« ពង្សាវតារក្សត្រ ទី១ ១៧ ៖ ‹ នាងក៏ទៅធ្វើតាមបង្គាប់របស់អេលីយ៉ា › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ពង្សាវតារក្សត្រ ទី១ ១៧ ៖ ‹ នាងក៏ទៅធ្វើតាមបង្គាប់របស់អេលីយ៉ា › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ពង្សាវតារក្សត្រ ទី១ ១២–១៣; ១៧–២២ ៖ មេរៀនទី ៨១
ពង្សាវតារក្សត្រ ទី១ ១៧
« នាងក៏ទៅធ្វើតាមបង្គាប់របស់អេលីយ៉ា »
ព្រះវរបិតាដ៏ជាទីស្រឡាញ់របស់យើងដែលគង់នៅស្ថានសួគ៌ និងព្រះរាជបុត្រារបស់ទ្រង់ គឺព្រះយេស៊ូវគ្រីស្ទ តែងតែប្រទានឱកាសដល់យើងដើម្បីអនុវត្តសេចក្តីជំនឿលើទ្រង់ទាំងទ្វេ ចំពេលមានការលំបាកក្នុងជីវិត ។ នៅកណ្ដាលគ្រោះរាំងស្ងួត ព្យាការីអេលីយ៉ាបានសុំស្ត្រីមេម៉ាយម្នាក់នៅសារិបតា ឲ្យផ្តល់អាហារចុងក្រោយរបស់នាងដល់គាត់ ។ នៅពេលស្ត្រីមេម៉ាយធ្វើសកម្មភាពដោយសេចក្តីជំនឿ ព្រះអម្ចាស់បានសន្យាដល់នាងនូវពរជ័យដ៏អស្ចារ្យ ។ ដូចជាស្ត្រីមេម៉ាយដែរ យើងអាចបង្ហាញជំនឿរបស់យើងលើព្រះដោយធ្វើតាមពួកព្យាការីរបស់ទ្រង់ ។ មេរៀននេះមានគោលបំណងជួយសិស្សធ្វើសកម្មភាពដោយសេចក្ដីជំនឿកាន់តែខ្លាំងទៅលើព្រះវរបិតាសួគ៌ និងព្រះយេស៊ូវគ្រីស្ទ ដោយការធ្វើតាមប្រសាសន៍របស់ពួកព្យាការី ។
ការរៀបចំសិស្ស ៖ សូមអញ្ជើញសិស្សឲ្យបង្ហាញអ្វីមួយដែលព្រះអម្ចាស់បានអញ្ជើញយើងឲ្យធ្វើតាមរយៈព្យាការីរបស់ទ្រង់ និងការសន្យាដែលទ្រង់បានប្រទានឲ្យ ប្រសិនបើយើងធ្វើវា ។ សូមអញ្ជើញសិស្សឲ្យមករៀនដោយត្រៀមខ្លួនចែកចាយ ។
សកម្មភាពរៀនសូត្រដែលអាចមាន
ការអញ្ជើញរបស់ព្យាការី
ដើម្បីជួយសិស្សមើលពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទប្រទានការណែនាំដល់យើងតាមរយៈពួកព្យាការីរបស់ទ្រង់ទាំងទ្វេ នោះអ្នកអាចដាក់បង្ហាញសកម្មភាពខាងក្រោមនេះ ។ សូមពិចារណារួមបញ្ចូលនូវព្យាការីបច្ចុប្បន្ន និងការអញ្ជើញដែលលោកបានទទួលបាននាពេលថ្មីៗនេះ ។ ជម្រើសមួយផ្សេងទៀត សិស្សអាចលើកឡើងឈ្មោះព្យាការីមួយចំនួន ( រួមទាំងព្យាការីបច្ចុប្បន្ន ) ហើយរាយបញ្ជីយ៉ាងហោចណាស់ការអញ្ជើញមួយ ដែលព្រះអម្ចាស់បានប្រទានឲ្យយើងតាមរយៈព្យាការីម្នាក់ៗ ។
សូមផ្គូផ្គងព្យាការីជាមួយនឹងការអញ្ជើញដែលព្រះអម្ចាស់បានប្រទានដល់ប្រជាជនរបស់ពួកលោក ៖
|
|
ចម្លើយ ៖ ១–គ ( សូមមើល អេធើរ ២:១៦; ៦:៤, ១២ ); ២–ឃ ( សូមមើល និក្ខមនំ ១៤:២១–២២ ); ៣–ក ( សូមមើល នីហ្វៃទី១ ២:១–២ ); ៤–ខ ( សូមមើល គោលលទ្ធិ និងសេចក្តីសញ្ញា ១៣៦:១ ) ។ អ្នកអាចអញ្ជើញសិស្សឲ្យជញ្ជឹងគិតថាតើពួកគេនឹងធ្វើតាមការណែនាំរបស់ព្យាការីនេះដែរឬទេ ប្រសិនបើពួកគេរស់នៅនៅក្នុងសម័យរបស់ព្យាការីទាំងនោះ ។
សូមអញ្ជើញសិស្សឲ្យជញ្ជឹងគិតពីការឆ្លើយតបរបស់ពួកគេចំពោះការអញ្ជើញរបស់ព្យាការីដែលនៅរស់ដោយធ្វើដូចខាងក្រោម ។
នៅលើរង្វាស់ពី ១–១០ របៀបដែលអ្នកនឹងវាយតម្លៃខ្លួនរបស់អ្នកនៅលើសេចក្តីថ្លែងការណ៍នីមួយៗខាងក្រោម ៖
-
ខ្ញុំជឿថា ព្រះអម្ចាស់មានព្រះបន្ទូលតាមរយៈពួកព្យាការី ។
-
ខ្ញុំស្គាល់អំពីអ្វីដែលព្រះអម្ចាស់កំពុងបង្រៀនតាមរយៈព្យាការីរបស់ទ្រង់នៅសព្វថ្ងៃនេះ ។
-
ខ្ញុំកំពុងធ្វើតាមការបង្រៀនរបស់ព្រះអម្ចាស់ ដែលបានប្រទានមកតាមរយៈពួកព្យាការីរបស់ទ្រង់ ។
នៅពេលអ្នកសិក្សា ពង្សាវតារក្សត្រ ទី១៧ សូមយកចិត្តទុកដាក់លើគំនិត និងការយល់ដឹងពីព្រះវិញ្ញាណបរិសុទ្ធ ។ សូមគិតអំពីរបៀបដែលការសិក្សារបស់អ្នកនៅថ្ងៃនេះ អាចជះឥទ្ធិពលដល់អារម្មណ៍របស់អ្នកអំពីសេចក្តីថ្លែងការណ៍ទាំងនេះ ។
អេលីយ៉ា និងស្ត្រីមេម៉ាយនៃក្រុងសារិបតា
កថាខណ្ឌពីរខាងក្រោមអាចអាន ឬសង្ខេប ។
ដោយសារអំពើទុច្ចរិត នគរអ៊ីស្រាអែលត្រូវបានបែងចែកជាពីរនគរគឺ អ៊ីស្រាអែល និងយូដា ( សូមមើល ពង្សាវតារក្សត្រ ទី១ ១១–១២ ) ។ ក្នុងរជ្ជកាលស្ដេចអ័ហាប់ដ៏ទុច្ចរិត ព្រះអម្ចាស់បានចាត់ព្យាការីអេលីយ៉ារបស់ទ្រង់ទៅកាន់ប្រជាជនអ៊ីស្រាអែល ។
ដោយប្រើព្រះចេស្តានៃព្រះ អេលីយ៉ាបានបង្អាក់ភ្លៀងមិនឲ្យធ្លាក់មកលើដែនដី ដែលបណ្តាលឲ្យមានគ្រោះរាំងស្ងួតជាច្រើនឆ្នាំ ។ ព្រះអម្ចាស់បានផ្គត់ផ្គង់តម្រូវការរបស់អេលីយ៉ា ដោយណែនាំលោកឲ្យលាក់ខ្លួនក្បែរទឹកជ្រោះ ដែលសត្វក្អែកចិញ្ចឹមគាត់ ( សូមមើល ពង្សាវតារក្សត្រ ទី២ ១៧:១–៦ ) ។
របៀបមួយដែលសិស្សអាចទទួលអារម្មណ៍នូវអំណាចពីអ្វីដែលពួកគេបានអានក្នុងព្រះគម្ពីរ គឺការស្រមៃថា ខ្លួនពួកគេស្ថិតក្នុងស្ថានភាពស្រដៀងគ្នានេះ ។
សូមអញ្ជើញសិស្សឲ្យអានខគម្ពីរខាងក្រោម ហើយឆ្លើយសំណួរតាមរយៈទស្សនៈរបស់អេលីយ៉ា ឬស្ត្រីមេម៉ាយ ។ សូមប្រាកដថាត្រូវពន្យល់ថា របៀបមួយដែលព្រះអង្គសង្គ្រោះទំនាក់ទំនងព្រះបន្ទូលរបស់ទ្រង់មកកាន់យើង គឺតាមរយៈព្យាការីរបស់ទ្រង់ ហើយថាពាក្យសម្តីរបស់អេលីយ៉ានៅក្នុងដំណើររឿងនេះបានមកពីព្រះអម្ចាស់ ។
សិស្សអាចត្រូវបានដាក់ជាគូៗ ដោយដៃគូនីមួយៗអានដំណើររឿងតាមរយៈទស្សនៈផ្សេងគ្នា ។ បន្ទាប់មក សិស្សអាចប្រើសំណួរដែលភ្ជាប់មកជាមួយ ដើម្បីសម្ភាសដៃគូរបស់ពួកគេអំពីអ្វីដែលពួកគេបានរៀនពីទស្សនៈរបស់ពួកគេ ។
ជម្រើសមួយផ្សេងទៀត អ្នកអាចមើល « Elijah and the Widow of Zarephath » ដែលមាននៅលើគេហទំព័រ ChurchofJesusChrist.org ចាប់ពីនាទីទី ៤:០៩ ដល់ ១០:០៦ ហើយអានខគម្ពីរដំណាលនោះដែរ ។
សូមមើល ពង្សាវតារក្សត្រ ទី១ ១៧:៨–១៦ ។
-
តើអេលីយ៉ា ឬស្ត្រីមេម៉ាយបានបង្ហាញជំនឿលើព្រះយេស៊ូវគ្រីស្ទយ៉ាងដូចម្ដេច ?
-
តើសេចក្តីសន្យារបស់ព្រះអម្ចាស់បានបំពេញដោយរបៀបណា ?
-
តើទាំងអេលីយ៉ា និងស្ត្រីមេម៉ាយអាចជានិមិត្តរូបនៃព្រះយេស៊ូវគ្រីស្ទយ៉ាងដូចម្ដេច ?
សូមអញ្ជើញសិស្សឲ្យចែកចាយចម្លើយរបស់ពួកគេ ។ របៀបមួយដែលអេលីយ៉ាអាចរំឭកសិស្សអំពីព្រះយេស៊ូវគ្រីស្ទ គឺដោយការអញ្ជើញស្ត្រីមេម៉ាយឲ្យធ្វើតាមអ្វីដែលលោកបាននិយាយដើម្បីបានសង្គ្រោះ ។ លោកក៏បានសន្យានឹងនាងដែរថា អាហារនឹងមានកាន់តែច្រើនឡើង ( ពង្សាវតារក្សត្រ ទី១ ១៧:១៤–១៦ ) ដូចព្រះអង្គសង្រ្គោះបានសន្យាដល់អ្នកដទៃផងដែរ ( សូមមើល ម៉ាថាយ ១៤:១៥–២១ ) ។ របៀបមួយនៃរបៀបជាច្រើនដែលស្ត្រីមេម៉ាយអាចរំឭកសិស្សអំពីព្រះយេស៊ូវគ្រីស្ទ គឺតាមរយៈរបៀបដែលនាងស្ម័គ្រចិត្តលះបង់អ្វីៗទាំងអស់ដែលនាងមាន ដូចដែលព្រះអង្គសង្គ្រោះបានធ្វើ ។
សូមសួរថាតើមេរៀនអ្វីដែលសិស្សបានរៀនចេញពីដំណើររឿងនេះ ។ ពួកគេអាចចែកចាយគោលការណ៍ផ្សេងៗ ។ ប្រសិនបើពួកគេមិនបានលើកឡើងពីសេចក្តីពិតខាងក្រោមនេះទេ សូមប្រាកដថាអ្នកនឹងបន្ថែមវា ៖ ការធ្វើសកម្មភាពដោយសេចក្តីជំនឿតាមព្រះបន្ទូលរបស់ព្រះអង្គសង្រ្គោះ នាំមកនូវពរជ័យដែលទ្រង់បានសន្យា ។ ការណ៍នេះរួមទាំងព្រះបន្ទូលរបស់ព្រះអង្គសង្គ្រោះតាមរយៈពួកព្យាការីរបស់ទ្រង់ ។
-
តើអ្វីអាចធ្វើឲ្យមានការលំបាកក្នុងការធ្វើសកម្មភាពដោយសេចក្តីជំនឿតាមការបង្រៀនរបស់ព្រះអង្គសង្គ្រោះ ?
-
តើអ្នកបានដឹងអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ដែលអាចជួយអ្នកធ្វើសកម្មភាពដោយសេចក្តីជំនឿ ?
ព្រះបន្ទូលរបស់ព្រះអង្គសង្គ្រោះ តាមរយៈពួកព្យាការីរបស់ទ្រង់
សូមអញ្ជើញសិស្សឲ្យចែកចាយពីកន្លែងដែលមានព្រះបន្ទូលរបស់ព្រះអម្ចាស់បានប្រទានមកតាមរយៈពួកព្យាការីរបស់ទ្រង់ ។ បន្ថែមពីលើបទគម្ពីរ និងសន្និសីទទូទៅ សិស្សអាចចែកចាយកន្លែងដូចជាទស្សនាវដ្ដី លីអាហូណា និង ដើម្បីកម្លាំងនៃយុវជន សៀវភៅ ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស និងប្រព័ន្ធផ្សព្វផ្សាយសង្គម ។
សូមអញ្ជើញសិស្សឲ្យប្រើប្រភពណាមួយក្នុងចំណោមប្រភពទាំងនេះ ដើម្បីបំពេញសកម្មភាពខាងក្រោម ។ សូមពិចារណាបង្ហាញការណែនាំ និងផ្តល់ឲ្យសិស្សនូវចំនួនពេលវេលាជាក់លាក់មួយដើម្បីសិក្សា ។
-
សូមគូរជួរឈរពីរនៅក្នុងសៀវភៅកត់ត្រារបស់អ្នក ។ គូររូបនំប៉័ងមួយដុំដើម្បីតំណាងឲ្យនំរបស់ស្រ្តីមេម៉ាយនៅក្នុងជួរឈរខាងឆ្វេង ហើយគូរក្រឡប្រេង និងធុងអាហារ ( សូមមើល ពង្សាវតារក្សត្រ ទី១ ១៧:១២, ១៦ ) នៅក្នុងជួរឈរខាងស្ដាំ ។
-
ដាក់ស្លាកនៅជួរឈរខាងឆ្វេងថា អ្វីដែលព្រះវរបិតាសួគ៌ និងព្រះយេស៊ូវគ្រីស្ទបានបង្គាប់ ។ ដាក់ស្លាកនៅជួរឈរខាងស្ដាំថា ពរជ័យដែលបានសន្យារបស់ទ្រង់ទាំងទ្វេ ។
-
នៅក្នុងជួរឈរខាងឆ្វេង សូមធ្វើបញ្ជីនៃអ្វីដែលព្រះវរបិតាសួគ៌ និងព្រះយេស៊ូវគ្រីស្ទកំពុងបង្គាប់ឲ្យយើងធ្វើតាមរយៈពួកព្យាការីរបស់ទ្រង់ទាំងទ្វេ ។ នៅក្នុងជួរឈរខាងស្ដាំ សូមរាយបញ្ជីពរជ័យដែលបានសន្យានៃការគោរពតាមព្រះបន្ទុលរបស់ទ្រង់ទាំងទ្វេ ។
វាអាចមានប្រយោជន៍ក្នុងការផ្តល់ឧទាហរណ៍ដល់សិស្ស ។ អ្នកអាចផ្តល់ « ការរស់នៅតាមពាក្យសម្ដីនៃប្រាជ្ញាវាងវៃ » សម្រាប់ជួរឈរខាងឆ្វេង ។ បន្ទាប់មក សិស្សអាចអាន គោលលទ្ធិ និងសេចក្ដីសញ្ញា ៨៩:១៨–២១ សម្រាប់ពរជ័យដែលព្រះអម្ចាស់បានសន្យា ។ ជម្រើសមួយផ្សេងទៀត អ្នកអាចចែកចាយគំរូថ្មីៗពីប្រសាសន៍របស់ព្យាការីនៅក្នុងសន្និសីទទូទៅ ។
សូមអញ្ជើញសិស្សឲ្យចែកចាយអ្វីដែលពួកគេបានសរសេរនៅក្នុងជួរឈររបស់ពួកគេនៅក្នុងក្រុមតូច ។ ត្រូវប្រាកដថា សិស្សម្នាក់ៗមានឱកាសចែកចាយយ៉ាងហោចណាស់រឿងមួយពីជួរនីមួយៗ ។ បន្ទាប់មក ក្រុមអាចពិភាក្សាសំណួរខាងក្រោម ។
-
តើអ្នកបានឃើញពរជ័យនៃការអនុវត្តសេចក្តីជំនឿតាមព្រះបន្ទូលរបស់ព្រះអម្ចាស់ ដែលបានប្រទានមកតាមរយៈពួកព្យាការីរបស់ទ្រង់ដោយរបៀបណា ?
សូមពិចារណាអញ្ជើញសិស្សឲ្យចែកចាយគំរូពីជីវិតរបស់ពួកគេនៅពេលពួកគេបានឃើញពរជ័យពីការធ្វើតាមដំបូន្មានរបស់ព្យាការី ។ ជាផ្នែកមួយនៃការពិភាក្សានេះ អ្នកអាចបង្ហាញវីដេអូ « That Night My Family Had Sufficient » ( ១:៤៧ ) ឬ « Fathers and Sons » ( ៥:៤២ ) ដែលមាននៅលើគេហទំព័រ ChurchofJesusChrist.org ។
សូមដាក់ផែនការធ្វើតាមពួកព្យាការីរបស់ព្រះ
សូមលើកទឹកចិត្តសិស្សឲ្យស្វែងរកជំនួយនៃព្រះវិញ្ញាណបរិសុទ្ធនៅពេលពួកគេធ្វើសកម្មភាពទាំងឡាយដូចតទៅនេះ ។
-
នៅក្នុងជួរឈរខាងឆ្វេង សូមសរសេរ ឬគូសរង្វង់អ្វីដែលព្រះអម្ចាស់កំពុងបង្គាប់ឲ្យអ្នកធ្វើតាមរយៈព្យាការីរបស់ទ្រង់ ដែលអ្នកមានអារម្មណ៍ថា ទ្រង់ចង់ឲ្យអ្នកផ្ដោតលើ ។
-
នៅក្នុងជួរឈរខាងស្ដាំ សូមសរសេរ ឬគូសរង្វង់ពីរបៀបដែលព្រះអម្ចាស់បានសន្យាថានឹងប្រទានពរដល់អ្នក បើអ្នកធ្វើតាមការទូន្មានរបស់ទ្រង់ ។
-
សូមជញ្ជឹងគិតពីអ្វីដែលអ្នកបានសរសេរ ឬគូសរង្វង់ រួចសរសេរផែនការរបស់អ្នកដើម្បីគោរពតាមអ្វីដែលព្រះអម្ចាស់បានបង្គាប់ឲ្យអ្នកធ្វើតាមរយៈព្យាការីរបស់ទ្រង់ ។
សូមអញ្ជើញសិស្សឲ្យស្វែងរករបៀបចងចាំអ្វីដែលពួកគេដាក់ផែនការដើម្បីធ្វើ ។ ឧទាហរណ៍ សិស្សអាចថតរូបការឆ្លើយតបរបស់ពួកគេ ហើយប្រើវាជាផ្ទាំងរូបភាពនៅលើទូរសព្ទរបស់ពួកគេ ។ សិស្សនឹងមានឱកាសតាមដាន និងរាយការណ៍អំពីផែនការរបស់ពួកគេនៅក្នុងមេរៀនទី ៩៦ ៖ « វាយតម្លៃការរៀនសូត្ររបស់អ្នកទី ៦ » ។
សូមពិចារណាបញ្ចប់ថ្នាក់ដោយការថ្លែងទីបន្ទាល់ថា សិស្សនឹងចូលមកកាន់តែជិតព្រះយេស៊ូវគ្រីស្ទ តាមរយៈការខិតខំរបស់ពួកគេដើម្បីធ្វើតាមព្យាការីរបស់ទ្រង់ ។