Cakacaka ni Kaulotu

Vakatovotovotaka mo saumi taro baleta na kosipeli ena nomu wasea ni da muri Jisu Karisito.

Sureti ira na itabagone mera tukuna mai eso na taro e baleta na nodra vakabauta se baleta na Lotu. Wasea na itabagone ki na vica na ilawalawa lalai, ka solia e dua na taro o ya vei ira. Sureti ira na itabagone mera wilika na taro, raica na ivolanikalou e vakavulica kina na iVakabula se ira Nona parofita na ivakavuvuli e sema ki na vakasama se taro oqo, ka vakarautaka na kena isau me wasei ki na ilawalawa taucoko ena ituvatuva vakaoqo:

1. Na neimami taro na ________________________________________________.

2. Na iVakabula e vakavulica_______________ (wilika e dua na ivolanikalou ka vakamacalataka).

3. Ena noqu bula, au raica ni _____________ (wasea na gauna o a bulataka kina na ivakavuvuli oqo).

iVakaraitaki:

1. Na neimami taro oqo: Na cava o ni sega kina ni gunu kofi?

2. Na iVakabula e vakavulica mai vei Nona iApositolo o Paula ni yagoda sa valetabu, ka dodonu meda rokova vakakina (wilika na 1 Korinica 6:19). Vei au, e kena ibalebale meu kakua ni vakatawana ki yagoqu e dua na ka ena vakacacana. E dua vei ira na kofi. Sa vakaraitaka mai na iVakabula e dua na lawa ni tiko bulabulaki na Lotue vakatokai na Vosa ni Vuku, ka vakavulici talega kina meda lako tani mai na waigaga, wai ni vakamatenitaki, kei na tavako.

3. Ena noqu bula, au sa kunea na veivakalougatataki cecere niu saga meu muria na iVakabula niu maroroya na yagoqu ni sa valetabu (wasea na veika o sotava se ivakadinadina).

Vakaitavi ena cakacaka ni kaulotu ena nomu vakavakarau mo solia e dua na iVola i Momani vua e dua.

Solia vei ira na itabagone na ilavelave ni iVola i Momani me baleti ira na daukaulotu. Sureti ira me ra vola na nodra ivakadinadina ena loma ni waqana e liu ka vakatakilakilataka eso na nodra ivolanikalou taleitaki. E rawa ni o sureti ira na daukaulotu tudei me ra vakatura eso tale na ivolanikalou me vakatakilakilataki. Solia vei ira na madigi me ra vakatovotovotaka na kena vakamacalataki na iVola i Momani kivua e dua ka se bera ni wilika (vukei ira se mera veivukei ena ivakaraitaki). Sureti ira me ra solia na nodra ilavelave ni iVola i Momani kivua e dua e sega ni lewe ni Lotu ka vakadinadinataka vua na tamata oya na iVola i Momani. Ena dua na itaviqaravi mai muri, sureti ira na itabagone me ra wasea na veika era a sotava.

Vakatovotovotaka na vakavulici ni dina vakosipeli kei na saumi ni taro ni kosipeli.

Wasei ira vakaveitokani na itabagone, me ra vakarautaka na veilesoni leleka mai na wase 3 ni Vunautaka Noqu Kosipeli. Na veitokani yadua me ra qai vakavulici ira na itabagone tale eso era matataki ira na dauvakadidike. Sureti ira na “dauvakadidike” me ra taro ena gauna ni veivosaki ka me ra qai sauma na veitokani. Ni ra sa oti na veitokani, me ra qai veisau me ra veivakavulici na vo ni itabagone.

Ena rawa vakavinaka na itaviqaravi oqo ni ra kila vakavinaka na itabagone na kila matau taumada ni vuli kei na veivakavulici era tu ena Vunautaka Noqu Kosipeli wase 2 kei na 10. Vakasamataka mo railesuva eso na kila matau oqo ni se bera ni o kerei ira na itabagone me ra veivakavulici.

Vulica na cakacaka ni kaulotu mai vei ira na daukaulotu tudei.

Sureti ira na daukaulotu tudei se o ira na daukaulotu lesu wale tikoga mai mera veivosakitaka na ituvaki matau eso kei na ivurevure sa tiko rawa me baleta na wasei ni kosipeli. Kerei ira mera vakamacalataka na iwalewale ni nodra vuli ni ra vakavakarau ni veivakatavulici. Dramataka na cava e rawa ni ra tukuna na itabagone kivei ira na nodra itokani me baleta na Lotu ena ituvaki eso. Sureti ira na itabagone mera sotava e dua na ka-vakadaukaulotu ena veimacawa ka wasea na veika era sota kaya.

Mo raica vakai iko se vakacava tu mada na veiqaravi ni kaulotu ka vakatorocaketaka na ivakarau ni vulica na kosipeli.

Vakailawalawataki ira na itabagone vakatagane se vakayalewa vata, ka solia ki na ilawalawa yadua e dua na “kaci ni kaulotu” ena dua na vanua e vuravura.Mera qai vulica na ilawalawa yadua e dua na lesoni mai na Vunautaka na Noqu Kosipelika vakarau mera vakavulica e dua na matavuvale ena tabanalevu. Vakarautaki ira na lewenilotu ena tabanalevu ni na gole mai e dua na ilawalawa ki na nodra vale, mera mai kana, ka vakavulica e dua na lesoni me dramataki ni ratou sega ni lewe ni Lotu. Me tiki ni itaviqaravi oqo, sa rawa vei ira na itabagone mera bulataka mai e vuqa na lawa ni kaulotu ena dua na macawa (me vakataka na yadra ena6:30, vulica na ivolanikalou me dua na auwa ena veisiga, gole tani mai na itukutuku kei vuravura, kei na so tale). Sa rawa talega vei ira na itabagone mera vulica na itovo ni vanua, draki, kei na yavunibula tale eso ni vanua era sa lesi kina. Navuca mo vakaitavitaki bisopi ena itaviqaravi oqo me vakavulici ira na itabagone ena veika lavaki ena veiqaravi ni kaulotu tudei, ka ivakarau ni kena vakaleweni na kerecuru ni kaulotu, kei na so tale.

Vulica na sala mo vakayagataka kina na iVola i Momani me sauma na nodra taro na dauvakadidike me baleta na bula kei na ka vakayalo.

Lesia ki na itabagone yadua e dua na “veitaro ni yalo” ena draunipepa 120 ni Vunautaka na Noqu Kosipeli. Bolei ira na itabagone mera vakasaqara na kena sauma rawa na iVola i Momani na taro oqori (kera gadreva mera vukei, vakaraitaka vei ira na wase e volai tiko kina na taro yadua ena Vunautaka na Noqu Kosipeli). Sureti ira mera wasea na veika era sa raica.

Wasea na kosipeli vei ira na lewe ni itikotiko raraba ena dua na siga dolavi raraba, soqo ni vanua, se dua tale na itaviqaravi.

Cakacaka vata kei iratou na matabisopi kei rau na daukaulotu tudei mo tuvanaka, vakarautaka, ka vakaraitaka raraba e dua na siga dolavi raraba ni kaulotu, soqo ni vanua, se dua tale na itaviqaravi e valenilotu. Mera na tauyavutaka ka veisoliyaka na itabagone na kena tikidua, kidavaki ira na sureti, wasea na yavu ni vunau vei ira na vulagi, ka tuva eso tale na itaviqaravi mera vulica kina na vulagi na kosipeli ena siga dolavi raraba.

Vulica na iwalewale ni kena wiliki ni iVola i Momani vata kei na dua tale ka na rairai dredre voli ni kila vakamatata.

Raica mera vakatakila yadua na itabagone e dua e rawa ni ra wilika vata na iVola i Momani ka na rairai tiko na dredre ni nona kila vakamatata (vakataka e dua na tacina se ganena gone se dua na itokani ka se bera ni wilika). Sureti ira mera tuvana e dua na gauna vakatabakidua ena veimacawa mera wiliwili vakatautauvata. Me vukei ira na itabagone ena vakavakarau ki na itaviqaravi oqo, solia vei ira na gauna mera vakatovotovo vakaisa. Tuberi ira ni ra vakatovotovotaka na nodra veivukei vakaiira ni kila vakamatata na ituvatuva ni talanoa, na vosa kei na malanivosa dredre eso, kei na dina vakaivunau e koto ena veiwase era wilika (raica na Vunautaka na Noqu Kosipeli, 123–24). Vakayaloqaqataki ira mera cakava vakakina ni ra wiliwili vata kei na tamata era sa vakatakila.

Sureti ira na itabagone mera lako vata mai ni sa oti e rauta ni dua na vula na nodra cakava oqo, ka veitalanoataka na ka era a vulica kei na cava e rawa ni ra cakava mera vakarautaki ira vinaka cake kina ni vukei ira tale eso mera kila vakamatata na iVola i Momani.

Rogoca na veika sa sotava e dua sa lesu mai ena kaulotu ka rawata na kilaka ni veivakavulici.

Kauti ira na itabagone ki na nona vale e dua na lewenilotu ka a daukaulotu tudei. Me dusimaki ira na itabagone o koya na lewenilotu ena kena vakarautaki e dua na kakana rawarawa ga e rawa ni ra vakarautaka ena nodra kaulotu. Sureti koya sa lesu mai na kaulotu me taura e vica na miniti me wasea na veika eso a sotava ena nona kaulotu, ka sureti iratou e vica na itabagone me ratou wasea e dua na itukutuku mai na Vunautaka Noqu Kosipeli kei na nona matavuvale na lewenilotu.

Vulica ka vakatovotovotaka na kila taumada ni veivakavulici ena nodra vakavulici eso.

Ni bera na itaviqaravi, vakabira wavoki na taro vakaoqo: Meu na veivakavulici vakacava mai na ivolanikalou? Meu na taro veilaveti vakacava niu veivakavulici tiko? Meu na vakarorogo vagumatua vakacava vei ira au vakavulica tiko? Meu na veivakavulici vakacava ena yavu ni nodra gagadre na dauvakadidike? Meu na vukei ira vakacava na tamata mera walia na nodra leqa? (Raica na Vunautaka na Noqu Kosipeli wase 10.)

Mera digitaka na itabagone e dua vei ira na kila oqo mera vakatorocaketaka, ka wasei ira vakaitokani yavutaki ena veika era sa digitaka. Na ilawalawa yadua me na vulica na nodrau kila oqo mai na Vunautaka na Noqu Kosipeli ka rau vakarau me vakaraitaka na kila oqo vei ira na ilawalawa taucoko. Ena nodra vuli, vakayaloqaqataki ira mera vakamatatataka na kila o ya, vakaraitaka ena cakacaka vakacava, ka mera vakatovotovotaka na kena vo.

Vulica na vakavulici ni kosipeli kivei ira na tamata mai na ituvaki kei na itovo vakavanua tale eso.

Sureti ira na daukaulotu oti mai na veivanua duidui e vuravura mera wasea vei ira na itabagone na nodra gauna ni kaulotu. Sa rawa mera vakayagataka e dua na teveli ka vakamacala ena itovo vakavanua se lotu ni dua na vanua, vakaraitaka na itaba se veika talei, se vakaraitaka e dua na kakana ni vanua tani. Veivosakitaka na sala a veivakauqeti kina na itovo vakavanua kei na nodra lotu na tamata ni ra vakavulica vei ira na kosipeli ni ra kaulotu. Mera wasei vakailawalawa na itabagone ka veitosoyaki ki na nona teveli na daukaulotu oti.

Vakaitavi ena cakacaka ni kaulotu ena nomu gole vata kei ira na daukaulotu tudei ena nodra vaqarai ka vakavulici na tani.

(Me Kilai: Na itaviqaravi oqo e veiraurau vinaka kei ira na Bete kei na Leba.) Ena nomuni cakacaka vata kei iliuliu ni kaulotu ni tabanalevu, tuva na gauna mera dau gole vata kina kei ira na daukaulotu tudei o ira na itabagone ka mera qarai ka vakavulici na tani. Taroga vei ira na daukaulotu na lesoni mera na vakavulici mera vakavakarau kina na itabagone ena kena vulici na iwase veiganiti ena Vunautaka na Noqu Kosipeli.

Ni sa levu se sa rawata kece na itabagone na madigi vinaka oqo, sureti ira mera wasea na ka era sotava ena dua na itaviqaravi ni Muavata. Na cava era vulica? Na cava e vakauqeta vei ira na ka era sotava oqori mera vakavakarau vakavinaka cake kina ki na nodra kaulotu?

Vukei ira na daukaulotu ena veivakasarasarataki ena vale ni Lotu.

Vakarautaka e dua na itaviqaravi vata kei rau na daukaulotu mera sureti mai kina na lewenilotu luluqa kei ira na itokani sega ni da vakabauta vata mera mai vakasarasarataki ki na veivale ni Lotu. Mera na liutaka tiko na daukaulotu na veivakasarasarataki. E kena ivakarau me tekivu na veivakasarasarataki ena icurucuru, ka mera na masu vata kina na vakaitavi. Mera na qai veiliutaki yani na daukaulotu ki na tobu ni papitaiso (ke tiko ena nomudou valenilotu e dua) ka vakamacalataka na noda gadreva na Veisorovaki i Jisu Karisito. E rawa ni vakamacalataki na ivakatakilakila vakamatai ni valenilotu, ka rawa ni vakayagataki oqo me vakavulici na kosipeli vakalesui mai. Me cava na veivakasarasarataki ena teveli ni sakaramede, ka vakavulica kina na daukaulotu na veika e baleta na sakaramede kei na kena gadrevi meda cakava ka vakavouia tiko na noda veiyalayalati kei na Kalou. Ena nodra vakararavi tiko ki na veidusimaki ni Yalotabu kei na ituvaki ni veivakasarasarataki, sa rawa vei ira na daukaulotu mera veisureti ena vulici vakalevu cake ni kosipeli, gole mai ki lotu, se mera papitaiso.

Ena gauna taucoko ni veivakasarasarataki, ko na sureti mo cavuta na nomu ivakadinadina ni ivakavuvuli ni kosipeli. Sa rawa mo vakavakarau ki na soqo oqo ena nomu vulica na ulutaga me vakataka na Veisorovaki i Jisu Karisito, na Vakalesui mai ni kosipeli, na sakaramede, kei na papitaiso. Sa rawa talega mo vakavakarau ena nomu kerei ira na daukaulotu mera vakasarasarataki iko ni bera ni ko sureti ira na vakaitavi.

Vakatorocaketaka na ivakarau ni vulici ni kosipeli ni vakayagataki na iyaya ni daukaulotu.

Wasei ira vakayarurua na itabagone, ka lesia vei rau e dua na wase ni ivolanikalou. Me rau vulica na wase o ya ni rau muria na idusidusi ena draunipepa 19– 20 ni Vunautaka na Noqu Kosipeli (masu, vuli ena gagadre dina, vakarorogo ki na Yalo, bulataka na ka o sa vulica) ka qai vakavulica ki na dua tale na ilawalawa yarua se ilawalawa taucoko e dua na lesoni era sa vulica. Navuca me sureti ira na itabagone mera bulataka na idusidusi oqo ena nodra vulica yadua na ivolanikalou.

Sureti ira na tamata mera lako mai vei Karisito ena nomu wasea na itukutuku veivakauqeti ena itukutuku raraba vakarautaki.

Mo ni sarava vata na vidio e rua oqo e baleta na Karisito: “Because of Him” (raica e cake), “Christlike Attributes,” kei na “His Sacred Name—An Easter Declaration.” Wasea vakai kemuni yadua na nomuni nanuma kei na lomamuni baleta na iVakabula. Ena gauna ni itaviqaravi se ni sa oti ena yakavi, wasea e dua vei rau na vidio oqo ena itukutuku raraba vakarautaki, me vakataka ena Facebook se Twitter. Na macawa e tarava, wasea na ka o sotava ni ko vakayacora oqo, oka kina na nodra nanuma na tamata ni ko wasea na itukutuku tabu oqo.

Me nanumi tiko ni dua na vuna e vakarautaka kina na Lotu na vidio oqo me rawa kina vei ira na lewenilotu mera wasea vei ira na tamata, oka kina na itokani ena veimatalotu tale eso.