Galuega Faafaifeautalai

Aoao e uiga i le aoao atu o le talalelei i tagata mai isi aganuu ma siosiomaga.

Valaaulia faifeautalai ua foi mai o e na auauna atu i ni nofoaga eseese i le lalolagi atoa e faasoa atu ni a latou aafiaga faamisiona ma le autalavou. E mafai e tagata taitasi ona seti se laulau ma saunia se faamatalaga i le aganuu ma le lotu o se eria faapitoa, faaali ni ata ma ni mea taua, pe aumai ni faataitaiga o se meaai ese. Talanoa i le ala na aafia ai e le aganuu ma tapuaiga a tagata ia latou misiona le ala na latou aoao atu ai i latou i le talalelei. E mafai ona vaevaeina le autalavou i ni vaega ma feofeoai solo i sauniuniga a faifeautalai ua toe foi mai.

Aoao i le ala e faitau ai le Tusi a Mamona ma se tagata o se atonu e faafaigata ona malamalama i ai.

Fai atu i talavou taitasi e faailoa mai se tagata e mafai ona latou faitauina faatasi le Tusi a Mamona, o se atonu e faafaigata ona malamalama i ai (e pei o se uso po o se tuafafine laitiiti po o se uo atonu e lei faitau muamua lava i ai). Valaaulia i latou e seti se taimi faapitoa i vaiaso taitasi e faitau faatasi ai. Ina ia fesoasoani i le autalavou e saunia mo lenei gaoioiga, tuu atu ia i latou se taimi e faataitai ai i ni paga. Taialaina i latou ao latou faatinoina i ni tala ma fesoasoani i le tasi ma le isi ia malamalama i le autu, upu faigata ma fuaitau, ma upumoni faavae o loo i ai i fuaiupu o loo latou faitauina (tagai Talai Lau Talalelei, 10–11). Uunaia i latou e faia lea lava mea e tasi pe a latou faitauina faatasi ma le tagata sa latou faailoa maia.

Valaaulia le autalavou e faapotopoto faatasi mai pe a mavae se masina o le faia o lenei mea, ma faia se talanoaga e uiga i mea sa latou aoaoina ma mea e mafai ona latou faia latou te saunia lelei atili ai e fesoasoani atu i isi ia malamalama i le Tusi a Mamona.

Aoao ma faataitai ia tomai faafaiaoga autu e ala i le aoaoina o isi.

Ao lumanai le gaoioiga, faailoa atu ni fesili faapenei: E faafepea ona ou aoao atu mai tusitusiga paia? E mafai faapefea ona ou tuuina atu ni fesili anoa ao ou aoao atu? E mafai faapefea ona ou faalogo lelei ia i latou ou te aoaoina? E mafai faapefea ona ou aoao atu e tusa ai ma manaoga o au tagata sailiili? E mafai faapefea ona ou fesoasoani i tagata e foia o latou popolega? (Tagai Tala'i La'u Talalelei mataupu e 10.)

Tuu atu i le autalavou e filifili se tasi o tomai nei e faaleleia, ma vaevaeina i latou e fai soa e tusa ma mea sa latou filifilia. E mafai e soa taitasi ona suesue faatasi i o laua tomai mai le Tala'i La'u Talalelei ma sauni e faailoa atu le tomai i le vaega atoa. I le la aoaoga, uunaia i laua e faamatala mai le uiga o le tomai, faailoa mai pe faapei le faaaogaina, ma tuu atu i isi e faataitaia.

Valaaulia isi ia o mai ia Keriso e ala i le faasoaina atu o ni savali musuia e ala i ala o faasalalauga faaagafesootai.

Faasoa atu ni ou manatu ma lagona e uiga i le Faaola i le tasi ma le isi. I le taimi o se gaoioiga po o se taimi mulimuli ane i lena afiafi, faasoa atu se tasi o nei vitio e ala i ala o faasalalauga faaagafesootai, e pei o le Facebook po o le Twitter. I le vaiaso e sosoo ai, faasoa atu ou aafiaga i le faia o lenei mea, e aofia ai ni tali mai isi a o e faasoaina atu nei savali paia.

Mafaufau o se tasi o mafuaaga ua fatuina ai e le Ekalesia nei vitio ina ia mafai ai tagata o le ekalesia ona fefaasoaina atu i le tasi ma le isi, e aofia ai uo mai isi tapuaiga.

Faataitai le aoao atu o upumoni o le talalelei ma le taliina o fesili o le talalelei.

Vaevae le autalavou e fai soa, ma fai atu ia i latou e saunia ni lesona pupuu mai le mataupu e 3 o le Talai Lau Talalelei. E mafai e soa taitasi ona aoao atu isi talavou o e o faia le matafaioi o le tagata sailiili. Valaaulia ia “tagata sailiili’ e fai ni fesili i le taimi o le talanoaga mo soa e tali mai. A uma ona aoao atu ia soa, e mafai ona fesuiai a latou matafaioi ma e mafai ona aoao atu isi talavou.

O le a sili atu ona manuia lenei gaoioiga pe a malamalama le autalavou i suesuega autu ma tomai faafaiaoga o loo aofia i le Talai Lau Talalelei mataupu e 2 ma le 10. Mafaufau e toe iloilo nisi o nei tomai ao lei fai atu i le autalavou e aoao atu.

Faasoa atu le talalelei i tagata o le alalafaga i se faletatala, faafiafiaga faaleaganuu, po o se isi gaoioiga.

Galulue faatasi ma le au epikopo ma faifeautalai faamisiona e fuafua, saunia, ma faalauiloa atu se faletatala a faifeautalai, gaoioiga faaleaganuu, po o se isi gaoioiga i le faletatalo i le lotoifale. Tuu i le autalavou e fatu ma tufatufa atu ni pepa, faafeiloai malo, faasoa atu ni aoaoga faavae autu ma tagata o asiasi mai, ma fuafua nisi gaoioiga e fesoasoani i tagata asiasi mai e aoao e uiga i le talalelei i le taimi o le faletatala.

Auai i le galuega faafaifeautalai e ala i le o faatasi ma faifeautalai faamisiona e saili ma aoao atu isi.

(Manatua: E talafeagai tele lenei gaoioiga mo ositaulaga ma Lora.) Galulue faatasi ma le taitai misiona a le uarota, fuafua se taimi e mafai ai ona o faatasi le autalavou ma faifeautalai faamisiona e saili ma aoao atu isi. Fesili i faifeautalai po o a ni lesona atonu o le a aoaoina ina ia mafai ai ona tapena le autalavou e ala i le suesue i vaega talafeagai i le Tala'i La'u Talalelei.

O le taimi lava e maua ai e le toatele po o le autalavou atoa lenei avanoa, valaaulia i latou e faasoa mai o latou aafiaga i le taimi o le gaoioiga a le Mutuale. O le a se mea sa latou aoaoina? O le a se mea na uunaia ai i latou e o latou aafiaga e faia ina ia lava tapena ai mo a latou misiona?

Fesoasoani i faifeautalai e tuuina atu malaga maimoa i falelotu a le Ekalesia i le lotoifale.

Fuafua se gaoioiga ma faifeautalai lea e te valaaulia ai tagata e le toaaga mai ma uo e le auai i la tatou faatuatuaga e fai se malaga maimoa i le falelotu a le Ekalesia. E tatau ona taulimaina e faifeautalai le tuuina atu o le malaga maimoa. E masani ona amataina malaga maimoa i le pito i luma [o le falelotu], lea e potopoto ai tagata e auai mo se tatalo amata. Ona taitai lea e faifeautalai le vaega i le faatanoa papatiso (pe afai e i ai se [faatanoa papatiso i la outou falesa) ma faamatala atu e uiga i la tatou manaomia mo le Togiola o Iesu Keriso. Atonu e alu ai le taimi e faasino atu ai galuega o faatufugaga o loo siomia ai le faletatalo, ma e mafai ona latou faaaogaina lenei galuega o faatufugaga e aoao atu ai e uiga i le talalelei toefuataiina. E masani ona faamaeaina ia malaga maimoa i totonu o le falesa i talaane o le laoai o le faamanatuga, lea e aoao ai e faifeautalai e uiga i le faamanatuga ma lo tatou manaomia e osia ma faafou feagaiga ma le Atua. E faalagolago i le taitaiga o le Agaga ma le tulaga o le malaga maimoa, e mafai e faifeautalai ona tuuina atu ni valaaulia e aoao atili ai e uiga i le talalelei, auai i le lotu, po o le papatisoina.

I le malaga maimoa atoa, o le a valaauliaina oe e faasoa atu le molimau i mataupu faavae o le talalelei. E mafai ona e saunia mo lenei aafiaga e ala i le suesueina o autu e pei o le Togiola o Iesu Keriso, o le Toefuataiina o le talalelei, o le faamanatuga, ma le papatisoga. E mafai foi ona e saunia e ala i le fai atu i faifeautalai e tuuina atu se malaga maimoa ae e te le'i valaauliaina isi ina ia auai.

Tofo pe faapei le galuega faamisiona ma faaleleia ni mausa o le suesueina o le talalelei.

Fai atu i le autalavou e tofu soa ma le itupa tutusa, ma tuu atu i soa taitasi se “valaauga i le misiona” e auauna atu i soo se nofoaga i le lalolagi. Fai atu i soa taitasi e suesue i se lesona mai le Talai Lau Talalelei ma sauni e aoao atu i se aiga i le uarota. Fesootai atu i nisi o tagata o le uarota e o atu ni soa i o latou aiga, fai taumafataga faatasi, ma aoao atu se lesona e pei lava e le auai lo latou aiga i le Ekalesia. I le avea ai ma se vaega o lenei gaoioiga, e mafai ona ola ai le autalavou i le tele o tulafono o le misiona mo se vaiaso (e pei o le ala i luga i le 6:30, suesue i tusitusiga paia mo se itula i le aso, faatapulaa le faaaogaina o ala o faasalalauga, ma isi mea faapena). E mafai foi e le autalavou ona aoao e uiga i le aganuu, tau, ma isi uiga o le eria o loo atofaina atu i ai i latou. Mafaufau e faaaofia le epikopo i nei gaoioiga ina ia aoao le autalavou e uiga i mea e manaomia mo le auaunaga faamisiona, le auala e auina atu ai se pepa talosaga mo le misiona, ma isi mea.

Aoao e uiga i le galuega faafaifeautalai mai faifeautalai faamisiona.

Valaaulia ni faifeautalai faamisiona po o ni faifeautalai faatoa foi mai e talanoa i ni tulaga talafeagai ma punaoa o loo maua mo le faasoaina atu o le talalelei. Fai atu ia i latou e faamatala mai le auala na latou suesue ai ao latou sauni e aoao atu. Faatino i ni tala mea e mafai e le autalavou ona tau atu i a latou uo e uiga i le Ekalesia i ni nofoaga eseese. Valaaulia le autalavou e faia se aafiaga faafaifeautalai i vaiaso taitasi ma faasoa ai o latou aafiaga.

Aoao i le auala e faaaoga ai le Tusi a Mamona e fesoasoani ai i tagata sailiili i le taliina o a latou fesili e uiga i le olaga ma le tulaga faaleagaga.

Atofa atu ia tofu le autalavou ma se tasi o “fesili o le agaga” i le itulau e 118 o le Talai Lau Talalelei. Aveatu se lui i le autalavou e sue pe o faapefea ona taliina e le Tusi a Mamona na fesili (afai latou te manaomia se fesoasoani, faasino i latou i mataupu o loo lisiina atu faatasi ma fesili taitasi i le Talai Lau Talalelei). Valaaulia i latou e faasoa mai se mea sa latou maua.

Faataitai le taliina o ni fesili e uiga i le talalelei e ala i le faasoa atu o le ala tatou te mulimuli ai ia Iesu Keriso.

Valaaulia le autalavou e fai mai ni fesili latou te faalogo i ai e uiga i o latou talitonuga po o le Ekalesia. Vaevae le autalavou i ni vaega toalaiti, ma tuu atu ia tofu i latou ma se fesili. Valaaulia le autalavou e faitau le fesili, sue ni mau lea e faatatau i le Faaola po o Ana perofeta o loo aoao atu ni mataupu faavae e fesootai i le mataupu po o le fesili, ma saunia ni tali e faasoa atu i le vaega atoa e ala i le mulimuli i se mamanu e pei o lea o loo i lalo:

1. O la matou fesili o le ________________________________________________.

2. Na aoao mai le Faaola _______________ (faitau se mau ma faamalamalama mai po o le a le uiga).

3. I lo’u olaga, ua ou iloa ai o _____________ (faasoa mai ni aafiaga patino i le ola ai i lenei mataupu faavae).

Faataitaiga:

1. O la matou fesili o le: Aisea e te le inu kofe ai?

2. Na aoao mai le Faaola e ala i Lana Aposetolo o Paulo o o tatou tino o se malumalu, ma e tatau ona tatou tausiaina i lena ala (faitau 1 Korinito 6:19). Mo au la, o lona uiga o le le aveina i totonu i lou tino o ni mea e lamatia ai. O le kofe o se tasi o na mea. Ua faaalia mai e le Faaola se tulafono o le soifua maloloinai le Ekalesiaua ta’ua o le Upu o le Poto, lea o loo aoao mai ia i tatou le aloese mai fualaau faasaina, ava malosi, ma le tapaa.

3. I lo’u olaga, ua ou maua ni faamanuiaga maoae ao ou taumafai e mulimuli i le Faaola i le tausia o lou tino e pei o se malumalu (faasoa atu se aafiaga patino po o se molimau).

Faaleleia ni mausa o le suesue i le talalelei e faaaogaina ai anomea faafaifeautalai.

Tuu e fai soa le autalavou, ma atofa atu i soa taitasi se mataupu mai tusitusiga paia. Fai atu ia i latou e suesue a latou mataupu e mulimuli ai i taiala o loo i itulau e 17–18 o le Tala'i La'u Talalelei (tatalo, suesue ma le naunautai moni, faalogo i le Agaga, faaaoga mea na e aoaoina) ona aoao atu lea o se lesona e uiga i mea sa latou aoaoina i se isi soa po o le vaega atoa. Mafaufau e valaaulia le autalavou e faaaoga taiala nei ia latou suesuega patino o tusitusiga paia.

Ia auai i le galuega faafaifeautalai e ala i le sauniuni e tuu atu se kopi o le Tusi a Mamona i se tagata.

Tuu atu i le autalavou ni kopi o le lomiga a faifeautalai o le Tusi a Mamona. Valaaulia i latou e tusi a latou molimau i totonu o le faavaa i luma ma faailoga nisi o a latou fuaitau e sili ona fiafia i ai. E mafai ona e valaauliaina ni faifeautalai faamisiona e fautua mai ni fuaitau faaopoopo e faailoga. Tuu atu ia i latou ni avanoa e faataitai le faamatalaina o le Tusi a Mamona i se tasi e lei faitau muamua lava i ai (fesoasoani ia i latou pe fai atu e fesoasoani le tasi i le isi i faataitaiga). Valaaulia i latou e ave a latou kopi o le Tusi a Mamona i se tasi e le auai i le Ekalesia ma molimau atu e uiga i le Tusi a Mamona i lena tagata. I le faagasologa o se gaoioiga i le lumanai, valaaulia le autalavou e faasoa mai ni o latou aafiaga.