Auauna atu

Tuu atu i tamaitai talavou uma se avanoa e maua ai le pine Aloaia o Tulaga Faatamaitai Talavou, e tusa lava po o a luitau faalemafaufau pe faaletino.

Faatulaga ni gaoioiga masani mo lau vasega a Tamaitai Talavou ina ia faamaea ai ni sini o le Alualu i Luma o le Tagata Lava Ia e fai ma sui o se tamaitai talavou i lau uarota po o le paranesi o loo i ai manaoga faapitoa faaletino pe faalemafaufau. Ia mautinoa o loo maua e le tamaitai talavou o loo i ai manaoga faapitoa le avanoa e auai ai ma saofaga ai i le tele e mafai ai.

Aoao se tomai aoga ma faaaoga e auauna atu ai i se tagata e le tagolima.

Valaaulia se tagata e aoao atu i le autalavou se tomai e pei o le valiata, tausitama, suia o le suauu o le taavale, lipeaina o se uila vilivae, fonoina o laei, po o le totoina o se togalaau (mafaufau e valaaulia se talavou po o latou matua e aoao atu le tomai). Fuafua se auala e faaaoga ai lenei tomai e auauna atu ai i isi.

Fesoasoani atu ia lagonaina e tagata matutua le alofa ma le talisapaia.

Asiasi i tagata matutua (e mafai ona faia i se aso faapitoa po o se aso malolo). E mafai e le autalavou ona asiasi i tagata taitoatasi i o latou aiga pe asiasi i se nofoaga o nonofo ai ni tagata e manaomia le fesoasoani pe ua litaea foi. Mafaufau e saunia se faafiafiaga puupuu faamusika po o se faaaliga taleni e faasoa atu. Ave ia tofu tagata matutua ma se meaalofa laitiiti po o se mea manaia, pe saunia ni pese po o ni taaloga e faasoa atu. Afai o asiasi i se nofoaga e nonofo ai tagata matutua, ia tapa muamua se faatagaga. E mafai foi ona e liliuina lenei [gaoioiga] i se gaoioiga auauna atu lea e faatino ai e talavou taitasi se galuega itiiti o le auauna atu ma le agalelei mo se tagata matua o le uarota. A maea, fai atu i le autalavou e talanoa e uiga i aafiaga.

Ia faamasani i avanoa e auauna atu ai ia i latou e le tagolima.

Asiasi i se Ekalesia i le lotoifale po o se faalapotopotoga i le alalafaga lea e tuuina atu se toomaga po o se fesoasoaniga i e matitiva ma le tagolima (e pei o le faleteuoloa a le epikopo, po o se fale mo e leai ni mea o nonofo ai, po o se fale o i ai tamaiti matuaoti). Talosaga atu ia i latou o e o galulue iina e faamatamata ai, ma faamalamalama atu le mea o latou faia e fesoasoani ai i tagata le tagolima. Saili po o a ni galuega faatino e mafai ona fesoasoani ai le autalavou i le nofoaga autu. Talanoa i auala na auauna atu ai le Faaola ma pe faapefea ona tatou avea faapei o Ia.

Fausia ma faailoa atu le talisapaia mo tama.

Fefaasoaai ma le tasi ma le isi le taua o o outou tama ia te outou. Fuafua o se korama po o le vasega ni auala e faaalia ai le talisapaia mo tama i lau uarota po o paranesi. O nisi nei o manatu:

Fausia ma faailoa atu le talisapaia mo tina.

Fefaasoaai ma le tasi ma le isi le taua o o outou tina ia te outou. O se korama po o se vasega, fuafua ma faataunuu se galuega o le auaunaga e faaalia ai le agaga faafetai mo tina o lou uarota po o le paranesi. O nisi nei o manatu:

• Fatu se tusiata i ata ma ni savali e faailoa atu ai lou agaga faafetai mo lou tina.

• Faia se vitio lea tou te tauina atu i tou tina lo outou alolofa tele mo i latou. Valaaulia tou tina e o mai e matamata le vitio ma outou.

• Toto se togalaau laitiiti mo se tina o le uarota po o le paranesi.

• Volenitia e fesoasoani i nai tina o le uarota po o le paranesi e ala i le tausia o a latou fanau i se afiafi.

• Saunia se taumafataga faapitoa o le afiafi e faamamalu ai tina, ma valaaulia ni nai tina mai le uarota po o le alalafaga. Tuuina atu ni taui i [tina] taitoatasi e auai, i le faamamaluina o lana auaunaga o se tina.

• Valaaulia a outou tina e auai i le Mutuale ma taaalo i se taaloga ma oe.

• Aoao se pese e faamamalu ai tina lea e mafai ona e usuina i le taimi o le sauniga faamanatuga i le Aso o Tina.

• Faia se tauvaga i totonu o le autalavou e vaai ai po o ai e mafai ona faamaea le tele o feau o le aiga mo o latou tina i le vaiaso.

Faatino ni galuega se tele o le auauna atu ma fiafia faatasi i se meaai manaia.

Seti ni faagasologa o ni galuega faatino—faia o ni galuega i le fanua mo se tina ua maliu lana tane po o se ulugalii matutua, sui ni ie pepe e foai atu, ma isi mea faapena—lea e tatau ona faamaea e le autalavou ina ia maua ai ni mea e faia ai se meaai manaia. O le taimi lava e maua ai ia mea uma, feiloai faatasi e fai se meaai manaia.

Auauna atu i le alalafaga ma faamanuia olaga o i latou o e nonofo ai iina.

Galulue faatasi ma tagata i le alalafaga e faailoa mai manaoga e mafai ona fesoasoani le autalavou e ausia. E mafai ona feiloai le autalavou ma taitai o le alalafaga, tagata faigaluega a le malo i le lotoifale, pe auai i se gaoioiga a le alalafaga e pei o se fonotaga a le aufono a le nuu. Faatulaga se galuega faatino e taulima ai manaoga o le alalafaga. O ni mea e ono fai e aofia ai le faamatagofieina o paka po o nofoaga faitele, faitau i tamaiti aoga, asiasi i tagata mamai i se falemai, faatulaga se sailiga meaai po o le tuiina o le toto, ma nisi mea faapena. Afai e talafeagai, fuafua mo ni galuega lipea faifaipea. Talanoa i fesili: O le a le tatou tiutetauave i lo tatou alalafaga? Aisea tatou te auauna atu ai? (Tagai i le Mosaea 2:17.)

Faaali le faaaloalo ma le migao mo fale ua faapaiaina.

A maea ona feutagai ma le epikopo po o se isi taitai, faamama le faletapuai po o isi fale o le Ekalesia (i totonu ma le lotoa). Afai e faamamaina le eria o le faamanatuga, talanoaina le paia o le faamanatuga. Atofa atu se tasi e ave i le fale le ie laulau, ta, gaugau, ma toe faafoi mai i le Aso Sa e sosoo ai.

Mafaufau e saili ni auala e faia ai le faamamaina o le falelotu ma se mea fiafia ma faaleagaga foi. Mo se faataitaiga, e mafai ona e liliuina le faamamaina i ni taaloga po o ni tuuga. E mafai foi ona e tulitatao le faamamaina ma se gaoioiga fiafia faavaega.

Aoao ona faamatagofie fale e ala i tomai faapitoa e faaleleia ma teuteuina ai.

Uunaia le autalavou e talanoa i o latou matua e uiga i se vaega o latou fale latou te fia mananao e faaleleia, ona valaaulia lea o se tagata faufautua (e pei o se talavou po o se matua) e aoao atu ni tomai e manaomia, e pei o le valiina, faatulagaina o ata, faaaogaina o lanu, laupapa, ma isi mea faapena. Tuu atu i le autalavou le avanoa e faataitai ai le tomai. Uunaia i latou e faaaoga mea sa latou aoaoina e faamatagofie atili ai o latou fale. I se gaoioiga i le lumanai, valaaulia le autalavou e faasoa atu pe faaali atu le auala latou te faamatagofieina ai o latou fale.

Ia faia le auauna atu i isi, e aofia ai o tatou aiga, o se vaega o tatou olaga i aso taitasi.

O se vaega, talanoaina auala e mafai ai e autalavou ona auauna atu i tagata o a latou aiga po o se isi aiga. Mafaufau e aoina ni lisi o mea e manaomia i le uarota mai i fonotaga faaleperisitua po o le Aualofa. Tuu atu i le autalavou kalena o loo avanoa le vaiaso e tasi. Tuu atu ia i latou e filifili galuega eseese o auaunaga e faia mo a latou aiga po o isi [aiga] mo le isi aso e fitu ma tusi i a latou kalena. Valaaulia i latou e faamaumau i totonu o a latou api talaaga po o a ni o latou lagona a o latou auauna atu I le faaiuga o aso e fitu, ia faia se gaoioiga tulitatao e faasoa ai aafiaga ma lagona.

Fesoasoani i aiga e le tagolima i le taimi o le Kerisimasi.

Saunia ni meaalofa ma meaai o le Kerisimasi mo se aiga po o auaiga e le tagolima (e mafai ona faia faalilolilo). Faamaopoopo faatasi ma le epikopo le fuafuaina o manaoga ma le faaaogaina o tupe na tuuina atu i le uarota po o ni foai mai tagata o le uarota. A maea le gaoioiga, valaaulia le autalavou e faasoa mai po o a ni o latou lagona na i ai ao latou tuuina atu lenei auaunaga. Talanoa i ni auala e mafai ona latou maua ai le agaga o le Kerisimasi i le tausaga atoa ao latou auauna atu ma faamanuiaina ia olaga o isi.

Aoao e fesootai ma, aoao mai, ma auauna atu i tagata oi ai ni manaoga faapitoa.

Matamata ma talanoa i se vitio e uiga i le auauna atu ia i latou o i ai manaoga faapitoa, e pei o le vitio, “Vae o Dayton,” “Mo Madison,” po o le “Faamalosiau le tasi i le isi”. Valaaulia ia talavou ma tagata matutua o i ai ni manaoga faapitoa i se po o gaoioiga o le faaauai i gaoioiga, e pei o le siva, taaalo i taaloga po o gaoioiga o le faamasani, po o le faia o ni mea taulima. Mamanu ni nofoaga o gaoioiga o loo taitaiina e ni vaega o le autalavou. Ia mautinoa le nofouta i manaoga ma tulaga o i latou o e auauna atu i ai. Mafaufau e faafesootai ia aoga po o nofoaga autu o le tausiga mo ni avanoa e auauna atu ai.

Ia iloa le tele o avanoa e auauna atu ai i tagata i aso uma.

Vaevae le autalavou i ni vaega toalaiti, ma luiina i latou e faatino ni galuega agalelei e lei fuafuaina se tele i se taimi faapitoa na tuuina atu latou te mafaia ai. A latou toe foi mai, fai atu ia i latou e faasoa mai se mea sa latou faia, o a ni o latou lagona, ma na faapefea ona aafia e a latou galuega i latou na latou auauna i ai. Fai atu i se taitai latou te malaga faatasi ma vaega taitasi.

Aoao ni tomai o le a sauniaina ai le autalavou mo le auaunaga o le olaga atoa.

Fesili atu i le autalavou po o le epikopo po o ai i le uarota, paranesi, po o alalafaga e manaomia se fesoasoani ( ia mautinoa e le o talanoaina se mea e le faalauaiteleina). Fai se lisi o tomai e manaomia e ausia ai nei manaoga. Ona fesili atu lea i le autalavou e faailoa mai ni tomai latou te le o mauaina (e mafai ona aofia ai le vali, kamuta faigofie, suisui, faitogalaau, ma isi mea faapena). Fesili atu i le autalavou po o fea o tomai latou te fia mananao e aoaoina e taulima ai nei manaoga. Fai ni fuafuaga mo le ala o le a aoao ai e le autalavou nei tomai. E mafai ona aofia ai le talosaga atu i se tagata poto masani mo se fesoasoani, saili ma le faaaogaina o vitio faaleaoaoga, aumaia o se tusi i le mataupu, ma isi mea faapena.

Ia saunia ni meaai mo e o fiaaai.

Faatulaga se sailiga meaai ma ao mai ia meaai e le leaga gofie e tuu i se fale e teu ai meaai po o nisi faalapotopotoga lea e fesoasoani i e fiaaai. Mafaufau e faafesootai ia faalapotopotoga nei e saili ai po o a ituaiga o meaai e matuai manaomia lava. Toe iloilo ma talanoaina ia mau o i le Mataio 25:31–45. O le a se mea o aoao mai e lenei mea ia i tatou e uiga i le mafuaaga tatou te auauna atu ai?

Auauna atu i isi ao maua le fiafia.

Tuu atu i vaega o talavou se lisi o ni galuega faatino talafeagai, ma atofa atu ni togi o tulaga faatauaina i tagata taitasi e tusa ai ma le faigata. Tofia ia vaega taitasi, e o faatasi ma se taitai matua, e asiasi i ni aiga o lalata ane, magaala, po o tuaoi e iloa ai po o le a le tele o galuega faatino e mafai ona latou faataunuuina i lena eria i se itula. Mo se faataitaiga, e mafai ona latou tapenaina le otaota i luga o le auala pe ofo atu e veleina ni vao a se tagata. Fai atu i vaega uma e toe foi mai pe a maea, e faaopoopo a latou togi ma faasoa mai o latou aafiaga. Avatu ni togi faaopoopo mo talavou o e na faatinoa ni auaunaga e le o i ai i le lisi. Talanoa i fesili nei: O le a le tatou tiutetauave i lo tatou alalafaga? Aisea tatou te auauna atu ai? (Tagai Mosaea 2:17.)

Fesoasoani atu i tagata fou o la tatou alalafaga ia lagona le taliaina lelei ma fesoasoani ia i latou ia lagona le olioli o le auaunaga.

Asiasi i se aiga fou i le eria ma fesoasoani ia i latou i le masii mai pe faatino nisi o auaunaga o manaomia, e pei o le galulue i le fanua, vali, po o le faia o ni lipea o manaomia i le fale. Mafaufau e tuuina atu foi lenei auaunaga i tagata o le Ekalesia faapea foi i latou e le auai i lo tatou faatuatuaga. A maea, talanoa faatasi ma le autalavou i le auala na faamanuiaina ai e a latou auaunaga lenei aiga.

Aoao i le auala e auauna atu ai i tagata o le aiga e ala i le agalelei ma le faaaloalo.

Valaaulia ni tei matutua po o nisi tagata matutua o le aiga e auai i se talanoaga faavaega e uiga i le faaleleia o mafutaga ma isi tagata o o tatou aiga. E mafai faapefea e uso ma tuafafine ona avea ma ni uo mamae ao latou laiti? Mafaufau e matamata le vitio “E Lua Uso e Va Ai”. Valaaulia le autalavou e mafaufau le tagata lava ia mo ni nai minute i soo se suiga o le a latou faia i le ala o latou taulimaina ai tagata o o latou aiga.

Auauna atu ma fausia ni fegalegaleaiga ma tagata matutua o le alalafaga.

Tofi ia talavou taitasi e valaaulia se tagata matua nofofua po o se tuaoi ua maliu lana tane i se taumafataga o le afiafi na faatulagaina e alii talavou ma tamaitai talavou. I le taimi o le taumafataga, fai atu i le autalavou e nonofo i autafa o le tagata sa latou valaauliaina ma aoao mai ni mea e uiga ia te ia. A latalata i le faaiuga, fai atu i talavou taitasi e faailoa mai lana uo ma faasoa mai se tala po o se mea sa latou aoaoina e uiga i lenei tagata.

Mafaufau e faia lenei taumafataga o le afiafi i le taimi o se aso malolo faapitoa lea e toatele tagata e mafai ona faamanuia ai e ala i le fiafia i se taumafataga o le afiafi ma isi tagata.

Fesoasoani i se tasi i le uarota ia lagona le alofagia.

Faapipii faalilolilo ni tamai fasi pepa o i ai ni savali faamalosiau ma le alofa i luga po o autafa o le taavale, faitotoa pito i luma, po o le fanua o se tagata o le uarota (e pei o le epikopo, o se aiga fou, po o se aiga ua o le o toe malolosi mai). Talanoa po o a ni lagona o le autalavou ao latou faia se mea lelei mo se isi tagata. E mafai faapefea ona faaalia e le autalavou le agalelei i isi i o latou olaga i aso uma? i o latou aiga? i le aoga? Valaaulia i latou e faataitai manatu nei mo se vaiaso ona faasoa atu lea o o latou aafiaga.