Soifua Maloloina Faaletino

Fefaasoaai fua o kuka mo ‘aiga maloloina lelei

Valaaulia le autalavou e aumai ni a latou fua o kuka e fiafia i ai, ma tuufaatasi i se tusikuka faigofie. Talanoa e uiga i le fuafuaina, sauniuniga, kukaina, ma le maloloina lelei o se meaai. Afai e talafeagai, e mafai e talavou taitasi ona aumaia se faataitaiga se tasi o a latou fua o kuka. E mafai ona fai faatauva lenei mea i le va o ni au eseese a le autalavou.

Aoao atu le taua o le tausia lelei o le soifua maloloina faaletino ma le faaleagaga.

Faataunuu se fe’a’eiga puupuu, faaiu i se faigalotu puupuu e uiga i le taua o le tausia lelei o le soifua maloloina faaletino ma le faaleagaga. Taulai atu i le auala e taua uma ai i lo tatou alualu i luma faavavau. O le vaega o le “Soifua Maloloina Faaletino ma le Faalelagona” i le Mo le Malosi o le Autalavou po o le Upu o le Poto i le Mataupu Faavae ma Feagaiga e mafai ona tuuina mai nisi o autu e talanoaina. Fuafua e valaauina ni matua e auai i lenei gaoioiga.

Aoao le vaega autu o le fesoasoani muamua.

Valaaulia se tasi e aoao atu ma faataitaia ia vaega autu o tomai tau fesoasoani muamua, e pei o le fufuluina o se manua, faatino le CPR, fesoasoani i se tasi o loo laoa, vaai po o i ai ni ponaivi ua gausia, ma isi mea faapena. Tuu atu ni avanoa e faataitai ai mea sa latou aoaoina ma faia ni pusa o fesoasoani muamua. Mafaufau e faia se faataitaiga faafoliga o se faalavelave—valaaulia ni tagata o le alalafaga e auai, ia faafoliga o loo latou mafatia mai ni manua eseese ma tuu atu i le autalavou e faatino le fesoasoani muamua.

Aoao i le taua o le ola maloloina ma fai ni fuafuaga e sui ai ni faataitaiga le maloloina.

Valaaulia se tagata o i ai se atamai i le autu o meaai paleni e talanoa i mausa maloloina o le taumafa. Ina ia faaaoga mea sa latou aoaoina, e mafai e le autalavou ona faia se lisi o mea uma lava sa latou aai ai i ni aso ua mavae ma iloilo po o le a le tulaga o le lelei po o le maloloina o lena meaai; e mafai foi ona e tofia ni vaega o le autalavou e sailiili i le soifua maloloina o ituaiga o meaai eseese; pe e mafai foi e le autalavou ona saunia ma aai i se meaai paleni e tusa ai ma mea sa latou aoaoina. Fai atu i le autalavou e suesue i le MF&F 89 ma tautino e ola i le Upu o le Poto (tagai “Soifua Maloloina Faaletino” i le Tiute i le Atua po o le lisi o galuega faatino mo le tulaga faatauaina o le Poto i le Alualu i Luma o le Tagata Lava Ia).

Aoao i tulaga faatonuina a le Alii mo le tausiga o o tatou soifua maloloina faalelagona ma pe aisea e taua ai lenei mea.

Faitau e uiga i le soifua maloloina faalelagona i le itulau e 25 o le Mo le Malosia o le Autalavou. Talanoa i mea o loo faia e talavou i aso taitasi e tausia ai o latou soifua maloloina faalelagona ma pe aisea e taua ai i le Alii. Valaaulia se tagata o i ai se poto masani i le faufautua ia i latou o i ai ni tulaga faaletonu o le faalelagona e malaga mai ma talanoa atu i le autalavou (o lenei tagata e mafai ona avea ma se tasi mai pe o loo fautuaina mai e le Tautua o Aiga AAG). Ia valaaulia foi le epikopo e talanoa i le auala e mafai ona fesoasoani mai ai le Togiola ma le Agaga o le Alii ia i tatou e saili le fiafia i le olaga.

Faaleleia lo tatou malosi faaletino.

Aoao i le auala e faia ai ni faamalositino faaletino eseese (e pei o le tamoe, nofo i luga, tulei i luga, toleni i mea mamafa, yoga, vili le uila, karate, po o nisi faamalositino e fiafia i ai le autalavou). Afai e manaomia, e mafai ona e sueina se tasi o i ai se tomai e aoao atu ai se faamalositino. Tuu atu i le autalavou latou te fuaina po o le a le lelei na latou faia ai nei faamalositino ma fai se fuafuaga e faaleleia ai i le taualumaga o nai vaiaso e sosoo ai. Toe feiloai, ma fai atu i le autalavou e lipoti mai lo latou alualu i luma. E mafai ona e toe faia le gaoioiga lenei ma ni faatinoga eseese. Talanoa pe aisea ua finagalo ai le Alii ia i tatou e tausia o tatou tino. E mafai ona e suesue le “Soifua Maloloina Faaletino ma Faalelagona” i le Mo le Malosi o le Autalavou (2011) o se vaega o lau gaoioiga.

Faaleleia le soifua maloloina e ala i gaoioiga malie faataaloga.

Valaaulia se talavou e aoao atu i isi se taaloga e fou i le vaega pe aoao atu ni tomai mo le faaleleiga o se taaloga masani (mafaufau e valaaulia se talavou e le toaga mai po o se uo i se isi tapuaiga). Taaalo i le taaloga o se vaega. Mafaufau e talanoa i le auala e tausia ai le agaga o le faauoga e oo lava i se siosiomaga faatautava. Taulai atu i penefiti o le soifua maloloina lea e oo mai i gaoioiga faaletino.

Ia maua ni tomai ma le talitonuga e aloese mai ai ma le taulimaina o ni tulaga faigata.

Valaaulia se tagata i le lotoifale e i ai se tomai faapitoa i le puipuiga o le tagata lava ia po o se tagata e faamalosia le tulafono ina ia aoao le autalavou i le ala e puipuia ai i latou lava mai sauaga faaletino po o nisi tulaga lamatia. E mafai ona latou aoao i ni auala o le puipuiga e fesoasoani ia i latou e aloese mai ai i ia tulaga faapea foi ni vaega faigofie o le puipuia o le tagata lava ia. E mafai ona e taulai atu i lenei autu mo ni nai vaiaso ina ia lava ai le taimi e tuu atu i le autalavou e faataitai ai mea sa latou aoaoina.

Ata mai le ©iStockphoto.com.

Aoao e fai ni filifiliga poto ma maloloina e uiga i meaai.

Talanoa i le ala e mafai ai e le autalavou ona fuafua ni tulaga faatauaina o meaai paleni o loo latou faatauina. Asiasi atu i le faleoloa supamaketi e faataitai ai le faatauina o ni mea e gaosi ai ni meaai maloloina. Vaevae le autalavou i ni au ma fai atu i au taitasi e taumafai e tusi se lisi faifaatauga mo se meaai sili ona maloloina. Fai atu i le autalavou e saili ia meaai o loo i ai ia latou lisi ma filifili le vaega sili ona maloloina mo vaega taitasi. I le faaiuga o le gaoioiga, fai atu i le autalavou e saili ni nai meaai paleni e faatau mo se taumafataga. Talanoa i faamanuiaga e oo mai i le ola ai i se olaga maloloina.

Aoao e uiga i tulaga o le saogalemu i le alatele male ave taavale mataalia

Valaaulia se tagata atamai e aoao atu i le autalavou e uiga i le saogalemu i luga o le alatele. O lenei talanoaga e mafai ona aofia ai ni metotia e faatatau i le saogalemu i le aveina o le taavale faapea foi ma ni mataupu faavae o le saogalemu o tagata savavali ma le tietie uila. Fai atu i le autalavou e faailoa mai ma talanoaina nisi o faalavelave masani e mafai ona tupu ao aveina le taavale. Uunaia i latou e fai ni folafolaga faapitoa e faataitaia ai ni tulaga saogalemu o le alatele (e pei o le le faaaogaina o telefoni feaveai ao aveina le taavale). E mafai ona suesueina e talavou le tasi ma le isi e uiga i mea ua latou aoaoina.

Tumau i le saogalemu mai mea matautia o le initoneti.

Valaaulia se tagata atamai e aoao mai ni mataupu faavae e uiga i le saogalemu i le initoneti, e pei o le aloese mai i le aafia i anomea le talafeagai, fetaiai ma tulaga faasaua i le initoneti, iloaina o i latou o e faaleaga i isi mo le faamalieina o ona tuinanau, ma le aloese mai tagata o gaoia faamatalaga patino a se isi tagata. Sailiili i le LDS.org e iloa ai ia punaoa e fesoasoani i tagata taitoatasi ma aiga e faaaoga le saogalemu i le Initoneti ma le atamai. Mafaufau e faaaoga le vaega o “Faafiafiaga ma Ala o Faasalalauga” o le Mo Le Malosi o le Autalavou e lagolago ai le gaoioiga lenei.

Amata sauniuni mo ni faalavelave faafuasei e ono tulai mai ma fesoasoani atu i isi ia lava tapena.

Valaaulia se tasi o i ai se malamalama e uiga i sauniuniga mo faalavelave faafuasei e aoao ai le autalavou i le ala e saunia ai mo ni faalavelave faafuasei eseese. Fesoasoani i le autalavou e faia ni tamai pusa o sauniuniga mo faalavelave faafuasei, e aofia ai ia sapalai mo fesoasoani muamua, moliuila, fagu vai, ma isi mea faapena. Ia talanoaina le mau “Afai ua outou saunia o le a outou le matatau” (MF&F 38:30). Fai se faaaliga sauniuni lea e mafai ai e le autalavou ona aoao atu o latou aiga ma isi tagata o le alalafaga i mea sa latou aoaoina e uiga i le sauniuniga mo faalavelave faafuasei.