“O Lo Tatou Faasinomaga ma le Faamoemoega Paia: O A’u o se Atali’i/Afafine o le Atua,” Tusi Lesona a le Faia’oga Seminare o le Feagaiga Tuai (2026)
“O Lo Tatou Faasinomaga ma le Faamoemoega Paia: O A’u o se Atali’i/Afafine o le Atua,” Tusi Lesona a le Faia’oga Seminare o le Feagaiga Tuai
Mo Le Malosi o le Autalavou: Faia o Filifiliga: Lesona 173
O Lo Tatou Faasinomaga ma le Faamoemoega Paia
O A’u o se Atali’i/Afafine o le Atua
Ua folafola atu e tamaitai talavou o le Ekalesia i le lalolagi atoa, “O a’u o se afafine faapelepele a ni matua faalelagi, e i ai se natura paia ma se taunuuga e faavavau” (“Autu a Tamaitai Talavou”).Ua folafola atu e ali’i talavou, “O a’u o se atali’i faapelepele o le Atua, ma ua iai ia te Ia se galuega mo a’u e fai” (“Autu o le Korama a le Perisitua Arona”).O lenei lesona o le a tuuina atu ai i tagata a’oga le avanoa e toe manatunatu ai i o latou faasinomaga ma faamoemoega paia.
Sauniuniga a le tagata a’oga: Valaaulia tagata a’oga e toe manatunatu i le laina muamua o le “Autu a Tamaita’i Talavou” po o le “Autu o le Korama a le Perisitua Arona.”E mafai ona latou taumafai e taulotoina pe faataitai faatele i le āluga o le aso atoa.E mafai ona faasoa mai e tagata a’oga pe faapefea e le faia o lenei mea ona aafia ai o latou uiga ma faatinoga.
Gaoioiga e Ono Mafai Ona Aoaoina Ai
O a’u o se atali’i/afafine o le Atua!
O le amataga o lenei vasega seminare o loo iai lesona eseese mai le Feagaiga Tuai, ia e talanoaina ai lo tatou faasinomaga ma faamoemoega paia.Mo se faataitaiga, Lesona 3: “Aperaamo 3,” Lesona 4: “Mose 1:1–11,” Lesona 5: “Mose 1:12–26,” ma le Lesona 8: “Kenese 1:26–27.”O lenei lesona o le a toe iloilo ai upumoni e uiga i faasinomaga paia mai isi lesona o le Feagaiga Tuai.Atonu o se toe iloiloga pe afai na faia e tagata a’oga nei lesona pe o se mua’i iloiloga o lesona o le a latou suesueina i le seminare i se taimi o i luma.
Mafaufau e amatalia le vasega e ala i le faaalia atu o se fā’ata i tagata a’oga.Valaaulia i latou e talanoaina faatasi ma se paga fesili nei:
-
E faafia ona e vaai i se fā’ata i lou aso atoa?
-
O le a se mea e masani ona e mafaufau iai pe a e vaai i lou ata?
Mafaufau e avatu ia tofu le tagata aoga ma se kopi o le saunoaga lenei:
Na tuuina mai e Elder Gary E. Stevenson o le Korama a Aposetolo e To’asefululua le valaaulia lenei i le autalavou:
O le toatele o outou e amata o outou aso i le tutu i luma o se fā’ata.O taeao, i lenei vaiaso, i lenei tausaga, ma aso uma lava, ia faatali teisi a o e tilotilo atu ia te oe lava i le fā’ata.Mafaufau ia te oe lava, pe fai leotele pe a e manao ai, “Oka, sei vaaia ia te a’u!E ofoofogia a’u!O a’u o se atali’i/afafine o le Atua!Na te silafia a’u!E alofa o Ia ia te a’u!”(“Uunaiga a le Agaga,” Liahona, Nov. 2023, 45)
Ina ia fesoasoani e faamamafa le valaaulia a Elder Stevenson, e mafai ona e valaaulia tagata a’oga e tutu i luga ma tauloto faatasi lana faamatalaga e amata mai le, “Oka, sei vaaia ia te a’u!
Tuu atu se taimi e mafaufau loloto ai i le fesili lenei:
-
Pe e te lagona e moni le faamatalaga a Elder Stevenson e uiga ia te oe?Aisea e ioe pe aisea e leai ai?
A o e suesue i fuaitau o mau i lenei lesona, tomanatu i auala e fesootai ai ia te oe.A o e faia faapea, e mafai ona fesoasoani le Agaga Paia e faamautinoa pe faateleina ai lou mautinoa e uiga i lou faasinomaga ma faamoemoega paia.
O se faataitaiga mai i tusitusiga paia
Mafaufau e tusi le siata lenei i le laupapa ma valaaulia tagata a’oga e kopi i a latou api talaaga mo suesuega.E mafai ona e faaitiitia le numera o fuaitau o mau e suesue e tagata a’oga, e tusa ma manaoga o au tagata a’oga po o taimi avanoa o le vasega.
E tele mea tatou te a’oa’oina e uiga i lo tatou faasinomaga ma faamoemoega paia mai aafiaga ma a’oa’oga a tagata i le Feagaiga Tuai.E ui o le tele o nei fuaitau e faatatau i tagata i le Feagaiga Tuai, ae o upumoni e mafai ona faatatau ia i tatou foi.
A e le’i amatalia le suesuega a tagata a’oga i nei fuaitau, e ono fesoasoani le suesue faatasi o se fuaitau se tasi.O se tasi nei o auala e mafai ona e faatinoina ai.
Faitau le Mose 1:3, 6, 12–13 ma vaavaai mo le eseesega na tupu na iloa ai e Mose o ia o se atali’i o le Atua.
-
O le a se mea na e mauaina?
Atonu na faasoa mai e tagata a’oga ni upumoni e pei o le O a’u o se atali’i/afafine o le Atua ma e iai Lana galuega mo a’u e fai po o le iloaina o a’u o se atali’i/afafine o le Atua e mafai ona fesoasoani ia te a’u e faatoilalo faaosoosoga.I luga o le laupapa, tusi ni ’aū mai le Mose 1:3, 6, 12–13 aga’i atu i ni li’o fou.Tusi upumoni nei, po o isi na iloaina e isi tagata a’oga i totonu o nei li’o fou.E mafai ona valaaulia tagata aoga e faia lenei mea lava e tasi i a latou api talaaga mo suesuega.
Afai e aoga mo tagata a’oga le talanoaina atili o nei upumoni, mafaufau e faaaoga anomea mai le Lesona 4: “Mose 1:1–11” ma le Lesona 5: “Mose 1:12–26.”
-
E faapefea e le iloaina o nei upumoni ona faia se suiga i lou olaga (pe faapefea ona faia se eseesega)?
-
O a nisi o galuega a le Atua ua faia mo oe ia ausiaina?
Suesuega a tagata a’oga ma talanoaga
Mafaufau e faatulaga tagata a’oga i ni paga pe i ni vaega to’alaiti ma tuuina atu faatonuga o lo o i lalo.E te ono fetuunai faatonuga e tusa ai ma le taimi o avanoa mo le vasega.
Manatua: E mafai ona e valaaulia tagata a’oga na faitauina le Kenese 1:26–27 ina ia latou vaai foi i le parakalafa lona lua o le “O Le Aiga: O Se Folafolaga I Le Lalolagi” mo malamalamaaga faaopoopo.Afai e le masani tagata a’oga i le tala i le Masiofo o Eseta, mafaufau e faamatala atu o ia o se tamaitai Iutaia i Peresia, na tuuina lona ola i se tulaga lamatia e laveai ai le nu’u o le Alii mai le fa’afanoga.
-
Faitau le tolu pe sili atu o fuaitau o mau o totoe i luga o loo i le siata.
-
I luga o le siata i lau api talaaga mo suesuega, tusi ni ‘aū mai mau ta’itasi na e faitauina.Tusi ni li’o fou i si’ui o nei ‘aū.
-
I totonu o nei li’o fou, tusi le mea ua a’oa’oina mai e lena mau e uiga i lou faasinomaga ma faamoemoega paia.
-
Talanoa ma lau vaega pe faapefea e nei aoaoga ona sa aafia ai lou olaga ma pe faapefea ona ono faia ai se suiga.
A mae’a galuega a tagata aoga, e mafai ona e valaaulia i latou e faaopoopo nisi o upumoni ua latou a’oa’oina i le siata i luga o le laupapa.
Ua lisiina atu i lalo o upumoni na ono faailoa mai e tagata a’oga, faatasi ma lesona e fesootai iai.
Aperaamo 3:22–23.Sa ou ola faatasi ma le Tamā Faalelagi o se tasi o Ana fanau agaga ae ou te le’i fanau mai.Tagai i le Lesona 3: “Aperaamo 3.”
Aperaamo 3:24–26.Ua auina mai a’u i le lalolagi e vaai pe o le a ou tausia poloaiga a le Atua.
Kenese 1:26–27.O a’u o se atalii/afafine o matua faalelagi, na foafoaina i lo laua faatusa.Tagai i le Lesona 8: “Kenese 1:26–27.”Tagai foi i le parakalafa lona lua o le “O Le Aiga: O Se Folafolaga i le Lalolagi.”
Eseta 4:14.”Ua tuuina a’u e le Tama Faalelagi i tulaga e mafai ai ona ou fesoasoani e faataunuu Lana galuega.Tagai i le Lesona 94: “Eseta Vaega 1.”
Salamo 82:6.O a’u o se atalii/afafine o le Atua ma ua iai le gafatia e avea ai e faapei o Ia.
Ieremia 1:5.Ae ou te le’i fanau mai, sa silafia a’u e le Alii ma tuuina mai ia te a’u ni tiutetauave patino e faatino i le olaga nei.Tagai i le Lesona 130: “Ieremia 1.”
Malaki 2:10.O tatou uma o fanau a le Atua ma e tatau ona agalelei le tasi i le isi.
E te ono filifili ni nai faamatalaga na tusia e tagata a’oga i luga o le laupapa ma talanoaina e faaaoga ai anomea mai isi lesona fesootai.Tagai i le faaiuga o le lesona lenei mo se faasologa mae’ae’a o le kalafi.Po o lou fai atu o se tasi pe sili atu o fesili e pei o nei:
-
Aisea e te manatu ai e taua le iloa o lenei upumoni?
-
O a aafiaga ua mafai ona fesoasoani ia te oe e talitonu ai e moni lenei mea?
-
E faapefea e le iloaina o le faasinomaga ma faamoemoega paia o isi ona aafia ai le auala tatou te taulimaina ai i latou?
E mafai ona e faaali atu lenei faamatalaga o se vaega o le talanoaga e uiga i le fesili na muamua:
Na aioi mai Peresitene Russell M. Nelson ia i tatou ina ia faaaloalo i fanau uma a le Atua ina ua ia saunoa mai:
E tofu i tatou ma se gafatiaga paia ona o tagata ta’ito’atasi o se atali’i/afafine o le Atua.E tutusa tagata uma i Lana silafaga.E loloto aafiaga o lenei upumoni.Uso e ma tuafafine, faamolemole faalogo ma le toto’a i le mea o le a ou fai atu ai.E le sili le alofa o le Atua i le tasi ituaiga o tagata nai lo le isi.Ua manino Lana a’oa’oga faavae i lenei mataupu.Ua Ia valaaulia tagata uma e o atu ia te Ia, “uliuli pe paʼepaʼe, e pologa pe saoloto, o tane ma fafine” [2 Nifae 26:33].
Ou te faamautinoa atu ia te outou, o lou tulaga i luma o le Atua e le fuaina i le lanu o lou pa’u.O le lelei po o le lē lelei ma le Atua e faalagolago i lou tuuto atu i le Atua ma Ana poloaiga ae e lē o le lanu o lou pa’u.
Ou te faanoanoa i le onosa’ia e o tatou uso ma tuafafine Uli i le lalolagi atoa ia tiga o le faailoga lanu ma le faailoga tagata.O le asō ou te valaau atu ai i o tatou tagata o le Ekalesia i soo se mea ia taimua i le lafoa’i o uiga ma soo se faatinoga o le faailoga lanu.Ou te aioi atu ia te outou ina ia faatupulaia le faaaloalo mo fanau uma a le Atua.
O le fesili mo i tatou taitoatasi, tusa lava po o le a le lanu, e tutusa lava.O e loto e faamuamua le Atua i lou olaga?(“Ia Faamuamua le Atua,” Liahona, Nov. 2020, 94)
Faaiuga
Vaai faalemafaufau faapea ua e tuua le seminare, ae fai mai se isi tagata a’oga: “Ou te le o matua mautinoa lelei e uiga i mea na tatou a’oa’oina i le asō.Pe e te talitonu ea i la mea uma, e uiga i lo tatou faasinomaga ma faamoemoega paia?
Manatunatu i mea atonu ua e a’oa’oina ma lagonaina.I totonu o lau api talaaga mo suesuega, tusi se tali pu’upu’u e mafai ona e faasoa ma lau uo.
Valaaulia ni nai tagata a’oga e faasoa mai mea sa latou tusiaina.Uunaia tagata a’oga e faapipii le faamatalaga a Elder Stevenson i luga o se fā’ata e masani ona latou faaaogaina, ina ia mafai ona latou mulimuli ai i lana valaaulia.O le ata lenei ua tuuina mai ai ni nai manatu i le auala e ono foliga iai le siata atoa, pe a uma ona faatino e tagata a’oga le gaoioiga suesue.