Malumalu ma Talafaasolopito o Aiga

Ia iloa le olioli i talafaasolopito o aiga e ala i le aoao e uiga i se tuaa.

Alu i le nofoaga autu o talafaasolopito o aiga i le lotoifale po o se nofoaga e tele ni komepiuta o i ai ma se fesootaiga o le Initoneti. Valaaulia se tagata e malamalama i faamaumauga anamua e faasoa mai se faataitaiga i le ala e mafai ona maua ai se faamatalaga po o se tala o se faamaumauga e uiga i se tagata. Valaaulia le autalavou e saili se faamaumauga anamua e uiga i se tasi o o latou tuaa i le lds.org/familyhistory. Afai e le mafai ona latou mauaina se faamaumauga, fesoasoani ia i latou ina ia fesoasoani e faatulaga ia faamaumauga mai le nofoaga na nonofo ai lo latou aiga ina ia mafai ona fesoasoani i le sailiga o na faamaumauga. Mafaufau e faapipii le faamaumauga po o le faamatalaga o le tagata o i le Gafa po o le Laau o le Aiga ma faaopoopo soo se faamatalaga fou latou te mauaina e uiga i lo latou aiga. Ia saunia soo se igoa e maua e ave i le malumalu.

Fesoasoani atu ia i latou o e atonu e le lagona le toafimalie i le teuina o o latou talafaasolopito o aiga faatekinolosi.

Talosaga atu i tagata matutua o le uarota e aoina mai ni ata tuai o le aiga ma faamatalaina i le autalavou se mea e uiga i ai (e mafai ona faia lenei mea i o latou aiga po o se isi nofoaga). Mafaufau e faa paga se talavou e toatasi ma tagata taitasi. Kopi ata, pue ni ata, pe o i le nofoaga autu o talafaasolopito o aiga i le lotoifale e kopi ai ia ata.Mafaufau e pue nisi o tala atonu o faamatalaina e tagata matutua e uiga i o latou aiga. Atonu e te manao e sii i totonu ni ata ma ni tala i le lds.org/familyhistory, oomi le faailoga e faaaofia ai tagata o i ai i totonu o ata ma tala, ma faafesootai i latou i le Gafa.

Ia iloa le olioli o le galue ai i talafaasolopito o aiga ma auauna atu i isi e ala i le faavasegaina o igoa.

Valaaulia se faufautua o talafaasolopito o aiga po o le taitai o le faavasegaina o igoa o le siteki e aoao le autalavou i le auala e faavasega ai ia igoa, pe aoao foi i le auala e amata ai i le FamilySearch.org. Seti faatasi o se vaega se sini e faavasega ai se aofaiga faapitoa o ni igoa, ma galulue faatasi i la outou sini. Atonu tou te mananao ia auai ia tagata uma i le galuega faatino lava e tasi o le faavasegaina o igoa e atiina ae ai le lotogatasi. Mafaufau e faavasega ia faamaumauga mai eria o le lalolagi lea o le a fesoasoani i tagata o le uarota ia maua o latou aiga.

Fesoasoani i isi e saunia igoa o o latou aiga e ave i le malumalu.

Valaaulia tagata o lau uarota e faatumu le tamaitusi O Lou Aiga. Ao mai tamaitusi ma le ID fesoasoani (o fuainumera mulimuli e lima o a latou pepa faamaumau) mai tagata o e manaomia le fesoasoani i le faagaoioia o igoa e ave i le malumalu. Alu i le lds.org/familyhistory ma ta i totonu le Laau o le Aiga po o le Gafa. Saini e alu ai i totonu o se tagata fesoasoani mo le tagata o le ekalesia. Ta i totonu le faamatalaga i le Laau o le Aiga po o le Gafa mai le tamaitusi O Lou Aiga ma tuu ai soo se sauniga o le malumalu o loo manaomia e faataunuuina. Lolomi se pepa o le Talosaga mo Sauniga o le Aiga mo le tagata. Ave le tamaitusi ma le pepa o le Talosaga mo Sauniga o le Aiga i le tagata.

Aoao e uiga i ai ma maua mai ai le malosi mai talatuu o o tatou aiga.

Fai atu i le autalavou e o mai saunia e faasoa atu se tala e sili ona latou fiafia i ai mai o latou aiga. E mafai ona avea ma se tala mai o latou talafaasolopito o aiga po o se mea taua na tupu i le aluga o o latou olaga. Uunaia i latou e faamatala mai pe aisea e taua ai ia i latou a latou tala ma pe na faapefea ona faamalosia ai o latou aiga. Vaevae le autalavou i ni vaega toalaiti ma fai atu ia i latou e fefaasoaai a latou tala, pe fai atu i ai e faasoa mai i le vaega atoa. Valaaulia i latou e aumai ni ata po o ni mea faitino e suitalaga ia latou tala. Atonu e te manao latou te faasoaina a latou ata ma tala i le lds.org/familyhistory ina ia mafai ai ona faasoaina atu i le tele o isi tagata o le aiga. Mafaufau i ni auala e faaaofia ai matua i lenei gaoioiga. Mo se faataitaiga, e mafai ona e valaauliaina i latou e auai atu i le gaoioiga ma faasoa atu ni tala.

Atiina ae ni molimau i le galuega o le malumalu ma talafaasolopito o aiga, ma auai i le togiolaina o e ua maliliu.

Auai atu i le malumalu e faia papatisoga ma faamauga mo e ua maliliu. Afai e talafeagai, saunia se igoa po o igoa o aiga mo le papatisoga ao lei oo i le taimi, ma talanoa i faamanuiga o le auauna atu i le malumalu (tagai “Auauna Atu,” Mo le Malosi o le Autalavou [2011], 32–33).

Afai e leai se malumalu i la outou eria, e mafai ona saunia le autalavou e auai i le malumalu i se aso e ala i le mauaina o se pepa faataga o le malumalu e faatapulaa le faaaogaina, faia o a latou lava galuega o talafaasolopito o aiga e agavaa ai o latou tuaa mo sauniga o le malumalu, ma aoao ai e uiga i faamanuiaga o le auauna atu i le malumalu.

Auauna atu i tagata o i ai ni aiga o loo lagomau i le fanuamaliu i le lotoifale e ala i le faasaoina ma le faasoaina o faamatalaga na maua i tuugamau.

Asiasi i le fanuamaliu i le lotoifale. Ave ni totini lima, oti laau laiti, salu, ma nisi mea e tapena ai ma faamama ai ia maa o tuugamau pe a manaomia. Pue ni ata o maa o tuugamau e faamaumau ai. Mo maa o tuugamau e faigata ona faitau, tusi lolomi se ata, faasolo ai ou lima i luga o upu, ma tusi i lalo le faamatalaga. Mafaufau e kopi i totonu o le komepiuta (faavasegaina) le faamatalaga mai tuugamau.

Aoao i le auala e sailia ai le talafaasolopito o aiga ma saunia ai igoa mo sauniga o le malumalu.

Alu i le nofoaga autu o talafaasolopito o aiga po o le lds.org/topics/family-history e iloa ai po o ai ou tuaa. Afai e manaomia, fatu se Faitotoa o le AAG mo talavou taitasi. Valaaulia le autalavou e faatumu le tamaitusi O Lo’u Aiga ma ta i totonu o le Gafa lena faamatalaga i le FamilySearch.org. Faatasi ai ma se fesoasoani mai se faufautua o talafaasolopito o aiga i le uarota, sue ma saunia ia igoa o tuaa mo sauniga o le malumalu. Fuafua se malaga i le malumalu e faataunuu ai ia sauniga nei.

Ia iloaina le olioli i talafaasolopito o aiga e ala i tu ma aga masani e pei o tala, ata, siva, meaai, ma musika.

Uunaia le autalavou e faatalanoa se matua matua, matua, tamaloa o le aiga, fafine o le aiga, po o se isi tagata o le aiga ina ia iloa ai le auala na amatalia ai se tu po o aga masani i lo latou aiga. Afai e leai sa latou tu po o aga masani, valaaulia i latou e mafaufau i se mea e tasi latou te fia amatalia o se aiga. Valaaulia talavou taitasi e faasoa mai se tu masani i le saunia o se tala, meaai, ata, siva, po o se pese. Valaaulia tagata o le aiga po o le uarota e avea ma tagata maimoa. Pue ni ata o nei tu ma aga masani. Mafaufau e fatu ni tala i le ala na mamanuina ai nei tu ma aga masani ma faasoa atu faatasi ma ata i le Pepa Gafa i le lds.org/familyhistory.