Nifais, Nifais tus Tub, Hilamas tus Tub
Ib tug ntawm Neeg Nifais kaum ob tug thwj tim uas tus Yexus Khetos uas sawv rov los lawm tau xaiv nyob hauv Phau Ntawv Maumoos. (3 Nf. 1:2–3; 19:4). Tus yaj saub no thov tus Tswv kawg siab kawg ntsws kom pab nws cov neeg. Nifais hnov tus Tswv lub suab (3 Nf. 1:11–14). Cov tim tswv kuj tuaj xyuas Nifais, nws ntiab cov dab phem tawm, muab nws tus kwv tij sawv hauv qhov tuag rov qab los, thiab hais lus tim khawv uas tib neeg yeej yuav tsum ntseeg (3 Nf. 7:15–19; 19:4). Nifais ceev cov vaj lug kub (3 Nf. 1:2–3).
Phau 3 Nifais
Ib phau uas Nifais, uas yog Nifais tus tub, sau nyob hauv Phau Ntawv Maumoos. Tshooj 1–10 qhia tias tau muaj raws li cov yaj saub hais txog tus Tswv txoj kev los. Tau pom lub cim ntawm tus Khetos txoj kev yug los; cov neeg hloov siab lees txim; tiam sis lawv rov qab ua phem. Thaum kawg tej cua daj cua dub, tej av qeeg, tej nag xob nag cua, thiab kev puas tsuaj loj heev tau qhia tias tus Khetos tuag lawm. Tshooj 11–28 ceev xwm txheej txog tus Khetos txoj kev los rau Amelikas. Nov yog zaj tseem ceeb tshaj plaws ntawm phau 3 Nifais. Khetos tej lus feem ntau zoo ib yam li Nws tej lus qhuab qhia uas tau sau nyob hauv phau Npaivnpaum (piv txwv, Mathais 5–7 thiab 3 Nifais 12–14). Tshooj 29–30 yog Maumoos cov lus rau tej haiv neeg hauv hnub nyoog kawg.
Phau 4 Nifais
Phau ntawv no tsuas muaj plaub caug cuaj nqe, tag nrho nyob hauv ib tshooj xwb, tiam sis phau no hais txog peb puas xyoo ntawm cov Neeg Nifais zaj keeb kwm (34–321 tom qab Yexus yug los). Muaj coob leej ntawm ntau tiam neeg, nrog rau Nifais, sau phau ceev xwm txheej no. Nqe 1–19 qhia tias tom qab tus Khetos uas sawv rov los tuaj xyuas lawv, tag nrho cov Neeg Nifais thiab cov Neeg Lamas hloov siab los ntseeg txoj moo zoo. Muaj kev thaj yeeb, kev hlub thiab kev sib haum xeeb. Cov Neeg Nifais peb tug thwj tim, uas Khetos cia nyob hauv lub ntiaj teb no mus txog thaum Nws txoj Kev Los Zaum Ob (3 Nf. 28:4–9), qhuab qhia cov neeg ntawd. Nifais cia cov ceev xwm txheej rau nws tus tub Amaus. Nqe 19–47 yog cov ceev xwm txheej txog Amos txoj kev qhuab qhia (84 xyoos) thiab nws tus tub Amos txoj kev qhuab qhia (112 xyoos). Thaum 201 tom qab Yexus yug los, kev muab hlob pib ua rau cov neeg muaj teeb meem, lawv thiaj li sib faib thiab pib tsim cov koom txoos cuav kom tau nyiaj (4 Nf. 1:24–34).
Tej nqe kawg hauv phau 4 Nifais qhia tias cov neeg ntawd tau rov qab mus ua phem dua. (4 Nf. 1:35–49). Thaum xyoo 305 tom qab Yexus yug los, Amaus uas yog Amaus tus tub tas sim neej thiab nws tus kwv Amaloos muab tej ceev xwm txheej dawb ceev zais kom tsis raug xwm txheej. Tom qab ntawd Amaloos tau muab cov ceev xwm txheej rau Maumoos, uas sau txog ntau yam xwm txheej uas muaj hauv nws lub neej ces nws rov qab sau tej ntawd kom luv (Mm. 1:2–4).