Taaloga, Tolauapiga, ma Fafo

Faamalolosia mafutaga, maua le fiafia, ma aoao tomai i se nofoaga i fafo.

Faufua ma faataunuu se tolauapiga e alu ai ma le po (e mafai ona sili atu nai lo le tasi le po). Valaaulia le autalavou e taitaia le fuafuaina—nofoaga, meaai, gaoioiga, masini, aafiaga faaleagaga, ma isi mea faapena. I le taimi o le tolauapiga, fesoasoani i le autalavou ia aoao se tomai fou (e pei o le saogalemu o afi, fagotaga, saogalemu i le togavao, ma isi mea faapena). Ia aofia ai gaoioiga e malie ma faaleagaga. Mo aiaiga faavae a le Ekalesia e faatatau i gaoioiga e alu ai ma le po, tagai i le Tusitaulima 2, 13.6.12.

Mafaufau e fesoasoani atu i le autalavou ia saunia mo le tolauapiga e ala i le aoaoina ia i latou o ni tomai autu o le tolauapiga ao lei o ese atu. O manatu e ono aofia ai:

• E faapefea ona amata se afi e saogalemu e kuka ai.

• E faapefea ona faatu ma ave i lalo se faleie.

• E faapefea ona saunia ma kukaina meaai i fafo.

• Vaega faigofie o le fesoasoani muamua.

• O le auala e tumau ai saogalemu i fafo po o le togavao (fai faapaaga, o le mea e fai pe a e leiloa, ma isi mea faapena).

• Lavalava talafeagai mo le tau ma le siosiomaga.

• O le auala e faaaloalo ai i le siosiomaga ma le nofoaga o manu feai.

Afai e talafeagai, tuu atu i le autalavou e faataitai nei tomai i se tauvaga lelei. Mo se faataitaiga, e mafai ona e vaevaeina le autalavou i ni vaega ma vaai po ai e sili ona vave le faatuina o le latou faleie pe fai se gaoioiga i le Mutuale lea e mafai ai e alii talavou ma tamaitai talavou ona kuka i fafo mo le tasi ma le isi.

Tuu atu i le autalavou e faasoa mai lo latou malamalama ma tomai e uiga i le taaloga.

Valaaulia se talavou e aoao atu i isi se taaloga e fou i le vaega pe aoao atu ni tomai mo le faaleleiga o se taaloga masani (mafaufau e valaaulia se talavou e le toaga mai po o se uo i se isi tapuaiga). E mafai foi ona ia talanoa i tulafono ma meataalo o le taaloga. Taaalo i le taaloga o se vaega. Mafaufau e talanoa i le auala e tausia ai le agaga o le faauoga e oo lava i se siosiomaga faatautava. Talanoa i auala e mafai ona e faaitiitia ai le faamamafaina o le manumalo.

Fiafia ma mafaufau i le ofoofogia o foafoaga a le Atua.

Alu i se savaliga sopo po o se savali o le natura e iloa ai ma fiafia i le matagofie o foafoaga a le Tama Faalelagi. Tuu atu se avanoa mo le autalavou e toe mafaufau ai i o latou lagona ma mafaufau e uiga i le lalolagi ua tuuina mai ia i tatou e le Tama Faalelagi. Valaaulia le autalavou e faamaumau o latou manatu i totonu o a latou api talaaga.

Aoao ia maua le lotofaafetai, faaaloalo, ma tausia le lalolagi ua tuuina mai ia i tatou.

Ia talanoaina le taua o le avea ma tausimea lelei i lo latou punaoa faanatura (tagai Kenese 1:28–30). Faatasi ai ma se faatagaga, fai se galuega faatino o se faasaoina po o le toefuataiina, e pei o le tapenaina o le lapisi, totoina o ni laau, po o le faamamaina o auala i se nofoaga o le tolauapiga. E mafai ona avea lenei mea ma se gaoioiga faifaipea i soo se taimi e faia ai ni gaoioiga a le autalavou i fafo. Mo se faataitaiga, afai o faia sa outou gaoioiga i se paka, e mafai e le autalavou ona tapenaina le lapisi mo le 15 minute ao lei amataina la latou gaoioiga.

Fai ni faamalositino ma fausia ni faauoga i se siosiomaga le faatautava.

Auai i ni gaoioiga malie e faaletino ae o ni gaoioiga masani ma e le faatautavaina. O nisi nei o ni manatu. Uunaia le autalavou e fautua mai ni a latou lava [gaoioiga], e fuafua i mea latou te mananao e fai. I le faaiuga o le gaoioiga, valaaulia le autalavou e faasoa mai soo se lesona sa latou aoaoina mai i le auai atu i le gaoioiga (mo se faataitaiga, afai tou te o i se fe’a’eiga, e mafai ona latou faasoa maia ni o latou lagona e uiga i le matagofie o foafoaga a le Atua ma la tatou tiutetauave i le tausiaina o i latou).

• O e aau.

• O i ni tietiega uila faatasi.

• O i se fe’a’eiga.

• O e faasee i seevae faasee pe faasee i laupapa faasee.

• Fai ni osogamaea faalevaega. E mafai ona amata i se tagata e toatasi o loo oso i totonu o le maea ma o taimi uma lava e ta faatamilo ai le maea ia faaopoopo atu i totonu se tagata e toatasi seia oo uma i totonu le vaega atoa. Pe, ao ta faataamilo le maea, fai i le autalavou e taufetuli taitoatasi auauai atu i totonu ma o ese atu i fafo.

Ia faateleina le malosi faaletino ma uunaia faauoga e ala i taaloga.

Fai se tauvaga lea e mafai ai e le autalavou ona auai ni au toalaiti pe taitoatasi foi, e taaalo ai pasiketipolo, tenisi e fai i luga o le laulau, soka, lape, po o se isi taaloga. Fatu ia au i soo se faasologa e fesoasoani ai i le autalavou e faamasani ma tagata latou te le iloa lelei. Fuafua e valaaulia ni tagata o le alalafaga e fai se au ma auai i le tauvaga. A uma le tauvaga, ia talanoaina mea na aoaoina e le autalavou e uiga i le galulue faatasi o se au ma fesootaiga ma isi.

Aoao ma faataitai ni tomai mo le laveai i fafo.

Aoao atu i le autalavou ni tomai e laveai ai. Mo se faataitaiga, e mafai ona latou aoao po o a laau e mafai ona latou ‘aina pe le ‘aina foi, le auala e fausia ai se fale le tumau, le auala e fai ai se afi, le auala e sailia ai lo latou ala pe afai ua leiloloa, le auala e saili ai se vai, ma faaauau ai lava. Tuu atu ia i latou e faataitai a latou tomai fou i se tulaga malie i fafo. Talanoa e uiga i ni mea e tutusa ai ma mea e faasao ai faaleagaga.

Aoao i le auala e saunia ai ni meaai i fafo.

Faapotopoto le autalavou i se nofoaga i fafo e aoao ai i le fausiaina o ni afi saogalemu e kuka ai, kuka i totonu o se ogaumu oveni Take, pe kuka i luga o se ogaumu o le tolauapiga. Fai atu i le autalavou e faataitai o latou tomai fou e ala i le kukaina o se meaai po o se meaalofa i tagata e taumamafa fiafia ai. Faasoa atu ni fuafuaga po o ni fua o ni meaai e sili ona e fiafia i ai e faaaoga i ni faatasitasiga po o tolauapiga e fai i fafo i le lumanai. Mafaufau e fai se mea e faamatagofie ai le eria ma auauna atu ai i le alalafaga ao i ai iina, e pei o le taalaoina o le lapisi, ma talanoa i o tatou tiutetauave e tausia ai ia foafoaga a le Atua.

Fausia le galulue faatasi ma le faamalositino ao auai i se tauvaga faamasani.

Taaalo i se taaloga e uunaia ai le autalavou ma manaomia ai le galulue faatasi. O ni nai manatu nei. Ia uunaia foi le autalavou e fautua mai ni taaloga latou te iloaina. Afai e manaomia, ia fetuunai ia taaloga ina ia mafai ai ona auai talavou o soo se tulaga o tomai. Mafaufau pe faapefea ona e fesootaia ia le galulue faatasi ma le mauaina o le fiafia e faatumauina ai le faapaleniina o le olaga (tagai Luka 2:52).

• Taaalo soka ao totolo i lima ma vae (ao faasaga i luga le fatafata).

• Taaalo volipolo i paluni vai. Vaevae le autalavou i ni paga, ma taofi e paga taitasi ia tulimau o se solo e togi ai se paluni vai i luga o le neti, ao taumafai le isi paga e pueina i le la foi solo.

• Fai se tuuga tamoe, ma mafaufau i ni auala sogasoga e faafaigata atili ai le tuuga. Mo se faataitaiga, e mafai ona tamomoe ia talavou ma se paluni i o latou tulivae, faapaleni se fuamoa i se sipuni, tolotolo agai i tua, ma isi mea faapena.

• Taaalo i se tosogamaea. Vaevae i ni au se lua. Ia tofu au e lua ma le pito o le maea umi e taofi ma taumafai le isi au e toso le isi au ia tea ese mai se tulaga ua faailogaina.

Aoao i metotia o le saogalemu mo le atinaeina ma le tausiga o se afi.

Fuafua se gaoioiga i fafo, e pei o se aso e fe’a’ei ai po o se tolauapiga e tasi le po. Ia mautinoa ua siaki ia mea e faasaina o afi i lau eria ua filifilia ao lei taitai.

1. Filifili se nofoaga saogalemu e fausia ai se afi. E tatau ona tapena lenei nofoaga ma ia mama mai mea e faigofie ona mumu ai se afi.

2. Faatumu se pakete lapoa i vai, ma tuu faalatalata ane e tape ai se afi pe a manaomia.

3. Aua nei faaaogaina soo se mea e vave ai le mumu o le afi e amata ai se afi (e pei o le kasolini, afi penisini, ma isi mea faapena).

4. Aua nei faatagaina soo se tagata e taalo i le afi.

5. Ia faatumauina le tulaga faatonutonu lelei o se afi.

6. Aua nei tuulafoaia le afi e aunoa ma se tasi o vaaia.

7. Faaaoga ia metotia nei e tape ai le afi:

a. Ia asu le vai i luga o le afi.

e. Saeu ma eli le afi i se suō po o se laau.

i. Toe asu nisi vai i luga o le afi.

o. Toe faaauau seia uma lelei ona pe le afi ma ua tapeina uma ia aloiafi.

Faaiu i se talanoaga e uiga i le ala o fesootai ai lenei gaoioiga i o tatou olaga faaletino ma le faaleagaga.

Atiina ae le malosi faaletino ma fausia le alalafaga.

Fai se tamoega po o se savaliga e 5K mo le autalavou. Valaaulia se tagata e i ai le poto masani i le tamoe e aoao atu e uiga i le faavevela i le taimi amata, faalemu i le taimi faaiuiu, po o ni metotia i le tamoe. Fai atu ia te ia e talanoa e uiga i penefiti po o faamanuiaga o le malosi faaletino. E mafai foi ona e valaauliaina tagata o le alalafaga ina ia auai.

Ina ia fiafia i gaoioiga faaletino ma latalata atili i le Alii a o e vaaia le mafagofie o Lana foafoaga.

Faatulaga se vaega o gaoioiga e saunia ai mo se malaga ma le atofaafafa saogalemu ma le fiafia. O nei gaoioiga e mafai ona umi atu mo ni nai vaiaso. O se sui o le korama po o le vasega ma se faufautua ua lava le malamalama mai le uarota, siteki, po o le alalafaga e mafai ona taitaia le gaoioiga. Mo gaoioiga taitasi, mafaufau e faaaofia se mea e valaaulia ai le uunaiga a le Agaga Paia. Mo se faataitaiga, e mafai ona e valaaulia se tagata e faasoa se aafiaga, faasoa atu le molimau, pe aoao atu se aoaoga faavae a o le i amata le gaoioiga.

• Folasaga i le atofaafafa. Aoao e uiga i meafaigaluega ma lavalava talafeagai, kukaina, tomai e ola ai, ma le fesoasoani muamua.

• Faataitai ni savaliga sopo. Faamaea ni nai savaliga sopo pupuu e saunia ai faaletino mo le malaga ma le atofaafafa. O se tasi o nei savaliga sopo faataitai e mafai ona aofia ai se tolauapiga mo le po e tasi. Aoao e faaaoga le faafanua ma le tapasa. Afai e mafai, aoao e faaaoga masini GPS ma masini fesootai o leitio.

• Fuafuaina o le malaga ma le lisi o mea e teuina. O se vaega, ia atiina ae se fuafuaga auiliili o le malaga, e aofia ai se faamatalaga o le faamoemoega, o se polokalama atoa, o auala, faatonuga mo auala, faamatalaga mo fesootaiga mo faalavelave faafuasei, ma faafanua. Saunia se lisi o mea e teuina. Ia saunia foi mo faigalotu ma fuafua taimi mo tatalo ma suesuega o tusitusiga paia a le tagata lava ia.

• Malaga ma le atofaafafa. Alu i le malaga. Faaaoga tomai ua aoaoina i gaoioiga e saunia ai mo le malaga.

Mo taiala e faatatau i gaoioiga e faasoloatoa ma le po, tagai Tusitaulima 2,13.6.12.

Aoao e fiafia i gaoioiga faaletino ma latalata atili i le Alii a o e talisapaia le mafagofie o Lana foafoaga.

Faatulaga se vaega o gaoioiga e saunia ai mo se malaga faafagota saogalemu ma le fiafia. O nei gaoioiga e mafai ona umi atu mo ni nai vaiaso. O se sui o le korama po o le vasega ma se faufautua ua lava le malamalama mai le uarota, siteki, po o le alalafaga e mafai ona taitaia le gaoioiga. Mo gaoioiga taitasi, mafaufau e faaaofia se mea e valaaulia ai le uunaiga a le Agaga Paia. Mo se faataitaiga, e mafai ona e valaaulia se tagata e faasoa atu se aafiaga, faasoa atu le molimau, pe aoao atu se aoaoga faavae a o le i amata le gaoioiga.

• Folasaga i le faagota. Aoao e uiga i meafaigaluega fagota talafeagai ma lavalava. Aoao pe iloilo foi soo se fesoasoani muamua e faatatau i fagota.

• Pueina ma le kukaina o le ia. Aoao e uiga i metotia o le mauaina o ia ma pe faapefea ona saunia se ofe faagota ma le laina. Faataitai le nonoaina o nonoa ma le togiina. Aoao pe faapefea ona seti se lave ma faamama ma kuka se ia.

• Fuafuaina o le malaga ma le lisi o mea e teuina. O se vaega, ia atiina ae se fuafuaga auiliili o le malaga, e aofia ai se faamatalaga o le faamoemoega, o se polokalama atoa, faamatalaga mo fesootaiga mo ni faalavelave faafuasei, ma faafanua. Saunia se lisi o mea e teuina. Ia saunia foi mo faigalotu ma fuafua taimi mo tatalo ma suesuega o tusitusiga paia a le tagata lava ia.

• Malaga e fagota. Alu i le malaga. Faaaoga tomai ua aoaoina i gaoioiga e saunia ai mo le malaga.

Afai o lau malaga e aofia ai se gaoioiga i le po atoa, iloilo le taiala i le Tusitaulima 2,13.6.12.