Gaoioiga Faalesiteki ma Siteki e Tele ua Tuufaatasi

Aoao se tomai aoga ma faaaoga e auauna atu ai i se tagata e le tagolima.

Saili ni galuega faatino i lau siteki po o alalafaga e mafai ona fesoasoani ai le autalavou. O le tele o nei galuega faatino e ono manaomia le autalavou e aoao i se tomai faapitoa ina ia mafai ai ona faataunuu le galuega. E le gata i le auauna atu i lo latou alalafaga, o le a sili atu ona faaauupegaina lelei le autalavou i o latou olaga atoa pe a latou maua ni tomai fou.

A uma ona faatulaga ia galuega faatino, vaevae le autalavou i ni vaega ma fai atu i se tagata e aoao se tomai e manaomia e vaega taitasi e faataunuu ai ia galuega faatino. Mo se faataitaiga, afai e i ai se galuega faatino o le toefuataiga, e mafai e nisi o le autalavou ona aoao ia iloa vali, ao isi ia aoao i le auala e lipea ai se pa po o le fausia o se puipui piliki. O nisi galuega faatino e mafai ona aofia ai le faamatagofieina o paka po o nofoaga faitele, faitau i tamaiti aoga, asiasi i tagata mamai i se falemai, faatulaga se sailiga meaai pe tui le toto, ma nisi mea faapena.

Afai e maua e taitai o le siteki ni galuega faatino i la outou eria, e mafai ona vaevaeina le autalavou i ni vaega ma auina atu i nofoaga eseese e faatino ai galuega faatino o le auauna atu. Mafaufau e faaiu le gaoioiga i se siva po o se taaloga mo le autalavou.

Faamalolosia fegalegaleaiga ma faamalositino ao auai atu i se tauvaga faafiafia.

Valaaulia se talavou e aoao atu i isi se taaloga e fou i le autalavou i la outou siteki po o le aoao atu o ni tomai mo le faaleleiga o se taaloga masani. Mafaufau e valaaulia se talavou e le o toaga mai ma ni uo e le auai i la tatou faatuatuaga ina ia auai mai. Faaaoga nisi o manatu nei, pe fai mai ni o oe lava manatu. Afai e manaomia, ia fetuunai ia taaloga ina ia mafai ai ona auai talavou o soo se tulaga o tomai. Mafaufau pe faapefea ona e faatatauina le lotogatasi ma le fiafia i le faatumauina o le paleni o le olaga (tagai i le Luka 2:52). Mafaufau i ni auala e tausia ai se agaga o le faauoga e oo lava i se siosiomaga faatautava.

• Vaevae le autalavou i ni au taitoatolu ma fai se tamoega taitoatolu, ma e eseese ia talavou e auai i vaega taitasi o le tamoega.

• Taaalo soka ao totolo i lima ma vae (ao faasaga i luga le fatafata).

• Taaalo volipolo i paluni vai. E vaevae le autalavou i ni paga, ma e taofi e paga taitasi ia tulimau o se solo e togi ai se paluni vai i luga o le neti, ao taumafai le isi paga e pueina i le la foi solo.

• Fai se tuuga tamoe, ma mafaufau i ni auala sogasoga e faafaigata atili ai le tuuga. Mo se faataitaiga, e mafai ona tamomoe ia talavou ma se paluni i va o latou tulivae, faapaleni se fuamoa i se sipuni, tolotolo agai i tua, ma isi mea.

• Fai se tosogamaea. Vaevae i ni au se lua. Ia tofu au e lua ma le pito o le maea umi e taofi ma taumafai le isi au e toso le isi au ia tea ese mai se tulaga ua faailogaina.

Auauna atu i e le tagolima.

Saili se vaega lea e fesoasoani ia i latou e le tagolima. E mafai ona avea o se lotu i le lotoifale po o faapotopotoga i le itumalo lea e tuuina atu se toomaga po o se fesoasoni i e matitiva ma le tagolima (e pei o le faleoloa a le epikopo, se fale mo e leai ni fale, po o se nofoaga e tuu ai tamaiti ua matuaoti), pe e mafai foi ona avea o se faalapotopotoga lea e tuuina atu le fesoasoani i le lalolagi atoa. Afai o se vaega i le lotoifale, fai atu ia i latou o loo puleaina e ave oe e faamatamata ma faamatala atu mea o latou faia e fesoasoani ai i tagata e le tagolima. Saili po o a galuega faatino e mafai ona fesoasoni atu ai le autalavou, ma faatulaga se galuega faatino. Mafaufau pe faapefea ona valaaulia ia uarota po o iunite taitasi e fesoasoani atu i se auala faapitoa. I le maea o le galuega faatino, fai se sauniga molimau e faasoa mai ai e le autalavou o latou lagona e uiga i aafiaga ma le auala e mafai ai ona tatou avea atili faapei o Keriso i a tatou auaunaga.

Ia lagona le Agaga ma o mai faatasi i le lotogatasi e ala i viiga paia.

Fai se aufaipese a le autalavou, ma faaaoga le taimi e faataitai ai ni pese se tele po o nisi pese talafeagai. Galulue ma le au peresitene o le siteki e faatulaga se taimi e faafiafia ai le autalavou mo isi, e pei o sauniga a le Ekalesia po o faigalotu. Mafaufau i nisi nofoaga e mafai ona e faasoa atu ai ni musika paia, e pei o se faatasiga a le nuu po o le alalafaga.

Faamanatu ia taleni a le autalavou.

Fuafua se faaaliga taleni a le autalavou o le siteki. Tuu atu i le autalavou e auai i le fuafuaina ma le faatulagaina o le gaoioiga. Ia aofia ai ni taleni eseese, ma valaaulia tagata e auai taitoatasi pe i ni vaega. E mafai ona avea le faaaliga taleni a le siteki ma taimuaga a ni faaaliga faapea a uarota taitasi e saunia ai a latou aitema.

Aoao e uiga i le faamatalaina o tala ma faasoa atu ia savali o le talalelei e ala i le gaosiga o vitio.

Filifili se autu o le talalelei, ma valaaulia le autalavou mai uarota po o paranesi taitasi e fatu ni vitio e tai 3–5 minute o loo aoaoina ai le autu lenei i se ala musuia. E mafai ona aumai le autu mai le Mo le Malosi o le Autalavou, o tusitusiga paia, po o latou lava olaga. Valaaulia le autalavou e faapotopoto faatasi ma matamata i ata pupuu na latou fatuina. Fai atu ia i latou e talanoa i mea sa latou aoaoina mai le aafiaga. Mafaufau e tuu atu ia i latou e faasoa mai ni a latou ata vitio faatasi ai ma a latou uo ma isi i alaata o faasalalauga faaagafesootai.

Faaali le faaaloalo ma le migao mo fale ua faapaiaina.

Talanoa i manaoga ma tulaga o le eseese o fale a le Ekalesia i le eria. Fuafua po o le a le mea e mafai ona faia e le autalavou e faaleleia ai pe faamamaina ai. Afai e te nofo latalata i se malumalu, feutagai ma i latou o e pulea ia lotoa o le malumalu e iloa ai pe o manaomia se auaunaga. A maea le auaunaga, mafaufau e fai ni taaloga a le autalavou ma ia faia se faatasiga fiafia.

Fesoasoani i aiga e le tagolima i le taimi o le Kerisimasi.

Ia saunia ma tuuina atu ni meaai ma ni meaalofa o le Kerisimasi mo se aiga po o auaiga e le tagolima (e mafai ona faia faalilolilo). Faamaopoopo faatasi ma epikopo po o peresitene o paranesi i la outou siteki le fuafuaina o manaoga, ma faaaoga ia tupe ua tuuina atu i le uarota po o foai mai tagata o le uarota e saunia ai ni meaalofa. A maea le gaoioiga, valaaulia le autalavou e faasoa atu po o a ni o latou lagona na i ai a o latou tuuina atu lenei auaunaga. Ia talanoaina ni auala e mafai ona latou maua ai le agaga o le Kerisimasi i le tausaga atoa ao latou auauna atu ma faamanuia ia olaga o isi.

Fai ni faamalositino ma fausia ni faauooga i se siosiomaga e le faatautava.

Fuafua se gaoioiga e faaletino ae le fai sooa ma e le faatautava. Uunaia le autalavou e fautua mai ni gaoioiga e tusa ma mea latou te fiafia i ai, pe faaaoga ni manatu nei. Mafaufau pe faapefea ona fesootai le gaoioiga lenei i se galuega faatino tele. Mo se faataitaiga, ao lei alu se savaliga sopo, e mafai ona faamama e le autalavou ia lotoa ia e lata ane i le mea e alu ai le savaliga sopo. I le faaiuga o le gaoioiga, valaaulia le autalavou e faasoa mai soo se lesona faaleagaga sa latou aoaoina mai i le auai atu i le gaoioiga (mo se faataitaiga, afai tou te o i se savaliga sopo, e mafai ona latou faasoa maia ni o latou lagona e uiga i le matagofie o foafoaga a le Atua ma lo tatou tiutetauave i le tausiaina o i latou).

• Fai se taufetuliga malie e 5K.

• Alu e aau.

• Alu i se tietiega uila.

• Alu i se savaliga sopo.

• Alu e faasee i seevae faasee pe faasee i le laupapa faasee.

Fausia le faatuatua ia Iesu Keriso, faamalolosia ia molimau, atiina ae taleni, faia ni uo fou, ma ia fiafia faatasi ma talavou o e tutusa talitonuga ma tulaga faatonuina o loo faasoaina.

Ua valaauliaina ia alii talavou ma tamaitai talavou e i le vaitausaga o le 14 e oo i le 18 ina ia auai faatasi i se gaoioiga po o ni faagasologa o gaoioiga ua ta’ua o le konafesi a le autalavou. O konafesi a le autalavou e masani lava ona faatasi ona faia i tausaga taitasi i tulaga faaleuarota po o le faalesiteki. E mafai foi ona faia i se tulaga o ni siteki tuufaatasi pe faale-eria. E fuafuaina ma faataunuuina ia konafesi faalesiteki a le autalavou e le komiti a le Au Perisitua Arona–Tamaitai Talavou i lalo o le taitaiga a le au peresitene o le siteki. E tatau ona valaaulia le autalavou e tuuina atu se fesoasoani i le komiti i le mea e gata ai lo latou mafai, i le fuafuaina o konafesi a le autalavou a le siteki. E mafai e le au peresitene o le siteki ona valaaulia le autalavou e auai i fonotaga a le komiti pe a manaomia.

Filifili se autu o le talalelei mo le konafesi. E mafai ona avea o se mau, le autu o le Mutuale mo le tausaga, po o se upusii mai se perofeta soifua. E tatau i le au peresitene o le siteki ona faamaonia le autu. Ia fuafua ni gaoioiga e pei o faigalotu, fonotaga faalevaega, aoaoina o ni aafiaga, ma galuega faatino auauna atu lea e ogatusa ma le autu.

Ua valaauliaina ia sui o le au epikopo po o le au peresitene o le siteki ina ia tele se vaega o le konafesi e auai ai. Ua uunaia ia au peresitene o Alii Talavou ma Tamaitai Talavou ina ia auai i le konafesi atoa.

Mo aiaiga faavae e faatatau i konafesi a le autalavou, tagai i le Tusitaulima 2: Taitaiina o le Ekalesia (2010), 13.4.

Faapotopoto i se vaega toatele ma faamalosia e le tasi le isi i le ola ai i le talalelei.

Ina ia iloa ma lesitala mo se konafesi a le MMA, asiasi i le lds.org/youth/fsy.

O konafesi a le MMA o gaoioiga ia a le autalavou a siteki tuufaatasi e faia i lalo o le taitaiga a le Au Peresitene o le Eria. E vaaia e Fitugafulu Eria le fuafuaina ma le faatinoina o mea e tutupu. Pe a valaaulia le autalavou o i lau siteki i se konafesi a le MMA i le lumanai, mafaufau e fuafua ni faigalotu po o isi gaoioiga e fesoasoani ai ia i latou e saunia ai mo le konafesi. Atonu foi e te manao e fuafua ni gaoioiga pe a uma le konafesi ina ia mafai ai ona latou faasoa maia o latou aafiaga ma tulitatao ai sini ua latou faatutuina.

Aoao e uiga i tuaa e ala i le aoaoina o ni siva ma musika mai taimi ao lei fananau le autalavou.

Fesoasoani i le autalavou e filifili se vaitau anamua (mo se faataitaiga, o le vaitau o le 20, 40 po o le 70) latou te fiafia i ai. Fai atu i korama, vasega, po o le vaega taitasi e aoao se pese po o se siva iloga mai lena vaitau ma tuu atu i tagata o la outou uarota po o paranesi po o se vaega o tagata matutua i le alalafaga. Atonu e te manao e faaopoopo ni toniga faigofie, teuga, ma ni mea faitino mai lena vaitau. Talanoa i le auala o ono suia ai ia uiga ma mea e fiafia i ai le lalolagi, peitai e faaaogaina lava pea e le aunoa ia tulaga faatonuina a le Alii. Valaau le autalavou e faasoa mai le auala e mafai ona latou maua le fiafia i le sisiva ai i lenei lalolagi ao faatumauina pea ia tulaga faatonuina a le Alii (tagai Mo le Malosi a le Autala, “Musika ma Siva”).

Ia maua le toafimalie e faafiafia ai i luma o uo ma le au maimoa.

Faapotopoto faatasi le autalavou i la outou siteki ma vaevae i latou i ni vaega toalaiti. Tuu atu ia tofu vaega taitasi ma se ata tumu i ni props filifili solo mai ma se taimi faatulagaina e fatu ai se tala puupuu e faaaoga ai a latou mea faitino taitasi. Fai atu ia i e mafai ona latou faatinoina a latou tala pupuu i le taimi lava lena pe pue foi ae matamata i ai ma a latou uo. Mafaufau e tuuina atu ni faailoga i vaega taitasi, e pei o le tala puupuu sili ona malie, sili ona faaaogaina ia mea faitino, sili ona sogasoga ma musuia, ma isi mea faapena.

Faaleleia ia taleni ma tuputupu ae faatasi i le lotogatasi.

Valaaulia le autalavou e saunia ni tala pupuu po o ni tala faatino malie i se po o tala mo tagata o le siteki. E mafai ona vaevaeina le autalavou i vaega faaleuarota po o nisi vaega. E mafai e le autalavou ona tusiina a latou lava tusiga pe faatino ni tala faatusipaia. Tuu atu i le autalavou e galulue faatasi i ni au e fuafuaina, faataitaia, ma faatinoina a latou tala mo le vaega atoa. E mafai foi ona fesoasoani le autalavou i mea faitino e faaaoga i tala, toniga, vaaiga, ma isi mea faapena. A maea le tala, talanoa pe aisea ua tuuina mai ai e le Tama Faalelagi ia i tatou ni taleni ma po o le a Lona finagalo tatou te faia i ai.

Saunia ni meaai mo e ua fiaaai.

Faatulaga se sailiga meaai ma ao mai ia meaai e le leaga gofie e tuu i se fale e teu ai meaai po o nisi faalapotopotoga lea e fesoasoani i e fiaaai. Mafaufau e faafesootai ia faalapotopotoga nei e saili ai po o a ituaiga o meaai e matuai manaomia lava. Ao lei faia pe ua maea foi lenei gaoioiga, toe iloilo ma talanoa i tala mai le Mataio 25:31–45 faatasi ma le autalavou. O le a se mea o aoao mai ia i tatou e uiga i le mafuaaga tatou te auauna atu ai? Valaaulia le autalavou e faasoa mai o latou lagona pe a latou auauna atu i isi ma le mafuaaga latou te lagona ai faapea.

Auauna atu i isi ao maua le fiafia.

Tuu atu i vaega o talavou se lisi o ni galuega faatino talafeagai, ma atofa atu ni togi o tulaga faatauaina i tagata taitasi. Tofia ia vaega taitasi (e o faatasi ma se taitai matua) e asiasi i ni aiga o lalata ane, magaala, po o tuaoi e iloa ai po o le a le tele o galuega faatino e mafai ona latou faataunuuina i lena eria i se itula. Mo se faataitaiga, e mafai ona latou tapenaina le otaota i luga o le auala pe ofo atu e veleina vao a se tagata. Fai atu i vaega uma e toe foi mai pe a maea, e faaopoopo a latou togi ma faasoa mai o latou aafiaga. E mafai foi ona e tuuina atu ni togi faaopoopo mo talavou o e na faatinoa ni auaunaga e le o i ai i le lisi.

A maea le gaoioiga, mafaufau e fai se talanoaga puupuu e taitaia e le autalavou o avea ma taitai i a latou korama po o vasega. Mafaufau e talanoaina ia fesili faapenei: O a ni ou lagona ao e auauna atu? Na faapefea ona aafia isi e ala i lau auaunaga? O le a le tatou tiutetauave i lo tatou alalafaga? Aisea tatou te auauna atu ai? (Tagai Mosaea 2:17.)

Atiina ae ni fegalegaleaiga e ala i agafaafesootai ma le siva.

O lau siteki pe tuufaatasi ai ma isi siteki i la outou eria, fuafua ma faataunuu se siva a le autalavou. E mafai ona maua ni taiala faapitoa e faatatau i siva i le Tusitaulima 2; 13.6.6. I le avea ai ma se vaega o le siva, mafaufau e valaaulia ni tagata e aoao i le autalavou ni siva eseese (e aofia ai ni siva o tu ma aga masani, aganuu, ma aso anamua). Faasoa atu ma talanoa i le vaega o “Musika ma Siva” i le Mo le Malosi o le Autalavou (2011) o se vaega o le gaoioiga.

Ia faamasani atili i le faatufugaga o le pue ata.

Valaaulia se tagata e aoao atu i le autalavou i uarota po o paranesi taitasi ia mataupu faavae autu o le pueina o ata, e pei o le faatulagaina o le meapueata, moli, ma isi mea. Atofa atu i uarota taitasi se autu (po o ni autu), ma tuu atu ia i latou e pue ni ata e fetaui ma a latou autu e sauniuni ai mo le gaoioiga a le siteki lea o le a faaalia ai.

Mafaufau e tuuina atu ni faailoga i vaega eseese. E mafai ona fetuunai lenei gaoioiga ina ia taulai atu i se autu faaletalalelei. O faataitaiga e mafai ona aofia ai le autu a le autalavou mo le tausaga, o se autu i le Mo le Malosi o le Autalavou, se autu faatusipaia, ma isi mea.

Fausia ni mafutaga e ala i gaoioiga taaalo.

Fai se tauvaga e mafai ai e le autalavou ona auai i ni au toalaiti pe taitoatasi. O taaloga e mafai ona aofia ai le soka, pasiketipolo, volipolo, tenisi i luga o le laulau, lape, po o se isi taaloga. E mafai ona o mai uarota taitasi i le tauvaga o se au, pe e mafai foi ona vaevae le autalavou i ni au i le aso o le tauvaga. Fuafua e valaaulia ni tagata o le alalafaga e fai se au ma auai i le tauvaga. O le faaaogaina o tagata ua aoaoina i le faafoeina o tagata i la outou tauvaga taaloga o le a fesoasoani i le faamautinoaina o le i ai o se aafiaga lelei mo tagata uma o aofia ai.

Atiina ae ni fegalegaleaiga, faamalosia se molimau, ma fiafia i se nofoaga i fafo.

Fuafua se tolauapiga a le siteki mo alii talavou mai uarota taitasi (e masani ona ta’ua ia vaega o le Tolauapiga a Helamana, Tolauapiga a Alema, Tolauapiga a Siona, ma faapena ai lava). E mafai ona avea lenei mea ma se tolauapiga e tasi le aso pe oo atu i ni aso se tele. O le tolauapiga a le Au Perisitua a le Siteki e fuafuaina i lalo o le taitaiga a le peresitene o le siteki ma faataunuuina e le au peresitene o Alii Talavou po o isi ua tofia e fesoasoani atu. E mafai foi ona tuufaatasia ni siteki mo ia ituaiga o gaoioiga. E tatau ona aofia i nei tolauapiga se faapaleniga o ni gaoioiga faafiafiaina ma malie, faaleagaga, ma e faatatau i le auaunaga. Mo se faataitaiga:

• E mafai ona aofia i gaoioiga faafiafia ma malie le aau, taaloga, fe’a’eiga, fagafaga aū, po o nisi mea e fiafia i ai alii talavou e fai. Uunaia ia uarota e faaaoga ia tomai ma taleni a tagata o le uarota ao latou fuafuaina nei gaoioiga.

• O gaoioiga faaleagaga e mafai ona aofia ai le suesue i tusitusiga paia taitoatasi, taulotoina o mau, talanoaga faavaega toalaiti e taitaia e alii talavou, faeasaite, sauniga molimau, avanoa faafaiaoga mo alii talavou, ma isi mea.

• O gaoioiga e faatatau i auaunaga e mafai ona aofia ai le faamatagofieina o le nofoaga po o fale o le tolauapiga, tuufaatasiga o ni ato o auaunaga agaalofa, aoaoina o ni tomai e faaaoga i le auauna atu i isi, ma isi mea.

E mafai ona atofaina ia uarota taitasi e fuafua ma vaaia se aofaiga faapitoa o gaoioiga. Filifili se nofoaga po o fale o le tolauapiga e mafai ona ofi ai pe faia ai foi ia ituaiga o gaoioiga lea e te manao e fai.

Faamalolosia molimau, lagona le Agaga, faia ni faauoga, auauna atu, ma atiina ae ia tomai faaletaitai ma isi.

Fuafua se tolauapiga a Tamaitai Talavou a le siteki mo tamaitai talavou mai uarota taitasi. I se feutagaiga ma taitai perisitua, ia faaaoga e taitai o Tamaitai Talavou le Tusi Lesona o Tolauapiga a Tamaitai Talavou ma le Tolauapiga a Tamaitai Talavou: O Se Taiala mo Taitai Perisitua ma Tamaitai Talavou e fuafua ai se aafiaga faaletolauapiga o le a anoa ma ofoofogia. E mafai ona valaauina e taitai perisitua ia faufautua a Tamaitai Talavou a le siteki ma uarota e avea ma taitai o le tolauapiga. Ia faatulaga ma faafoeina e taitai o le tolauapiga le polokalama a le tolauapiga i lalo o le taitaiga a le au peresitene o Tamaitai Talavou o le siteki. Atonu e mafai ona latou galulue faatasi ma taitai o le uarota ma le komiti o gaoioiga a le siteki i le fuafuaina o masini, femalagaaiga, ma isi fesoasoaniga.

Mo faamatalaga e uiga i le faatupeina o le tolauapiga, tagai i le Tusitaulima 2: Taitaiina o le Ekalesia (2010), 10.8.9. Mo faamatalaga e uiga i le saogalemu i le tolauapiga, tagai i le Tusitaulima 2, 13.6.20 ma le Tusi Lesona o le Tolauapiga a Tamaitai Talavou.