Karolo ea 49
Ts’enolo e fanoeng ka Moporofeta Joesph Smith ho Sidney Rigdon, Parly P. Pratt, le Leman Copley, Kirtland Ohio, ka la 7 Mots’eanong 1831. Leman Copley o ne a ile a amohela evangeli empa a ntse a ts’oere lithuto tse ling tsa Shakers (United Society of Believers in Christ’s Second Appearing) eo e neng e le karolo ea eona pele. Tse ling tsa litumelo tsa Shakers e ne ele hore Ho tla Lekhetlo la Bobeli ha Kreste ho so etsahetse le hore o ile a hlaha ka sebopeho sa mosali Ann Lee. Ba ne ba sa nahane kolobetso ea metsi e le bohlokoa. Ba ile ba hana lenyalo ’me ba lumela ho bophelo ba bosooa ka ho feletseng. Ba bang ba li Shakers hape ba ne ba sa lumele ho jeoa ha nama. Ka ho etella ts’enolo ena pele, nalane ea Joseph Smith ea hlalosa, “Ho ba le kutloisiso e phethahetseng ea taba, ke ile ka botsa Morena, ’me ka fumana tse latelang.” Ts’enolo e hanana le lintlha tse ling tsa motheo tsa sehlopha sa Shakers. Baena ba boletsoeng pejana ba ile ba nka kutu ea ts’enolo eo ho sechaba sa Shakers (pel’a Cleveland, Ohio) ’me ba ba balla eona e felletse, empa ea latoloa.
1–7, Letsatsi le hora tsa ho tla ha Kreste li tla lula li sa tsebahale ho fihlela a e tla; 8–14, Batho ba lokela ho baka, ba lumele evangeli, ba hlonephe lits’ebeletso ho fumana poloko; 15–16, Lenyalo le hlotsoe ke Molimo; 17–21, Ho ja nama ho lumelletsoe; 22–28, Sione e tla atleha ’me Ba-Lamane ba tla thunya joaloka palesa pele ho Ho tla Lekhetlo la Bobeli.
1 Mamelang mantsoe a ka, bahlanka ba ka Sidney, le Parley, le Leman; hobane bonang, kannete ke re ho lona, hore ke le fa taelo hore le tla tsamaea ’me le rute evangeli ea ka eo le e fumaneng, esita le joaloka ha le e fumane, ho li Shakers.
2 Bonang, ke re ho lona, hore ba lakatsa ho tseba karolo ea ’nete, empa e seng kaofela, hobane ha ba ea loka ka pele ho ’na ’me ba lokela ho baka.
3 Ka baka leo, ke romela lona, bahlanka ba ka Sidney le Parley, ho ruta evangeli ea ka ho bona.
4 ’Me mohlanka oa ka Leman o tla behoa matsoho bakeng sa mosebetsi oona, hore a ke a buisane le bona, e seng ho latela seo a se fumaneng ka bona, empa ho latela seo a tla se rutoa ke lona bahlanka ba ka; ’me ka ho etsa joalo ke tla mo hlohonolofatsa, ho seng joalo a ke ke a atleha.
5 Joana ho rialo Morena; hobane ke ’na Molimo, ’me ke rometse Mora oa ka ea ’nots’i lefats’eng bakeng sa topollo ea lefats’e, ’me ke laetse hore eo ea mo amohelang o tla bolokoa, ’me eo ea sa mo amoheleng o tla tsuoa—
6 ’Me ba entse ho Mora oa Motho esita le joaloka ha ba lakalitse; ’me o nkile matla a hae ka letsohong le letona la khanya ea hae, ’me joale oa busa leholimong, ’me o tla busa ho fihlela a theohela lefats’eng ho beha lira tsohle tlas’a maoto a hae, nako eo e haufi—
7 ’Na, Morena Molimo, ke e buile; empa hora le letsatsi ha ho motho ea li tsebang, leha e le mangeloi a leholimong, kapa ba tla tseba ho fihlela a e-tla.
8 Ka baka leo, ke lakatsa hore batho bohle ba bake, hobane bohle ba tla’sa sebe, ntle le bao ke ipoloketseng bona, batho ba halalelang bao le sa ba tsebeng.
9 Ka baka leo, ke re ho lona hore ke romelletse ho lona selekane sa ka se sa feleng, esita le seo se neng se le teng ho tloha ts’imolohong.
10 ’Me seo ke se ts’episitseng ke se phethahalitse, ’me lichaba tsa lefats’e li tla se khumamela; ’me, haeba e se ka bo-bona, ba tla kokobela, hobane seo ha hajoale se phahamisitsoeng se tla kokobetsoa ka matla.
11 Ka baka leo, ke le fa taelo hore le ee har’a batho bana, ’me le re ho bona, joaloka ho mo-apostola oa ka oa khale, eo lebitso la hae e neng e le Petrose:
12 Lumelang ho lebitso la Morena Jesu, ea neng a le lefats’eng, ’me ea tlang ho tla, qalo le qetello;
13 Bakang ’me le kolobetsoe ka lebitso la Jesu Kreste, ho latela taelo e halalelang, bakeng sa tlhatsuo ea libe;
14 ’Me eo ea etsang sena o tla fuoa mpho ea Moea o Halalelang, ka ho behoa matsoho ke baholo ba kereke.
15 ’Me hape, kannete ke re ho lona, hore mang kapa mang ea thibelang ho nyala ha a ea rongoa ke Molimo, hobane lenyalo le hlotsoe ke Molimo ho motho.
16 Ka baka leo, ke molao hore a be le mosali a le mong, ’me ba babeli e tla ba nama ele ’ngoe ’me tsena tsohle hore lefats’e le ke le phethahatse morero oa popo;
17 ’Me hore ho ke ho tlatsoe ka motho, ho latela popo ea hae pele lefats’e le etsoa.
18 ’Me mang kapa mang ea thibelang ho ila nama, hore motho a se ke a ja e ts’oanang, ha a rongoa ke Molimo;
19 Hobane, bonang, libatana tsa naha le linonyana tsa moeeng, ’me tse tlileng lefats’eng, li tlisitsoe bakeng sa ts’ebeliso ea motho bakeng sa lijo le liaparo, le hore a ke a be le tsona ka bongata.
20 Empa ha ho ea fanoa hore motho a le mong a be le tse fetang tsa e mong, ka baka leo, lefats’e le lutse sebeng.
21 ’Me ho malimabe motho ea ts’ollang mali kapa ea senyang nama ’me a se na tlhoko.
22 ’Me hape, kannete ke re ho lona, hore Mor’a Motho ha a tla ka sebopeho sa mosali le ha e le sa monna ea tsamaeang lefats’eng.
23 Ka baka leo, le se ke la thetsoa, empa tsoelang pele ho tiea, le shebetse pele hore maholimo a sisinyehe, le lefats’e le thothomele ’me le thekesele ho ea pele le morao joaloka motho ea tahiloeng, ’me le bakeng sa hore liphula li phahamisoe, le lithaba li kokobetsoe, le hore libaka tse litutulu li batalatsoe—’me tsena tsohle ha lengeloi le tla letsa terompeta ea lona.
24 Empa pele letsatsi le leholo la Morena le e-tla, Jakobo o tla atleha lefelleng, ’me Ba-Lamane ba tla thunya joaloka palesa.
25 Sione e tla atleha holim’a maralla ’me e nyakalle holim’a lithaba, ’me e tla bokelloa hammoho sebakeng seo ke se khethileng.
26 Bonang, ke re ho lona, tsamaeang joaloka ha ke laetse, bakang libeng tsa lona tsohle; kopang ’me le tla fuoa, kokotang ’me le tla buleloa.
27 Bonang, ke tla tsamaea ka pele ho lona ’me ke be molisa oa lona; ’me ke tla ba har’a lona, me ha le na ho ferekangoa.
28 Bonang, ke ’na Jesu Kreste, ’me ke tla ka potlako. Esita le joalo. Amen.