Fesootaiga ma Fegalegaleaiga

Faaleleia le faatuatuaina o se eria ua filifilia.

Fai atu i le autalavou e faailoa mai ni uiga o le a fesoasoani ia i latou e tuputupu ae ai faalelagona pe faaleagaga ma latou te fia mananao foi e faamalosia i totonu o i latou lava. Fai atu i talavou taitasi e tusi se fuafuaga a le tagata e faateleina ai le tomai ma faamalolosia ai ni vaivaiga i lena uiga. Tuu atu i le autalavou e auauai i le faasoaina mai i le korama po o le vasega se mea sa latou mananao e faaleleia. Ona valaaulia lea o tagata o le korama po o le vasega e tuuina mai ni manatu ma ni fautuaga i le auala e mafai ai ona taulimaina e talavou taitasi lana lava sini. Tulitatao atu ma se faamalosiauga ma lipoti i tagata o le korama po o le vasega. Mafaufau e faaaofia nisi o uiga ma taleni fou pe ua faaleleia i gaoioiga a le autalavou i le lumanai.

Faamalosia fegalegaleaiga ma uo ma tuaoi o faatuatuaga uma.

Ia iloa isi vaega o faatuatuaga i la outou eria. Fai se gaoioiga mo vaega o faatuatuaga e tele ina ia o mai faatasi i le agaga o le lotogatasi. E mafai ona avea ma se galuega faatino, se taumafataga o loo tufaina, se gaoioiga po o se taaloga e fai i fafo, po o se isi gaoioiga. Galulue faatasi ma le epikopo e feiloai ai ma taitai o nei faalapotopotoga ma faamaopoopo ia taumafaiga e amanaia ai e le tasi le isi ma auauna atu ai faatasi i le alalafaga.

Aoao e faaaloalo i le tasi ma le isi ma faaali le migao talafeagai i tulaga eseese.

Fai se taumafataga lea e faataitai ai e alii talavou ma tamaitai talavou ni fegalegaleaiga ma ni amioga lelei ma le faaaloalo. Ao lei faia le taumafataga, talanoa ma faataitai ni faataitaiga o ni uiga talafeagai ma lē talafeagai. I le gaoioiga lenei, mafaufau e faasino i vaega o “Tafaoga Faamasani,” “Ofu ma Foliga Vaaia,” ma le “Gagana” mai le Mo le Malosi o le Autalavou.

Faataitai ni uiga tausaafia o tafaoga faamasani i se siosiomaga malie ma le saogalemu.

Fai atu i alii talavou taitasi e valaaulia lona tina (po o se tei, fafine o le aiga, ma isi faapena) ma valaaulia e tamaitai talavou taitasi lona tama (po o se tei, tamaloa o le latou aiga, ma isi faapena) mo se tafaoga faamasani faavaega i le faletapuai. E tatau i le autalavou ona o faatasi ma o latou paga, taulima ma le agalelei ma le faaaloalo i latou, ma gauai atu i manaoga o a latou paga. O gaoioiga e mafai ona aofia ai se taumafataga o le afiafi, matamata i se vitio a le Ekalesia, taaalo i ni taaloga, aoao se tomai fou (e pei o se siva faapitoa), po o le i ai o se failauga e talanoa i ni uiga lelei o tafaoga faamasani. A uma le tafaoga faamasani, e tatau i le autalavou ona faafetai atu ia latou paga mo le faaaluina o le po e faatasi ai ma i latou.

Uunaia se uiga lelei agai i tafaoga faamasani ma tuuina mai ni taitaiga e faatatau i fegalegaleaiga.

Faatulaga se au faamasino e taliina fesili o i ai a ositaulaga ma Lora e uiga i tafaoga faamasani ma mafutaga. Mafaufau e aofia ai se tuufaatasiga o ni ulugalii matutua, ulugalii faatoa faaipoipo, ma autalavou nofofua matutua i le au faamasino. E mafai ona tusi e le autalavou ni fesili ao lei taitai oo i le taimi ina ia mafai ai e le au faamasino ona saunia lelei. E mafai ona suesue muamua le autalavou ma le au faamasino i le vaega o “Tafaoga Faamasani” i le Mo le Malosi o le Autalavou.

Ia lagona atili le toafimalie e faafeiloai atu ai i le epikopo ma saili lana fautuaga.

Faaalu se po e faamasani ai i lau epikopo po o le peresitene o le paranesi. Valaaulia o ia e talanoa e uiga i lona valaauga, lana matafaioi o se tama, lana galuega ma isi tiute, faapea ma lana molimau. Ona taaalo lea i nisi o taaloga faafesootai. Valaaulia o ia e faasoa mai mea sa ia aoaoina e uiga i le taitaiga e ui o loo auauna atu i lona valaauga. Mafaufau e fai le gaoioiga i se nofoaga masani ina ia lagona ai e le talavou le toafimalie i le faamasani atu i le epikopo.

Faamasani i isi talavou.

Ao lei faia le gaoioiga, fai atu i le autalavou e aumai ni aitema se tolu o loo suitulaga ia i latou. Ia tofu talavou taitasi ma se ato i le amataga o le gaoioiga. Fai atu i le autalavou e tuu a latou aitema i totonu o le ato, ona faafefiloi lea o ato. Ia auauai le filifiliina i soo se faasologa o ato, ma faailoa mai ia mea o i totonu. Fai atu i le autalavou e mate mai po o ai o latou uo o loo suitalaga ai na aitema. A sao le faailoa mai o talavou taitasi, valaaulia lena tagata e faasoa mai sana mau po o se pese e sili ona fiafia i ai ma pe aisea e fiafia i ai.

Aoao i mataupu faavae o le galulue faatasi.

Fai ni au taitoalua pe taitoatolu. Tuu atu ia tofu au taitasi ma ni straws se 10 ma pe tusa ma le 25 inisi o le mea faapipii. Faatonu au taitasi e fau se vaa e lagolago ai ni tupe siliva laiti. Tau atu i au taitasi e 5–10 a latou minute e fau ai se latou vaa e ave ai ia sene. Tau atu ia i latou e le mafai ona latou muai faataitaia le gafatia o o latou vaa e opeopea ai. Tuu vaa i totonu o se faatanoa tele po o se apa mo le faataitaiga. Faaopeopea ia vaa mo le 5 minute ona amata lea ona tuu taitasi ia siliva i luga o vaa. O le au e sili siliva e i luga o le vaa e aunoa ma le goto pe mafuli e malo.

A tofu maua uma e au uma le avanoa e fau ai ma faataitai se vaa, e faatagaina i latou e toe fausia a latou vaa mo se isi taumafaiga. E faaaoga e au taitasi ia straws lava e tasi ae e tuuina atu se mea faapipii fou.

Mulimuli i le taaloga i fesili o le talanoaga. O le a se mea na faigofie ai pe faigata ai le fauina o le vaa? Na faapefea ona e malie i le ala na fausia ai le vaa? Pe na sili atu ea le vaa lona lua nai lo le vaa muamua? Afai e ioe, aisea? Pe na faaosoosoina oe e vaai i mea o loo faia e isi au ao fauina lau vaa? O faapefea ona pei le fausia o ni vaa e pei o le galue i se aiga, korama, po o le vasega? O a mataupu faavae ma amioga o lelei ai le galueaiina o le foia o faafitauli i totonu o aiga po o vaega?

Fausia se lotogatasi i totonu o le vasega, korama, po o se vaega ao feauaunaai tagata i le tasi ma le isi.

Fai atu i tagata o lau vasega, korama, po o vaega (po o tagata matutua i le uarota) e lisiina ni auaunaga latou te naunau e tuuina atu mo isi (mo se faataitaiga, o le a ou fesoasoani ia te oe i lau meaaoga o le matematika, o le a ou auliina ou ofu lotu, o le a ou kukaina lau malu taeao ae e te lei alu i le aoga, ma isi mea faapena). I le taimi o le Mutuale, tuu atu i le autalavou e taliina ia fesili e maua ai ni togi (mo se faataitaiga, atonu e te manao e tuuina atu ni togi i tagata uma lava ua maea a latou meaaoga, tagata uma o e na suesue i tusitusiga paia i lena aso, i latou uma o e o laeiina le lanu moana, ma isi mea faapena). A maua e tagata taitasi se aofaiga o togi, fai se faatautui o auaunaga, e totogi i a latou togi. Tuu atu i le autalavou se taimi faatapulaa lea e faamaea ai ia auaunaga e tatau ona latou tuuina atu i le tasi ma le isi.

Atiina ae ni tomai o fesootaiga ma faaletaitai.

Fatu ni au taitoafa, ma pupuni mata o talavou taitasi. Tuu atu i au taitasi se maea umi o nonoa se’i, ma tuu atu le 30 sekone e fatu ai se sikuea ma a latou maea e aunoa ma le talanoa o le tasi i le isi (pe fai atu ia i latou e fai se galuega e ese mai ai e manaomia ai le galulue faatasi). O a ni luitau sa feagai ma i latou i le faia o se sikuea?

Tuu atu latou te toe taumafaia, ae o le taimi la lea fai i se tagata e toatasi o le vaega e aveese le ie lea sa pupuni ai ona mata (ae, ia aua lava nei faatagaina se tagata e tautala). O faapefea ona ese la latou aafiaga i le taimi lea?

Tuu atu ia i latou e toe taumafai mo le taimi lona tolu, ma faataga le tagata e le o ufiufia ona mata e tautala. O faapefea ona ese la latou aafiaga i le taimi la lea? Talanoa i le taua o le faaaliga (vaaiga, muai vaaia) ma le fesootaiga i taitai. O le a se mea o aoao atu e lenei gaoioiga i le autalavou e uiga i le matafaioi a perofeta, tagata vaai, ma tali faaaliga?

Ma le mea mulimuli, toe fai le gaoioiga, ae o le taimi la lea faataga ia tagata uma o vaega taitasi e vaai ma talatalanoa. O a ni o latou lagona i le taimi nei ina ua mafai ona latou vaai ma saofaga atu i le fofo? O faapefea ona faatatau lenei gaoioiga i le auala e tatau ona galulue faatasi ai ia korama ma vasega?

Aoao i ni auala talafeagai e foia ai ma tali atu ai i e faasaua.

Valaaulia se failauga faapitoa e talanoa i le faasaua—pe aisea e tupu ai, tulaga eseese o tupu ai, taunuuga, ma po o le a se mea e faia i ai. Valaaulia le autalavou e faatino ni tala o ni o mea o tutupu ma faailoa mai po o le a se mea latou te faia pe afai o i latou po o se tasi latou te iloaina ua sauaina. Mafaufau e faaali le vitio “Kalapu a le Au Le Palauvavale” po o le faasoa atu o nisi aafiaga patino e uiga i le tetee atu i e faasaua. Talanoa i le poloaiga ia fealofani ma le alofa o Keriso mo i tatou (tagai Ioane 13:34). O faapefea ona aafia e lenei mea le ala o tatou taulimaina ai isi.

Aoao i le taua o le lotogatasi ma tuu atu i isi e fesoasoani ia te oe i le ausiaina o sini.

Faamamafa atu le taua o le saogalemu i le taimi o lenei gaoioiga. E le tatau ona auai ni tagata e faaletonu o latou papatua po o nisi tulaga e faatatau i ai o le soifua maloloina. Fai atu i le autalavou e o mai e fai se lio malosi ma felatai se tasi po o le tele foi ma faasaga talavou taitasi i totonu, ia pipii tauau. E tatau i tagata auai taitasi o le lio po o lio foi ona tautino o le a matua faatuatuaina lava ma matua naunau lava e lagolago faaletino le isi talavou o i totonu o le lio. Fai atu i se talavou se toatasi e tu i le ogatotonu ma moeiini ona mata, piilima ona lima. I le tuuina mai o le faailo talafeagai, ia faataamilo lenei talavou ma faaminoi solo ao tumau pea ona vae i le ogatotonu o le lio. Toe fai le gaoioiga ma talavou taitasi o e mananao ia maua lea aafiaga o le faatuatuaina o isi. Atonu o nisi o le autalavou e mananao e matamata nai lo le tu i le ogatotonu.

A maea le taaloga fai atu ia fesili toe mafaufauina nei: Na faapei le lagona o le i ai i totonu o le lio? O le a se mea e mafai ona suitulaga ai lenei lio? O a fea e tatau ai ona tatou faalagolago atu ma faatuatuaina isi i o tatou olaga? E mafai faapefea ona tatou avea ma tagata faatuatuaina? E mafai faapefea ona tatou atinaeina lo tatou faatuatua i le Faaola?

Aumai ni manatu malie ma talafeagai mo le tafaoga faamasani ma faataitaiina.

Ao lei oo i le taimi, fai atu i le au ositaulaga ma Lora e mafaufau ma talatalanoa i ni manatu malie ma musuia o tafaoga faamasani. Atonu o le a latou mafaufau i nisi mea e pei o se pati o le matafaga i totonu i le taimi o le taumalulu, se pati o le Kerisimasi ia Iulai, se po taalo lea e taaalo ai le autalavou i ni taaloga mai taimi ao latou laiti, se luau, se fiesta, ma isi mea faapena. Fesoasoani ia i latou i le fuafuaina ma le faagaoioiga o le po. Afai e mafai, amata i le fai atu i se vaega o ositaulaga po o ositaulaga uma e piki ia Lora taitasi ma aveina atu o ia i le nofoaga ma toe momoli i le fale. Afai o i ai ni gaoioiga i le taimi o le tafaoga faamasani e manaomia ai ni paga, fesuiai soo ia paga ina ia mafai ona fesootai alii talavou ma tamaitai talavou taitasi ma tagata uma ma o le tafaoga faamasani e faatatau lava i le mauaina o le fiafia faavaega. Toe iloilo le vaega o le “Tafaoga Faamasani” o i le Mo le Malosi o le Autalavou ma talanoa i mea sa e aoaoina e uiga i tafaoga faamasani talafeagai.

Aoao i le auala e fesootai ai ma tagata i fafo atu o la outou lava vaega faaletupulaga.

Faanonofo le autalavou i le tasi itu o ni seti o laulau ae nonofo o latou matua po o ni tagata matutua mai le uarota i le isi itu. I luga o laulau, saunia ni lisi o ni fesili, o le ia faamasani ia te oe. Tuu atu i paga taitasi (e tasi le talavou ma le tagata matua e toatasi) ni nai minute e fesiligia ai e le tasi le isi i ni fesili. Ona faailo lea pe a uma le taimi ma fai atu i le talavou e mei i le isi nofoa, e paga ai ma se tagata matua fou. Mafaufau e faapaga ia tamaitai talavou ma sui o le Aualofa (po o alii talavou ma sui o le korama a toeaina) ina ia latou faamasani atili i nei faalapotopotoga, lea o le a latou auai atu i ai i se taimi e le o toe mamao.

Ia avea ma uo lelei o le autalavou i lau uarota.

Fai atu i le autalavou e saofafai faafesagai le tasi i le isi i ni atulaina se lua. Ao lei faia le gaoioiga, toe iloilo le vaega “O Uo” i le Mo le Malosi o le Autalavou e aoao ai i auala e faatino ai le atinaeina o ni faauoga. Faailoa atu se autu e talanoaina, ma fai atu i le autalavou ia o loo saofafai mai le isi itu latou te talanoa i ai. Ia tai minute po o le sili atu foi ma sui autu, ma o taimi uma foi e sui ai le autu ia fesuiai foi talavou mai le laina nofoa ina ia tofu talavou ma se paga fou i le talanoaga.O autu e ono aofia ai mea e te fiafia i ai, tu ma aga masani faaleaiga, sini mo le lumanai, manatu musuia o tafaoga faamasani, po o a ni uiga e te fiafia i ai i alii talavou po o tamaitai talavou, ma nisi mea faapena.

Faamasani le tasi i le isi ao faamamaluina ia talavou taitasi.

Ao lei oo i le taimi, fai i le autalavou atoa e faatumu se iloiloga faigofie e uiga i lanu, meaai, ma mea faafiafia e sili ona latou fiafia i ai, ma isi mea faapena. Faafefiloi ia iloiloga ma tuu atu ia tofu le autalavou ma se iloiloga e ana e se isi tagata. Fai i le autalavou e aumai i le Mutuale (e aunoa ma le faaaluina o soo se tupe) se kata na fai i le fale, tusi, po o se meaalofa mo le tagata e anaina le iloiloga lea sa latou mauaina. I le taimi o le Mutuale, taaalo ini taaloga masani o aso fanau o tamaiti ma fai ni meaai masani o le aso fanau, faamatala atu o loo e faamanatuina le aso fanau o tagata uma i se pati “e le o se aso fanau” o loo faamamaluina ai tagata uma. Faaiu i le fai atu i tagata taitasi e faailoa mai le tagata e anaina le iloiloga lea sa na maua (faaaoga ia tali o le iloiloga) ma tuu atu i lena tagata se kata, tusi, po o se meaalofa “e le o se aso fanau”. Pe, e mafai ona aveese ia igoa mai iloiloga ae mate e le autalavou po o fea o tagata o loo faamatalaina e iloiloga taitasi.

Aoao ni mataupu faavae o le setiina o sini ma le galulue faatasi.

Vaevae le autalavou e fai paga, ma tuu atu ia tofu paga taitasi ma ni tamai polo (po o pepa ua numinumi faalapotopoto) ma se pakete. Fai atu i le autalavou e taumafai e togi polo i totonu o pakete mai se mea mamao ma faamaumau pe faafia ona faamanuiaina. Ona tuu atu lea ia i latou e toe taumafai ae uu e le isi tagata o le paga le pakete ma faaminoi pe a manaomia. O le a se mea na aoao e le autalavou e uiga i le ausia o sini ma le galulue faatasi mai lenei gaoioiga?

Ia iloa le maoae o le lelei e mafai ona ausia e le autalavou pe a latou galulue faatasi o se korama, vasega, po o se vaega.

Ao lei taitai lava oo i le taimi ma i sina faamalamalamaga itiiti lava, atofa atu i talavou taitasi e tofu uma mai ma se mea o loo manaomia e faia ai se fua o se kuka latou te fiafia i ai (mo se faataitaiga, fai i se tasi e aumai se fuamoa e tasi; o le isi, e tasi le sipuni ti o le masima; ma faapena ai lava). Faapotopoto faatasi mo le gaoioiga i se aiga po o se isi nofoaga lea e mafai ona tou kuka ai pe taoina ai foi ni meaai. Fesili atu i le autalavou pe latou te fiafia e aai i mea ia sa aumaia e i latou lava pe e sili atu pe a tuufaatasi ma isi mea [ia na aumai e isi]. Ona fesili atu lea pe o le a se mea e mafai ona tuufaatasia i ai ia nei mea. A maea ni talanoaga, ia tuuina atu le fua ma faamatala atu e pei lava ona sili atu le lelei o le tuufaatasia o mea, o le a faamanuiaina foi i tatou pe a tatou faatulagaina i tatou lava ma avea ma ni korama ma ni vasega lotogatasi. Galulue faatasi e saunia le fua, ma fai atu i le autalavou e aai ma fefaasoaai ia taunuuga.

Aoao ni tomai tau fesootaiga lelei ma le lagolagosua.

Fai se faatulagaga o mea faitino eseese (e pei o poloka, sapalai o meaaoga, po o ni mea o le fale) e aunoa ma le tuu atu i le autalavou e vaai i ai. Vaevae le autalavou i ni au, ma tuu atu ia tofu au taitasi ma anomea o loo manaomia e fatu ai ni faatulagaga tutusa. Faataga se tagata e toatasi o au taitasi e vaai i ai. E mafai ona faamatalaina e le tagata o le au lenei le faatulagaga i se tagata o le au lona lua ae le o se isi tagata. E mafai ona fesootai mai le tagata o le au lona lua i le vaega o totoe o le au i le na o le taliina o a latou tali o le ioe po o le leai. Afai e manaomia, e mafai ona toe foi le tagata o le au lona lua i le tagata o le au muamua mo nisi faamatalaga. A lagona loa e vaega uma ua maea i latou, e mafai ona latou faatusaina a latou faatulagaga i le mea muamua. O le a se mea o aoao mai e lenei gaoioiga i le autalavou e uiga i le taitaiga ma le fesootaiga? Mata e mafai faapefea ona suitulaga i perofeta ma faaaliga?

Atiina ae ni tomai faaletaitai ma fesootaiga.

Fai ni au e taitoalua. O le tasi tagata o le au e taitai ao le isi e mulimuli. Nonoa mata o le tagata e mulimuli. E taialaina e le taitai le tagata mulimuli e ala atu i se auala o maagao. A maea sina taimi, ona faafesuiai lea o tofiga o le autalavou ma toe fai lea faagasologa.

Na faapei lagona o se tagata e mulimuli? O le a se mea na aoao e le autalavou e uiga i le taitai? O le a se mea na latou aoao e uiga i le mulimuli? O le a se mea o aoao atu ia i latou e lenei gaoioiga e uiga i le atinaeina o le faatuatua i le Tama Faalelagi ma Iesu Keriso?

Mafaufau i isi ma faaali le loto faafetai ma le talisapaia.

Asiasi faalilolilo atu i fale o tagata o le uarota ma paranesi e tusi ai i le penisina ni tusi faafetai po o le faamalosiauga i o latou auala taavale po o auala savali. Pe, e mafai ona tuu e le autalavou ni tusi agalelei i le faitotoa. Talanoa i aoaoga o loo i le vaega o le “Loto Faafetai” i leMo le Malosi o le Autalavou e aoao atili ai e uiga i lagona ma le faaalia o le faafetai.

Ia iloa le alofa ma le auaunaga o isi i le vasega, korama, po o le vaega.

Fai atu i le autalavou e nonofo faataamilo i se lio ae uu e se tagata e toatasi se polo o vulu po o se manoa. Fai atu i le tagata lena e faailoa mai se uiga, aafiaga, po o se galuega auauna atu e aofia ai se isi tagata o i le lio lea ua ia maua ai le agaga faafetai. Uu se vaega o le vulu, ona togi lea o le polo vulu i le tagata lea na faailoa mai. E faaauau e lena tagata le faagasologa, ona uu foi lea o se vaega o le vulu. Faaauau pea ona taaalo seia mamanuina se uepi, e fesootai ai le vaega. Talanoa i ni auala e mafai ai ona tatou maua le lotogatasi ao tatou alolofa atu ma auauna atu le tasi i le isi.