Testamenta Taloha: Boky torolalana ho an’ny mpampianatra seminera

Votoatiny
Pejin-dohateny
Teny fanolorana ny Boky torolalana ho an’ny mpampianatra
Lesona momba ny Testamenta Taloha
- Tonga soa ato amin’ny Testamenta Taloha
- Mosesy 1; Abrahama 3
- Genesisy 1–2; Mosesy 2–3; Abrahama 4–5
- Genesisy 3–4; Mosesy 4–5
- Genesisy 5; Mosesy 6
- Mosesy 7
- Genesisy 6–11; Mosesy 8
- Genesisy 12–17; Abrahama 1–2
- Genesisy 18–23
- Genesisy 24–33
- Genesisy 37–41
- Genesisy 42–50
- Eksodosy 1–6
- Paska
- Eksodosy 7–13
- Eksodosy 14–18
- Eksodosy 19–20; 24; 31–34
- Eksodosy 35–40; Levitikosy 1; 4; 16; 19
- Nomery 11–14; 20–24; 27
- Deoteronomia 6–8; 15; 18; 29–30; 34
- Josoa 1–8; 23–24
- Mpitsara 2–4; 6–8; 13–16
- Rota; 1 Samoela 1–7
- 1 Samoela 8–10; 13; 15–16
- 1 Samoela 17–18; 24–26; 2 Samoela 5–7
- 2 Samoela 11–12; 1 Mpanjaka 3; 6–9; 11
- 1 Mpanjaka 12–13; 17–22
- 2 Mpanjaka 2–7
- 2 Mpanjaka 16–25
- 2 Tantara 14–20, 26, 30
- Ezra 1; 3–7; Nehemia 2, 4–6, 8
- Estera
- Joba 1–3; 12–14; 19; 21–24; 38–40; 42
- Salamo 1–2; 8; 19–33; 40; 46
- Salamo 49–51; 61–66; 69–72; 77–78; 85–86
- Salamo 102–103; 110; 116–119; 127–128; 135–139; 146–150
- Ohabolana 1–4; 15–16; 22; 31; Mpitoriteny 1–3; 11–12
- Isaia 1–12
- Isaia 13–14; 22; 24–30; 35
- Isaia 40–49
- Isaia 50–57
- Isaia 58–66
- Jeremia 1–3; 7; 16–18; 20
- Jeremia 31–33; 36–38; Fitomaniana 1; 3
- Ezekiela 1–3; 33–34; 36–37; 47
- Daniela 1–7
- Hosea; Joela
- Amosa; Obadia; Jona
- Mika; Nahoma; Habakoka; Zefania
- Hagay 1–2; Zakaria 1–4; 10–14
- Malakia
Lesona Fiomanana hiatrika ny fiainana
- Fifehezana fotopampianarana: Mitady ny valin’ireo fanontaniako
- Fahaiza-manao momba ny fandalinana soratra masina
- Ho zatovo mahery!: Fanaovana safidy
- Manorina fizakan-tena
- Fahasalamana ara-batana sy ara-pihetseham-po
- Fiomanana amin’ny fianarana sy asa hatao any aoriana
- Mahomby any an-tsekoly
- Fiomanana ho misiônera
- Fiomanana ho any amin’ny tempoly
- Fampianaran’ireo mpitarika ao amin’ny Fiangonana
Tovana

Boky torolalana Ho zatovo mahery!: Mampifandray ny safidintsika amin’i Kristy

“Ho zatovo mahery!: Mampifandray ny safidintsika amin’i Kristy,” Testamenta Taloha: Boky torolalana ho an’ny mpampianatra seminera (2026)

“Ho zatovo mahery!: Mampifandray ny safidintsika amin’i Kristy,” Testamenta Taloha: Boky torolalana ho an’ny mpampianatra seminera

Ho zatovo mahery!: Fanaovana safidy: Lesona 171

Boky torolalana Ho zatovo mahery!

Mampifandray ny safidintsika amin’i Kristy

Manao safidy tsy tapaka isika mandritra ny androm-piainantsika. Rehefa mahatsapa ho sahirana isika eo amin’ny fandraisana fanapahan-kevitra tsara dia afaka mitondra hery sy fitarihana ho antsika i Jesoa Kristy sy ny fotopampianarany. Ny Ho zatovo mahery!: Torolalana amin’ny fanaovana safidy dia toerana iray azontsika aleha mba hahitana fahamarinana momba an’i Jesoa Kristy sy ny fotopampianarany. Ity lesona ity dia manampy ny mpianatra hanao fanazaran-tena hampiasa ny boky torolalana Ho zatovo mahery! mba hanaovana safidy nentanim-panahy mifototra amin’i Jesoa Kristy sy ny fotopampianarany.

Fanomanana ny mpianatra: Asao ny mpianatra hamerina hijery ny fizarana iray nosafidiny ao amin’ny Ho zatovov mahery!. Afaka mandinika ny fomba ahafahan’ny fampianaran’i Jesoa Kristy ao amin’io fizarana io manampy azy ireo handray fanapahan-kevitra entanim-panahy ireo mpianatra.

Sahanasa fianarana azo atao

I Jesoa Kristy no vatolampiko

Alohan’ny hanombohana ny fampianarana dia omeo ny tahadikan’ny Ho zatovo mahery!: Torolalana amin’ny fanaovana safidy ny mpianatra na ampio izy ireo hahita izany amin’ny endrika elektrônika ao amin’ny Bibliothèque de l’Évangile.

Hevero ny hanomboka ny fotoam-pianarana amin’ny alalan’ny fampisehoana sary iray ahitana fanilo iray ho an’ny tantsambo nandritra ny tafio-drivotra iray.

Inona avy ireo fitsipiky ny filazantsara azonao ampianarina amin’ny alalan’ny fampiasana ity sary ity?

Raha mila fanampiana ny mpianatra dia azonao atao ny manontany azy ireo hoe maneho inona ny tafio-drivotra na ny vatolampy raha toa ka maneho ny fiainantsika ilay fanilo ho an’ny tantsambo. Mety hizara fitsipika isan-karazany ny mpianatra. Isaory izy ireo amin’ny fandraisany anjara amin’ny fifanakalozan-kevitra.

Vakio ny Salamo 62:5–7 ka tadiavo ny ifandraisan’ireo teny ao amin’ny Salamo amin’ilay sary ahitana fanilo ho an’ny tantsambo.

Nahoana no famaritana tsara an’i Jesoa Kristy ny vatolampy?

Vakio ity teny nambaran’ny Loholona Dieter F. Uchtdorf ao amin’ny Kôlejin’ny Apôstôly Roambinifolo ity ka tadiavo ny fomba ahafahantsika manao an’i Jesoa Kristy ho vatolampintsika.

Isaky ny manao safidy tsara mifototra amin’ireo fahamarinana mandrakizain’ny Mpamonjy ianao dia mampiseho fa maniry Azy ho ao amin’ny fiainanao ianao. Ireny safidy ireny dia manokatra ny vavahadin’ny lanitra, ary ny heriny dia hirotsaka eo amin’ny fiainanao. …

… Rehefa manorina ny fiainantsika isika, dia zava-dehibe ny manao safidy tsara. Ary zava-dehibe ny mahatakatra ny fahamarinana mandrakizain’ny Mpamonjy. Saingy ny tanjaka ilaintsika mba hanoherana ireo tafio-drivotra eo amin’ny fiainana dia tonga rehefa mampifandray ireo safidintsika amin’i Jesoa Kristy sy ny fotopampianarany isika. Izany no fanampiana entin’ny Ho zatovo mahery! ho antsika. (“Ho zatovo mahery!: Ny hafatry ny Mpamonjy ho anareo,” Ho zatovo mahery, Martsa 2024, 38)

Inona no azontsika ianarana avy amin’ny Loholona Uchtdorf?

Rehefa mizara ny mpianatra dia ampio izy ireo hahita fahamarinana tahaka ity manaraka ity: mahazo hery avy amin’i Jesoa Kristy isika rehefa mampifandray ny safidintsika Aminy sy amin’ny fotopampianarany. Azonao atao ny manoratra io fahamarinana io eny amin’ny solaitrabe.
Inona araka ny eritreritrao ny dikan’ny hoe mampifandray ny safidintsika amin’i Jesoa Kristy sy ny fotopampianarany?

Ny mpianatra dia mety hizara zavatra toy ny hoe, manaraka ny ohatra nasehon’i Kristy, manao safidy mifototra amin’ny fampianarany, na mangataka fitarihana avy amin’ny Ray any an-danitra rehefa mandray fanapahan-kevitra.

Ataovy izay hahatakaran’ny mpianatra fa ny Ho zatovo mahery!: Torolalana amin’ny fanaovana safidy dia fitaovana iray izay afaka manampy antsika hampifandray ny safidintsika amin’i Jesoa Kristy.

Azonao atao koa ny mizara ity ohatra manaraka avy amin’ny Loholona Uchtdorf ity.

Nanazava ny mety ho fisehon’ny fampifandraisana ny safidintsika amin’i Jesoa Kristy sy amin’ny fotopampianarany ny Loholona Uchtdorf.

Mety ho fantatry ny namanao fa tsy hamitaka na handainga ianao ary mandray ny fianarana ho zava-dehibe. Kanefa fantany ve fa izany dia noho i Jesoa Kristy nampianatra fa “ny marina no hahafaka anareo tsy ho andevo”? [Jaona 8:32; “Ny marina no hahafaka anareo tsy ho andevo,” Ho zatovo mahery!, martsa 2024, 30]. (“Ho zatovo mahery!: Ny hafatry ny Mpamonjy ho anareo,” Ho zatovo mahery!, martsa 2024, 38)

Ahoana no ahafahan’ny fampifandraisana ny safidintsika amin’i Jesoa Kristy manome hery antsika mba hanoherana ireo tafio-drivotry ny fiainana?

Eritrereto ny toe-javatra iray atrehinao amin’izao fotoana izao, na mety hatrehinao any aoriana, izay mety hitaky anao hanao safidy sarotra. Hevero ny mety hanampian’i Jesoa Kristy sy ny fotopampianarany anao.

Henoy ny bitsiky ny Fanahy Masina rehefa manao fanazaran-tena mampifandray ny safidinao amin’i Jesoa Kristy amin’ny fanampian’ny boky torolalana Ho zatovo mahery! ianao.

Ny firafitry ny boky torolalana

Ny tanjon’ity fizarana ity dia ny hanampiana ny mpianatra hampahafantatra ny tenany ny firafitry ny boky torolalana Ho zatovo mahery!. Raha efa mahafantatra ny boky torolalana ny mpianatrao dia azonao dinganina ity fizarana ity ka mandehana any amin’ny lamina hakan-tahaka.

Atoroy ny mpianatra ilay kisary eo ambanin’ny “Manaova safidy entanim-panahy” ao amin’ny boky torolalana na asehoy ity fampahalalana manaraka ity izay avy ao amin’ny kisary.

“Hahita ny fampianaran’i Jesoa Kristy sy ireo mpaminaniny ianao ato amin’ny Ho zatovo mahery! Raha ireo fahamarinana ireo no mitarika anao dia afaka manao safidy entanim-panahy izay hitahy anao amin’izao fotoana izao sy mandritra ny mandrakizay ianao.” (“Manaova safidy entanim-panahy,” Ho zatovo mahery: Torolalana amin’ny fanaovana safidy [2022], 4). Mizara ho lohahevitra samihafa ny boky torolalana ary misy fizarana telo ny lohahevitra tsirairay:

Fahamarinana mandrakizay, na fotopampianaran’ny filazantsaran’i Jesoa Kristy naverina tamin’ny laoniny
Fanasana hanao asa mahakasika ireo fahamarinana ireo
Ireo fitahiana nampanantenaina omen’ny Tompo an’ireo izay miaina araka ny fampianarany

Mamolavola ny dingana

Vakio ny Genesisy 39:9–12 ka tadiavo ny fomba nampifandraisan’i Josefa ny safidiny tamin’i Jesoa Kristy sy ny fotopampianarany.

Inona no hitanao?

Hevero ny hamorona vondrona ahitana mpianatra telo. Asao ny mpianatra tsirairay ao amin’ny vondrona hisafidy tarehimarika iray ka hatramin’ny telo izay mifanaraka amin’ny iray amin’ireto fanontaniana manaraka ireto.

Halalino ny fizarana “Masina ny vatanao” ao amin’ny Ho zatovo mahery! ary mifantoha amin’ny iray amin’ireto manaraka ireto:

Inona no “Fahamarinana mandrakizay” heverinao fa nanampy an’i Josefa hanao ny safidy nataony?
Inona no “Fanasana” narahin’i Josefa?
Inona amin’ireo “Fitahiana nampanantenaina” araka ny hevitrao no niainan’i Josefa?

Asao ny mpianatra hizara izay hitany amin’ny vondrona misy azy. Azonao marihina fa na dia nigadra vokatry ny safidy handositra ny vadin’i Potifara aza i Josefa dia mbola niaraka taminy hatrany ny Tompo (jereo Genesisy 39:20–21; 41:38–43).

Manao fampiharana

Rehefa vitan’ny mpianatra ny tao anatin’ny taratasy zaraina dia azonao atao ny manasa azy ireo hizara ny fomba nampaherezan’i Jesoa Kristy azy ireo rehefa nampifandray ny safidiny taminy sy tamin’ny fotopampianarany izy ireo.

Azonao iverenana indray ny Salamo 62:5–7. Avy eo dia hevero ny hametraka ity fanontaniana manaraka ity amin’ny mpianatra.

Inona no nianaranao androany momba ny fanohizana tsy tapaka ny fifandraisana amin’i Jesoa Kristy sy ny fotopampianarany rehefa mandray fanapahan-kevitra?

Hevero ny hizara ny fijoroana ho vavolombelona anananao momba an’i Jesoa Kristy. Azonao faranana amin’ilay teny namabara ao amin’ny fizarana “Hanampy anao i Jesoa Kristy,” ao amin’ny Ho zatovo mahery ny fampianarana. Amporisiho ny mpianatra hampifandray ny safidiny Aminy sy amin’ny fotopampianarany.

Loharanom-pitaovana fanampiny

Inona no tanjon’ny Ho zatovo mahery!: Torolalana amin’ny fanaovana safidy?

Nampianatra izao ny Loholona Dieter F. Uchtdorf ao amin’ny Kôlejin’ny Apôstôly Roambinifolo:

14:11

Ity Ho zatovo mahery! vaovao ity dia misy lohateny hoe Torolalana amin’ny fanaovana safidy.

Aoka hazava tsara fa ny mpanoro lalana tsara indrindra hanananao eo amin’ny fanaovana safidy dia i Jesoa Kristy. I Jesoa Kristy no maha-zatovo mahery.

Noho izany ny tanjon’ny Ho zatovo mahery! dia ny hampitodihana anareo any Aminy. Mampianatra anareo ireo fahamarinana mandrakizain’ny filazantsarany naverina tamin’ny laoniny izany, fahamarinana momba ny hoe iza ianareo sy iza Izy ary inona no zavatra azonareo tanterahina miaraka amin’ny heriny. Mampianatra anareo ny fomba hanaovana safidy tsara mifototra amin’ireo fahamarinana mandrakizay ireo izany.

Zava-dehibe koa ny mahafantatra ny zavatra tsy ataon’ny Ho zatovo mahery!. Tsy mandray fanapahan-kevitra eo amin’ny toeranareo izany. Tsy manome anao “eny” na “tsia” eo anatrehan’ny safidy rehetra mety hatrehinareo izany. Ny Ho zatovo mahery! dia mifantoka amin’ny fototra iorenan’ny safidinareo. Mifantoka amin’ny soatoavina sy fitsipika ary fotopampianarana izany fa tsy amin’izay fitondrantena manokana rehetra. (“I Jesoa Kristy no maha-zatovo mahery,” Liahona, Nôv. 2022, 10–11)

Amin’ny fomba ahoana no ahafahan’ny fifantohana amin’ Andriamanitra sy ny fahamarinany manampy ahy handray fanapahan-kevitra?

Nampianatra izao ny Filoha Russell M. Nelson:

18:51

Raha tojo fakam-panahy ianao, na dia efa reraka na mahatsapa ho irery na diso fandraisana aza ianao no tonga ilay fakam-panahy, dia alaivo sary an-tsaina ny hery mety ho azonao rehefa misafidy ny hamela an’ Andriamanitra hanjaka eo amin’ny fiainanao sy mangataka Azy mba hankahery anao ianao.

Raha toa ka ny hamela an’ Andriamanitra hanjaka, ny ho anisan’i Isiraely, no fanirianao lehibe indrindra, dia fanapahan-kevitra maro no ho lasa mora. Olana maro no ho lasa tsy misy dikany! Ho hainao ny hikarakara ny tenanao. Ho fantatrao izay tokony hojerenao sy hovakinao, aiza no tokony handanianao ny fotoananao, ary iza no tokony hataonao namana. Fantatrao izay tianao hotratrarina. Fantatrao ny karazan’olona tena tianao hahatongavana. (“Aoka Andriamanitra no hanjaka,” Liahona, nôv. 2020, 94)

Sahanasa fianarana fanampiny

Ohatra avy amin’ny Loholona Uchtdorf mikasika ny fampifandraisana ny safidy amin’i Jesoa Kristy

Tao amin’ny lahatsoratra nosoratan’ny Loholona Uchtdorf ao amin’ny gazetiboky Ho zatovo mahery! dia nitanisa ohatra maromaro momba ny endrika mety hisehoan’ny fampifandraisana ny safidintsika amin’i Jesoa Kristy sy ny fotopampianarany izy. Raha mahasoa ny mpianatra ny ohatra hafa dia jereo ireo ohatra hafa nomeny ao amin’ny “Ho zatovo mahery: Ny hafatry ny Mpamonjy ho anareo.”

Mahatakatra ny fibebahana

Raha tokony hampiasa ilay fizarana “Masina ny vatanao” sy i Josefa tany Egypta ho an’ny lamina hakan-tahaka dia azonao volavolaina ny fomba ampiasana ny boky torolalana Ho zatovo mahery! miaraka amin’ny fizarana “Hanampy anao i Jesoa Kristy.” Azonao atao ny mangataka ny mpianatra hitanisa ny zavatra mety ho hitan’ny zatovo iray fa sarotra momba ny fibebahana. Ny mpianatra dia mety hizara zavatra toy ny hoe, fahatsapana ho menatra na ho tsinontsinona, kivy rehefa avy nanandrana niova imbetsaka, na manontany tena raha toa ka voavela heloka izy ireo.

Asao ny mpianatra handalina ny fizarana “Hanampy anao i Jesoa Kristy” ao amin’ny boky torolalana ka hitady izay nianarany mikasika ny Tompo sy ny filazantsarany izay afaka ny hanampy ny zatovo iray hiaina ireo zavatra notanisain’izy ireo.

I Jesoa Kristy no maha-zatovo mahery

Mba hampidirana ny Ho zatovo mahery!: Torolalana amin’ny fanaovana safidy, dia azonao atao ny manasa ny mpianatra hifidy iray amin’ireto andinin-tsoratra masina ireto ka hitady izay zavatra nianarany momba an’i Jesoa Kristy. Azon’ny mpianatra atao ny manoratra eny amin’ny solaitrabe ny zavatra hitany.

Salamo 18:1–3
Salamo 28:7–8
Salamo 62:5–8

Rehefa avy nandalina ireo andinin-tsoratra masina dia afaka mifanakalo hevitra momba ny fomba ahafahan’i Jesoa Kristy ho hery antsika ny mpianatra na hizara zavatra niainany izay nahatonga an’i Jesoa Kristy ho hery ho azy ireo.

Asao ny mpianatra, avy eo, hijery ny boky torolalana ka hikaroka ny zavatra nianarany momba an’i Jesoa Kristy sy ny fotopampianarany izay afaka mampahery ny zatovo amin’izao fotoana izao.