Matafaioi o le Lumanai

Aoao e uiga i ni filifiliga o ni matata faaolioli ma faia ni fuafuaga e taulai atu i ai.

Fesili atu i le autalavou po o a matata e latou te fiafia i ai, ma mafaufau e valaaulia tagata o le uarota i galuega eseese e faasoa atu mea e latou te faia ma pe faapefea ona faaaofia i lena matata. Mafaufau e tuuina atu se suesuega o matata e fiafia i ai le autalavou e fesoasoani e fuafua ai matata talafeagai e fetaui ma i latou. E mafai foi ona e lagolago pe asiasi i se faaaliga o galuega i le lotoifale e faalauiloa atu ai le autalavou i galuega ma matata e mafai ona maua. Fautuaina le autalavou e saunia ni fesili ao le i faia le faaaliga. Talanoaina pe faapefea ona tulimataia ia sini faaleaoaoga po o le faalegaluega e saunia ai le autalavou mo tiutetauave i le lumanai o le avea ma ni matua ma tausi [aiga].

Aoao e uiga i se matata po o le vaega o suesuega.

Saili matua o le autalavou o e e mafai ona aoao atu le autalavou e uiga i a latou matata po o galuega. Talosagaina i latou e tuu atu i le autalavou se vaaiga aoao o ituaiga galuega o loo maua i lena matata, o a ni agavaa e manaomia mo lena ituaiga matata, ma isi mea faapena. Afai e talafeagai, ia tuu atu i le autalavou e o e matamata i le falefaigaluega. Talanoa i le auala e saunia ai e le gauai atu i aoaoga po o sini faapitoa ia le autalavou mo tiutetauave o i le lumanai i le avea ai ma ni matua ma tagata faigaluega.

Faamasani i se lotoa o le kolisi ma ia musuia e taulai atu i se aoaoga maualuga atu.

Asiasi i se lotoa o le kolisi i le lotoifale po o le aoga o matata eseese e aoao ai e uiga i le aafiaga o le kolisi ma avanoa faaleaoaoga. Fesili e uiga i tulaga manaomia o le ulufale atu, sikolasipi, matafaioi tautupe, ma tulaga i galuega po o matata o ono i ai. Talanoa i le auala e saunia ai e le gauai atu i aoaoga po o sini faapitoa ia le autalavou mo tiutetauave o i le lumanai i le avea ai ma ni matua ma tagata faigaluega.

Aoao e fuafua ma saunia ni meaai paleni.

Valaaulia se tagata kuka lelei i la outou alalafaga e aoao le autalavou i le ala e fuafua ai meaai, fai le faatauga, ma faaaoga ia tomai faigofie o le kuka. Ia avea o se gaoioiga tulitatao, vaevae i vaega e saunia ai ni vaega eseese o se meaai. O mai faatasi e fiafia i le taumafataga ma faasoa atu i isi mai le uarota. Talanoa i le taua o le malamalama i le auala e saunia ai meaai ina ia faamanuia ai i tatou lava faapea ma isi.

Tuu atu i talavou matutua le avanoa e fesoasoani ai i talavou laiti ina ia faamanuiaina i le aoga.

Saili po o a mataupu o le aoga e faigata i le autalavou, ona faapaga lea o talavou taitasi ma se tasi e mafai ona fesoasoani i na mataupu. Valaaulia i latou e talanoa i autu e pei o metotia lelei mo le suesue ma pe aisea e taua ai le galulue malosi i le aoga e saunia ai mo tiutetauave o i le lumanai. Talanoa i le Mataupu Faavae ma Feagaiga 88:78–80 ma po o le a se mea o aoao mai e nei mau e uiga i le faaauauina o le aoga. Mafaufau i le faatulagaina o ni vaega suesue faifai pea po o le tofia o ni faiaoga faapitoa mo i latou e manaomia le fesoasoani faaopoopo.

Saunia ia mea tautupe mo aoga maualuluga.

Tuu atu i se faufautua o aoga po o se tasi mai le nofoaga o mea tau galuega i la outou eria e talanoa i avanoa tau sikolasipi ma tupe o loo avanoa i tamaiti aoga. Talanoa i le Tupe Faaagaga mo Aoga pe afai e faatatau i la outou eria. Uunaia le autalavou e faia se fuafuaga mo le auala o le a latou totogiina ai le aoga. E mafai ona aofia i lenei mea le mauaina o se galuega ma sefe mo le kolisi, fuafua mea e manaomia ona latou faia e agavaa ai mo se sikolasipi, po o le faamautuina o se fesoasoaniga tautupe. Afai e talafeagai, tuu atu i le autalavou se taimi e faataitai ai le faatumuina o pepa talosaga. Talanoa i le auala e saunia ai e le gauai atu i aoaoga po o sini faapitoa ia le autalavou mo tiutetauave o i le lumanai i le avea ai ma ni matua ma tagata faigaluega.

Faamalolosia fegalegaleaiga ma faaaloalo i matua.

Fai atu i le autalavou e ao mai ni ata ma ni mea faitino patino o loo faamatala mai ai ni mea e uiga i o latou matua. E mafai ona latou talanoa ma o latou matua e uiga i le auala na la feiloai ai, pe na faapei le taimi sa latou tuputupu ae ai, mea sa la ausia ma faataunuuina, ma mea la te fiafia i ai. Fai atu i le autalavou e aumai se pese e fiafia i ai o latou matua e ta pe faatino mo le vaega. Valaaulia ia matua o le autalavou i le faafiafiaga, ma auauai le autalavou i le faailoa mai o o latou matua i le vaega e faaaoga ai ia aitema sa latou aoina mai. A uma le faafeiloaiga, fai atu i le autalavou e faailoa mai pe tusi ni mea sa latou faamemelo ai i o latou matua ma faailoa atu lo latou agaga faafetai mo la latou ositaulaga ma le alofa. Faaiu le gaoioiga i se talanoaga e faatatau pe aisea na poloaiina ai i tatou e le Atua ia “ava i lou tama ma lou tina.” Tuu atu i le autalavou e toe mafaufau i le auala e mafai ona latou iloa ai ma faamamaluina lo latou Tama Faalelagi.

Aoao ina ia nafa taulimaina lelei mea tau tupe i le taimi nei e saunia ai mo le lumanai.

Mafaufau e faasoa atu se tulaga moni o le olaga e fesoasoani ai i le autalavou ina ia malamalama i le tau o le soifuaga. Talanoa i le taua o le ola ai i mea e te gafatia. Aoao i le auala e fatuai ai ma ola ai i se paketi faigofie, e aofia ai le totogiina o le sefuluai ma taulaga, sefe mo ni tupe faaalu i le lumanai, aloese mai pasene o nonogatupe ma kata faifaatau, malamalama i nonogatupe a tamaiti aoga, ma ola saoloto mai aitalafu. Faasoa atu ni auala e faapea o le ola tutoatasi i mea tautupe e faasaoloto mai ai i tatou ina ia auauna lelei atu ma faamanuia i isi.

Aoao i le taimi nei e aoao atu le talalelei i le aiga.

Ao lei faia le gaoioiga, fai atu i le autalavou e filifili se autu o le talalelei ma fautuaina atu ni manatu mo le aoao atu o lena autu i le afiafi faaleaiga. E mafai ona latou aumaia ni manatu mai mea sa latou faia i o latou lava aiga.

Tofia ni talavou po o ni vaega o talavou e saunia ni vaega eseese o le afiafi faaleaiga (mo se faataitaiga, mau, pese, tatalo, lesona, gaoioiga, meaai manaia). I le taimi o lau gaoioiga, fai atu i le autalavou e faataunuu ni matafaioi lea na atofaina atu ia i latou ao e faia se faataitaiga o le afiafi faaleaiga. Ona mamanuina lea o se tamai ato o le afiafi faaleaiga mo le autalavou e ave i le fale. E mafai ona aofia i le ato se siata o tofiga, anomea o le lesona, faatonuga o gaoioiga, ma se fua o se meaai manaia. Talanoa e uiga i le taua o le auai i le afiafi faaleaiga i le taimi nei ina ia mafai ai ona maua se meafaigaluega aoga i le faamalolosia o aiga i le lumanai.

Ia saunia mo se faaipoipoga fiafia ma faavavau e ala i le faatutuina o ni sini ina ia avea ma se toalua amiotonu.

Teuteu se potu i lo outou faletapuai i ata o le malumalu, afai e mafai o malumalu e sili ona latalata i le mea o loo e nofo ai. Valaaulia ou matua ina ia auai i le gaoioiga. E mafai ona e fai atu i faufautua ma matua e aumai ia ata o a latou faaipoipoga ma ofu talaloa po o suti na latou ofuina ina ua latou faaipoipo. Faatasi ai ma se faatagaga mai le epikopo po o le peresitene o le paranesi, fai atu i nai matua ina ia saunia e talanoa atu e uiga i feagaiga o le faaipoipoga o le malumalu. Fai atu ia i latou e faasoa atu pe na faapefea ona latou saunia mo le faaipoipoga, pe na faapefea ona latou filifili po o ai e faaipoipo i ai, ma mea o loo latou faia i le taimi nei e faamalosia ai a latou faaipoipoga. Valaaulia lau vasega po o le korama e seti ni sini ina ia saunia e faaipoipo i le malumalu ma faamamaluina feagaiga o le faaipoipoga.

Aoao i le auala e tausia ai le fanau.

Faatino se semina o le tausiga o tamaiti e aoao ai ni vaega tau le atinaega faigofie o le fanau ma le auala e taulimaina ai o latou manaoga. Taaalo i ni taaloga e fiafia tamaiti e taaalo ai, fatu se ala maagao e aoao atu ai e uiga i le saogalemu o tamaiti, pe aoao foi ma faatino nisi o tala moe malie, solo, po o ni pese e faafiafia ai tamaiti. Faaiu le gaoioiga i se talanoaga e uiga i isi auala e mafai e le autalavou ona saunia ai i le taimi nei ina ia avea ma ni matua amiotonui le lumanai. Valaaulia le autalavou e faataitai ia tomai nei e ala i le tausitama, volenitia i le vasega pepe, po o nisi auala.

Atiina ae ni tomai suesue lea e mafai ona fesoasoani i le autalavou i le aoga i le taimi nei ma faapea ai le taimi mulimuli i le olaga.

Valaaulia se faiaoga, faiaoga faapitoa, po o se tamaitiiti aoga faamanuiaina e aoao atu ma faataitaia ni tomai suesue lelei ma aoga. Tuu atu i le autalavou ni avanoa e faataitai ai i nei tomai. Mafaufau e setiina ni nofoaga o le a mafai ai e le autalavou ona faataitaia ni tomai e pei o le faitauina o ni anotusi faigata, tusitusi, faatulagaina ni faamatalaga, suesue mo ni suega, tusi ni tala, tauloto ni motugaafa, ma isi mea faapena i le avea ma se vaega o le gaoioiga, faitau ma talanoa i le fautuaga mai le Mataupu Faavae ma Feagaiga 88:118.

Aoao i le auala e tausi ai ia mama ma faatulaga tataule fale.

Aoao ni tomai autu o le faatulagaga ma le faamamaina o le fale mai se faufautua i ni auala malie ma sogasoga. Mo se faataitaiga, fai se taaloga po o se tauvaga mai ni galuega faamama. Faailoa mai ni mea e manaomia ma ni metotia talafeagai e faatumauina ai se fale faatulagaina lelei. Talanoa i faamanuiaga e oo mai mai le faatumauina o se fale o le faatulagaga tatau. A uma ona aoao ia tomai, ia faaaoga e auauna atu ai i se tagata o loo i ai se mea o manaomia, po o le faamama ai o potu i le faletatalo e pei ona faataitaia.

Aoao i le auala e saili ai ma maua ai ni galuega.

Valaaulia le tagata tomai faapitoa mo galuega i le siteki po o le uarota e faasoa atu i le autalavou le auala o ia fesoasoani ai e tapena ia tagata taitoatasi e saili ni galuega. Fai atu i le tagata tomai faapitoa mo galuega ina ia fesoasoani atu i le autalavou i nisi o tomai faigofie i le sailia o se galuega (e pei o le upegatafalagi, faatalanoaga, po o le tusiaina o se pepa o faamatalaga e faatatau ia te ia) ma ni fautuaga(e pei o laei ma teuga ma le auala e mafai ai ona faaalia le to’a ma le toafimalie).Mafaufau e tuu atu i le autalavou e faataitai ia tomai nei i le tasi ma le isi (mo se faataitaiga, i ni faatalanoaga faataitai). E mafai foi ona e tuuina atu ia i latou le taimi e tapena ai a latou lava pepa o faamatalaga po o le faataitai e faatumu ni talosaga mo se galuega. Talanoa i le auala e mafai ai e ni galuega eseese ona aafia ai gaoioiga a lou aiga ma le Ekalesia.

Aoao i le auala e faaaoga tatau ai ia punaoa o i se faletusi i le alalafaga.

Asiasi i se faletusi i le alalafaga e aoao ai e uiga i punaoa o loo maua e fesoasoani ai i tamaiti aoga i a latou sailiga faaleaoaoga (tagai MF&F 88:118). I lalo o le taitaiga a le tagata e vaaia le faletusi, matamata i le faletusi ma faamasani i aiaiga ma taiala mo le lelei o le faaaogaina o anomea. E mafai foi e le autalavou ona aoao ni tomai mo nisi suesuega sili aoga o le Initoneti.

Aoao ni uiga e atiina ae po o ni uiga e vaavaai i ai i se toalua i le lumanai.

Valaaulia ni tama ma ni tina e auai i se talanoaga faavaega e faatatau po o le a se mea e avea ai ma se tama maoae. O faapefea ona latou pulefaamalumalu, tausia, ma puipui o latou aiga ma fesoasoani i o latou taitoalua e avea ma paaga tutusa? Uunaia le autalavou e fai ni fesili e uiga i le tulaga faatama. E mafai ona latou auina mai ia fesili ao lei taitai. Mafaufau e fai atu i le talavou e fai mai ni fesili e uiga i tulaga faapitoa ma fai atu i tama e tali mai i le auala latou te taulimaina ai.

Aoao ni uigae atiina ae po o ni uiga e vaavaai i ai i se toalua i le lumanai.

Valaaulia ni tina ma ni tama e auai i se talanoaga faavaega e faatatau po o le a se mea e avea ai ma se tina maoae. O faapefea ona latou faafaileleina a latou fanau, aoao o latou aiga, ma fesoasoani i a latou tane e avea ma paaga tutusa? Uunaia le autalavou e faia ni fesili e uiga i le tulaga faatina. E mafai ona latou auina mai ia fesili ao lei taitai. Mafaufau e fai atu i le talavou e fai mai ni fesili e uiga i tulaga faapitoa ma fai atu i tina e tali mai i le auala latou te taulimaina ai.

Atiina ae ni tomai aoga mo le faaleleia ma le tausiga o se aiga.

Tuu atu i se taitai matua po o le autalavou e aoao atu ni tomai eseese aoga o le aiga, e pei o le auli, suisui, palama, iloaina ma le faaaogaina o meafaigaluega, ma isi mea faapena. E mafai ona e faia se tauvaga faigofie e suesue ai le autalavou i le vave ma le lelei e mafai ona latou faamaea ai nei galuega. Talanoa i le mafuaaga e taua ai nei tomai mo le faataunuuina o matafaioi o i le lumanai i le avea ma matua.

Fefaasoaai taleni ma faataitai le kukaina o ni ipu eseese.

Fai atu i le autalavou ma taitai matutua e saunia ni meaai e sili ona fiafia i ai le aiga ma laulau atu ia i latou i le taimi o se taumafataga masani. Saunia ni faailoga i ni vaega eseese, e pei o le meaai e sili ona matagofie, sili ona tofo lelei, sili ona maloloina, sili ona tulagaese, ma isi mea faapena. Mafaufau e fatu mai le autalavou, taitai o le autalavou, ma taitai o le uarota se vaega o faamasino. Atonu e te manao e valaaulia matua e auai. Talanoa i faamanuiaga o le taumafa paleni po o ni auala e mafai ona e faaaoga ai le kuka e auauna atu ai i isi.

Aoao ia tomai suesue e faaaoga i le fale, lotu, seminare, ma le aoga.

Valaaulia se taitai, talavou, po o se faiaoga seminare e talanoa e uiga i le suesue i tusitusiga paia. Fai atu ia te ia e faataitai le makaina o mau, tusitusia o ni faamatalaga, suesue i autu, faamaumauina i api talaaga o mau, ma faia ai pea i se auala aoga. Tuu atu i le autalavou se itulau na kopi o mau e faataitai ai. Ona valaaulia lea o se tagata matua e talanoa e uiga i le ala e mafai ai ona faatatau na metotia i isi taulaiga faaleaoaoga. Tuu atu i le autalavou se tusiga manaia po o se tala e faataitai ai. Ia talanoaina pe faapefea ona fesootai ia aoaoga faaleagaga ma le faaletino.

Faatino se auaunaga ao aoao i le ala e faaleleia ai ma faatumauina se aiga.

Valaaulia se tagata e i ai se tomai faapitoa i le valifale e faataitaia ma aoao atu le tomai o le valiina o le fale. I lalo o le taitaiga a le epikopo, filifili se aiga o se tagata e le tagolima ma faatulaga mo le autalavou ma faufautua e vali se potu, pa, puipui, po o nisi eria. Mafaufau e talanoa i fesili nei: Na faapei se lagona o le tuuina atu o se auaunaga? O le a faapefea ona fesoasoani ia te au le iloa vali ia avea ai ma se tagata e faatuatua ia te ia lava. O a nisi o fesootaiga i le va o le vali ma aoaoga faavae o le talalelei? Uunaia le autalavou ia auai i se galuega faatino o le valiina faatasi ma o latou aiga.