5. Tus Dej Susquehanna

Daim duab no yees tau tus Dej Susquehanna nyob hauv Pawg Zos Harmony, Pennsylvania.

Tej Yam Tseem Ceeb uas Muaj Dhau Los: Joseph Smith tus Hluas xub tuaj nrhiav hauj lwm rau hauv Harmony thaum xyoo 1825. Nws thiab nws txiv tuaj so ze ntawm no nyob hauv Isaac Hale lub tsev, qhov chaw uas Joseph xub xub ntsib Emma Hale, tus uas tom qab no yog nws tus poj niam (JS—K 1:56–57). Joseph thiab Emma sib yuav thaum lub Ib Hlis Ntuj hnub tim 18, xyoo 1827. Tus Yaj Saub tau txais cov phiaj kub thaum lub Cuaj Hlis Ntuj hnub tim 22, xyoo 1827, nyob hauv Manchester, New York, thiab tsis ntev tom qab ntawd tau tsiv nrog Emma mus nyob rau Harmony, qhov chaw uas nws pib txhais cov phiaj kub. Thaum nws tab tom txhais Phau Ntawv Maumoos, Joseph thiab Oliver Cowdery xav paub ntxiv txog kev cai raus dej thiab taug kev mus rau ib qho chaw hauv hav zoov nyob ze ntawm no, thov tus Tswv ntsig txog qhov no. Yauhas tus uas Muab Neeg Ua Kev Cai Raus Dej tshwm sim los teb nws tej lus thov thaum lub Tsib Hlis Ntuj hnub tim 15, xyoo 1829 (JS—K 1:66–74; Q&K 13). Nws muab lub Pov Thawj Hwj Aloos rau Joseph thiab Oliver. Ces nkawd mus rau haud tus dej thiab ib tug muab ib tug ua kev cai raus dej kom tau txais kev zam txim rau tej kev txhaum. Ces Yauhas tus uas Muab Neeg Ua Kev Cai Raus Dej qhia Joseph thiab Oliver nkawd kom ib tug muab tug tsa rau lub Pov Thawj Hwj Aloos. Tsis ntev tom qab ntawd, Petus, Yakaunpaus, thiab Yauhas tshwm sim los muab lub Pov Thawj Hwj Mekhixedes rau Joseph thiab Oliver nkawd, nyob nruab nrab ntawm Harmony thiab Colesville (Q&K 27:12–13; 128:20).