15. Lub Tuam Tsev Nauvoo

Lub Tuam Tsev Nauvoo qub yog xuas cov pob zeb qaub xim txho uas nyob ntawm ib cheeb tsam nyob ze coj los ua. Lub tsev ntev li 39 mev thiab dav li 27 mev. Ntawm npoo av mus rau saum tus pej thuam xaus nkaus siab li 48 mev. Lub Koom Txoos cov mej zeej tau raug ntau yam kev txom nyem thiaj ua tau lub tuam tsev zoo nkauj no, pib ua thaum xyoo 1841. Ib txhia siv zog ua lub tsev tau ntau lub hlis; ib txhia qee lawv pob nyiaj los ua. Txawm tias ua tsis tau tiav tag nrho los, twb muaj cov mej zeej tuaj ua kab ke puv nkaus ob peb lub hlis ua ntej lawv mus rau Sab Hnub Poob. Txawm tias cov Neeg Ntseeg feem coob khiav tawm ntawm Nauvoo mus thaum lub caij nplooj ntoo hlav xyoo 1846 vim muaj tej pawg neeg yuav ua phem rau lawv los, muaj ib co neeg ua hauj lwm uas tshwj xeeb nyob tom qab ua tau lub tuam tsev tiav. Thaum lub Plaub Hlis Ntuj hnub tim 30, xyoo 1846, Txwj Laug Orson Hyde thiab Wilford Woodruff ntawm Pawg Kaum Ob tug Thwj Tim thiab li ntawm 20 tus neeg ntxiv tau muab tus Tswv lub tsev no fij tseg. Thaum cov mej zeej ntawm lub Koom Txoos uas tseem tshuav raug ntiab tawm ntawm Nauvoo thaum lub Cuaj Hlis Ntuj lawv tau tso tseg lub tuam tsev; ces pawg neeg phem ua qias rau lub tsev dawb ceev no. Thaum lub Kaum Hli Ntuj xyoo 1848, hluav taws ua rau sab haud kub hnyiab puas tsuaj tag. Lub tuam tsev uas rov ua dua tshiab (nyob hauv daim duab no), uas tau ua raws nraim li lub tuam tsev qub, tus Thawj Tswj Hwm Gordon B. Hinckley yog tus muab fij tseg thaum lub Rau Hli Ntuj hnub tim 27–30, xyoo 2002.

Tej Yam Tseem Ceeb uas Muaj Dhau Los: Lub rooj sab laj thaum lub Kaum Hli Ntuj hnub tim 5, xyoo 1845 yog muaj nyob hauv chav sib txoos ntawm lub tuam tsev. Tau pib ua vaj txiaj ntsim thaum lub Kaum Ob Hlis Ntuj hnub tim 10, xyoo 1845, thiab ua mus txog rau lub Ob Hlis Ntuj hnub tim 7, xyoo 1846. Coob tshaj 5,500 tus ntawm Tsoom Haiv Neeg Ntseeg hauv Hnub Nyoog Kawg tau txais lawv vaj txiaj ntsim, thiab tau ua kev cai raus dej rau cov tuag thiab ua kev sib khi rau ntau tus neeg.