoʻuí. ʻOku fie maʻu ke ke ʻiloʻi e ngaahi ʻuhingá mo e ngaahi foungá, pea toki fakakaukauʻi leva ʻa e ngaahi nunuʻa hoʻo filí.”
ʻI he taimi naʻá ku manatuʻi ai ʻa e Fakamoʻuí mo ʻEne feilaulau maʻakú, naʻá ku fakakaukau ʻe mahuʻingamālie ʻeku tatalí mo e ngaahi tāpuaki ʻo hono tauhi ʻeku ngaahi fuakavá, kau ai ʻa e fono ʻo e angamaʻá mo e mali ʻi he temipalé. ʻOku ʻikai fekauʻaki ʻa e fiefia moʻoní mo hono fai ha meʻa pē ʻokú ke fiemaʻu. ʻOku fekauʻaki ia mo e moʻui taau ke maʻu ʻa e takaua ʻo e Laumālie Māʻoniʻoní.
ʻE lava ke ʻi ai mo ha ngaahi meʻa kehe ʻi he taimi ʻoku tau ongoʻi ai ʻoku ʻahiʻahiʻi kitautolu ke tau maumauʻi ʻetau ngaahi fuakavá. ʻOku ʻikai faingofua maʻu pē hono moʻui ʻaki e ongoongoleleí! Ka ko e ngaahi fuakava ʻoku tau faí mo e ngaahi fekau ʻoku tau tauhí naʻe fokotuʻu ia ʻe ha Tamai Hēvani ʻofa ʻa ia ʻokú Ne finangalo ʻa e lelei tahá maʻatautolu. Te tau lava ʻo falala ʻokú Ne ʻafioʻi ha meʻa lahi ange ʻi he meʻa ʻoku tau maaʻusiá pea ʻe tataki maʻu pē kitautolu ʻe he muimui kiate Ia kae ʻikai ko e māmaní, ki he fiefiá.
Falala ki he Taimi ʻa e ʻOtuá
ʻOku ou ongoʻi houngaʻia ʻi heʻeku maʻu ʻa e ʻofá kimuí ni mai peá u mali ʻi he temipalé. ʻOku ou fiefia naʻá ku līʻoa ki he ngaahi fekaú koeʻuhí ke u lava he taimí ni ʻo fiefia ʻi he ngaahi tāpuaki ʻo e mali taʻengatá.
Ko e moʻoni, ʻoku ʻikai ngāue ʻa e talangofuá ʻo hangē ha mīsini fakatau atú. ʻOku ʻikai ke tau maʻu ha tāpuaki pau hili pē hono tauhi ha fekaú. Pea hangē ko e fakamatala ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻE ʻi ai e ngaahi tāpuaki ʻe niʻihi ʻe hoko vave mai, ko e niʻihi ʻe hoko tōmui, pea ko e niʻihi ʻe toki hoko ʻi langi; ka ko kinautolu te nau tali lelei e ongoongolelei ʻo Sīsū Kalaisí, ʻe hoko ia”
ʻOku ʻi ai ʻeku fakamoʻoni ʻoku ʻafioʻi kitautolu takitaha ʻe he ʻOtuá pea te Ne tokangaʻi kitautolu. Neongo ʻe lava ke faingataʻa ke ongoʻi taʻepauʻia pe makehe mei homou toʻú, tautautefito ʻi ha māmani taʻeangamaʻa, ka ʻoku ou tui “ʻoku fengāueʻaki fakataha ʻa e ngaahi meʻa kotoa pē ke lelei ai ʻa kinautolu ʻoku ʻofa ki he ʻOtuá” (Loma 8:28). ʻOku ou ʻiloʻi ʻoku ʻikai maʻu ʻa e fiefia moʻoni mo tuʻuloá ʻi he talangofua pē ki he ngaahi fekau ʻa e ʻOtuá ka ko hono fakatupulaki ha vā fetuʻutaki mo Iá.