Malosi Faaleagaga

Faataitai le faaaogaina o le faatuatua ma le faalogologo i le Agaga.

Ao lei faia le gaoioiga, lalaga se maea e ui i totonu o se auala gaoa puupuu. E mafai ona faia lenei mea i fafo e faaaoga ai laau ma isi mea faanatura po o i totonu foi e faaaoga ai ni meaafale faigofie po o nisi aitema. Faapipii se ata o le Faaola i le iuga o le auala gaoa.

Valaaulia se taitai po o le autalavou e faasoa atu i le vaega se savali puupuu e uiga i le faatuatua. Faamalamalama atu e filemu le gaoioiga lenei lea e tatau ai ona latou usitaia ia lapataiga ma pipiimau i le maea. Tau atu i le autalavou o le a suitulaga se tasi o taitai i le leo o le Agaga, ma o le a tuu atu i le autalavou uma ina ia lagona le leo o lena taitai. Taitai atu ia talavou taitasi i le amataga o le maea e faaiu ai le ala gaoa ao ufiufi ia mata. Tuu atu i le taitai o loo sui i le Agaga e tuuina atu ni faatonuga atamai e mulimuli ai le autalavou (e pei o le “laa i luga o le ogalaau” po o le “liliu i le itu agavale”), ma fai atu i isi taitai e faasese le autalavou e ala i le tuuina atu ia i latou o ni faatonuga le lelei. Ao taunuu atu le autalavou i le iuga o le maea, aveese ia ufiufi taitasi mai o latou mata ina ia mafai ona latou iloa ua latou taunuu atu i le Faaola.

A uma ona maua e tagata uma le avanoa e auai ai, valaaulia le autalavou e faasoa mai o latou manatu e uiga i le gaoioiga ma talanoa i mea sa latou aoaoina e uiga i le faaaogaina o lo latou faatuatua, faalogo i le Agaga, ma le tumau e oo i le iuga.

Aoao e uiga i ai ma talisapaia le faatuatua o i latou sa ola i aso anamua.

Valaaulia se tasi o le sa suesue i le Tusi Paia e faasoa mai i le autalavou le auala e mafai ai ona fesoasoani le aoao e uiga i aganuu ma le olaga i aso uma i le vaitaimi anamua ina ia latou malamalama ai i tusitusiga paia. Taialaina le autalavou i le sailia o ni mau mai le Feagaiga Tuai ma le Feagaiga Fou o loo aoao mai e uiga i le olaga i vaitaimi faatusipaia. Valaaulia le autalavou e fatu se mea o le a loloto ai lo latou malamalama e uiga i tusitusiga paia. E mafai ona latou fausia ni mea faufale po o ni masini, fatu ni faatusa o ni fale, saunia se meaai faatusipaia, pe toe mamanu ni ofu na ofuina e tagata o loo faamatala mai i tusitusiga paia. Talanoa pe faapefea ona fesoasoani lenei mea ia i tatou ina ia malamalamala lelei atili ai i tusitusiga paia.

O faataitaiga e mafai ona aofia ai:

• Faia o se moli (tagai Mataio 25).

• Kukaina o se meaai o le Paseka (tagai Esoto 12–13).

• Fausia pe tusiaina se faatusa o le Tapeneko (tagai Esoto 25–31).

• Faia o se filateri (tagai Mataio 23:5).

• Faia o se asu saito (tagai Mataio 3:12).

Faatele le malamalama i tulaga faatonuina a le Alii.

Tusi i lalo ni tulaga eseese o loo fetaiai ma le autalavou. Mo se faataitaiga, “E te alu i le fale o se uo ma e filifili au uo o loo tou faatasi e matamata i se ata e le talafeagai. O le a se mea e te faia?” Faapipii ia pepa taitasi i se nofoaga eseese po o se potu o le fale o le ekalesia. Vaevae le autalavou i ni vaega, ma auina atu ia vaega taitasi i se nofoaga eseese. I nofoaga taitasi, fai atu i se tasi o le autalavou e faitau le tulaga i le vaega. Valaaulia ia talavou taitasi e saili i le tamaitusi o le Mo le Malosi o le Autalavou e maua ai se fautuaga i le ala e taulima ai lena tulaga. Talanoa faatasi o se vaega i aafiaga na oo i ai le autalavou i ni tulaga talitutusa ma pe na faapefea ona latou filifili e mulimuli i tulaga faatonuina a le Alii. Faaaoga le pepa i nofoaga taitasi e faasoa mai ai le autalavou ma tusi i lalo ni manatu i le ala e mafai ona latou tali mai ai. Ona fesuiai lea o nofoaga ina ia tofu asiasi uma ia vaega i tulaga uma.

Aoao ni auala musuia e aoao atu ai isi e uiga i le Tusi a Mamona.

Tuu atu i le autalavou e aoao atu i le tasi ma niisi vaega po o ni tala mai le Tusi a Mamona i ni auala musuia ma mataalia (e pei o se tala faatino, se vitio, po o se taaloga). Fai atu ia i latou e faamatala mai pe na faapefea ona fesoasoani lenei tala po o vaega ia i latou ina ia malamalama i se mataupu faavae o le talalelei.

Ia mafai ona faamatala ma tautino atu o le a ola i tulaga faatonuina o le tauagafau.

Fai se faaaliga o laei ma sitali tauagafau. Vaai se tagata e i ai ni ona tomai suisui po o le aiina e faataitaia le auala e su’i ai ma talaina ia ofu ina ia sili atu ona tauagafau. Ona fai lea i le autalavou e faaali ia laei tauagafau (atonu e te mafaufau i ni vaega e pei o ofu lotu, ofu e laei i faatasitasiga aloaia, ma ofu taalo). Fesili i tagata o loofaaaliina le ofu e talanoa e uiga i le auala na filifili o ia ina ia tauagafau ma le auala o ia ola ai i lena tautinoga. Talanoa i le mafuaaga e taua ai le tauagafau ma le auala e mafai ona tatou valaaulia ai le Agaga e ala i le tauagafau i la tatou tautala, amio, ma laei.

Ia malamalama ma faasoa atu ni tulaga faatonuina o i le Mo le Malosi o le Autalavou.

Fai atu i ni vaega o le autalavou e fatu se faasilasilaga po o se faasalalauga (e pei o se pepa lautele o i ai se savali e pei o le Mormonad po o le meme, se vitio, se pese, ma isi mea faapena) e uiga i autu eseese mai le Mo le Malosi o le Autalavou. Fai atu ia i latou e faasoa mai mea sa latou fatuina i le autalavou atoa ma isi. Valaaulia le vaega e faasoa mai le auala sa faamanuiaina ai i latou ao latou ola ai i tulaga faatonuina lea na faailoa mai.

Faaaoga ia aoaoga mai le konafesi aoao.

Aumai nisi o upusii e sili ona e fiafia i ai mai le konafesi i se gaoioiga o le Mutuale. Fatu ni fagu o i ai ni upusii e sili ona e fiafia mai le konafesi. O aso taitasi mo le isi ono masina, toso mai se upusii mai le fagu ma mafaufau loloto i le mea o aoao mai. Tusi se api talaaga o mea e te aoaoina.

Maua se molimau ia Iesu Keriso e ala i le faitauina o Talalelei o le Feagaiga Fou.

Ia faia se fuafuaga o se vasega po o se korama e faitau ia le Talalelei e fa o le Feagaiga Fou i totonu o se taimi faapitoa. (Mo se faataitaiga, e mafai ona e amata i le amataga o le tausaga ma faamaea a o lei oo i le Aso Sa o le Eseta.) E mafai ona e tuuina atu se avanoa i sui o le vasega po o le korama i le Aso Sa e faasoa mai mea ua latou aoaoina ma aafiaga o loo latou mauaina a o latou aoao e uiga i le Faaola. Fuafua se gaoioiga lea e tapenaina e sui o le vasega po o le korama se nofoaga e tuuina atu ai mea ua latou aoaoina i o latou aiga po o tagata o le alalafaga. Mo se faataitaiga, e mafai ona latou fatuina se nofoaga e aoao e uiga i lauga, faataoto, po o le Togiola a Iesu Keriso.

Faamalosia molimau e uiga i le Tusi a Mamona.

Lui le autalavou e faitau atoa le Tusi a Mamona (po o se vaega ua filifilia) i se periota o le taimi ua filifilia. Talanoa i ni auala e mafai ai ona latou uunaia le tasi ma le isi, siaki lo latou alualu i luma, ma faamaumau ma le faaeteete ia uunaiga ua latou maua ao latou faitau. Fai se sauniga molimau po o se faigalotu puupuu pe a uma mo le autalvou e faasoa atu ai mea sa latou aoaoina ma le ala na faatofuina ai i latou lava i tusitusiga paia o aafia i o latou olaga i aso uma.

Ia malamalama pe mafai faapefea ona fesoasoani konafesi aoao ia te oe e maua ia tali.

A o lei faia le konafesi aoao, faaalu sina taimi i le aluga o se gaoioiga o le Mutuale po o se lesona o le Aso Sa e tusi ai i lalo fesili o loo ia te oe e faatatau i autu o le talalelei. A o e matamata i le konafesi ma lou aiga ma uo, tusi soo se aoaoga po o musumusuga o le a fesoasoani e tali au fesili. A maea le konafesi aoao, faasoa atu nisi o tali ua e mauaina i lou aiga ma vasega po o le korama.

Uunaia le tasi ma le isi e ala i le faasoaina mai o ni mau anoa.

Fai atu i talavou taitasi e tofu mai ma se mea faitino e suitulaga i lana mau e sili ona fiafia i ai. Tuu uma ia mea faitino i luga o se laulau ma fai atu i le autalavou e faitau mai a latou mau ma faamatala mai pe aisea e taua ai ia i latou. Valaaulia le epikopo po o se isi taitai e mate mai po o fea o mea faitino e fetaui ma mau taitasi. Ona valaaulia lea o le epikopo e faasoa mai ma aoao atu e uiga i nisi o mau e sili ona ia fiafia i ai.

Aoao mai perofeta soifua ma aposetolo ma ia manatua mea na latou aoao mai.

Faatulaga ni taaloga faalētaua tele e tali ai e au a le autalavou ni fesili e uiga i le konafesi sili ona lata mai—po o ai na lauga i le a le autu, faatusatusa ia ata i igoa o le Au Pulega, ma isi mea faapena. Ao lei faia le taaloga, uunaia le autalavou e tusi ni faamatalaga i taualumaga o le konafesi, ma faataga i latou e faasino ia latou faamatalaga i le taimi o le taaloga. A maea le taaloga, talanoa i lagona ma uunaiga lea na oo mai i le autalavou ao latou faalogologo i le konafesi aoao ma le mea o le a latou faia o se taunuuga o aoaoga sa latou mauaina.

Faaaoga ni auala malie e aoao atu ai pe faapefea ona faamatalaina ia tulaga faatonuina a le Alii i isi.

Taaalo i se tasi o taaloga nei e fesoasoani ai i le autalavou ia iloa le auala e faamalamalama atu ai a latou tulaga faatonuina i isi:

• Ao lei taitai oo i le taimi, saunia ni kata o i ai ni autu mai leMo le Malosi o le Autalavou i luga o kata. Lisi i lalo ifo o autu taitasi, ni upu e fesootai i lena autu (mo “Faafiafiaga ma Ala o Faasalalauga,” atonu e te lisia ai, “televise,” komepiuta,” “uati,” po o le “tifaga”). Vaevae le autalavou i ni au. Fai atu i se tagata taalo mai au taitasi e fai atu ni taga po o ni faaataataga i lana au e mate ai le autu e aunoa ma le faaaogaina e le tagata taalo nisi o upu i luga o le kata. Afai e mateia e le au se autu i se taimi faapitoa, fai atu i le tagata o le au na sao le mateina o upu o i luga o le kata e faatino mai pe faapefea ona ia faasoa atu i se uo ia tulaga faatonuina a le Alii i lena autu (atonu e te manao e tuuina atu se tulaga lea o le a fesiligia ai ni tulaga faatonuina). Afai e le mateiaina e le au le autu i se taimi na faatulagaina, fai atu i le tagata o loo tuuina atu ni faaataataga e faia se faatinoga e faaaoga ai ia upu o i le kata e faamatala ai i se uo ia tulaga faatonuina a le Alii.

• Tusi i luga o se fasi pepa nisi o o tatou tulaga faatonuina (Upu o le Poto, aso Sapati, tulafono o le legavia, sefuluai, ma isi mea) ma tuu i totonu o se pesini. Vaevae le autalavou i ni au. Fai atu i au taitasi e filifili i soo se faagasologa se tulaga faatonuina mai le pesini. Tuu atu ia i latou pe a ma le lima minute e talanoaina ai le ala sili ona lelei e faamatala ai ma aoao atu ai le tulaga faatonuina na latou filifilia i se uo. A uma ona talanoaina e au a latou tulaga faatonuina na filifilia, filifili ni tagata mai au taitasi e fai ma sui o le latou vaega e faatinoa se tulaga lea e tatau ai ona latou faamatalaina i ni fesili o latou tulaga faatonuina i se uo. Toe fai ia talanoaga ma fai ni tala faatino mo ni nai taamilosaga.

• Fai atu i le autalavou e aumai se faataitaiga laiitiiti o se meaai e mafai ona faaaoga e sui ai se tulaga faatonuina mai le Malosi o le Autalavou, e pei o se fualaau mata ma le pau o loo sui i se ofu tauagafau. Fai atu i le autalavou e tuu mai ni a latou faataitaiga ma ni lesona pupuu e uiga i tulaga faatonuina o latou faatatau i ai. Fai atu ia i latou e faamatala mai se tala patino e uiga i se aafiaga sa latou mauaina mai lena tulaga faatonuina.

Aoaoina o mataupu faavae o le talalelei ma tala faatusipaia i auala anoa.

Faaaoga se taaloga e aoao ai se tala po o se mataupu faavae mai i tusitusiga paia o nisi nei o manatu:

• Faitau ma talanoaina fuaitau o mau e uiga i le ofutau a le Atua (tagai Efeso 6:10–17; MF&F 27:15–18). Mafaufau i le taua o vaega taitasi o le ofutau. Fausia ia ofutau ma lau vasega po o le korama mai i mea faitino e le taugata, e pei o pepa malo po o le pepa. Saili ni auala anoa, e pei o se auala faalavefau, e faaali ai pe faapefea e lenei ofutau ona puipuia i latou mai lamatia faaleagaga.

• Taalo le Taua o mau e ala i le nonoaina o se manoa i le va o laau e lua ma faatautau ni palanikeke uumi mai le manoa ina ia le mafai ona vaaia e tagata o i le tasi itu ia tagata o loo i le isi itu. Vaevae tagata auai i ni au se lua ma fai atu ia i latou e taooto pe nonofo i lalo i itu uma o le manoa (e le mafai ona latou minoi pe a maea ona latou [taooto pe nonofo i lalo]). O le a tuuina atu e taitai matutua ia ni tulaga faigata (e pei o le "O loo valaaulia oe e lau uo i se pati e inu ai [meainu malosi]"). O le tagata muamua e tauina mai se mau o le a fesoasoani ia i latou i tulaga taitasi e mafai ona togiina se polo i le isi itu o le palanikeke. Afai e tau le polo i se tasi, o le a pe lena tagata. Faaauau pea ona taaalo seia pe uma le autalavou i le tasi itu o le palanikeke.

• Tao ni nai keke. Vaevae lau vasega po o lau korama i ni vaega, ma tuu atu ia i latou ni tala talafeagai mai tusitusiga paia (e pei o le faataoto i le Samaria agalelei po o Tanielu i le lua o leona). Valaaulia i latou e teuteu se keke e faamatala ai la latou tala. Tuu atu i le autalavou e faasoa atu a latou keke ma valaaulia i latou e mate tala faatusitusiga paia ua latou teuteuina. Tuu atu ia i latou na teuteuina le keke e faasoa atu ni nai mau autu mai le tala ma aoao atu pe faapefea ona faaaoga mataupu faavae o loo i totonu o tala i o latou olaga. Ona taumafa lea o keke.

• Taalo se taaloga e pei o le togitogiga polo po o le pa'i ma pe. Afai e tape se talavou, e mafai e ia ona toe taalo e ala i le taulotoina pe faaupuina se fuaitau o mau tauloto. Ina ia faia le taaloga ia sili atu ona luitauina, faataga le faa-tasi ona faaaogaina fuaitau o mau tauloto taitasi.

Aoao pe faapefea ona tausia se api talaaga i ni auala eseese.

Ia faia se po o api talaaga lea e mafai ai ona e aoaoina auala eseese e tausia ai se api talaaga, e pei o api talaaga masani, api talaaga i le initoneti, lautusi o le tagata lava ia, api, tusi ata na pueina, api talaaga o leo, api talaaga o vitio, ma isi mea faapena. Faatu ni sini e tausia se api talaaga mo se vaiaso, ma faasoa i lau vasega po o le korama au aafiaga.

Sauni e faasoa atu ma isi pe aisea ua tatou filifili ai e ola i tulaga faatonuina a le Alii.

Faailoa mai ni fetauupuga e ono faia e tagata e tetee atu ai i tulaga faatonuina i le Mo le Malosi o le Autalavou (mo se faataitaiga, “Afai ma te alolofa i le tasi ma le isi, e mafai ona ma solia le tulafono o le legavia ao lei faaipoipo”). Fai atu i le autalavou e galulue faatasi e fau ai se mataupu talanoaina mo tulaga faatonuina a le Alii, e faaaoga ai punaoa e pei o tusitusiga paia ma le Mo le Malosi o le Autalavou. Afai e talafeagai, e mafai foi e le autalavou ona saili mo upu lata mai a perofeta soifua e uiga i le mataupu. Faatino se tala o se mea o tupu lea e fesiligia ai se tasi o nei tulaga faatonuina, ma tuu atu i le autalavou e faataitai le faasoaina atu o a latou talitonuga.

Atiina ae ni uiga o Keriso.

Fai atu i le autalavou e faatumu le Gaoioiga o Uiga i le itulau e 135 o le Tala'i La'u Talalelei. Fai atu i le autalavou e faailoa mai ni uiga latou te fia mananao e faaleleia i o latou olaga. Fai atu i talavou taitasi e fai se fuafuaga mo le atinaeina o se uiga ua ia filifilia, e aofia ai se sini mamao ma ni faataitaiga maumaututu e fai soo e ausia ai le sini. Fai atu i le autalavou e fai ni siata o le a fesoasoani ia i latou e mulimulitai ai i faataitaiga. Ia auai faatasi e lipoti mai le tulaga alualu i luma i se taimi mulimuli ane.