Fuakava Motuʻá – Tohi Lēsoni ʻa e Faiako Seminelí

Kanotohi
Peesi Talamuʻakí
Talateu ki he Tohi Lēsoni ʻa e Faiakó
Ngaahi Lēsoni ʻo e Fuakava Motuʻá
- Talitali Lelei Koe ki he Fuakava Motuʻá
- Mōsese 1; ʻĒpalahame 3
- Sēnesi 1–2; Mōsese 2–3; ʻĒpalahame 4–5
- Sēnesi 3–4; Mōsese 4–5
- Sēnesi 5; Mōsese 6
- Mōsese 7
- Sēnesi 6–11; Mōsese 8
- Sēnesi 12–17; ʻĒpalahame 1–2
- Sēnesi 18–23
- Sēnesi 24–33
- Sēnesi 37–41
- Sēnesi 42–50
- ʻEkesōtosi 1–6
- Toetuʻú
- ʻEkesōtosi 7–13
- ʻEkesōtosi 14–18
- ʻEkesōtosi 19–20; 24; 31–34
- ʻEkesōtosi 35–40; Levitiko 1; 4; 16; 19
- Nōmipa 11–14; 20–24; 27
- Teutalōnome 6–8; 15; 18; 29–30; 34
- Sōsiua 1–8; 23–24
- Fakamaau 2–4; 6–8; 13–16
- Lute; 1 Samuela 1–7
- 1 Samuela 8–10; 13; 15–16
- 1 Samuela 17–18; 24–26; 2 Samuela 5–7
- 2 Samuela 11–12; 1 Ngaahi Tuʻi 3; 6–9; 11
- 1 Ngaahi Tuʻi 12–13; 17–22
- 2 Ngaahi Tuʻi 2–7
- 2 Ngaahi Tuʻi 16–25
- 2 Fakamatala Meʻa Hokohoko 14–20, 26, 30
- ʻĒsela 1, 3–7; Nehemaia 2, 4–6, 8
- ʻĒseta
- Siope 1–3; 12–14; 19; 21–24; 38–40; 42
- Saame 1–2; 8; 19–33; 40; 46
- Saame 49–51; 61–66; 69–72; 77–78; 85–86
- Saame 102–103; 110; 116–119; 127–128; 135–139; 146–150
- Lea Fakatātā 1–4; 15–16; 22; 31; Tangata Malanga 1–3; 11–12
- ʻĪsaia 1–12
- ʻĪsaia 13–14; 22; 24–30; 35
- ʻĪsaia 40–49
- ʻĪsaia 50–57
- ʻĪsaia 58–66
- Selemaia 1–3, 7, 16–18, 20
- Selemaia 31–33; 36–38; Tangilaulau ʻa Selemaia 1, 3
- ʻIsikieli 1–3; 33–34; 36–37; 47
- Taniela 1–7
- Hōsea; Soeli
- ʻĀmosi; ʻOpataia; Siona
- Maika; Nēhumi; Hapakuki, Sefanaia
- Hakeai 1–2; Sakalaia 1–4, 7–14
- Malakai
Ngaahi Lēsoni Teuteu ki he Moʻuí
- Fakataukei Fakatokāteliné: Ko Hono Kumi ʻa e Ngaahi Tali ki Heʻeku Ngaahi Fehuʻí
- Ngaahi Taukei Ako Folofolá
- Tohi Fakahinohino Ki Hono Fakamālohia ʻo e Toʻu Tupú
- Ko Hono Tanumaki ʻo e Moʻui Fakafalala Pē Kiate Kitá
- Tuʻunga Moʻui Lelei Fakatuʻasinó mo Fakaelotó
- Ko e Teuteu ki he Ako mo e Ngāue Maʻuʻanga Moʻui ʻi he Kahaʻú
- Lavameʻa ʻi he Akó
- Teuteu ki he Ngāue Fakafaifekaú
- Teuteu ki he Temipalé
- Ngaahi Akonaki ʻa e Kau Taki ʻo e Siasí
Fakamatala Fakalahí

Ko Hono Fakatupulaki ʻo e Ngaahi Tōʻonga Moʻui Leleí: ʻE Lava ke Tokoniʻi Kitautolu ʻe Sīsū Kalaisi ke Liliu ʻEtau Tōʻonga Moʻuí

“Ko Hono Fakatupulaki ʻo e Ngaahi Tōʻonga Moʻui Leleí: ʻE Lava ke Tokoniʻi Kitautolu ʻe Sīsū Kalaisi ke Liliu ʻEtau Tōʻonga Moʻuí,” Fuakava Motuʻá – Tohi Lēsoni ʻa e Faiako Seminelí (2026)

Moʻui Lelei Fakatuʻasinó mo Fakaelotó: Lēsoni 187

Ko Hono Fakatupulaki ʻo e Ngaahi Tōʻonga Moʻui Leleí

ʻE Lava ke Tokoniʻi Kitautolu ʻe Sīsū Kalaisi ke Liliu ʻEtau Tōʻonga Moʻuí

ʻOku hoko ʻa e ngaahi angafai ʻoku tau toutou fakahoko ʻi he fakalau ʻa e taimí ko ha ngaahi tōʻonga moʻui. ʻE lava ke tokoniʻi kitautolu ʻe ha ngaahi tōʻonga moʻui ʻe niʻihi ke tau muimui lelei ange ki he Fakamoʻuí. Mahalo ko e ngaahi tōʻonga moʻui kehé ko ha ngaahi founga ʻikai lelei ia ʻo e fehangahangai mo e ngaahi ongo faingataʻá pea ʻe lava ke iku ia ki heʻetau ongoʻi mamaʻo mei he Tamai Hēvaní mo Sīsū Kalaisi. ʻOku tokoni hono fokotuʻu ha tōʻonga moʻui ʻoku leleí ke tau ongoʻi ofi ai pea hoko ʻo hangē ange ko Kinauá. ʻE lava ke tokoni ʻa e lēsoni ko ʻení ki he kau akó ke nau fekumi ki ha tokoni mei he Tamai Hēvaní mo Sīsū Kalaisi ke fakatupulaki ha ngaahi tōʻonga moʻui ʻoku leleí.

Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi meʻa ʻoku nau fai ʻi he ʻaho kotoa pē kuo hoko ko ha ngaahi tōʻonga moʻui. Te nau lava foki ʻo fakakaukau ki he founga ʻoku hanga ai ʻe he ngaahi tōʻonga moʻui ko ʻení, lelei mo kovi fakatouʻosi, ʻo liliu ʻenau fakalakalaka fakalaumālié.

Teuteu ʻa e tokotaha akó: Fakaafeʻi e kau akó ke fakakaukau ki he ngaahi meʻa ʻoku nau fakahoko he ʻaho kotoa kuo hoko ia ko ha ngaahi tōʻonga moʻuí. Te nau lava foki ʻo fakakaukau ki he founga ʻoku uesia pe faitokonia ai ʻenau fakalakalaka fakalaumālié ʻe he ngaahi tōʻonga moʻui lelei mo kovi fakatouʻosi ko ʻení.

Ngaahi ʻEkitivitī Ako ʻOku Ala Fakahokó

ʻOku hangē ʻa e tōʻonga moʻuí ko ha ngoué

Te ke lava ʻo kamata e kalasí ʻaki hano fakafehoanaki hono fokotuʻu ha tōʻonga moʻui leleí ki hono tō ha ngoué. Ke fai ʻení, fakakaukau ke fakaʻaliʻali ha fakatātā ʻo ha vao pea mo ha ʻīmisi ʻo ha ngaahi matalaʻiʻakau pe ʻakau ʻi ha ngoue.

Fakakaukauloto ʻoku fie ʻilo ha kaungāmeʻa ki he meʻa ʻe fiemaʻu ke ne fai ke liliu ai ha konga kelekele kuo ʻufiʻufi ʻe he vaó ki ha ngoue.

Ko e hā te ke faleʻi kinautolu ke nau faí?

Mahalo ʻe talaatu ʻe he kau akó ha ngaahi meʻa hangē ko hono toʻo ʻo e vaó, teuteuʻi ʻo e kelekelé, tō ʻa e tengaʻi ʻakaú, fana faitoʻo moʻui lelei, mo hono fuʻifuʻi ʻo e ʻakaú.
ʻE founga fēfē hono fakafehoanaki ʻa e founga tō ngoué ki hono fokotuʻu ha ngaahi tōʻonga moʻui ʻoku leleí?

Fakakaukau ke fakaafeʻi e kau akó ke fakakaukau ki heʻenau ngaahi tōʻonga moʻuí. ʻE lava ke fekumi ʻa e kau akó ki he tokoni ʻa e Laumālie Māʻoniʻoní ke ʻiloʻi ʻa e meʻa ʻoku nau fakahoko leleí mo e meʻa te nau lava ʻo fakaleleiʻí.

ʻE lava ke tā ʻe he kau akó ʻi heʻenau tohinoa akó ha vao mo ha matalaʻiʻakau. ʻE lava ke fakahingoa ʻe he kau akó ʻa e vaó ko e “Ngaahi tōʻonga moʻui ʻoku ou fie liliú” pea fakahingoa ʻa e matalaʻiʻakaú ko e “Ngaahi tōʻonga moʻui ke kamata pe hokohoko atú.”

Kapau ʻoku fiemaʻu ʻe he kau akó ha sīpinga, te ke lava ʻo fakaʻaliʻali ʻa e fakatātā ko ʻení pe tā ia ʻi he palakipoé.
Ko e hā ha ola ʻo e ngaahi tōʻonga moʻuí ʻi heʻetau moʻuí?
Ko e hā te ne lava ʻo fakafaingataʻaʻiaʻi hono fakatonutonu e ngaahi tōʻonga moʻui ʻoku ʻikai leleí pe fokotuʻu ha ngaahi tōʻonga moʻui ʻoku leleí?

ʻE lava ke tokoniʻi kitautolu ʻe Sīsū Kalaisi ke liliu ʻetau tōʻonga moʻuí

Mahalo te ke fie fakapapauʻi ange ki he kau akó, neongo ʻoku fiemaʻu ha ngāue ke liliu ʻetau tōʻonga moʻuí, ka kuo ʻosi talaʻofa ʻa e Fakamoʻuí ke tokoniʻi kitautolu.

Lau ʻa e ʻIsikeli 36:26–27; Mōsaia 3:19; mo e ʻEta 12:27, ʻo kumi e meʻa ʻoku akoʻi ʻe he ngaahi potufolofola ko ʻení fekauʻaki mo e founga ʻe lava ke tokoniʻi ai kitautolu ʻe Sīsū Kalaisi ke tau liliú.

ʻE ʻaonga fēfē nai ʻa e ngaahi veesi ko ʻení ki hono liliu ʻetau ngaahi tōʻonga moʻuí?

Naʻe akonaki foki ʻa Palesiteni Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo hono liliu ʻetau ngaahi tōʻonga moʻuí ʻo pehē:

Ko e moʻoni, ʻoku tau maʻu kotoa pē ha ngaahi tōʻonga pe mele pe hisitōlia fakataautaha ʻe lava ke ne taʻofi kitautolu mei heʻetau kau kakato fakalaumālie ʻi he ngāue ko ʻení. …ʻ[O]ku ʻi ai ha tokoni fakalangi maʻá e taha kotoa pē ʻi ha faʻahinga taimi pē ʻoku tau fakaʻamu ai ke liliu hotau ʻulungāngá. Naʻe foaki ʻe he ʻOtuá kia Saula ha “loto foʻou.” Naʻe fekau ʻe ʻIsikeli ʻa ʻIsileli kotoa ʻi he kuonga muʻá ke liʻaki honau kuohilí pea “ngaohi … [ha] loto-foʻou pea mo [ha] laumālie foʻou.” Naʻe uki ʻe ʻAlamā ha “fuʻu liliu lahi” ʻa ia ne fakatupunga ai e tupulaki ʻa e laumālié, pea naʻe akoʻi tonu ʻe Sīsū “kapau ʻe ʻikai fanauʻi foʻou ha tangata, ʻe ʻikai ʻaupito mamata ia ki he puleʻanga ʻo e ʻOtuá.” ʻOku mahino mai ko e malava ko ia ke liliu mo moʻui ʻi ha founga māʻoniʻoni angé, kuo hoko maʻu pē ia ko e taha ʻo e ngaahi meʻaʻofa ʻa e ʻOtuá maʻanautolu ʻoku fekumi ki aí. (“Ko e Koloa Lelei Tahá,” Liahona, Nōvema 2021, 9)

Te ke fakamatalaʻi fakanounou fēfē ʻa e meʻa ʻoku akoʻi ʻe he ngaahi potufolofola ko ʻení mo Palesiteni Hōlani fekauʻaki mo e ngaahi tōʻonga moʻuí ki ha fakamatala ʻo e moʻoní?

Lolotonga e vahevahe ʻa e kau akó, tokoni ke nau ʻiloʻi ha moʻoni hangē ko ʻení: ʻI heʻetau haʻu kia Sīsū Kalaisí, te Ne tokoniʻi kitautolu ke liliu ʻetau tōʻonga moʻuí.
ʻOkú ke pehē ko e hā ʻoku tau fiemaʻu ai e tokoni ʻa Sīsū Kalaisí ke liliu ʻetau tōʻonga moʻuí?
Ko e hā ha ngaahi founga te tau lava ai ʻo haʻu kiate Ia kae lava ke Ne tokoniʻi kitautolu ke liliu ʻetau tōʻonga moʻuí?

Sīpinga ʻa Kitioné

Ke tokoni ke ʻilo ʻe he kau akó ʻa e founga ʻe lava ke tokoniʻi ai kitautolu ʻe he Fakamoʻuí ke tau liliú, fakakaukau ke vahevahe ʻa e talanoa ʻo Kitioné. ʻO ka fiemaʻu, te ke lava ʻo fakamatalaʻi ange ko Pealí ko ha ʻotua tamapua ia naʻe lotu ki ai ʻa e kakaí kae ʻikai ko e ʻEikí (vakai, “Peali,” Fakahinohino ki he Ngaahi Folofolá).

Hili ha vahaʻataimi ʻo e faiangahalá, naʻe fakamamahiʻi e kakai ʻIsilelí ʻe he kau Mitiané. Naʻe teuteuʻi ʻe he ʻEikí ha tangata ko Kitione ke tokoni ke fakahaofi ʻa ʻIsileli mei honau ngaahi filí (vakai, Fakamaau 6:11–14).

ʻI hono maʻu ʻe Kitione e ngāue mei he ʻEikí, naʻá ne fakahaaʻi ʻene hohaʻa he ʻikai ke ne lava ʻo fakahoko iá.

Lau ʻa e Fakamaau 6:15–16, ʻo kumi ʻa e founga naʻe tali ai ʻe he ʻEikí ʻa e ngaahi meʻa naʻe hohaʻa ki ai ʻa Kitioné.

Naʻe ʻave ʻe Kitione ʻene ngaahi hohaʻá ki he ʻEikí. Naʻe fakapapauʻi ange ʻe he ʻEikí kia Kitione he ʻikai ke Ne fehangahangai toko taha pē mo e ngāue ko ʻení (vakai, Fakamaau 6:17–24).

Lau ʻa e Fakamaau 6:25–26, ʻo kumi e ngaahi liliu naʻe kole ʻe he ʻEikí kia Kitione ke ne fakahokó.

ʻOkú ke pehē ko e hā naʻe fakahinohinoʻi ai ʻe he ʻEikí ʻa Kitione ke ʻuluaki holoki ʻa e ʻōlita kia Pealí pea toki langa ha ʻōlita foʻou ki he ʻEikí?
Kapau te tau fakafehoanaki ʻa e ongo ʻōlita ko ʻení (ko hono langa ʻo e ʻōlita foʻoú ki he ʻEikí hili hono holoki hifo ʻa e ʻōlita kia Pealí) ki heʻetau tōʻonga moʻuí, ko e hā ʻe lava ke akoʻi ʻe he sīpinga ko ʻení fekauʻaki mo e meʻa ʻoku finangalo e ʻEikí ke tau fai ke liliú? Ko e hā ha ngaahi founga te Ne lava ai ʻo tokoniʻi kitautolu?

Mahalo te ke fie fakafehoanaki e ngaahi fakahinohino ʻa e ʻEikí kia Kitioné ki hono ʻuluaki toʻo ʻo e vaó pea toki tō ʻa e tengaʻi ʻakaú mei he kamataʻanga ʻo e lēsoní. Tokoni ke mahino ki he kau akó e finangalo ʻa e ʻEikí ke tokoniʻi kitautolu ke fakatou siʻaki mei heʻetau moʻuí ʻa e ngaahi tōʻonga moʻui ʻoku ʻikai moʻui leleí (toʻo ʻa e vaó/holoki hifo e ʻōlita ki ha ʻotua loí) pea fakahoko ha ngaahi tōʻonga moʻui lelei ʻi heʻetau moʻuí (tō ha ngaahi tengaʻi ʻakau, langa ha ʻōlita foʻou ki he ʻEikí).

Ko hono fokotuʻu ha ngaahi tōʻonga moʻui ʻoku leleí

ʻE lava ke lisi ʻe he kau akó ʻi he palakipoé ʻenau tali ki he ngaahi fehuʻi ko ʻení.

Lau ʻa e ʻAlamā 13:28–29, ʻo kumi e ngaahi founga te tau lava ai ʻo haʻu kia Sīsū Kalaisi kae lava ke Ne tokoniʻi kitautolu ke liliu ʻetau tōʻonga moʻuí.

Ko e hā ʻa e meʻa naʻá ke maʻú?
Ko e hā ha ngaahi founga kehe te tau lava ai ʻo haʻu kiate Ia?

ʻE tokoniʻi kitautolu ʻe he Fakamoʻuí ke liliu ʻetau tōʻonga moʻuí

Kuo ueʻi fakalaumālie fēfē koe pe ko ha taha ʻokú ke ʻilo ʻe he Fakamoʻuí ke fai ha ngaahi liliu ke hoko ʻo hangē ange ko Iá?
Kapau ʻoku fakahaaʻi ʻe ha taha ʻoku faingataʻa ke liliu ʻenau tōʻonga moʻuí, ko e hā te ke fiemaʻu ke nau manatuʻi fekauʻaki mo e Tamai Hēvaní mo Sīsū Kalaisí?

Mahalo ʻe tokoni ke poupouʻi e kau akó ke nau faʻa kātaki mo vilitaki ʻi heʻenau ngaahi feingá, he ʻoku faʻa fiemaʻu ki ai ha taimi mo ha toutou feinga ke liliu ʻetau tōʻonga moʻuí. Te ke lava ʻo toe lau ʻa e ʻIsikeli 36:26–27 ke fakamanatu ki he kau akó ʻoku talaʻofa ʻa e Fakamoʻuí ke tāpuakiʻi kinautolu ʻaki Hono Laumālié ke tokoniʻi kinautolu ke nau fai ʻa e ngaahi liliu ʻoku fiemaʻú.

Ngaahi Maʻuʻanga Tokoni Kehé

Ko e hā ha ngaahi tōʻonga moʻui māʻoniʻoni te u lava ʻo feinga ke fakatupulaki?

Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko hotau fatongia toputapú ke fakatupulaki ha ngaahi tōʻonga moʻui māʻoniʻoni ʻokú ne fakaafeʻi e Laumālie ʻo e ʻEikí ke ʻiate kitautolu he taimi kotoa pē—ʻa e ngaahi tōʻonga moʻui hangē ko hono tauhi e ngaahi fuakavá, talangofua ki he ngaahi fekaú, fakatomala, faʻa fakamolemole, fekumi ʻi he folofolá, ngāue tokoni, mo e moihū ʻi ʻapi, ʻi he lotú, pea ʻi he temipalé.

Naʻe fakahaaʻi ʻe he kau ākonga ʻa e Fakamoʻuí ʻi he Tohi ʻa Molomoná ha ʻulungaanga māʻoniʻoni ʻe taha: “Naʻa nau lotua ʻa e ngaahi meʻa naʻa nau holi lahi taha ki aí; pea naʻa nau holi ke foaki ʻa e Laumālie Māʻoniʻoní kiate kinautolu” (3 Nīfai 19:9). (“Ke Tau Manatu Maʻu Ai Pē Kiate Ia,” Liahona, Sune 2023, 6)

Kapau ʻoku ou fāifeinga ke liliu ha tōʻonga moʻui, te u kamata ʻi fē?

Naʻe akonaki ʻa Palesiteni Henelī B. ʻAealingi ʻo e Kau Palesitenisī ʻUluakí ʻo pehē:

Ko e tokolahi taha ʻo kitautolú kuo tau aʻusia ʻa e fakalakalaka fakafoʻituituí. Kuo akoʻi mai he meʻa ne u aʻusiá ʻa e founga ʻoku fakalakalaka ai ʻa e kakaí mo e ngaahi kautahá: ko e feituʻu lelei taha ke te fekumi aí ko e fanga kiʻi liliu iiki ʻe lava ke tau fakahoko ʻi he ngaahi meʻa ʻoku tau fakahoko maʻu peé. ʻOku ʻi ai ha mālohi ʻi he kātakí mo e toutou feingá. Pea kapau ʻe lava ke tataki kitautolu ʻe ha ueʻi fakalaumālie ke tau fili ʻa e fanga kiʻi meʻa iiki totonu ke tau liliú, ʻe hanga ʻe he talangofua maʻu peé ʻo ʻomi ha fakalakalaka ʻoku lahi. ( “The Lord Will Multiply the Harvest” [evening with a General Authority, Feb. 6, 1998], 95)

Ko e fē te u lava ʻo ako lahi ange ai fekauʻaki mo hono fokotuʻu ha ngaahi tōʻonga moʻui ʻoku leleí?

“ʻE tokoniʻi koe ʻe Sīsū Kalaisi,” Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (2022), 6–9.

“ʻOku Tokoni pe Uesia Nai Koe ʻe Hoʻo Ngaahi Tōʻonga Moʻui Matuʻuakí?,” Liahona, ʻAokosi 2023, 30–33.

“Ko Hoʻo Ngoue ʻo e Ngaahi Faingamālié,” Ki Hono Fakamālohia ʻo e Toʻu Tupú, Sune 2023, 12–14.

Ngaahi ʻEkitivitī Fakalahi ki he Akó

Tohi fakahinohino Ki Hono Fakamālohia ʻo e Toʻu Tupú

Kapau ʻokú ke ongoʻi ʻe ʻaonga ki he kau akó hano aleaʻi e ngaahi founga ʻe lava ke tokoniʻi ai kitautolu ʻe he Tamai Hēvaní mo Sīsū Kalaisi ke liliu ʻetau tōʻonga moʻuí, te ke lava ʻo lau ʻa e “Fakahoko ha ngaahi fili ʻoku ueʻi fakalangí” mo e “ʻE tokoniʻi koe ʻe Sīsū Kalaisi” ʻi he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí (2022).

ʻE lava ke vahevahe ʻa e kau akó ki ha ngaahi hoa. ʻE lava ke lau ʻe he hoa takitaha ha taha ʻo e ngaahi kongá pea fevahevaheʻaki ʻa e meʻa ne nau ʻiló.

ʻOku fakafaingamālieʻi ʻe Sīsū Kalaisi ʻa e liliú

Te ke lava ʻo fakaʻaongaʻi ʻa e foʻi vitiō“Inspiring Short: Putting off the Natural ‘Horse’” (1:44) ke tokoni ke vakai ʻa e kau akó ki he founga ʻoku malava ai ʻa e liliú. Ko e vahevahe ʻe ʻEletā Kali B. Kuki ʻo e Kau Fitungofulú ha faleʻi fekauʻaki mo e founga te tau lava ai ʻo ikunaʻi ʻetau ngaahi fakahehema ʻo e tangata fakakakanó (vakai, Mōsaia 3:19) pea fakavaivai ki he finangalo ʻo e ʻEikí ʻi heʻetau moʻuí. Fakaafeʻi e kau akó ke vahevahe ʻa e meʻa naʻe makehe kiate kinautolu mei he talanoa ko ʻení.

Ko hono ʻiloʻi e founga ʻoku tākiekina ai ʻe heʻetau ngaahi ongó ʻa ʻetau tōʻonga moʻuí

Te ke lava ʻo fakaʻaongaʻi ʻa e foʻi vitiō“Taking Charge of Technology: Remedies” (3:45) ko ha sīpinga ʻo hono fakatokangaʻi e founga ʻoku tākiekina ai ʻe heʻetau ngaahi ongó ʻetau tōʻonga moʻuí mo e founga te tau lava ai ʻo liliu ʻetau tōʻonga moʻuí. Hili homou sio he vitioó, te ke lava ʻo kole ki he kau akó ke nau vahevahe ha ngaahi founga mei he foʻi vitioó kuo nau moʻui ʻaki pe ʻoku nau fie ʻahiʻahi moʻui ʻaki.

3:45