Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko e Fekuki mo e Mamahí mo e Loto-Taʻotaʻomiá: ʻE Fuesia ʻe Sīsū Kalaisi ʻEtau Loto-Mamahí mo e Mamahí

“Ko e Fekuki mo e Mamahí mo e Loto-Taʻotaʻomiá: ʻE Fuesia ʻe Sīsū Kalaisi ʻEtau Loto-Mamahí mo e Mamahí,” Fuakava Motuʻá – Tohi Lēsoni ʻa e Faiako Seminelí (2026)

“Ko e Fekuki mo e Mamahí mo e Loto-Taʻotaʻomiá: ʻE Fuesia ʻe Sīsū Kalaisi ʻEtau Loto-Mamahí mo e Mamahí,” Fuakava Motuʻá – Tohi Lēsoni ʻa e Faiako Seminelí

Moʻui Lelei Fakatuʻasinó mo Fakaelotó: Lēsoni 185

Ko e Fekuki mo e Mamahí mo e Loto-Taʻotaʻomiá

ʻE Fuesia ʻe Sīsū Kalaisi ʻEtau Loto-Mamahí mo e Mamahí

Artwork entitled "Healer" by Lightweave. Jesus Christ stands with his arms outstretched and comforting and elderly woman.

Naʻe ʻafioʻi ʻe he Tamai Hēvaní ʻe ʻomi ʻe he moʻui fakamatelié ni ha ngaahi momeniti ʻo e mamahí, loto-foʻí, siva e ʻamanakí, mo e loto-taʻotaʻomiá. Naʻá Ne fekauʻi mai Hono ʻAló ke aʻusia ʻa e meʻa kotoa pē te tau faingataʻaʻia aí, mo ha talaʻofa ʻe lava ke tokoniʻi kitautolu ʻe Hono mālohí ke tau maʻu ha fiemālie (vakai, Mātiu 11:28–30). ʻE lava ke tokoni ʻa e lēsoni ko ʻení ke mahino ki he kau akó ʻa e founga ʻe tokoniʻi ai kinautolu ʻe he Tamai Hēvaní mo Sīsū Kalaisi ke nau kātekina ʻa e ngaahi ongo ʻo e mamahí mo e loto-taʻotaʻomiá.

Teuteu ʻa e tokotaha akó: Fakaafeʻi e kau akó ke kumi ha potufolofola pe lea mei ha taki ʻo e Siasí ʻa ia ʻe lava ʻo tokoni ki ha taha ke tokanga taha ki he Tamai Hēvaní mo Sīsū Kalaisi ʻi he taimi ʻokú ne ongoʻi loto-mamahi pe loto-taʻotaʻomia aí. Te nau lava ʻo teuteu ke vahevahe ʻenau potufolofolá mo e kalasí.

Ngaahi ʻEkitivitī Ako ʻOku Ala Fakahokó

Ko e ngaahi kavenga fakamafasia ʻo ʻetau moʻuí

Fakatokangaʻi ange: ʻOku ʻikai fiemaʻu ke ke hoko ko ha mataotao ʻi he moʻui lelei fakaeʻatamaí ke akoʻi ʻa e lēsoni ko ʻení. Lotua e fakahinohino ʻa e Tamai Hēvaní, muimui ki he naunau fakalēsoní, pea falala ki he Laumālie Māʻoniʻoní. Kapau ʻe vahevahe ʻe he kau akó ʻa e ngaahi faingataʻa fakataautaha ʻoku nau fehangahangai mo iá pe fai ha ngaahi fehuʻi ʻoku ʻikai ke ke lava ʻo tali, fakapapauʻi ange ʻoku ʻofa ʻa e Tamai Hēvaní mo Sīsū Kalaisi ʻiate kinautolu. Poupouʻi kinautolu ke fekumi ki ha faleʻi lahi ange mei he mātuʻá, kau taki ʻo e Siasí, kau faifaleʻi ʻi he akó, pe kau mataotao ʻi he moʻui lelei fakaelotó.

Fakakaukau ke kamata e kalasí ʻaki hano fakaʻaliʻali ha fakatātā ʻo ha kau fononga lalo lōloa ʻoku nau fononga ʻi ha hala he moʻungá. Fakaafeʻi e kau akó ke aleaʻi e founga ʻe lava ke tatau ai ʻeni mo ʻetau fononga ʻi he māmaní. Kole ange leva ki he kau akó ke fakakaukauloto ki ha toko taha ʻo e kau fononga laló naʻe pau ke ne fafa ha kato āfei mamafa ʻi he kotoa ʻo ʻenau fonongá.

ʻE fakalahi fēfē ʻe he kato āfei mamafá ʻa e faingataʻa ʻo e fonongá? ʻE hoko fēfē nai ia ko ha tāpuakí?

Hili iá te ke lava ʻo kole ki he kau akó ke vahevahe ha niʻihi ʻo e ngaahi “kato āfei” fakaeloto ʻoku ala feʻao holo mo e toʻu tupú he ʻahó ni. Hili e vahevahe ʻa e kau akó, fakamatalaʻi ange ʻe nofotaha ʻa e lēsoni ko ʻení ʻi he ngaahi ongo ʻo e mamahi pe loto-taʻotaʻomia ʻoku tau faʻa fuesia he taimi ʻe niʻihi ʻi he moʻuí.

Naʻa mo e ngaahi ongo faingataʻa hangē ko e mamahí mo e loto-taʻotaʻomiá ko ha konga angamaheni pē ia ʻo ʻetau fononga fakamatelié. Hangē ko ha kato āfei mamafá, ʻe lava ʻe he ngaahi ongo faingataʻá ʻo ʻai ke ngali fakafoʻi ʻetau fonongá, ka ʻe lava foki ke tokoni e ngaahi ongo ko ʻení ke tau ongoʻingofua mo manavaʻofa ki he niʻihi kehe ʻoku faingataʻaʻiá.

Hiki ʻi hoʻo tohinoa akó ʻa e founga ʻoku uesia ai hoʻo moʻuí he taimí ni pe ko ha taimi ʻi he kuohilí, ʻe he ngaahi ongo ʻo e loto-mamahí mo e loto-taʻotaʻomiá.

ʻOku ʻafioʻi moʻoni ʻe Sīsū Kalaisi ʻa e ongo ʻoku tau maʻú

Fakamanatu ki he kau akó kuo akoʻi ʻe he kau palōfita ʻo e kuonga muʻá mo onopōní ʻe lava ke tokoniʻi kitautolu ʻe he Fakamoʻuí ke tau kātekina ʻa e ngaahi ongo faingataʻa kotoa pē.

Lau ʻa e ʻĪsaia 53:3–5 mo e ʻAlamā 7:11–12, ʻo kumi e ngaahi moʻoni fekauʻaki mo e mālohi ʻo e Fakamoʻuí ke tokoniʻi kitautolu ʻi he taimi ʻoku tau loto-mamahi, loto-foʻi, pe loto-taʻotaʻomia aí.

Ko e hā e ngaahi foʻi lea pe kupuʻi lea ʻoku hā mahuʻinga kiate koé?
ʻE tokoni fēfē ʻeni ki ha taha ʻoku fāifeinga ke ne kātekina ʻa e mafatukituki ʻo e ngaahi mafasia fakaeloto ko ʻení?

Naʻe pehē ʻe Palesiteni Lāsolo M. Nalesoni ʻi heʻene ʻiloʻi ʻe faingataʻaʻia e fānau ʻa e Tamai Hēvaní ʻi he moʻuí ni:

ʻOku ou kōlenga atu ke mou haʻu [kia Sīsū Kalaisi] ke Ne lava ʻo fakamoʻui ʻa kimoutolu! … Te Ne fakamoʻui ʻa kimoutolu mei he loto-mamahí mo e ilifiá. Te Ne fakamoʻui ʻa kimoutolu mei he ngaahi kafo ʻo e māmani ko ʻení.

Ko e hā pē haʻamou ngaahi fehuʻi pe palopalema, ʻoku maʻu maʻu pē ʻa e talí ʻi he moʻui mo e ngaahi akonaki ʻa Sīsū Kalaisí. Ako lahi ange fekauʻaki mo ʻEne Fakaleleí, ʻEne ʻofá, ʻEne ʻaloʻofá, ʻEne tokāteliné, mo ʻEne ongoongolelei ʻo e faifakamoʻuí mo e fakalakalaká kuo fakafoki maí. Tafoki kiate Ia! Muimui ʻiate Ia! (“Ko Sīsū Kalaisi Maʻu Pē ʻa e Talí,” Liahona, Mē 2023, 127)

Te ke fakamatalaʻi fakanounou fēfē ʻa e meʻa naʻá ke ako meia ʻĪsaia, ʻAlamā, mo Palesiteni Nalesoni fekauʻaki mo e fefaʻuhi mo e ngaahi mafasia hangē ko e mamahí mo e loto-mamahí?

ʻI he ngaahi meʻa kehe ʻe ala vahevahe ʻe he kau akó, tokoniʻi kinautolu ke nau ʻiloʻi ha foʻi moʻoni hangē ko ʻení: ʻI heʻetau haʻu kiate Iá, ʻe tokoniʻi kitautolu ʻe he Fakamoʻuí ke tau fuesia ʻa e ngaahi kavenga mafasia ʻo e mamahí mo e loto-mamahí.

Mahalo ʻe ʻaonga ki he kau akó ʻa e ngaahi vitiō ʻo e Haʻu kia Kalaisí ʻi he Facebook “Because Jesus Christ died …” (1:06) pe “Rise,” (1:42) mei he ComeUntoChrist/facebook.com.
ʻOku ʻuhinga ki he hā ke “haʻu kiate Ia,” “tafoki kiate Ia,” pea “muimui ʻiate Ia” ki ha taha ʻoku fekumi ki he tokoni ʻa e Fakamoʻuí ʻi he loto-mamahí, loto-foʻí, pe loto-taʻotaʻomiá?
ʻOkú ke pehē ʻe tokoni fēfē ʻa e mahino ʻo e foʻi moʻoni ko ʻení ki ha taha ʻoku fefaʻuhi mo e ngaahi ongo ko ʻení?

Fakaafeʻi ʻa e Laumālie Māʻoniʻoní ke tokoni atu ke ke ʻiloʻi ʻa e ngaahi founga ʻoku ngāue fakaetauhi fakataautaha atu ai ʻa e Fakamoʻuí kiate koe ʻi hoʻo fehangahangai mo e mamahí, loto-mamahí, pe ha toe faʻahinga mafasia fakaeloto pē.

Te tau lava ʻo kātaki, ʻi he tokoni ʻa e Fakamoʻuí

Elijah sitting among rocks with a ray of light shining on him.

ʻE lava ke tokoniʻi kitautolu ʻe he talanoa ʻo e palōfita ko ʻIlaisiaá ke tau ʻiloʻi e ngaahi founga ʻoku tokoniʻi ai kitautolu ʻe he Fakamoʻuí ke tau kātakiʻi e ngaahi faingataʻa fakaelotó.

Fakakaukau ke fakaʻaliʻali ha fakatātā ʻo ʻIlaisiā toko taha ʻi he veʻe moʻungá. ʻI he fakafanongo ʻa e kau akó ki he ngaahi fakaikiiki ko ʻeni mei he talanoá, fakaafeʻi kinautolu ke fakakaukauloto ki he ongo ne nau mei maʻu ʻi ha tūkunga tatau.

Hili hono fakahalaiaʻi ʻe ʻIlaisiā ʻa e kau palōfita loi ʻa Pealí ʻi he Moʻunga. Kāmelí (vakai, 1 Ngaahi Tuʻi 18), naʻe feinga ʻa e kuini faiangahala ko Sisipelí ke tāmateʻi ia. Naʻe fakatokanga ʻa e ʻEikí kia ʻIlaisiā, ʻa ia naʻe hola toko taha ki he feituʻu maomaonganoá (vakai, 1 Ngaahi Tuʻi 19:1–3).

Ko e hā ha ngaahi ongo naʻá ke mei maʻu ʻi he tūkunga ko ʻení?

Lau ʻa e 1 Ngaahi Tuʻi 19:4, ʻo kumi e ongo naʻe maʻu ʻe ʻIlaisiaá.

Ko e hā ha ngaahi founga kehe kuó ke mamata ai ki hono tokoniʻi koe, pe ko ha taha ʻokú ke ʻilo, ʻe he Tamai Hēvaní mo Sīsū Kalaisi ke ke matuʻuaki e ngaahi mafasia fakaelotó?

Fakakaukau ke fakaafeʻi e kau akó ke vahevahe ha potufolofola, himi, pe ʻīmisi ʻoku nau manako ai kuó ne tokoniʻi kinautolu ke nau falala ki he Tamai Hēvaní mo Sīsū Kalaisi ʻi he taimi ʻoku nau loto-mamahi pe loto-taʻotaʻomia aí.

ʻE ala fakatupu ʻe he 1 Ngaahi Tuʻi 19:4 ha ngaahi fehuʻi fekauʻaki mo e fakalaveaʻi kitá pe taonakitá. ʻOku totonu maʻu pē ke fai ha tokanga fakamātoato ki he ngaahi kaveinga ko ʻení. Fakamanatu ki he kau akó ʻoku nau ngāue ʻi he tui kia Sīsū Kalaisi ʻi he taimi ʻoku nau tala ai ki ha taha ʻa e ongo ʻoku nau maʻú. ʻE lava ke maʻu ha ngaahi maʻuʻanga tokoni lahi ange fekauʻaki mo e loto-taʻotaʻomiá mo e fakaʻehiʻehi mei he taonakitá ʻi he Gospel Library pea ʻi he Ngaahi ʻEkitivitī Fakalahi ki he Akó ʻi he tatau ʻo e tohi lēsoni ko ʻení ʻi he ʻinitanetí.

Vahevahe ʻa e meʻa kuó ke ongoʻí

Fakatokangaʻi ange: Tokoni ke mahino ki he kau akó, neongo e angaʻofa, ʻofa, mo e tokanga maʻu pē ʻa e ʻEikí, ka ʻoku kei faʻa hoko mai pē ʻa e ngaahi faingataʻa fakaelotó. ʻE lava ke fakafeʻātungiaʻi ʻe he loto-taʻotaʻomiá he taimi ʻe niʻihi ʻa e founga ʻetau malava ke ongoʻi e ʻofa ʻa e Fakamoʻuí pe ʻiloʻi e tokoni ʻa e Laumālie Māʻoniʻoní.

ʻI hoʻo tohinoa akó, fili ha meʻa ‘e taha pe lahi ange mei heni ke fakakakato:

Hiki ha meʻa naʻá ke ako pe ongoʻi he ʻahó ni ʻe lava ʻo tokoni atu ke ke falala ki he Tamai Hēvaní mo Sīsū Kalaisi ʻi he taimi ʻokú ke ongoʻi loto-mamahi pe loto-taʻotaʻomia aí.
Hiki ha potufolofola ʻe lava ʻo tokoni atu ʻi he taimi ʻokú ke ongoʻi loto-mamahi pe loto-taʻotaʻomia aí (hangē ko e ʻĪsaia 53:3–5; Saame 34:18; pe ʻAlamā 7:11–12). ʻE tokoniʻi fēfē koe ʻe he ngaahi foʻi lea pe kupuʻi lea mei he potufolofola ko ʻení ke ke ongoʻi ofi ai ki he Tamai Hēvaní mo Sīsū Kalaisi?
Kapau naʻe ʻi ai haʻo kaungāmeʻa naʻe loto-mamahi pe loto-taʻotaʻomia, ko e hā ha meʻa te ke loto ke mahino ki he tokotahá ni fekauʻaki mo e Tamai Hēvaní, Sīsū Kalaisi, pea mo e meʻa naʻá ke ako he ʻaho ní? Hiki ʻa e meʻa te ke vahevahé.

Ngaahi Maʻuʻanga Tokoni Kehé

ʻOku ʻafioʻi nai ʻe he Fakamoʻuí ʻa e ongo ʻoku ou maʻú?

Naʻe fakamanatu mai ʻe Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá:

Mahalo ʻoku faingataʻa ke ke tui ʻe fie tokoniʻi koe ʻe Sīsū ko ha toko taha pē ʻi he lauimiliona ʻoku mou toʻu tataú. Kapau ʻe faifai angé peá ke fakakaukau ʻoku ʻi ai ha ngaahi ngāue lelei ange ke Ne fakahoko kae ʻikai fakamālohia koe ʻi he taimi ʻokú ke faingataʻaʻia aí, fakakaukau kiate Ia ʻi he ngoue [ko Ketisemaní], fakakaukau kiate Ia ʻi he funga kolosí. “[Naʻá Ne mamahi, naʻá Ne tautaʻa pea pekia]” maʻau koeʻuhí he naʻá Ne ʻafioʻi ʻokú ke mahuʻinga. ʻOkú Ne kei ʻafioʻi pē ia. ʻOkú Ne mātuʻaki tokanga, hōifua, pea mo malava ke tokoniʻi koe—ʻi he taimí ni pea taʻengata. Naʻá Ne foaki ʻEne moʻuí koeʻuhí ke Ne lava ʻo fakamālohia koe ʻi hoʻo tali ʻEne fakaafe liliu moʻui: “Haʻu kiate aú” (Mātiu 11:28). (“Maʻu Ho Mālohingá ʻia Sīsū Kalaisi,” Ki Hono Fakamālohia ʻo e Toʻu Tupú, Māʻasi 2024, 5)

Naʻe pehē ʻe ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻE lava ʻe he Fakamoʻuí, ʻo lelei ange ʻi ha toe taha, ke fakamoʻui ʻa e haʻahaʻa ʻo e ngaahi tūkunga faingataʻa ʻo e moʻui fakamatelié. ʻI ha ngaahi meʻa ʻe niʻihi, mahalo he ʻikai fakamoʻui fakatuʻasino kitautolu ʻi he taimi pē ko iá mei he mamahí pe mahamahakí, ka ʻe lava ke fakamoʻui fakalaumālie kitautolu ʻi hano foaki mai ha ivi, mahino, mo e kātaki ke tau fuesia ʻa e kavenga ʻoku hili kiate kitautolú. Ko ia, ʻi he tafoki hotau lotó ki hotau Fakamoʻuí, te Ne fakahoko ha ngaahi meʻa fakaofo ʻi heʻetau moʻuí. (“Ko hono Kātekina ʻo e Ngaahi Faingataʻá” [fakataha lotu fakaemāmani lahi maʻá e kakai lalahi kei talavoú, 18 Fēpueli 2024], broadcasts.ChurchofJesusChrist.org)

Ko e fē te u lava ʻo ako lahi ange ai fekauʻaki mo e fakaʻehiʻehi mei he mamahí, loto-taʻotaʻomiá, mo e taonakitá?

“Fehangahangai mo e Loto-mafasiá”
“Mourn With Those That Mourn: Hope Works” (taimi 2:20 ki he 5:55)

11:48
“Ko e Maluʻi mei he Taonakitá mo e Ngāue Fakaetauhí” ʻi he ChurchofJesusChrist.org

Ngaahi ʻEkitivitī Fakalahi ki he Akó

Naʻe aʻusia ʻe he Fakamoʻuí ʻa e mamahí

Fakakaukau ke kamata e kalasí ʻaki hano fakaʻaliʻali e fehuʻi ko ʻení ʻi he palakipoé, “Ko e fē ha taimi naʻá ke tangi ai, pea ko e hā hono ʻuhingá?” ʻOange ha kiʻi taimi ki he kau akó ke nau fakalaulauloto ai ki he aʻusia ʻoku haʻu ki heʻenau fakakaukaú. Fakamanatu ki he kalasí ʻoku lahi ha ngaahi sīpinga ʻi he folofolá ʻo e tutulu ʻa e Fakamoʻuí ʻi he kakaí. Hili iá pea fakaʻaliʻali ʻa e ngaahi ʻata ko ʻení.

Fakaafeʻi e kau akó ke fili ha taha ʻo e ngaahi potufolofola ko ʻení, ʻo kumi e meʻa ʻoku tau ako fekauʻaki mo e Fakamoʻuí. Mahalo ʻe tokoni ke lau ʻa e ʻuluʻi fakamatala ʻo e vahé ke mahino ʻa e puipuituʻa ʻo e aʻusia ʻa e Fakamoʻuí.

Fakaafeʻi e kau akó ke nau vahevahe mo ha hoa pe kulupu tokosiʻi ʻa e meʻa ne nau akó. Kapau ʻokú ke pehē ʻe ʻaonga ki he kau akó ke nau ʻiloʻi ʻa e taimi ʻoku nau loto-mamahi lahi ai pe ko ha taha ʻoku nau ʻilo, pea fiemaʻu ha tokoni lahi ange, te ke lava ʻo vahevahe ʻa e meʻa ko ʻení.

ʻI he Taimi ʻOku Mahulu Hake Ai ʻi he Loto-Mamahí

Fakahaaʻi ʻa e manavaʻofá kiate kinautolu ʻoku mamahí

Mahalo ʻe ʻaonga ki he kau akó hano aleaʻi ha niʻihi ʻo e ngaahi founga te tau lava ai ʻo ngāue fakaetauhi ki ha taha ʻoku faingataʻaʻia. Vahevahe ange ko e muimui ko ia ki he sīpinga ʻa e Fakamoʻuí, ʻoku tau ʻuluaki fakahaaʻi mo fakamahuʻingaʻi ai ʻa e ʻofá.

Fakaafeʻi e kau akó ke lau ʻa e Siope 2:11–13, ʻo kumi e meʻa ʻokú ne akoʻi mai fekauʻaki mo hono tokangaʻi ʻo kinautolu ʻoku loto-mamahi pe faingataʻaʻiá.

Fakakaukau ke vahevahe ia koeʻuhí he ʻoku ʻikai ke tau ʻiloʻi pau ʻa e ongo ʻoku maʻu ʻe he tokotaha ko iá (naʻa mo e taimi kuo tau foua ai ha meʻa tatau), te tau lava ʻo vahevahe ha ngaahi fakamatala ʻokú ne fakahaaʻi ʻa e ʻofá mo e manavaʻofá (kaungā-ongoʻi). Te ke lava ʻo ʻai ke akoako fakahoko ʻe he kau akó ha tali ki ha taha ʻoku faingataʻaʻia.

ʻOku tokoni ʻa e ngaahi fakamatala hangē ko ʻení ke fakahaaʻi ʻa e kaungā-ongoʻí:

“ʻOku ʻikai ke u ʻilo ʻa e meʻa ke lea ʻakí ka ʻoku ou loto ke ke ʻilo ʻoku ʻofaʻi koe ʻe he tokolahi, kau ai au.”
“‘Oua te ke talanoa kapau ʻoku ʻikai ke ke loto ki ai, ka ʻoku ou ʻi hení ke fakafanongo kapau ʻokú ke [fie talanoa].”
“ʻOku sai pē ka kehekehe e ngaahi ongó mei he ʻaho pe momeniti ʻe tahá ki he ʻaho pe momeniti hokó.”
“ʻOku ʻikai ha founga tonu pē ʻe taha ki he anga hoʻo ongó. Tuku pē ke ke a‘usia ʻa e ngaahi ongó ‘i heʻenau hoko maí.”
“ʻOku ou ʻofa ʻiate koe, pea ʻoku ou lotua koe.”

Vahevahe mo e kau akó, neongo naʻe tali lelei ʻe he ngaahi kaungāmeʻa ʻo Siopé ʻi he kamataʻangá, ka naʻe ʻikai ke nau fuʻu tokoni kimui ange ʻi he hokohoko atu ʻene faingataʻaʻiá (vakai, Siope 4).

Tokoni ke mahino ki he kau akó mahalo ʻe ʻi ai ha ngaahi fakamatala ʻoku fakataumuʻa lelei he ʻikai ala tokoni ia ki ha taha ʻoku loto-mamahi. Te ke lava ʻo toe vakaiʻi ha ngaahi fakamatala ʻaonga hangē ko e:

“Ko e konga pē ia ʻo e palani ʻa e ʻOtuá.”
“Koloá pē …” (“Koloa pē naʻe ʻikai ke nau faingataʻaʻia.”)
“ʻOku totonu ke ke …” pe “Kuo pau ke ke …”
“Naʻá ku aʻusia e meʻa tatau.”
“ʻE toe lelei ange he fakalau ʻa e taimí.”

Ki ha tokoni lahi ange ki he ngāue fakaetauhi kiate kinautolu ʻoku mamahí, vakai, “Loto Mamahí mo e Molé” ʻi he Ngaahi Maʻuʻanga Tokoni Faifaleʻí ʻi he ChurchofJesusChrist.org.