11. Far West Qhov Chaw rau lub Tuam Tsev

Qhov chaw nyob ntawm Far West, Missouri, yog qhov chaw rau li 3,000 mus txog 5,000 tus Neeg Ntseeg nyob, cov uas nrhiav kev tiv thaiv tej kev tsim txom nyob hauv Ciaj Ciam Av Jackson thiab Clay. Thaum xyoo 1838 tus Tswv txib cov Neeg Ntseeg kom ua ib lub tuam tsev rau ntawm no (saib Q&K 115:7–8). Cov neeg phem tej kev tsim txom ua rau lawv ua tsis tau. Thaum lub Kaum Hli Ntuj hnub tim 31 xyoos ntawd, tus Yaj Saub Joseph Smith thiab lwm cov thawj coj ntawm lub Koom Txoos raug ntes, thiab tom qab hais plaub tiav nyob hauv Richmond, lawv raug kaw hauv lub Tsev Kaw Liberty. Thaum lub caij ntuj no xyoo 1838–1839, Tsoom Haiv Neeg Ntseeg hauv Hnub Nyoog Kawg raug ntiab ntawm Far West thiab lwm qhov chaw nyob hauv Missouri mus nyob rau Illinois.

Tej Yam Tseem Ceeb uas Muaj Dhau Los: Tau muab ib qho chaw fij tseg ua ib lub tuam tsev thiab tau tso tej ncej zeb tag. Tau txais xya zaj lus tshwm sim uas muab luam tawm hauv phau Lus Qhuab Qhia thiab Kev Khi Lus (tshooj 113–115; 117–120). Joseph F. Smith, uas yog tus Thawj Tswj Hwm thib rau ntawm lub Koom Txoos, yug nyob hauv Far West, thaum lub Kaum Ib Hlis Ntuj hnub tim 13, xyoo 1838. Far West yog lub hauv paus rau lub Koom Txoos tau ib ntus thaum tus Yaj Saub Joseph Smith coj.