Tusi Lesona a le Faiaoga Seminare o le Feagaiga Tuai

Anotusi
Itulau Autu
Faatomuaga i le Tusi Lesona a le Faiaoga
Lesona o le Feagaiga Tuai
- Faafeiloai Atu Mai le Feagaiga Tuai
- Mose 1; Aperaamo 3
- Kenese 1–2; Mose 2–3; Aperaamo 4–5
- Kenese 3–4; Mose 4–5
- Kenese 5; Mose 6
- Mose 7
- Kenese 6–11; Mose 8
- Kenese 12–17; Aperaamo 1–2
- Kenese 18–23
- Kenese 24–33
- Kenese 37–41
- Kenese 42–50
- Esoto 1–6
- Eseta
- Esoto 7–13
- Esoto 14–18
- Esoto 19–20; 24; 31–34
- Esoto 35–40; Levitiko 1; 4; 16; 19
- Numera 11–14; 20–24; 27
- Teuteronome 6–8; 15; 18; 29–30; 34
- Iosua 1–8; 23–24
- Faamasino 2–4; 6–8; 13–16
- Ruta; 1 Samuelu 1–7
- 1 Samuelu 8–10; 13; 15–16
- 1 Samuelu 17–18; 24–26; 2 Samuelu 5–7
- 2 Samuelu 11–12; 1 Tupu 3; 6–9; 11
- 1 Tupu 12–13; 17–22
- 2 Tupu 2–7
- 2 Tupu 16–25
- 2 Nofoaiga a Tupu 14–20; 26; 30
- Esera 1; 3–7; Neemia 2; 4–6; 8
- Eseta
- Iopu 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Fa’ataoto 1–4; 15–16; 22; 31; Failauga 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Ieremia 1–3; 7; 16–18; 20
- Ieremia 31–33; 36–38; Auega 1; 3
- Esekielu 1–3; 33–34; 36–37; 47
- Tanielu 1–7
- Hosea; Ioelu
- Amosa; Opetaia; Iona
- Mika; Nauma; Sapakuka; Sefanaia
- Hakai 1–2; Sakaria 1–4; 7–14
- Malaki
Lesona o Sauniuniga mo le Olaga
- Atamai i Aoaoga Faavae: Mauaina o Tali i A’u Fesili
- Tomai i Suesuega o Tusitusiga Paia
- Taiala Mo Le Malosi o le Autalavou
- Atinaega o le Ola Tutoatasi o le Tagata Lava Ia
- Soifua Maloloina Faaletino ma Faalelagona
- Sauniuni mo Aoaoga ma Galuega i le Lumanai
- Faamanuiaina i le Aoga
- Sauniuniga Faafaifeautalai
- Sauniuniga mo le Malumalu
- Aoaoga a Taitai o le Ekalesia
Faaopoopoga

Mose 1:12–26: “Alu Ese ia Oe, Satani”

“Mose 1:12–26: ‘Alu Ese ia Oe, Satani,’” Tusi Lesona a le Faiaoga Seminare o le Feagaiga Tuai (2026)

“Mose 1:12–26: ‘Alu Ese ia Oe, Satani,’” Tusi Lesona a le Faiaoga Seminare o le Feagaiga Tuai

Mose 1; Aperaamo 3: Lesona 5

Mose 1:12–26

“Alu Ese ia Oe, Satani”

Ua tatou lagonaina uma faaosoosoga a Satani. Peitai, e pei o Mose, a o tatou manatuaina po o ai moni lava i tatou, e mafai ona tatou maua le malosi mai le Atua e faatoilalo ai Satani ma ana faaosoosoga i o tatou olaga. O le faamoemoega o lenei lesona o le fesoasoani lea i tagata aoga ia maua le malosi mai le Atua e faatoilalo ai o latou lava faaosoosoga.

Sauniuniga a le tagata aoga: Valaaulia tagata aoga e mafaufau loloto i se tasi o faaosoosoga latou te feagai patino ma o mai saunia i le vasega e aoao pe faapefea ona faatoilaloina.

Gaoioiga e Mafai ona Fai e Aoao Ai

Feagai ai ma faaosoosoga

Ina ia saunia tagata aoga e aoao e uiga i le faatoilaloina o faaosoosoga, mafaufau e faasoa atu le faamatalaga lenei ma fesili.

Na aoao mai Peresitene Jeffrey R. Holland o le Korama a Aposetolo e Toasefululua:

Ua matou talanoa atu ma le lototoa ona o Satani o se tagata moni ua matua mausali i lona faaumatiaina o outou ma ua outou fetaiai ma ana faatosinaga i vaitausaga o lo outou talavou. (“Ua Tauto i Tatou Uma,” Liahona, Nov. 2011, 45)

O le a sou lagona e uiga i lenei upusii mai ia Peresitene Holland?
O a nisi o faaosoosoga o loo feagai ma talavou o le Au Paia o Aso e Gata Ai?

Atonu e aoga le tusi i luga o le laupapa o faaosoosoga o loo ta’ua e tagata aoga. O le a e fai atu i tagata aoga e toe manatunatu i nei mea i se taimi mulimuli ane o le lesona.

Mo fesili nei, e mafai ona e mafaufau e valaaulia tagata aoga e tusi a latou tali i se api talaaga mo suesuega.

Mafaufau loloto i se faaosoosoga sa e feagai ai pe atonu foi o loo e tauivi ai. Mafaufau i tulaga nei:

O le a se mea e faigata ai ia te oe ona tetee atu i lena faaosoosoga?
O le a se mea e te faia e saili ai le fesoasoani ma le malosi e tetee atu ai?
O le a le lelei o lou lagona o loo ua e i ai i le faatoilaloina o ou faaosoosoga?

A o e suesueina le Mose 1:1–26 i le aso, saili le taitaiga mai le Agaga Paia e faailoa mai ai upumoni e mafai ona faamalosia ai oe a o e feagai ma faaosoosoga.

O Mose ua faaosoosoina e Satani

Valaaulia tagata aoga e faasoa mai mea latou te manatua mai le lesona talu ai, pe e mafai foi ona latou iloiloina puupuu le Mose 1:1–10 ma manatunatu i mea sa latou aoaoina. Afai e manaomia, faamanatu atu ia i latou o Mose na “vaai faafesagai lava ma le Atua, ma sa talanoa o ia ma ia” (Mose 1:2) ma sa aoao faatolu e le Atua ia Mose o ia o Lona atalii (tagai fuaiupu 4, 6, ma le 7).

E ui o Mose o se perofeta maoae, ae sa feagai foi o ia ma faaosoosoga maoae. E lei leva ona mavae le feutagaiga a Mose ma le Atua, ae ia maua se aafiaga faigata tele lea na “sau ai Satani e faaosooso ia te ia” (Mose 1:12). Ona o le mea na iloa ma faia e Mose, sa mafai ai ona ia manumalo. Faitau le Mose 1:12–22, ma vaavaai mo mea na fesoasoani ia Mose e faatoilalo ai faaosoosoga a Satani. Mafaufau e faailoga mea ua e mauaina.

E mafai ona e fuafua e faaali le vitio “O A’u o se Atalii o le Atua” mai le faailo taimi 2:50 i le 6:30, po o le vitio atoa pe afai e te lei faaalia i tagata aoga le vaega muamua o le lesona talu ai. A uma le vitio, e mafai ona e valaaulia tagata aoga e faitau ia fuaiupu, ma vaavaai mo mea na fesoasoani ia Mose e faatoilalo ai faaosoosoga a Satani. E mafai ona talanoaina loa e tagata aoga fesili nei i ni paga po o ni vaega laiti.

6:31

O le a se mea ua e aoao mai i le aafiaga o Mose e mafai ona fesoasoani ia i tatou e faatoilalo ai o tatou faaosoosoga?

Mafaufau e tusi le mataupu faavae lē uma lenei i luga o le laupapa: E mafai ona tatou maua le fesoasoani a le Atua e faatoilalo ai faaosoosoga e ala i le … Valaaulia tagata aoga e o mai i le laupapa ma faauma le mataupu faavae i a latou lava upu. Afai e manaomia e tagata aoga se fesoasoani, e mafai ona e taialaina i latou e ala i le fai atu o fesili e pei o nei:

O le a le mea na faaigoa ai e Satani ia Mose i le fuaiupu 12, ma na faapefea ona tali atu Mose i le fuaiupu 13?
O le a le mea na manatua e Mose mai lona aafiaga faaleagaga ma le Atua lea na fesoasoani ia te ia ina ua feagai o ia ma faaosoosoga?

E mafai e tagata aoga ona faauma le mataupu faavae i ni auala, e aofia ai nisi o mea nei:

… manatua o i tatou o fanau a le Atua.

… toe manatuaina o aafiaga faaleagaga ua tuanai

… valaau atu i le Atua mo le malosi

A uma ona faailoa mai ni mataupu faavae se tele, mafaufau e faaaoga le upusii ma fesili nei e fesoasoani e faaloloto ai le malamalama o tagata aoga i upumoni na latou mauaina.

Sa faasoa mai e Peresitene Russell M. Nelson mea nei e uiga i le mana o le manatuaina o i tatou o fanau a le Atua:

A’u uo pele, o outou moni lava o fanau agaga a le Atua. Sa outou pepese lava i lenei upumoni talu ina outou iloa upu o le “O A’u o se Atalii/Afafine o le Atua.” Ae pe ua tusia ea lena upumoni e faavavau i lou loto? Pe na laveaiina ea oe e lenei upumoni ina ua oulua fetaiai ma se faaosoosoga? (“Filifiliga mo le Faavavau” [faigalotu i le lalolagi atoa mo le autalavou matutua, Me 15, 2022])

O le a sou manatu i le uiga o le i ai o le upumoni faapea o oe o se atalii/afafine o le Atua ua mamanuina i lou loto?
E mafai faapefea e le manatuaina o i tatou o fanau a le Atua ona faamalosia i tatou pe a tatou feagai ma faaosoosoga?
Aisea e te manatu ai tatou te manaomia le fesoasoani a le Atua e faatoilaloina faaosoosoga?

Valaaulia tagata aoga e faasoa mai ni faataitaiga o se taimi na faamalosia ai e le Atua se tasi e tetee atu i faaosoosoga. E mafai ona aumai lenei mea mai tusitusiga paia, tagata e latalata atu ia i latou, po o o latou lava olaga. A o faaosoosoga e patino i le tagata lava ia, faamanatu i tagata aoga e aua nei faasoa maia soo se faaosoosoga patino.

Faatoilaloina o faaosoosoga faaletagata lava ia

Ina ia fesoasoani i au tagata aoga ia malamalama pe mafai faapefea ona latou ola i mataupu faavae na talanoaina i le asō, valaaulia i latou e filifili se faaosoosoga se tasi pe lua na tusia i luga o le laupapa i le amataga o le lesona. I le avea ai o se vasega po o ni vaega toalaiti, valaaulia tagata aoga e mafaufau i ni auala faatino e mafai ai e se tagata o feagai ma lena faaosoosoga ona faaaoga nei mataupu faavae e faatoilalo ai lena faaosoosoga.

Mafaufau e valaaulia tagata aoga e tusi o latou manatu i luga o le laupapa, pe e mafai foi ona e faaali atu nisi o manatu nei.

O auala e faaaoga ai mea ua tatou aoaoina i le Mose 1:12–26:

Tusi i lau api talaaga se taimi na e lagonaina ai le alofa o le Alii ma iloa ai o oe o se atalii/afafine o le Atua. E mafai ona e toefaamanatuia lenei mea i taimi o faaosoosoga.
Tauloto ma faataitai mau musuia, viiga, po o tatalo o le faamanatuga ina ia e toe fai ia te oe lava pe a oo ina faaosoosoina oe. (O se fuafuaga lenei sa faaaoga e le Faaola i le Mataio 4:1–11.)
Tatalo i aso taitasi mo le malosi ma le mana o le Alii e faatoilalo ai faaosoosoga. Lipoti atu i le Tama Faalelagi i afiafi taitasi e faafetai atu ai ia te Ia, faailoa soo se vaivaiga, ole atu mo se faamagaloga, ma tautino atu e faaauau pea ona taumafai ai (tagai i le 3 Nifae 18:15, 18).
Toe manatunatu i aafiaga faaleagaga ua tuanai na e oo i ai ma tusi i lalo i se api talaaga. Faasino atu i nei mea pe a tulai mai se faaosoosoga.
Talanoa ma matua po o tagata matutua faatuatuaina po o uo pe na faapefea ona fesoasoani nei mataupu faavae ia i latou ma auala o le a latou fautuaina atu ai oe e faaaoga.

Valaaulia tagata aoga e fai se fuafuaga e fesoasoani ai ia i latou e faatoilalo faaosoosoga latou te feagai. E mafai ona e faia lenei mea e ala i le tuuina atu o faatonuga nei:

Toe mafaufau i le faaosoosoga sa e mafaufau loloto i ai i le amataga o le lesona po o se isi [faaosoosoga] o loo e tauivi ai.

Faasoa atu lau molimau e uiga i le mana ma le malosi o le Alii na e oo i ai i lou olaga ma Lona finagalo e fesoasoani i au tagata aoga e faatoilalo o latou faaosoosoga. Faailoa atu lou talitonuina o i latou ma i lo latou gafatia e faatoilalo ai o latou faaosoosoga faatasi ai ma le fesoasoani a le Atua.

Ole atu i le Tama Faalelagi mo se taitaiga, faamaea le faamatalaga lenei i lau api talaaga mo suesuega po o i lou mafaufau: “Ina ia fesoasoani ia te au e saunia e tetee atu i lenei faaosoosoga, o le a ou .”

O Punaoa Faaopoopo

E mafai faapefea e le manatuaina o le alofa o le Atua mo au o Sona atalii/afafine ona fesoasoani ia te au pe a faaosoosoina?

Na saunoa mai Peresitene M. Russell Ballard (1928–2023) o le Korama a Aposetolo e Toasefululua:

Faamolemole ia manatua, muamua, e alofa lou Tama Faalelagi ia te oe, ma, lona lua, o lou Faaola, o le Alii o Iesu Keriso, e alofa ia te oe. Ia tuuina sa’o nei upumoni i lou mafaufau ona faagoto uga ifo lea i totonu o lou loto. O le a latou tuuina atu ia te oe se tapasa mo le auala e tatau ona e galue ai ma le auala e tatau ona e taulimaina ai isi, ma o le a latou avatu ai ia te oe le malosi e faatoilalo ai faaosoosoga ma tumau ai i luga o le ala o feagaiga a le Ekalesia. (“Children of Heavenly Father” [Faigalotu i le Brigham Young University, Mati. 3, 2020])

E mafai faapefea e le toe manatuaina o o tatou aafiaga faaleagaga ua tuanai ona fesoasoani ia i tatou e faatoilalo ai faaosoosoga?

Sa saunoa mai Peresitene Jeffrey R. Holland o le Korama a Aposetolo e Toasefululua:

I taimi o le atuatuvale po o le le mautonu po o taimi e fesouaiina ai, tutumau i le nofoaga ua uma ona e manumalo ai, e tusa lava pe utiuti lena nofoaga. … A oo mai na taimi ma mānu a’e faafitauli, ma a le vave ona oo mai se vaifofo, ia taofi mau i mea ua uma ona outou iloa ma tutu malolosi seia oo mai se isi malamalama faaopoopo. … O le tele o lou faatuatua po o le maualuga o lou malamalama e le o le mea lea e taua—o le faamaoni a’ia’i e te faatinoina e tusa ai ma lou faatuatua ma le upumoni ua uma ona e iloa. (“Le Alii e, Ua Ou Talitonu,” Liahona, Me 2013, 93–94)

Aisea e masani ona oo mai ai faaosoosoga pe a ou taumafai e alualu i luma faaleagaga pe ina ua uma ona ou maua ni aafiaga faaleagaga?

Sa aoao mai le Perofeta o Iosefa Samita (1805–44):

O le latalata atili o le agai atu o se tagata i le Alii, o le a faaalia ai se mana sili atu e le fili e taofia ai le faataunuuina o Ona faamoemoega. (i le Orson F. Whitney, Life of Heber C. Kimball [Aai o Sate Leki: Bookcraft, 1967], 132)

Na faamalamalama mai e Peresitene Jeffrey R. Holland:

Ou te fia faamalosia outou taitasi i le asō e faatatau i mea faafeagai lea e masani ona oo mai ina ua uma ona faia ni faaiuga malamalama, ina ua uma ona tuuina mai e taimi o faaaliga ma tautinoga se filemu ma se faamautinoaga lea na tatou manatu o le a le mafai ona te’a ese ma i tatou.

E le mafai ona tatou tuuto atu e fai mo sina taimi o ia mea taua tumau ma taunuuga e faavavau e aunoa ma le iloaina o le a avea ma se taua—o se taua lelei ma se taua manumalo, ae o se taua lava, po o le a lava [le ituaiga]. (“Cast Not Away Therefore Your Confidence” [Faigalotu a le Brigham Young University, Mati 1999], 2–3)

E mafai faapefea ona tatou teena le mana o Satani?

Sa faasoa mai Elder Ulisses Soares o le Korama a Aposetolo e Toasefululua e uiga i le faatoilaloina o faaosoosoga:

14:47

O le tau faasaga i faaosoosoga e manaomia ai se olaga o le maelega ma le faamaoni. Ae faamolemole ia silafia ua saunia le Alii e fesoasoani mai ia i tatou i a tatou taumafaiga patino ma ua folafola mai faamanuiaga ofoofogia pe afai tatou te tumau e oo i le iuga. (“Saili Atu ia Keriso i Mafaufauga Uma,” Liahona, Nov. 2020, 83)

Gaoioiga Faaopoopo e Aoao Ai

O se faataitaiga moni o le olaga masani o le faatoilaloina o faaosoosoga

Ina ia fesoasoani i tagata aoga o e atonu ua uma ona toilalo i se faaosoosoga pe o tauivi ma vaisu, mafaufau e faaali le vitio “Let God Guide You: From Weakness to Strength“ (6:07), o le tala i se tagata na mauaina le mana ma le malosi o le Alii e faatoilalo ai ona faaosoosoga ma vaisu i ponokalafi. O lenei vitio atonu e faapitoa le aoga mo tagata aoga o e ua uma ona toilalo i faaosoosoga. A uma le vitio, fesili i le vasega po o a malamalamaaga na latou maua e uiga i le faatoilaloina o faaosoosoga ma le matafaioi a le Atua i lo tatou gafatia e faatoilalo ai. Mafaufau e faaali tonu le vitio a o lei oo i le vaega o le “Faatoilaloina o faaosoosoga patino” o le lesona.

6:7

Mose 1 i le Penina Tau Tele nai lo le tusi o le Kenese

Afai e te manatu e mafai ona aoga i tagata aoga le talanoaina pe aisea e le o i ai le Mose 1 i le tusi o Kenese, valaaulia i latou e faitau le Mose 1:23, ma vaavaai mo le mafuaaga e le o aofia ai i le taimi nei. Mafaufau e fai atu fesili nei:

Aisea e te manatu atonu na le manao ai Satani i lenei tala ina ia “i ai i totonu o le fanauga a tagata” (Mose 1:23)?
O a mafuaaga ua e fiafia ai ina ua toe aumaia e le Alii lenei mataupu e ala ia Iosefa Samita?

Faatusatusaina o aafiaga o Mose i aafiaga o Iosefa Samita

Ina ia fesoasoani i tagata aoga ia malamalama atili i le auala e tetee atu ai i faaosoosoga a Satani ma faamanuiaga ia e mafai ona oo mai e ala i le faia o lena mea, valaaulia tagata aoga e faatusatusa ia aafiaga o Mose ma aafiaga o Iosefa Samita.

I a latou api talaaga mo suesuega, e mafai e tagata aoga ona tusi ai se ata faafasilaau ma faaigoaina o Mose ma le isi ata faafasilaau e faaigoaina o Iosefa Samita. Ona mafai lea ona latou faatusatusa le Mose 1:12–22 ma le Iosefa Samita—Talafaasolopito 1:13–16, ma vaavaai mo faamatalaga autu i fetaiaiga taitasi ma Satani, ma mea na faia e Mose ma Iosefa Samita e faatoilalo ai o ia. E mafai ona latou lisiina nei faamatalaga auiliili i lalo ifo o ata taitasi.

Afai e manaomia e tagata aoga se fesoasoani, mafaufau e faaali atu fesili e pei o le:

O le a se aafiaga faaleagaga e mafai ona e manatua na oo i ai le perofeta a o lei fetaiai ma Satani?
Na faapefea ona faatoilalo e le Perofeta ia Satani?
O le a le mea na tupu o se taunuuga o le faatoilaloina e le Perofeta o Satani (tagai Mose 1:24-25; Iosefa Samita—Talafaasolopito 1:17)?

E mou ese atu faaosoosoga a o tatou saili atu ia Keriso i mafaufauga uma

Ina ia fesoasoani i tagata aoga ia iloa le taua o le taulai atu ia Keriso i le taimi o faaosoosoga, fesoasoani ia i latou ia iloa na taulai atu Mose ia Iesu Keriso i le taimi na la fetaiai ai ma Satani (tagai Mose 1:13, 16–18). Faaali le vitio “E mou atu faaosoosoga ao tatou saili atu ia Keriso i mafaufauga uma” (2:57), ma fai atu i le vasega e faasoa mai soo se malamalamaaga faaopoopo latou te maua e uiga i le faatoilaloina o faaosoosoga.

2:58