Cakacaka ni Liga, iVakatagi, kei naDanisi

Vulica e dua na kila vakacakacaka maqosa sara ena gauna o vaqaqacotaka tiko kina na nomu veimaliwai kei ira na tani.

Sureta e dua se vica na lewe ni tabanalevu se itikotiko mera vakavulica vei ira na itabagone e dua na kila vakacakacaka maqosa se taledi era tauyavutaka saraga, me vaka na talitali, boroboro, matai, culacula, ceu kau, kei na so tale. O na via sureti ira beka na lewe ni tabanalevu se itikotiko qase mera vakaitavi. Me vakauqeta na veimaliwai veivolekati cake sara, sa rawa mo navuca me lesi e dua se rua na itabagone me cakacaka yadudua kei ira na qasenivuli, me salavata kei na ka e dautaleitaka. Sureta na itabagone me tauyavutaka e dua na ka me vakayagataka kina na kila vakacakacaka vou ka na vakalougatataka na nona bula e dua. Tuva e dua na itavi ka ra na wasea vata kina na itabagone na ka era sa tauyavutaka kei ira era a vakavulica vei ira nodra kila vakacakacaka.

Vulica mo wasea na kosipeli ena sala vovou, ka e marautaki.

Wasea vakailawalawa na itabagone (e rawa talega mera wasei vaka-kuoramu se kalasi se dua tale na sala). Solia na gauna ki na ilawalawa yadua me tauyavutaka vakai koya e dua na vidio e lima na miniti e wasei kina na itukutuku ni kosipeli. Lesia na itoko ni vidio oqo, me vakataka na itoko ni Muavata ni yabaki o ya, ulutaga mai na Me iSakisaki ni iTabagone, na ulutaga era vulica tiko na itabagone ena lotu, se dua tale. Ni ra sa vakacavara na itabagone na nodra vidio, me caka sara e dua na bogi ni sara yaloyalo mera wasea kina na vidio oqo ki na ilawalawa taucoko. Kera vinakata na itabagone, e rawa mera katona nodra vidio ena initaneti me wasei na kosipeli vei ira nodra ikuri ni itokani.

Tauyavutaka e dua na ka e kana vinaka ka rairai totoka.

Sureta e dua na dauvakasaqa me digia e dua na kakana se vica na isaqasaqa ni kakana e kana vinaka ka rairai totoka. Sureti koya talega me vakavulici ira na itabagone ena vakarautaki ni kakana oqori. Mera vakarautaka ka veikauyaka na itabagone na kakana oqori vei ira na lewe ni tabanalevu se vanua vakaitikotiko e gadreva tu na veiqaravi. Salamuria ena dua na mataveivosaki ni nodra qaravi na tani.

Yalodei ni vakaitavi ena matadra na icaba se dausarasara.

Wasea vakailawalawa na itabagone, ka solia ki na ilawalawa yadua e dua na taga sinai ena iyaya digitaki eso ni drama. Solia e dua na gauna ki na ilawalawa mera tuvana e dua na drama ni vakayagataka e dua na nodra iyaya ni drama. Mera qai vakayacora na nodra drama se katona, mera qai laki sarava vata kei na nodra icaba se tabanalevu se tabana. Navuca mo solia na icocovi ki na ilawalawa lasa duadua nona drama, vakayagataka vinaka nodra iyaya ni drama, bulabula duadua, kei na so tale.

Vulica na iwalewale ni danisi ka vakatorocaketaka na taledi.

Sureti ira na tamata mera mai vakavulici ira na itabagone ena mataqali danisi eso (oka kina na meke matau, vakavanua, ka makawa eso). Wasea ka veivosakitaka na wase “iVakatagi kei na Danisi” ena Me iSakisaki ni iTabagone me tiki ni itaviqaravi. Mera vakatovotovo kece ena danisi, ka rawa talega mo navuca e dua na danisi ni tabanalevu ka sureti kina na veimatavuvale.

Vakatorocaketaki ni taledi ka tubu vata ena duavata.

Sureti ira na itabagone mera tekivuna eso na ilawalawa mera tuva ka cakava eso na drama se ivakaraitaki lalai. Mera vola ga na itabagone na nodra vosa ni drama se cakava na nodra italanoa ni ivolanikalou. Mera cakacaka vata vaka-timi na itabagone mera tuva, vakamatautaka, ka cakava nodra drama ki na ilawalawa taucoko. Sa rawa mo veivuke talega ena kena iyaya, isulusulu, ivakaraitaki, kei na so tale. Veivosakitaka na vuna e solia kina na Tamada Vakalomalagi na taledi vei keda kei na cava e vinakata o Koya meda cakava kina.

Taracake na ivakarau dodonu ni veimaliwai vei ira na cauravou kei na goneyalewa ka taracake na yalonuidei.

Veivosakitaka ka vakaraitaka na ivakarau ni noda kerea e dua me da danisi, ivakarau dodonu ni danisi, itutu ni danisi, isulusulu kei na irairai, na ivakarau ni vakarokoroko kei na veidokai, kei na so tale. Railesuva na iwasewase ni “iVakatagi kei na Danisi” ena Me iSakisaki ni iTabagone, ka veivosakitaka na veika e vakavuvulitaki kina. Sureti ira na itabagone me ra vakatovotovotaka na veika era sa vulica.

Vukei ira na itabagone mera vulica ka marautaka na ivakatagi mai na veimataqali vanua.

Sureta e dua me vakavulici ira na itabagone ena ivakatagi mai na veimataqali vanua. Sa rawa mo vakaraitaka na veimataqali iyaya ni ivakatagi ka solia vei ira na itabagone mera vakatagitaka. Me veivosakitaki na vuna e bibi kina na ivakatagi ki na dua na vanua. Vakailawalawa, me wiliki na Vunau kei na Veiyalayalati 25:12.

Vukei ira na itabagone mera vakila na Yalotabu ka mai vakaduavatataki ena sere ni lotu tabu.

Tekivuna e dua na matasere ni itabagone ka vakatovotovotaka e vica na sere ni lotu se na sere vinaka tale eso. Cakacaka vata kei bisopi se peresitedi ni tabana ena vakarautaki ni dua na gauna mera vakaitavi kina na itabagone kivei ira tale eso, me vakataka ena soqoni ni Lotu se sokalou.

Vulici ira na qase e liu ena vulici na danisi kei na sereivakatagi vakatekivu ni ra se bera ni sucu na itabagone.

Vukei ira na itabagone mera digitaka e dua na gauna makawa (me vakataka, ena 1920, 40, se 70) era taleitaka. Mera qai vulica na kuoramu, kalasi, se ilawalawa yadua e dua na sere, se danisi mai na gauna o ya ka vakatasuasuataka ki na tabanalevu se tabana se ki na dua na ilawalawa qase ni itikotiko raraba. Sa rawa mo navuca na kena isulusulu, sasauni, kei na iyaya ni gauna o ya. Veivosakitaka ni rawa ni veisau na iwalewale kei na gagadre kei vuravura, ia na ivakatagedegede ni Turaga ena vakayaco-ka tikoga. Sureti ira na itabagone mera wasea ni rawa mera danisi ena marau ena vuravura nikua ka ra maroroya tikoga na ivakatagedegede ni Turaga (raica na Me iSakisaki ni iTabagone, “iVakatagi kei na Danisi”).

Vulica na dautalanoa ena tabaki ni vidio.

Sureta e dua na tamata me vakatavulici ira na itabagone ena iwalewale ni vakayagataki gacagaca ni vidio me tuvalaki kina e dua na vidio e tukuna e dua na italanoa. Solia vei ira na ilawalawa ni tabagone e vica na macawa mera tuvalaka e dua na vidio lekaleka ena vakayagataki ni dua na italanoa mai na New Era, na ivolanikalou, itukutuku makawa ni Lotu, se na nodra dui bula. Sa rawa ni ra sarava eso na iTukutuku ni Momani me baleti ira na iTabagone ena vakasama eso (raica na lds.org/youth/video). Me ra lesu vata tale mai mera sarava ka rekitaka na vidio eso. Vakasamataka mo talevalesu na “Veivakamarautaki kei na iTukutuku Raraba” mai na Me iSakisaki ni iTabagone me tiki ni taviqaravi oqo.

Mo dau vakavinavinakataka na veivakaraitaki ni ivakatagi.

Meda laki tiko vata ena dua na soqoni ni ivakatagi veilaveti, ke rawa ena dua na vakatovotovo se vakatasuasua ni dua na itabagone ena tabanalevu. Me veivosakitaki na yaga ni ivakatagi, e vinaka ka savasava.

Taleitaka rawa na veika ni veivakamarautaki kei na ka vakavanua e sotavi talega.

Lako ki na dua na drama, danisi vakatovotovo, se so tale na soqo vakavanua. Oqo e rawa ni dua na vakatasuasua e vakaitavi kina e dua na itabagone se dua tale na lewe ni tabanalevu. Kevaka e rawa, taura mai na veivakadonui mera sarasara na itabagone ena daku ni vatavata ni veivakamarautaki se raica eso na cakacaka tuvani matau emuri ka vulica e levu na ka me baleta na sasaga e vakayacori ena tutaki ni dua na veivakamarautaki. Sa rawa ni o saga mo vosa vua e dua na dauvakatasuasua me baleta na ka e sotava ni cakacaka voli ena tabana ni veivakamarautaki. Veivosakitaka na vosa vakatautauvata me baleta na taledi kei na cava e gadreva na Turaga meda cakava mai na isolisoli eso e sa soli vei keda (raica na Maciu 25:14–29).

Marautaki na nodra taledi na itabagone kei ira na lewenilotu.

Tuvanaka e dua na vakaraitaki ni taledi ni tabanalevu se itabagone. Mera na vakaitavi kina na itabagone ena kena tuvanaki ka vakayacori na soqo oqo. Me okati kina na veimataqali taledi, ka sureti ira na tamata mera mai dui vakaitavi kina se vakailawalawa. Me veivosakitaki na vuna sa solia tu kina vei keda na Tamada Vakalomalagi na taledi eso kei na cava e gadreva o Koya meda vakayacora kina.

Vulica na iwalewale ni liutaki vakatagi.

Ena nomu vakayagataka na ivurevure ena daku ni serenilotu, vulica ka vakamatautaka na liutaki vakatagi ena kena gauna gadrevi. Sureti ira na itabagone mera vakamatautaka na liutaki sere ni lotu ena soqoni ni Sigatabu e tarava, sokalou, semineri, lotu vakamatavuvale, kei na so tale.

Vakavulici vakalevu na kila-ka ni veitaba.

Sureta e dua me mai vakavulici ira na itabagone ena ivakavuvuli taumada ni veitaba, me vakataka na ivukivuki ni itaba, cina, kei na so tale. Solia ki na itabagone yadua se timi ni itabagone e dua na itaba livaliva (kerei ira mera dui kauta mai na nodra, ke rawa). Lesia vei ira na ulutaga eso, ka talai ira mera laki tabaka mai na veika me baleta na nodra ulutaga. Ni ra sa lesu mai, vakadewataka na veika sa tabaki ki na dua na komupiuta mera na raica taucoko na itabagone. Sa rawa mo solia na icocovi ena veimataqali iwasewase eso. (Kevaka e sega ni tiko na itaba livaliva, sa rawa mo vakayagataka na itaba vakafilimu ka vakaraitaka na itaba ena dua na itaviqaravi ni Muavata ni sa sava oti na filimu.) Sa rawa me semati na itaviqaravi oqo me vakatabakiduataki kina e dua na itoko ni kosipeli ena itaba ni itabagone.

Vakamatautaki iko ena veimataqali yaya ni vakatagi, ka kunea vakacaca e dua na taledi vunitaki.

Kauta mai e dua se levu cake na iyaya ni vakatagi ka kerea e dua me vakatavulici ira na itabagone ena itekivu ni vakayagataki ni yaya. Solia vei ira na itabagone na gauna mera vakatovotovo ka vakatagi vakaiira. Wilika ka veivosakitaka vakailawalawa na Vunau kei na Veiyalayalati 25:12.