Tuam Tsev, tus Tswv lub Tsev

Yog tus Tswv lub tsev. Tus Tswv yeej ib txwm txib Nws cov neeg kom ua tej tuam tsev, yog tej tsev dawb huv uas Haiv Neeg Ntseeg uas tsim nyog ua tej kab ke dawb ceev thiab tej kab ke ntawm txoj moo zoo rau lawv tus kheej thiab rau cov uas tuag lawm. Tus Tswv los xyuas Nws cov tuam tsev, thiab cov tsev no yog tej chaw teev tiam Vajtswv uas dawb huv tshaj.

Lub tuam tsev ntaub uas Mauxes thiab cov neeg Ixayees tsa yog ib lub tuam tsev uas lawv nqa tau. Cov Neeg Ixayees siv lub tuam tsev no thaum lawv khiav dim Iyiv.

Lub tuam tsev nyob hauv Phau Qub uas neeg paub txog tshaj plaws yog lub tuam tsev uas Xalumoos ua nyob hauv Yeluxalees (2 Xvn. 2–5). Cov Neeg Npanpiloos muab lub tuam tsev no ua puas tsuaj thaum xyoo 587 ua ntej Yexus yug los thiab 70 xyoo tom qab Xelunpanpees mam muab txum tim rov qab los (Exa. 1–6). Ib feem ntawm lub tuam tsev no raug kub hnyiab thaum xyoo 37 ua ntej Yexus yug los, thiab tom qab ntawd Helauj tus Loj mam rov muab kho dua. Cov Neeg Loos muab lub tuam tsev ua puas tsuaj xyoo 70 tom qab Yexus yug los.

Nyob hauv Phau Ntawv Maumoos, Vajtswv tau coj cov neeg ncaj ncees uas ua raws li Vajtswv txoj kev cai los ua thiab teev tiam nyob hauv tej tuam tsev (2 Nf. 5:16; Mxy. 1:18; 3 Nf. 11:1). Kev ua thiab kev siv ib lub tuam tsev raws li kev tsim nyog yog tej lub cim ntawm lub Koom Txoos tseeb nyob hauv txhua lub caij nyoog tso txoj cai, tsis hais lub Koom Txoos uas tau muab txum tim rov qab los hauv peb lub caij nyoog. Lub Tuam Tsev Kirtland yog thawj lub tuam tsev uas ua thiab muab fij tseg rau tus Tswv nyob hauv lub caij nyoog no. Txij thaum ntawd los tau muab tej lub tuam tsev fij tseg nyob hauv ntau thaj av nyob thoob plaws lub ntiaj teb.