Amas, Amas tus Tub
Nyob hauv Phau Ntawv Maumoos, yog thawj txiav txim thib ib thiab yog ib tug yaj saub rau haiv neeg Nifais. Thaum nws tseem hluas nws xav kom ua rau lub Koom Txoos puas tsuaj (Mxy. 27:8–10). Tiam sis, ib tug tim tswv tshwm sim rau nws thiab nws hloov siab los ntseeg txoj moo zoo (Mxy. 27:8–24; Amas 36:6–27). Tom qab ntawd nws tsum tsis ua tus thawj txiav txim kom qhia tau cov neeg (Amas 4:11–20).
Phau ntawv Amas
Yog ib phau nyob hauv Phau Ntawv Maumoos, uas muaj cov ntsiab lus ntawm ob tug yaj saub Amas, uas yog Amas tus tub, thiab nws tus tub Hilamas cov ceev xwm txheej. Tej xwm txheej nyob hauv phau no yog tshwm sim li ntawm xyoo 91 los txog rau xyoo 52 ua ntej Yexus yug los. Phau no muaj 63 tshooj. Tshooj 1–4 piav txog cov uas ua raws li Nihos thiab Alixais qhia txoj kev ntxeev siab tawm tsam cov Neeg Nifais. Tej tsov rog uas muaj thaum lub caij no yog tej uas muaj kev puas tsuaj loj tshaj plaws rau thaum lub sij hawm ntawd nyob hauv cov Neeg Nifais zaj keeb kwm. Tshooj 5–16 muaj ib zaj uas hais txog Amas txoj kev mus ncig ua tub txib thaum ntxov, thiab muaj nws zaj lus cob qhia txog tus Tswv Yug Yaj Zoo (Amas 5) thiab nws txoj kev tshaj tawm nrog Amulej nyob hauv lub nroog Amoonaihas. Tshooj 17–27 muaj cov ceev xwm txheej txog Mauxiyas cov tub thiab lawv txoj kev ua hauj lwm qhuab qhia nyob hauv cov Neeg Lamas. Tshooj 28–44 muaj Amas tej zaj lus cob qhia uas tseem ceeb tshaj plaws. Nyob hauv tshooj 32 Amas muab txoj lus piv rau ib lub noob; nyob hauv tshooj 36 nws qhia nws zaj dab neeg txog nws txoj kev hloov siab los ntseeg rau nws tus tub Hilamas. Tshooj 39–42 hais txog Amas cov lus ntuas rau nws tus tub Khali-atoos, uas tau ua txhaum txoj kev coj ncaj ncees; zaj lus cob qhia tseem ceeb no piav txog kev txim lij, kev hlub tshua, Kev Sawv Rov Los, thiab txoj Kev Theej Txhoj. Tshooj 45–63 piav txog cov Neeg Nifais tej tsov rog hauv lub caij nyoog ntawd thiab Henkos kev tsiv teb tsaws chaw. Cov thawj coj zoo kawg xws li tus Thawj Tub Rog Maulaunais, Thi-akhas, thiab Lihais pab cawm cov Neeg Nifais los ntawm lawv txoj kev ua siab loj thiab tej yam lawv ua raws caij raws nyoog.