« វាយតម្លៃការរៀនសូត្ររបស់អ្នកទី ៦ ៖ ពង្សាវតារក្សត្រ ទី១ ១៧–នាងអេសធើរ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« វាយតម្លៃការរៀនសូត្ររបស់អ្នកទី ៦ ៖ ពង្សាវតារក្សត្រ ទី១ ១៧–នាងអេសធើរ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
នាងអេសធើរ ៖ មេរៀនទី ៩៦
វាយតម្លៃការរៀនសូត្ររបស់អ្នកទី ៦
ពង្សាវតារក្សត្រ ទី១ ១៧–នាងអេសធើរ
ការពិចារណា និងការវាយតម្លៃពីការរៀនសូត្រខាងវិញ្ញាណរបស់យើង អាចជួយយើងឲ្យខិតទៅកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។ មេរៀននេះមានគោលបំណងជួយសិស្សឲ្យគិតពិចារណាពីគោលដៅដែលពួកគេបានដាក់ និងការរីកចម្រើនដែលពួកគេបានដកពិសោធន៍ក្នុងអំឡុងពេលសិក្សារបស់ពួកគេអំពី ពង្សាវតារក្សត្រ ទី១ ១៧–នាងអេសធើរ ។
ការរៀបចំសិស្ស ៖ សូមអញ្ជើញសិស្សឲ្យមករៀនបានរៀបចំខ្លួនចែកចាយវគ្គបទគម្ពីរដែលមានអត្ថន័យសម្រាប់ពួកគេពីការសិក្សាព្រះគម្ពីរសញ្ញាចាស់របស់ពួកគេ ។ សូមឲ្យពួកគេគិតអំពីរបៀបដែលវគ្គបទគម្ពីរនោះជួយពួកគេឲ្យធ្វើតាមព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
ការសិក្សាក្នុងថ្នាក់របស់អ្នកអំពី ពង្សាវតារក្សត្រ ទី១ ១៧–នាងអេសធើរ អាចផ្តោតទៅលើលទ្ធផលផ្សេងគ្នាជាងអ្វីដែលបានវាយតម្លៃនៅក្នុងមេរៀននេះ ។ បើដូច្នេះ សូមបត់បែនសកម្មភាពនេះដើម្បីវាយតម្លៃពីការរីកចម្រើនដែលសិស្សបានដកពិសោធន៍ចេញពីលទ្ធផលដែលពួកគេផ្តោតលើក្នុងថ្នាក់របស់អ្នក ។
នៅក្នុងមេរៀននេះ សិស្សនឹងមានឱកាសវាយតម្លៃការរីកចម្រើនរបស់ពួកគេលើផ្នែកដូចខាងក្រោម ៖
-
កាន់តែមានបំណងប្រាថ្នាដើម្បីពឹងផ្អែកលើព្រះអម្ចាស់ដើម្បីទទួលបានកម្លាំង និងការជួយសង្រ្គោះ ។ ( ចំណាំ ៖ សកម្មភាពនេះគឺផ្អែកលើការបង្រៀនចេញពីមេរៀនទី ៧៤ ៖ « សាំយូអែល ទី១ ១៧ » មេរៀនទី ៨៥ ៖ « ពង្សាវតារក្សត្រ ទី២ ៦ » មេរៀនទី ៨៦ ៖ « ពង្សាវតារក្សត្រ ទី២ ១៨–២០ » និងមេរៀនទី ៩៥ ៖ « នាងអេសធើរ ផ្នែកទី ២ » ) ។
-
ការប្រែធ្វើជាសិស្សរបស់ព្រះយេស៊ូវគ្រីស្ទ ( ចំណាំ ៖ សកម្មភាពនេះអាចទាញមេរៀនណាមួយដែលផ្តោតលើការបង្កើតផែនការ ឬការកំណត់គោលដៅសម្រាប់ការអនុវត្ត ។ វាមិនត្រូវបានរំពឹងទុកថាសិស្សនឹងមានមេរៀននីមួយៗទាំងនេះបានរាយបញ្ជីជាមួយនឹងសកម្មភាពដែលត្រូវរៀបចំសម្រាប់ការវាយតម្លៃនេះទេ ) ។
ការរីកចម្រើនខាងវិញ្ញាណ
សូមអញ្ជើញសិស្សឲ្យប្រៀបធៀបកម្ពស់របស់ពួកគេឥឡូវនេះទៅនឹងកាលពួកគេនៅក្មេង ។
អ្នកអាចដាក់បង្ហាញរូបភាពនេះនៅដើមមេរៀននេះ ។
-
តើការស្គាល់ការផ្លាស់ប្តូរកម្ពស់របស់យើងអាចប្រៀបធៀបទៅនឹងការស្គាល់ការរីកចម្រើនខាងវិញ្ញាណរបស់យើងដោយរបៀបណា ?
-
តើយើងអាចសម្គាល់ថា តើយើងកំពុងរីកចម្រើនខាងវិញ្ញាណ និងប្រែក្លាយកាន់តែដូចជាព្រះអង្គសង្គ្រោះតាមរបៀបណាខ្លះ ?
នៅពេលសិស្សពិភាក្សាសំណួរទាំងនេះ អ្នកប្រហែលជាចង់ជួយពួកគេឲ្យកត់សម្គាល់ថា ការផ្លាស់ប្តូរកម្ពស់របស់យើងមិនត្រូវបានមើលឃើញជារៀងរាល់ថ្ងៃនោះទេ ប៉ុន្តែនឹងមើលឃើញបន្តិចម្តងៗ ។ ដូចគ្នានេះដែរ ការរីកចម្រើនខាងវិញ្ញាណរបស់យើងត្រូវបានកត់សម្គាល់ជាញឹកញាប់បំផុតនៅពេលដែលយើងពិនិត្យមើលជីវិតរបស់យើងបន្តិចម្តងៗ ។ ឧទាហរណ៍យើងអាចមានអារម្មណ៍ថា មានបំណងចង់ធ្វើល្អកាន់តែខ្លាំង ( សូមមើល ម៉ូសាយ ៥:២ ) កាន់តែខ្ជាប់ខ្ជួនក្នុងការអធិស្ឋាន និងការសិក្សាព្រះគម្ពីររបស់យើង ឬប្រព្រឹត្តចំពោះអ្នកដទៃដោយសេចក្ដីស្រឡាញ់កាន់តែច្រើនឡើង ។
សូមអញ្ជើញសិស្សឲ្យជញ្ជឹងគិតពីអ្វីដែលពួកគេបានរៀននៅក្នុងថ្នាក់កាលពីប៉ុន្មានសប្តាហ៍មុន និងចំណាប់អារម្មណ៍ខាងវិញ្ញាណដែលពួកគេអាចបានទទួល ។ សិស្សអាចពិនិត្យមើលការកត់ត្រានៅក្នុងសៀវភៅកំណត់ហេតុដែលពួកគេប្រហែលជាបានសរសេរ និងខគម្ពីរដែលពួកគេប្រហែលជាបានអាន ឬបានគូសចំណាំ ។ សូមពិចារណាអញ្ជើញឲ្យសិស្សឆ្លើយសំណួរបន្ទាប់នៅក្នុងសៀវភៅកំណត់ហេតុការសិក្សារបស់ពួកគេ មុនពេលពិភាក្សាចម្លើយទាំងនោះទាំងអស់គ្នាជាថ្នាក់ ។
-
តើអ្នកបានរៀន ឬទទួលអារម្មណ៍យ៉ាងណាអំឡុងពេលសិក្សាអំពីព្រះគម្ពីរសញ្ញាចាស់របស់អ្នក ?
-
តើសេចក្ដីពិតដែលអ្នកបានរៀន និងអនុវត្តបានជួយអ្នកដើរតាមព្រះយេស៊ូវគ្រីស្ទតាមរបៀបណាខ្លះ ?
កាន់តែមានបំណងពឹងផ្អែកលើព្រះអម្ចាស់ដើម្បីទទួលបានកម្លាំង និងការជួយសង្រ្គោះ
ក្នុងនាមជាសិស្សដែលបានសិក្សាអំពីព្រះគម្ពីរសញ្ញាចាស់ នោះពួកគេប្រហែលជាត្រូវបានបំផុសគំនិតដោយគំរូនៃព្រះអម្ចាស់ប្រទានពរដល់បុគ្គលទាំងឡាយដែលពឹងផ្អែកលើទ្រង់ដើម្បីទទួលបានកម្លាំង និងការជួយសង្រ្គោះ ។
សូមពិចារណាបង្ហាញសេចក្តីថ្លែងការណ៍ខាងក្រោមនេះ ដើម្បីជួយសិស្សឲ្យចងចាំឧទាហរណ៍ថ្មីៗដែលពួកគេប្រហែលជាបានសិក្សា ។ របៀបមួយដើម្បីធ្វើបែបនេះ គឺដើម្បីបង្ហាញសេចក្តីថ្លែងការណ៍ដូចខាងក្រោមដោយគ្មានឈ្មោះរបស់អ្នកឡើងនិយាយ ។ សរសេរឈ្មោះតាមលំដាប់ផ្សេងៗគ្នា ។ បន្ទាប់មកសូមអញ្ជើញសិស្សឲ្យផ្គូផ្គងសេចក្ដីថ្លែងការណ៍ជាមួយនឹងអ្នកណាដែលនិយាយសេចក្ដីថ្លែងការណ៍នោះ ។
ប្រសិនបើអាច អ្នកក៏អាចបង្ហាញរូបភាពដែលទាក់ទងនឹងបុគ្គលម្នាក់ៗផងដែរ ។
ដាវីឌ—« ចំណែកឯងបានមកឯយើងទាំងកាន់ដាវ និងលំពែង ហើយនឹងដែកពួយផង តែឯយើងវិញ យើងមកឯឯងដោយនូវព្រះនាមរបស់ព្រះអម្ចាស់នៃពួកពលបរិវារគឺជាព្រះនៃពួកពល សាសន៍អ៊ីស្រាអែល » ( សាំយូអែល ទី១ ១៧:៤៥ ) ។
អេលីសេ—« កុំខ្លាចអ្វីឡើយ ដ្បិតពួកដែលនៅខាងយើងមានគ្នាច្រើនជាងពួកដែលនៅខាងគេទៅទៀត »( ពង្សាវតារក្សត្រ ទី២ ៦:១៦ ) ។
ហេសេគា—« ចូរមានកម្លាំង និងចិត្តក្លាហានឡើង កុំភ័យខ្លាច … ដ្បិតនៅខាងយើងមាន ១ អង្គដែលពូកែជាងពួកគេទៅទៀត ។ ចំណែកគេ មានតែដៃខាងសាច់ឈាមប៉ុណ្ណោះ តែខាងយើងវិញ មានព្រះយេហូវ៉ាជាព្រះនៃយើងរាល់គ្នា សម្រាប់នឹងជួយ ហើយធ្វើចម្បាំងជំនួសយើង » ( របាក្សត្រ ទី២ ៣២:៧–៨ ) ។
នាងអេសធើរ—« ឯខ្ញុំ និងពួកស្រីបម្រើរបស់ខ្ញុំ ក៏នឹងតមដូច្នោះដែរ យ៉ាងនោះ ខ្ញុំនឹងចូលទៅគាល់ស្តេច ដែលជាការខុសច្បាប់ហើយបើខ្ញុំត្រូវស្លាប់ ក៏ស្លាប់ទៅចុះ » ( នាងអេសធើរ ៤:១៦ ) ។
អ្នកប្រហែលជាចង់រំឭកសិស្សអំពីសកម្មភាពនានាពីមេរៀនអំពីបុគ្គលទាំងនេះ ។ ការណ៍នេះអាចជួយសិស្សចងចាំពីអារម្មណ៍ និងចំណាប់អារម្មណ៍ដែលពួកគេអាចមានអំឡុងពេលការសិក្សារបស់ពួកគេ ។
សិស្សអាចរំឭកពីដុំថ្មដែលពួកគេបានគូរដើម្បីតំណាងឲ្យរបៀបមួយដើម្បីអនុវត្តសេចក្ដីជំនឿលើព្រះយេស៊ូវគ្រីស្ទជាមួយនឹងបញ្ហាប្រឈមរបស់ពួកគេនៅក្នុងមេរៀនទី ៧៤ ៖ « សាំយូអែល ទី១ ១៧ » ។
សិស្សអាចរំឭកពីបញ្ជីនៃរបៀបដែលព្រះអម្ចាស់មើលថែ និងយកព្រះទ័យទុកដាក់ចំពោះយើងនៅក្នុងមេរៀនទី ៨៥ ៖ « ពង្សាវតារក្សត្រ ទី២ ៦ » ។
សិស្សអាចនឹកឃើញពីរបៀបដែលព្រះអម្ចាស់បានជួយសង្រ្គោះស្តេចហេសេគា និងសាសន៍យូដានៅក្នុងមេរៀនទី ៨៦ ៖ « ពង្សាវតារក្សត្រ ទី២ ១៨–២០ » ។
សិស្សអាចនឹកឃើញពីរបៀបដែលពួកគេសរសេរ នាងអេសធើរ ៤:១៦ ឡើងវិញក្នុងមេរៀនទី ៩៥ ៖ « នាងអេសធើរ ផ្នែកទី ២ » ។
-
តើអ្នកបានបំផុសគំនិតដោយរបៀបដែលព្រះអម្ចាស់បានប្រទានពរដល់បុគ្គលម្នាក់ ឬច្រើននាក់នៃបុគ្គលទាំងនេះ ?
បន្ទាប់ពីពិនិត្យមើលដំណើររឿងក្នុងព្រះគម្ពីរហើយ សូមអញ្ជើញសិស្សឲ្យជញ្ជឹងគិតពីអារម្មណ៍របស់ពួកគេផ្ទាល់ ។ របៀបមួយដើម្បីធ្វើការណ៍នេះ គឺត្រូវអញ្ជើញសិស្សឲ្យឆ្លើយសំណួរមួយ ឬច្រើនដូចខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ។ បន្ទាប់ពីមានពេលគ្រប់គ្រាន់ សិស្សដែលស្ម័គ្រចិត្តអាចចែកចាយគំនិត និងអារម្មណ៍របស់ពួកគេជាមួយនឹងសិស្សដទៃទៀត ។
-
តើអ្នកកំពុងរៀនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ដែលអាចជួយអ្នកពឹងផ្អែកលើទ្រង់ទាំងទ្វេដើម្បីទទួលបានកម្លាំង និងការជួយសង្រ្គោះ ?
-
តើអ្នកបានដកពិសោធន៍អ្វីថ្មីៗនេះ ដែលបានបង្កើនបំណងប្រាថ្នារបស់អ្នកដើម្បីពឹងផ្អែកលើព្រះវរបិតាសួគ៌ និងព្រះយេស៊ូវគ្រីស្ទដើម្បីទទួលបានកម្លាំង និងការជួយសង្រ្គោះ ?
ការប្រែធ្វើជាសិស្សរបស់ព្រះយេស៊ូវគ្រីស្ទ
ជម្រើសទី ១
សិស្សអាចមានឱកាសជាច្រើននៅក្នុងមេរៀនថ្មីៗ ដើម្បីពង្រឹងភាពជាសិស្សរបស់ពួកគេលើព្រះយេស៊ូវគ្រីស្ទ និងដំណឹងល្អរបស់ទ្រង់ ។ នេះជាបញ្ជីមេរៀនដែលសិស្សអាចបានដាក់គោលដៅដើម្បីពង្រឹងភាពជាសិស្សរបស់ពួកគេ ៖
នៅក្នុងមេរៀនទី ៨១ ៖ « ពង្សាវតារក្សត្រ ទី១ ១៧ » សិស្សត្រូវបានអញ្ជើញឲ្យធ្វើសកម្មភាពដោយសេចក្ដីជំនឿកាន់តែខ្លាំងលើព្រះយេស៊ូវគ្រីស្ទ ដោយធ្វើតាមប្រសាសន៍របស់ពួកព្យាការីរបស់ទ្រង់ ។
នៅក្នុងមេរៀនទី ៨៤ ៖ « ពង្សាវតារក្សត្រ ទី២ ៥ » សិស្សត្រូវបានអញ្ជើញឲ្យធ្វើកិច្ចការតូចតាច និងងាយដែលព្រះអម្ចាស់បង្គាប់ឲ្យយើងធ្វើ ។
នៅក្នុងមេរៀនទី ៨៧ ៖ « ពង្សាវតារក្សត្រ ទី២ ២១–២៣ » សិស្សត្រូវបានអញ្ជើញឲ្យងាកទៅរកព្រះអម្ចាស់ តាមរយៈការសិក្សាព្រះគម្ពីរផ្ទាល់ខ្លួនរបស់ពួកគេ ។
នៅក្នុងមេរៀនទី ៩០ ៖ « របាក្សត្រ ទី២ ១៤–១៦ » សិស្សត្រូវបានអញ្ជើញឲ្យធ្វើផែនការមួយដើម្បីស្វែងរកព្រះអម្ចាស់ ។
នៅក្នុងមេរៀនទី ៩៣ ៖ « នេហេមា » សិស្សត្រូវបានអញ្ជើញឲ្យបន្តផ្ដោតលើកិច្ចការដែលព្រះវរបិតាសួគ៌បានប្រទានឲ្យពួកគេធ្វើ ។
នៅក្នុងមេរៀនទី ៩៥ ៖ « នាងអេសធើរ ផ្នែកទី ២ » សិស្សត្រូវបានអញ្ជើញឲ្យធ្វើសកម្មភាពដោយភាពក្លាហានដើម្បីធ្វើតាមព្រះហឫទ័យរបស់ព្រះអម្ចាស់ ។
សូមពិចារណាដោយអធិស្ឋានថា ផែនការ ឬគោលដៅណាដែលសិស្សអាចធ្វើនៅក្នុងមេរៀនទាំងនេះ ដើម្បីពង្រឹងភាពជាសិស្សរបស់ពួកគេចំពោះព្រះយេស៊ូវគ្រីស្ទ ។ ផ្តល់ឲ្យសិស្សនូវឱកាសមួយដើម្បីវាយតម្លៃការខិតខំរបស់ពួកគេដើម្បីអនុវត្តតាមផែនការ និងគោលដៅរបស់ពួកគេ ។ សិស្សអាចស្គាល់ភាពជោគជ័យរបស់ពួកគេ ហើយតាំងចិត្តឡើងវិញ ឬបន្តជាមួយផែនការរបស់ពួកគេ ។ ក្រាហ្វិកខាងក្រោមអាចជួយសិស្សឲ្យបន្តខិតខំដើម្បីសម្រេចបាននូវគោលដៅរបស់ពួកគេ ។
ជម្រើសទី ២
ការបំផុសគំនិត និងក្រាហ្វិកខាងក្រោមអាចត្រូវបានប្រើប្រាស់ដើម្បីជួយសិស្សឲ្យស្គាល់ និងឆ្លើយតបទៅនឹងការបំផុសគំនិតពីព្រះវិញ្ញាណបរិសុទ្ធ ។
សូមគិតអំពីអ្វីដែលអ្នកបានទទួលអារម្មណ៍បំផុសគំនិតដោយព្រះវិញ្ញាណបរិសុទ្ធឲ្យធ្វើក្នុងរយៈពេលប៉ុន្មានសប្តាហ៍ចុងក្រោយនេះ ។ ការបំផុសគំនិតទាំងនេះអាចមានក្នុងទីកន្លែងផ្សេងៗគ្នា រួមមាននៅផ្ទះ ក្នុងព្រះវិហារ ឬក្នុងថ្នាក់សិក្ខាសាលា ។ សម្រាប់ការបំផុសគំនិតនីមួយៗដែលអ្នកស្គាល់ សូមគិតអំពីកន្លែងដែលអ្នកស្ថិតនៅលើដ្យាក្រាមខាងក្រោមនេះ ។ កត់ត្រាគំនិតរបស់អ្នកនៅក្នុងសៀវភៅកំណត់ហេតុការសិក្សារបស់អ្នកអំពីអ្វីដែលអ្នកទទួលអារម្មណ៍ថា ជំហានបន្ទាប់របស់អ្នកគឺធ្វើតាមការបំផុសគំនិតដែលអ្នកបានទទួល ។
ផ្តល់ឲ្យសិស្សនូវពេលវេលាដើម្បីជញ្ចឹងគិតដោយស្ងៀមស្ងាត់ និងកត់ត្រានៅក្នុងសៀវភៅកំណត់ហេតុរបស់ពួកគេ ។ បន្ទាប់ពីមានពេលវេលាគ្រប់គ្រាន់ហើយ សូមពិចារណាពិភាក្សាអំពីសំណួរមួយចំនួនដូចខាងក្រោមជាមួយសិស្ស ។
-
តើអ្នកគិតថាអ្វីខ្លះជាជំហានដែលពិបាកជាងក្នុងដំណើរការនេះ ?
-
តើយើងអាចទាញកម្លាំងមកពីព្រះយេស៊ូវគ្រីស្ទតាមរបៀបណា ដើម្បីយកឈ្នះលើឧបសគ្គទាំងនេះចំពោះភាពជាសិស្សរបស់យើង ?