17. Khiav Dim Mus rau Sab Hnub Poob

Txoj kev khiav tawm ntawm Nauvoo, Illinois mus, yog npaj rau thaum lub Peb–Plaub Hlis Ntuj, tiam sis vim tej pawg neeg yuav ua phem rau lawv Thawj Tswj Hwm Brigham Young thiaj pib coj cov Neeg Ntseeg hla tus Dej Mississippi thaum lub Ob Hlis Ntuj hnub tim 4, xyoo 1846. Thawj Tswj Hwm Young nyob tom qab muab vaj txiaj ntsim rau cov Neeg Ntseeg thiab tsis tau tawm ntawm Nauvoo mus txog ib nrab hli thaum lub Ob Hlis Ntuj.

Tej Yam Tseem Ceeb uas Muaj Dhau Los: Ua ntej nws tuag tus Yaj Saub Joseph Smith qhia tej yuav muaj los yav tom ntej hais tias, “Nej ib txhia yuav muaj sia nyob thiab mus pab npaj tej chaw nyob thiab tsa tej nroog thiab mus pom cov Neeg Ntseeg rais los ua ib haiv neeg muaj zog nyob nram cov Roob Rocky.” Yuav luag 12,000 tug Neeg Ntseeg khiav tawm ntawm Nauvoo mus pib thaum lub Ob Hlis Ntuj mus txog lub Cuaj Hlis Ntuj xyoo 1846. Tom qab cov Neeg Ntseeg ncaim ntawm Winter Quarters thiab lwm qhov chaw mus, lawv raug faib ua pab muaj kaum leej, tsib caug leej, thiab ib puas leej, ib pab muaj ib tug thawj coj (Q&K 136:3). Thaum lub Cuaj Hlis Ntuj xyoo 1846 ib pawg neeg phem uas muaj kwv yees li 800 leej thiab muaj rau rab tuam phom loj tuaj khoo lub nroog Nauvoo. Tom qab sib ntaus sib tua tau ob peb hnub, cov Neeg Ntseeg raug yuam kom nyoo swb xwv kom cawm tau lawv txoj sia thiab muaj cib fim hla tus dej. Tsib puas mus txog rau pua tus txiv neej, poj niam, thiab me nyuam tau hla tus dej thiab mus so rau ntawm ntug dej. Thawj Tswj Hwm Brigham Young xa neeg nrog rau khoom noj thiab khoom siv mus pab cawm cov “Neeg Ntseeg uas raug kev txom nyem” no.