Bulabula ni Yago

Vakatorocaketaka noda kaukauwa vakayago.

Vulica mo kila na veimataqali vakaukauwa yago eso (me vaka na cici, dabe cake, lave cake, danisi, lave ka-bi, yoga, vodo basikeli, karate, se so tale na vakaukauwa yago era taleitaka na itabagone). Ke gadrevi, raica mai e dua e kenadau me mai vakavulica na vakaukauwa yago. Mera dikeva na itabagone na nodra rawata tiko na vakaukauwa yago oqo ka mera na tuva me vakatorocaketaka tiko ena vica na macawa e tarava. Sota tale, ka mera ripotetaka na itabagone na nodra toso tiko. Mo tokaruataka na itaviqaravi oqo ena vica na kena vakayacori. Veivosakitaka na vuna e vinakata kina na Turaga meda karona na yagoda. Mo na vulica “Tiko Bulabula ni Yago kei na Vakasama” ena Me iSakisaki ni iTabagone (2011) me tiki ni nomu itaviqaravi.

Vakatorocaketaki ni tiko bulabula ena itaviqaravi vakaqito.

Sureta e dua na cauravou me vakavulica eso ena dua na qito e vou ki na ilawalawa se vakavulica e dua na kila me vakatorocaketaki kina e dua na qito kilai levu (sa rawa mo sureta e dua na cauravou luluqa vakalotu se itokani ni dua tale na lotu). Me vakayacori vakailawalawa na qito oqo. Sa rawa me veivosakitaki na sala me maroroi kina e dua na yalo ni veitokani ena gauna mada ga ni veisisivi. Raimatua tikoga ki na tiko bulabula e rawati mai na itaviqaravi vakayago vakaoqo.

Vulica na bibi ni tiko bulabula ka tuvanaka mo veisautaka na itovo e sega ni bulabula.

Sureta e dua e kila vinaka na ulutaga ni vakarau ni kana me veivosakitaka na ivakarau bulabula ni kana. Mera cakava na ka era sa vulica, mera cakava na itabagone e dua na lisi ni veika era a kania ena vica na siga sa oti ka dikeva na bulabula ni kakana o ya; mo lesia talega na ilawalawa eso ni itabagone mera vakadikeva na bulabula ni veimataqali kakana eso; se mera vakarautaka ka kania na itabagone e dua na kakana bulabula yavutaki mai na veika era a vulica. Mera vulica na itabagone na V&V 89 ka dinata mera bulataka na Vosa ni Vuku (raica “na Bulabula ni Yago” ena iTavi Vua na Kalou se na lisi ni cakacaka ni yavunilewa ni Kila Ka ena Torocake Yadudua).

Wasea na icakacaka ni kakana bulabula.

Sureti ira na gone me ra kauta mai na nodra icakacaka ni kakana taleitaki, ka biuta vata me dua na ivola ni vakasaqa rawarawa. Veivosakitaka na tuvai ni kakana, vakarautaki, ivakarau taumada ni vakasaqa, ivakarau ni kana vinaka. Kevaka e rawa, e rawa ni ra kauta mai na itabagone yadua na sabolo ni dua na nodra kakana. Oqo talega e rawa ni vuki me veisivisivi vei ira na timi ni itabagone.

Vulica na imatai ni veivuke taumada.

Sureta e dua me mai vakavulica ka vakaraitaka na iwalewale ni imatai ni veivuke, me vakataka na savati ni dua na mavoa, na soli icegu, vukea e dua e ora, qaravi ni sui e ramusu, kei na so tale. Solia na madigi vei ira na itabagone mera vakatovotovotaka na veika era sa vulica ka cakava na nodra iyaya ni imatai ni veivuke. Sa rawa mo vakatasuasuataka ni yaco e dua na leqa— ka sureta na itikotiko raraba mera mai vakaitavi, ka dramataka ni sa yaco vei ira eso na veimataqali mavoa ka mera vakaraitaka kina na itabagone na imatai ni veivuke.

Vulica na ivakatagedegede ni Turaga me baleta na qarauni ni ituvaki bulabula ni noda vakasama kei na vuna e ka bibi kina oqo.

Vulica me baleta na tiko bulabula ni vakasama ena tabana e 25 ni Me iSakisaki ni iTabagone. Veivosakitaka na ka era sa cakava tiko na itabagone ena siga yadua me qarauni kina na tiko bulabula ni nodra vakasama kei na vuna e sa ka bibi kina vua na Turaga. Sureta e dua ka sa matua ena vakasalataki ira na vakaleqai tu ena vakasama me lako mai ka vosa vei ira na itabagone (oqo e rawa ni dua mai na se vakaturi mai na LDS Family Services). Sureta talega na bisopi me veivosakitaka na iwalewale e rawa ni vukei keda kina na Veisorovaki kei na Yalo ni Turaga meda kunea na bula marau.

Rawata na maqosa kei na yalodei me levei ka sotavi na veigauna rerevaki.

Sureta e dua na kenadau ena ivakarau ni taqomaki iko se dua na ovisa ni lawa me vakavulici ira na itabagone ena ivakarau me ra taqomaki ira kina mai na ivalavala kaukauwa se na ituvaki rerevaki tale eso. E rawa ni ra vulica na ivakarau ni qaqarauni me vukea nodra levea na veigauna vakaoqori vakakina na ivakarau taumada ni taqomaki koya. E rawa ni o vakanamata ena ulutaga oqo ena vica na macawa me soli kina vei ira na itabagone na gauna e rauta me ra vakatovotovotaka na ka era sa vulica.

iYaloyalo mai na ©iStockphoto.com.

Taqomaki tikoga mai na veika rerevaki ena initaneti.

Sureta e dua na tamata kila-ka me vakavulica na ivakavuvuli ni tataqomaki vinaka ena intaneti, me vaka na levei ni veika rerevaki e tu eloma, sotavi ni veivakalolomataki ni saiba, kilai ira na dau kana buta, ka levea na daubutako ivakatakilakila. Vakadikeva na LDS.org me laurai na ivurevure me ra vukei kina na tamata yadua kei na matavuvale ena nodra vakayagataka na Initaneti ka taqomaki vinaka tikoga. Navuca mo vakayagataka na iwasewase ni “Veivakamarautaki kei na iTukutuku Raraba” niMe iSakisaki ni iTabagoneme tokona na itaviqaravi oqo.

Vulica na tataqomaki ena veitosoyaki e gaunisala kei na draiva.

Sureta e dua na kenadau me vakatavulici ira na itabagone me baleta na tataqomaki e gaunisala. Na veivosaki oqo sa rawa ni oka kina na ituvatuva taqomaki ni draiva vakakina na ivakavuvuli eso ni tataqomaki me baleta na tamata e gaunisala kei na basikeli. Kerei ira na itabagone mera vakatakila ka veivosakitaka eso na veivakasosataki matau e rawa ni yaco ni ra draiva voli. Vakayaloqaqataki ira mera vakadeitaka matua mera vakatovotovotaka na tataqomaki e gaunisala (vaka na sega ni vakayagataki ni talevoni veikauyaki ni draiva voli). Sa rawa ni ra veivaqaqai vakaiira na itabagone ena ka era sa vulica.

Vakatavulica na bibi ni noda tiko bulabula vakayago ka vakayalo.

Vakacavara e dua na taubale lekaleka, ka tinia ena dua na sokalou lekaleka me baleta na bibi ni tiko bulabula vakayago ka vakayalo.Vakanamata ni rau bibi ruarua ki na noda torocake tawamudu. Na wase “Tiko Bulabula ni Yago kei na Vakasama” ena Me iSakisaki ni iTabagone se na Vosa ni Vuku ena Vunau kei na Veiyalayalati ena rawa ni vakarautaka eso na ulutaga me veivosakitaki. Sa rawa mo sureti ira na itubutubu mera mai vakaitavi ena itaviqaravi oqo.

Vulica me vuku ka bulabula nomu lewa baleta na kakana.

Veivosakitaka nodra vakadeitaka na itabagone na yaga ni kakana bulabula mera volia. Sikova e dua na sitoa se makete mo vakamatautaka nomu volia na isaluwaki bulabula ni kakana. Wasea vakatimi na itabagone ka mera vola na timi yadua na lisi ni isaluwaki bulabula ni kakana. Mera qai raica na itabagone na kakana ena nodra lisi ka digitaka na kena e bulabula duadua.Ni sa cava na itaviqaravi, mera laki volia mai na itabagone eso na vakalomavinaka bulabula me kedra. Veivosakitaka na veivakalougatataki e yaco mai ni da tiko bulabula.

Tekivu vakavakarau ki na leqa tubukoso e rawa ni yaco ka vukei ira na tamata mera vakarautaki ira.

Sureta e dua e tiko vua na kila ni vakavakarau ki na leqa tubukoso me vakavulici ira na itabagone ena vakavakarau ki na mataqali leqa tubukoso eso. Vukei ira na itabagone mera cakava eso na iyaya ni vakavakarau ki na leqa tubukoso, oka kina na iyaya ni imatai ni veivuke, cina livaliva, tavaya ni wai, kei na so tale. Veivosakitaka na ivolanikalou “Ia kevaka dou sa vakarau vakavinaka tu, dou na sega sara ni rere” (V&V 38:30). Vakayacora e dua na soqo ni vakavakarau mera na vakavulica kina na itabagone na nodra matavuvale kei na lewe ni itikotiko raraba na veika era sa vulica me baleta na vakavakarau ki na leqa tubukoso.