Ata, Musika, ma Siva

Aoao ni tomai sogasoga ao faamalolosia ia mafutaga ma isi.

Valaaulia se tagata se toatasi po o le toatele foi mai le uarota po o le alalafaga e aoao atu i le autalavou se tomai po o ni taleni musuia, e pei o le niti [knitting], kamuta, su’ilima, vaneina o laau, ma isi mea faapena. Atonu e te manao e valaaulia ni tagata matutua o le uarota po o le alalafaga e auai. Ina ia uunaia atili le fesootaiga patino, e mafai ona e mafaufau e tofia se tasi o talavou po o le toalua foi e galulue faatasi ma faiaoga taitasi, e tusa ai ma mea e fiafia i ai ia talavou. Valaaulia le autalavou e fatu se mea e faaaoga ai o latou tomai fou lea o le a faamanuia ai le olaga o se tasi. Fuafua se gaoioiga lea o le a faasoa atu ai e le autalavou se mea sa latou fatuina ma le tasi ma le isi faapea i latou na aoaoina o latou tomai.

Aoao i le auala e faasoa atu ai le talalelei i se auala malie, ma faanei ona po.

Vaevae le autalavou e fai vaega (e mafai ona vaevaeina i latou i korama po o vasega po o se isi auala). Tuu atu ia tofu vaega ma le taimi e mamanu ai ni a latou lava vitio e tolu i le lima minute lea e faasoa mai ai se savali a le talalelei. Atofa atu se autu mo vitio, e pei o le autu a le Mutuale mo le tausaga, autu mai le Mo le Malosi o le Autalavou, o se mataupu o loo aoaoina e le autalavou e uiga i le ekalesia, po o se isi mea. A uma ona faia e le autalavou a latou vitio, fai se po tifaga mo le autalavou e faasoa mai ai a latou vitio ma le vaega atoa. Afai e mananao i ai le autalavou, e mafai ona latou tuuina i totonu o le initoneti a latou vitio ma faasoa atu le talalelei i le toatele o a latou uo.

Mamanu se mea e tofolelei ma manaia.

Valaaulia se tagata e poto e kuka e filifili se meaai po o ni fua se tele o ni meaai e tofolelei ma manaia. Valaaulia lena tagata e aoao atu i le autalavou le auala e saunia ai lenei meaai. Tuu atu i le autalavou e saunia le meaai mo le tuuina atu i tagata o le uarota po o le alalafaga o e o loo manaomia le auaunaga. Tulitatao atu ma se talanoaga e uiga i le auauna atu i isi.

Ia maua se lagona talisapaia mo faatufugaga ma isi aafiaga faaleaganuu.

Alu i se tala, faaaliga siva, po o nisi gaoioiga faaleaganuu. E mafai ona avea o se faafiafiaga a se tasi o le autalavou po o se isi tagata o le uarota o loo aofia ai. Afai e talafeagai, ia tapa se faatagaga e maimoa ai le autalavou i tua atu o le tulaga po o nisi o vaaiga i tua o se tala po o faafiafiaga ina ia aoao atili ai e uiga i se taumafaiga e aofia ai le tuufaatasiga o le faafiafiaga. E mafai ona e faatulaga e talanoa i se tasi o tagata faafiafia e uiga i ona aafiaga i le galue ai i lenei vaega. Talanoa i le tala faafaataoto o taleni ma le finagalo o le Alii mo i tatou e faaaoga ai taleni ua tuuina mai ia i tatou (tagai Mataio 25:14–29).

Ia maua se agaga talisapaia mo faatufugaga faamusika.

Auai faatasi i se faafiafiaga o musika musuia, atonu o se faaaliga po o se faafiafiaga a se tasi o le autalavou i le uarota.Talanoa i le taua o musika lelei ma anoa.

Fesoasoani i le autalavou ia lagona le Agaga ma o mai faatasi i le lotogatasi e ala i viiga paia.

Fai se aufaipese a le autalavou, ma faaaoga le taimi e faataitai ai ni pese se tele po o nisi pese talafeagai. Galulue ma le epikopo po o peresitene o le paranesi e faatulaga se taimi e faafiafia ai le autalavou mo isi, e pei o sauniga a le Ekalesia po o faigalotu.

Aoao e uiga i le faamatalaina o tala e ala i le gaosiga o vitio.

Valaaulia se tasi e aoao i le autalavou le faaaogaina o masini vitio e pue ai se vitio o faamatalaina se tala. Tuu atu i ni vaega o le autalavou ni nai vaiaso e pue ai se vitio puupuu e faaaoga ai se tala mai le Liahona, tusitusiga paia, talafaasolopito o le Ekalesia, po o latou lava olaga. Toe o mai faatasi e matamata ma fiafia i vitio. Mafaufau e iloilo “Faafiafiaga ma Ala o Faasalalauga” mai le Mo le Malosi o le Autalavou o se vaega o lenei gaoioiga.

Faamanatu ia taleni a tagata talavou ma le uarota.

Fuafua se faaaliga taleni a le uarota po o le autalavou. Fai atu i le autalavou e saofaga i le fuafuaina ma le faatulagaina o le gaoioiga. Ia aofia ai ni taleni eseese, ma valaaulia tagata e auai taitoatasi pe i ni vaega. Talanoa i le mafuaaga ua tuuina mai ai ia i tatou e le Tama Faalelagi ni taleni ma po o le a Lona finagalo tatou te faia i ai.

Ia faamasani i mea faifaili faamusika eseese, ma atonu o le a iloa ai se taleni o natia.

Aumai se mea faifaili faamusika se tasi po o le sili atu foi ma fai atu i se tagata e aoao i le autalavou ni vaega autu o le taina o lena mea faifaili. Tuu atu se taimi i le autalavou e faataitai ai ma taina mo isi. Faitau faatasi o se vaega ma talanoa i le Mataupu Faavae ma Feagaiga 25:12.

Aoao e uiga i tuaa e ala i le aoaoina o ni siva ma musika mai taimi ao lei fananau le autalavou.

Fesoasoani i le autalavou e filifili se vaitau anamua (mo se faataitaiga, o le vaitau o le 20, 40 po o le 70) latou te fiafia i ai. Fai atu i korama, vasega, po o le vaega taitasi e aoao se pese po o se siva iloga mai lena vaitau ma tuu atu i tagata o la outou uarota po o paranesi po o se vaega o tagata matutua i le alalafaga. Atonu e te manao e faaopoopo ni toniga faigofie, teuga, ma ni mea faitino mai lena vaitau. Talanoa i le auala o ono suia ai ia sitali ma mea e fiafia i ai le lalolagi, peitai e faaaogaina lava pea e le aunoa ia tulaga faatonuina a le Alii. Valaau le autalavou e faasoa mai le auala e mafai ona latou maua le fiafia i le sisiva ai i lenei lalolagi ao faatumauina pea ia tulaga faatonuina a le Alii (tagai Mo le Malosi a le Autala, “Musika ma Siva”).

Fesoasoani i le autalavou e aoao e uiga i ai ma talisapaia musika mai aganuu eseese.

Valaaulia se tasi e aoao atu le autalavou e uiga i musika mai aganuu eseese. Mafaufau e faasoa atu ni ituaiga o mea faifaili eseese ma tuu atu i le autalavou e faataitai le taina. Ia talanoaina pe aisea e taua ai le musika i aganuu taitasi. Faitau ma talanoaina faatasi o se vaega le Mataupu Faavae ma Feagaiga 25:12.

Ia maua le toafimalie e faafiafia ai i luma o uo ma se aumaimoa.

Vaevae le autalavou i ni vaega, ma tuu atu i vaega taitasi se ato e tumu i ni mea faitino eseese na filifilia. Tuu atu i vaega se taimi e fatu ai se tala faatino puupuu e faaaoga ai a latou mea faitino taitasi. Fai atu iai e mafai ona latou faatinoina a latou tala pupuu i le taimi lava lena pe pue foi ae matamata i ai ma a latou uo. Atonu e mafai ona e mafaufau e tuuina atu ni faailoga i vaega taitasi e pei o le tala puupuu sili ona malie, sili ona faaaogaina ia mea faitino, sili ona sogasoga ma musuia, ma faaauau ai pea.

Aoao ia iloa siva ma faaleleia ia taleni.

Valaaulia ni tagata e aoao atu i le autalavou ni siva eseese (e aofia ai ni siva tuai, aganuu, ma ni siva anamua).Faasoa atu ma talanoa i le vaega o “Musika ma Siva” i le Mo le Malosi o le Autalavou o se vaega o le gaoioiga. Faataitai le sisiva faatasi, ma fuafua e faatulaga se siva a le uarota ma valaaulia ia aiga.

Aoao i le auala e taitai ai le musika.

Faaaoga ia punaoa i tua o le tusipese, e aoao ai ma faataitai le taitaiina o le musika o ituaiga o taimi eseese. Valaaulia le autalavou e faataitai le taitaiina o ni pese lotu i le Aso Sa a sau, faigalotu, seminare, afiafi faaleaiga, ma isi mea faapena.

Faaleleia ia taleni ma tuputupu ae faatasi i le lotogatasi.

Valaaulia le autalavou e fai ni vaega e fuafua ai ma faatino ni tala pupuu po o ni tala malie. E mafai e le autalavou ona tusia ni a latou lava tusiga pe faatino ni tala faatusipaia. Tuu atu i le autalavou e galulue faatasi i ni au e fuafuaina, faataitaia, ma faatino a latou tala mo le vaega atoa. E mafai foi ona fesoasoani le autalavou i mea faitino e faaaoga i tala, toniga, vaaiga, ma isi mea faapena. Talanoa i le mafuaaga ua tuuina mai ai ia i tatou e le Tama Faalelagi ni taleni ma po o le a Lona finagalo tatou te faia i ai.

Ia faamasani atili i le tomai o le pueina o le ata.

Valaaulia se tagata e aoao atu i le autalavou ia mataupu faavae autu o le pueina o ata, e pei o le faatulagaina o le meapueata, moli, ma isi mea. Tuu atu ia tofu le autalavou po o au a le autalavou ma se meapueata faasolo [digital] (fai atu ia i latou e aumai ni a latou lava meapueata, pe a mafai). Atofa atu ia i latou ni autu, ma auina atu i latou i fafo e pue mai ni ata e fetaui ma a latou autu.A latou foi mai, kopi ata ma sii i luga o se komepiuta ina ia mafai ona vaai uma i ai le autalavou. Mafaufau e tuuina atu ni faailoga i vaega eseese. (Afai e le o maua ni meapueata faasolo, e mafai ona e faaaogaina ni meapueata e i ai le lola ma faasoa atu ni ata i le taimi o se gaoioiga o le Mutuale i le lumanai pe a uma ona faaliliuina ia ata.)E mafai ona fetuunai lenei gaoioiga ina ia taulai atu i se autu faaletalalelei i le ata na pueina e le autalavou.

Atiina ae ni fegalegaleaiga talafeagai i le va o alii talavou ma tamaitai talavou ma atiina ae lou faatuatuaina o oe lava ia.

Talanoa ma faataitai le auala e talosaga atu ai i se tasi lua te sisiva, uiga talafeagai i siva, tulaga i siva, ofu ma teuga, auala e faaalia ai le faaaloalo ma le migao, ma isi mea faapena. Iloilo le vaega o “Musika ma Siva” i le Mo le Malosi o le Autalavou ma talanoa i mea o loo aoao mai. Valaaulia le autalavou e faataitai mea sa latou aoaoina.