Karolo ea 54
Ts’enolo e fanoeng ka Moporofeta Joseph Smith ho Newel Knight, Kirtland, Ohio, ka la 10 Phuptjane 1831. Litho tsa Kereke tse phelang Thompson, Ohio, li ile tsa arohana ke lipotso tse neng li amana le nyehelo ea thepa. Boikhomoso le meharo li ile tsa bonahala. Kamorao ho borumuoa lichabeng ba hae ho Ba-Shakers (bona sehlooho sa karolo ea 49), Leman Copley o ne a robile selekane sa hae sa ho nyehela ts’imo ea hae e kholo e le sebaka sa bojalefa ba Bahalaleli ba fihlang ho tsoa Colesville, New York. Ka lebaka leo, Newel Knight (moetapele oa litho tse phelang Thompson) le baholo ba bang ba ne ba tlile ho Moporofeta ba botsa hore ba tsoelepele joang. Moporofeta o ile a botsa ho Morena ’me a amohela ts’enolo ena, e laelang litho tsa Thompson ho tloha ts’imong ea Leman Copley ’me ba etele Missouri.
1–6, Bahalaleli ba tlameha ho boloka selekane sa evangeli ho fumana mohau; 7–10, Ba tlameha ho ba le mamello litsietsing.
1 Bona, joana ho rialo Morena, esita le Alpha le Omega, qalo le qetello, esita le eena ea ileng a thakhisoa bakeng sa libe tsa lefats’e—
2 Bona, kannete-nete, ke re ho uena, mohlanka oa ka Newel Knight, u tla ema ka tieo ofising eo ke u khethetseng eona.
3 ’Me haeba baena ba hau ba lakatsa ho phonyoha lira tsa bona, etsang hore ba bake libeng tsohle tsa bona, ’me ruri ba fetohe ba ikokobelitseng ka pele ho ’na ’me ba soabileng.
4 ’Me joaloka ha selekane seo se ba ileng ba se etsa ho ’na se robehile, esita le joalo se se se fetohile lefeela ’me ha se sa na phello.
5 ’Me bomalimabe ho eo ka eena khopiso ena e hlahang; hobane ho ne ho le molemo ho eena ha a ne a khanngoe bolibeng ba leoatle.
6 Empa ho lehlohonolo bao ba bolokileng selekane seo ’me ba mamela taelo eo, hobane ba tla fumana mohau.
7 Ka baka leo, tsamaeang ’me le balehe lefats’e leo, e se re lira tsa lona tsa tla holim’a lona; ’me le nke leeto la lona, ’me le khethe eo e tlang ho ba moetapele oa lona, ’me a lefe lichelete bakeng sa lona.
8 ’Me ke joana le tlang ho nka leeto la lona litikolong tse bophirima, ho lefats’e la Missouri, meeling ea Ba-Lamane.
9 ’Me kamorao hore le qete leeto, bonang, ke re ho lona, batlang ho iphelisa joaloka batho, ho fihlela ke le lokisetsa bolulo.
10 ’Me hape, e-bang le mamello tsietsing ho fihlela ke e-tla; ’me bonang, ke tla ka potlako, ’me ke ts’oere moputso oa ka, ’me bao ba neng ba mpatla esale ka meso ba tla fumana phomolo ea meea ea bona. Esita le joalo. Amen.